KO TE lotohoha ʼe feala pe ke maʼu e te hahaʼi fuli, ʼo feia pe mo te hahaʼi ʼa te ʼAtua. Neʼe tohi fenei e te tagata faipesalemo: “E lahi te u tuania ia au.” (Pesalemo 94:19) Pea neʼe ui e Sesu ʼe feala ke faigataʼa tatatou tauhi ʼae kia Sehova lolotoga te ʼu ʼaho fakamuli ʼuhi ko “te u fakahoha o te mauli.” (Luka 21:34) Kaʼe ʼe feafeaʼi kia koe? ʼE ke logoʼi koa ʼe ke taʼomia ʼuhi ko te ʼu fihifihia fakapaʼaga, peʼe fakafamili, peʼe ke tuʼania ki tou malolō fakasino? ʼE lava tokoni feafeaʼi atu ia Sehova ke ke tauʼi te ʼu aluʼaga ʼaia?

ʼE mole feala ke tou tauʼi tokotahi pe ia te lotohoha. Neʼe tohi e te apositolo ko Paulo, ‘kua tataʼo tatou e te ʼu mamahi kehekehe, ʼe tou tuʼania, pea kua li tatou ki te kele.’ Kaʼe neʼe ina toe ui fenei: “E mole [tou] taomia,” ʼe mole tou “lotovaivai” pea ʼe mole tou ‘mamate.’ Kotea ʼae ʼe tokoni mai ke tou maʼu te faʼa kataki? ʼE ko “te malohi lahi” ʼae ʼe haʼu mai totatou ʼAtua mafimafi, ia Sehova.—2 Kolinito 4:7-9.

Fakakaukauʼi age muʼa pe neʼe ke maʼu feafeaʼi ia “te malohi lahi” ʼaia ʼi muʼa atu? Kei ke manatuʼi koa he akonaki fakalotomalohi neʼe ina uga koe ke ke lotofakafetaʼi ki te ʼofa ʼo Sehova? Neʼe mole tuputupu koa la ia tau tui ki te ʼu fakapapau ʼa Sehova ʼi te temi ʼae neʼe ke akoʼi ai ki ʼihi ia te ʼamanaki ʼae ki he Palatiso? Ka tou kau ki te ʼu fono mo tou fakaha tatatou tui ki ʼihi, ʼe tou maʼu ai te malohi moʼo ʼutakiʼi te ʼu tuʼania ʼo te maʼuli. Pea ʼe tou toe maʼu ai mo he fakakaukau ʼe tokalelei ke feala hatatou tauhi fakafiafia kia Sehova.

ʼE moʼoni ʼe feala ke lahi te ʼu aluʼaga ʼae ʼe tonu ke ke haga ki ai. Ohage la, ʼe kole mai e Sehova ke tou fakamuʼamuʼa ia te Puleʼaga pea mo tou kau tuʼumaʼu ki te ʼu gaue fakalaumalie. (Mateo 6:33; Luka 13:24) Kaʼe ʼe feafeaʼi age la mo kapau ʼe ke ogosia ʼuhi ko te fakafeagai ʼa te famili peʼe ko te ʼu kaugā gaue, mo te mahaki peʼe ko te ʼu fihifihia fakafamili? Peʼe fakamaʼua atu e tau gaue fakamalama ia tou temi mo tou malohi ʼae ʼe feala ke ke fakaʼaogaʼi ki te kokelekasio? ʼE lahi fau te ʼu fakamaʼua ʼaia, kaʼe ʼe siʼisiʼi pe tou temi pea mo tou malohi moʼo fakatokatoka te ʼu aluʼaga fuli ʼaia, koia ʼe lagi ke logoʼi ai tou taʼomia. Pea lagi ʼe ke feuiʼaki ʼe lahi fau te ʼu meʼa ʼae ʼe fakamaʼua atu e Sehova.

Ko Sehova ʼe lotomahino. ʼE mole he temi ʼe ina kole mai he meʼa ʼe mole tou lavaʼi. Pea ʼe mahino kia te ia, ʼe fakamaʼua he temi ke feala hatatou maʼu he fimalie mai totatou lotomamahi ʼi te faʼahi fakasino pea mo te faʼahi ʼo te fakakaukau.—Pesalemo 103:13, 14.

Tou vakaʼi pe neʼe tokaga feafeaʼi ia Sehova ki te polofeta ko Elia. Neʼe hola ia Elia ki te toafa, koteʼuhi neʼe lotovaivai ʼaupito pea mo mataku. Kaʼe neʼe fakatonutonuʼi koa e Sehova te polofeta pea mo ina fakatotonu age ke toe liliu ʼo fakahoko tana gaue ʼae neʼe hinoʼi ki ai? Kailoa. Neʼe fekauʼi tuʼa lua e Sehova  ia te ʼaselo ʼo fafagu ia Elia ke tuʼu ʼo kai. Hili ʼaho ʼe 40, neʼe kei lotohoha pe ia Elia pea mo mataku. Neʼe toe tokoni feafeaʼi ia Sehova ki ai? ʼUluaki, neʼe fakaha e Sehova ʼe ina lava puipui ia ia. Lua, neʼe fakalotofimalieʼi e Sehova ia Elia ʼaki he palalau ʼe fakatokatoka mo malū. Pea tolu leva, neʼe fakaha e Sehova, neʼe ko te toko lauʼi afe ʼae neʼe kei tauhi agatonu kia te ia. Mole faʼa fualoa ki ai, pea neʼe toe liliu ia Elia ko he polofeta faʼafai. (1 Hau 19:1-19) Kotea te ako ʼe tou maʼu mai te faʼifaʼitaki ʼaeni? Neʼe kataki fualoa pea mo lotomanavaʼofa ia Sehova kia Elia, ʼi te temi ʼae neʼe lotohoha ai. ʼE toe feia pe ia tana tokaga ʼae kia tatou.

Kapau ʼe ke fakakaukauʼi ia te ʼu faʼahi ʼae ʼe feala ke ke foaki kia Sehova, ʼe ʼaoga ke ke fakapotopoto. ʼAua tau fakatatau ia te ʼu faʼahi ʼae ʼe ke lava fakahoko ia ʼaho nei pea mo ʼae neʼe ke fakahoko ʼi muʼa atu. Tou toʼo he faʼifaʼitaki. Ko te tagata lele ʼae ʼe ina tuku tana ako faigaoʼi lolotoga ni mahina peʼe ko ni taʼu, ʼe mole feala ke toe lele atu aipe ohage ko te temi muʼa. Kaʼe ʼe ina kamata fai hana ʼu kiʼi fakatuʼutuʼu ke ina toe maʼu te malohi mo te kataki. ʼE hage ia te kau Kilisitiano ko he ʼu tagata lele. ʼE natou akoako koteʼuhi ʼe ʼi ai ʼanatou fakatuʼutuʼu lelei. (1 Kolinito 9:24-27) He koʼe ʼe mole ke fai hau fakatuʼutuʼu ke feala ke ke fakahoko? Ohage la, ʼe feala ke ke kau ki he fono ʼo te kokelekasio. Kole kia Sehova ke tokoni atu ke ke fakahoko ia tau fakatuʼutuʼu ʼaia. Pea ʼi tau kua toe malohi ʼi te faʼahi fakalaumalie, ʼe ke ‘logoʼi anai mo ke sio ki te lelei ʼo Sehova.’ (Pesalemo 34:9) Ke ke manatuʼi, ko faʼahi fuli ʼae ʼe ke fai moʼo fakaha ia tou ʼofa kia Sehova, tatau aipe pe ʼe veliveli, ʼe maʼuhiga ia kia te ia.—Luka 21:1-4.

Neʼe fakalotomalohiʼi feafeaʼi e Sehova ia June ke toe liliu mai kia te ia? ʼE ina ui fenei mai: “Neʼe au faikole tuʼumaʼu kia Sehova pea mo kole age kia te ia ke tokoni mai. Pea neʼe palalau mai te ʼohoana ʼo taku tama ʼo ʼuhiga mo te fakatahi lahi ʼe fai ʼi toku kolo. Neʼe au fakatotonu ai ke au kau ʼaho tahi pe ki te fakatahi lahi ʼaia. Kaʼe ʼi toe fiafia leva ʼae neʼe au logoʼi ʼi taku toe fakatahi mo te hahaʼi ʼa Sehova. Ko te fakatahi lahi ʼaia, neʼe ko te fakalotomalohi ʼae neʼe au talitali ki ai. ʼI te temi nei ʼe au fiafia koteʼuhi kua au toe liliu mai ʼo tauhi kia Sehova. Kua toe ʼi ai te ʼuhiga ʼo toku maʼuli. Pea kua au mahino ʼe maʼuhiga ke au fakatahi mo ʼoku tehina mo tuagaʼane. Koia ʼe au lotofakafetaʼi ai ʼi taku maʼu te temi ke au toe liliu mai.”