Te Tohi Mai Te Kolesi Pule
Ki siʼi ʼomatou kaumeʼa ʼi te tui:
Ohage pe ko tatatou kua mahino ki ai, ʼe lahi te ʼu hisitolia ʼo te ʼu hahaʼi ʼe tou maʼu ʼi te Tohi-Tapu. Tokolahi te ʼu tagata mo te ʼu fafine agatonu neʼe natou tau mo he ʼu faigataʼaia ohage pe ko tatou. Pea neʼe natou “natula tahi mo tatou.” (Sakopo 5:17) Ko ʼihi neʼe natou taʼomia ʼuhi ko ʼonatou lotomamahi pea mo natou lotohoha. Ko ʼihi atu, neʼe fakalotomamahiʼi e he tahi ʼo tonatou famili peʼe ko ʼonatou tehina mo tuagaʼane. Pea tokolahi neʼe natou lotomamahi ʼaki tanatou tukugakoviʼi ia natou ʼuhi ko ʼanatou hala.
Koia neʼe natou mavae koa mai ia Sehova? Kailoa. Koteʼuhi tokolahi neʼe natou hage ko te tagata faipesalemo ʼae neʼe faikole fenei: “E au hehe o hage ko he ovi nee puli: kumi tau tagata faifekau, koteuhi e mole pe galo au folafola ia au.” (Pesalemo 119:176) Neʼe kua ke logoʼi koa ia te ʼu manatu ʼaia?
ʼE mole he temi ʼe galoʼi ai e Sehova ʼana kau atolasio ʼae kua to kehe mai te faga ovi. Kaʼe ʼe tokoni tuʼumaʼu kia natou ʼaki ʼonatou tehina mo tuagaʼane. Ohage la, tou vakaʼi pe neʼe tokoni feafeaʼi ia Sehova ki tana kaugana ko Sopo, ʼae neʼe tau mo he ʼu tuʼuga malaʼia. Neʼe kau ki ai ia te fihifihia fakapaʼaga, te mamate ʼo natou ʼae neʼe ʼofa mamahi ai pea neʼe toe mahaki kovi mo ia. Pea neʼe toe lavea mo tona loto ʼi te ʼu palalau fakalotomamahi mai ia natou ʼae neʼe tonu ke natou fakalotomalohiʼi ia ia. Kaʼe neʼe mole pe he temi neʼe lituʼa ai kia Sehova, logo la neʼe manatu hala ʼi he tahi temi. (Sopo 1:22; 2:10) Neʼe tokoni feafeaʼi ia Sehova kia Sopo ke ina toe maʼu he ʼu manatu fakapotopoto?
Neʼe tokoni ia Sehova kia Sopo ʼaki tona kaumeʼa ʼi te tui neʼe higoa ko Eliu. ʼI te temi ʼae neʼe fakaha ai e Sopo ʼona tuʼania, neʼe fagono ki ai ia Eliu ʼo uga ia ia ke palalau. Kotea anai ka ina ui? Neʼe ina valokiʼi koa ia Sopo pe neʼe ina faigaʼi koa ke ufiufi mo ina tukugakoviʼi ia ia totonu? Neʼe fia maʼoluga ake koa ia Sopo? Kailoa ia. ʼAki te laumalie ʼa te ʼAtua, neʼe ui fenei e Eliu: “Ia mua o te Atua e au tatau mo koe, nee fau au o hage ko koe mai te pela.” Hili ʼaia pea neʼe ina fakalotofimalieʼi fenei ia Sopo: “Aua naa ke mataku anai kia au, pe e ke manatu anai e au fia malaki ia koe.” (Sopo 33:6, 7) Neʼe mole toe hilifaki atu e Eliu kia Sopo he tahi ʼu fihifihia, kaʼe ʼaki te lotoʼofa neʼe ina foaki te tokoni mo te fakalotomalohi ʼae ʼe ʼaoga ki ai.
Ke ke mahino neʼe matou manatu feia pe mo matou ʼi tamatou teuteuʼi te kaupepa ʼaeni. ʼUluaki, neʼe matou fagono, mo vakavakaʼi fakalelei ia te ʼu aluʼaga pea mo te ʼu tala manatu ʼa te tokolahi ʼae neʼe kua natou fakamamaʼo mai te kokelekasio. (Taaga Lea 18:13) Hili ia, neʼe matou kumi mo vakavakaʼi ʼi te Tohi-Tapu ʼaki te faikole, te ʼu hisitolia ʼe ha mai ai pe neʼe tokoni feafeaʼi ia Sehova ki ʼana kaugana ʼo te temi muʼa, ʼae neʼe tau mo he ʼu aluʼaga ohage pe ko tatou. Pea neʼe matou fakatahiʼi ia te ʼu hisitolia Fakatohi-tapu mo te ʼu fakamatala ʼo totatou temi, moʼo faʼufaʼuʼaki ia te kaupepa ʼaeni. ʼE matou fakaafe atu ia koe ke ke lau te kaupepa ʼaeni. Pea ʼe matou fakaʼamu ke ke mahino ki tomatou ʼofa mamahi ʼae ia koe.
Te Kolesi Pule ʼa Te Kau Fakamoʼoni ʼa Sehova