Fakakaukauʼi te aluʼaga ʼaeni: Ko Tim ʼe gaoʼi mo ʼona kaumeʼa, pea ʼi tana ʼakahi te foʼi fiti neʼe foa ai te sioʼata ʼo te motoka ʼo te vahaʼa fale.

Ka na ko koe la ia Tim, kotea ʼae ka ke fai anai?

KO FAʼAHI ʼE TOLU ʼE FEALA KE KE FAI:

1. Ke ke hola.

2. Ke ke tukugakoviʼi he tahi.

3. Ke ke fakaha ki tou vahaʼa fale te aluʼaga ʼae neʼe hoko, pea mo ke ui age ʼe ke totogi anai te ʼu meʼa ʼae neʼe maumau.

ʼE lagi ke fia filifili te 1 Faʼahi. Kaʼe ʼe ʼi ai te ʼu tupuʼaga ke ke fakaha ai ʼau lakahala, tatau aipe pe ʼe ko te foa ʼo he matapa fakamalama peʼe ko he tahi age meʼa pe.

1. ʼE ko te meʼa ʼae ʼe tonu ke fai.

   ʼE ui fenei ʼi te Tohi-Tapu: “E matou loto ke lelei tuumau te u mea fuli e matou fai.”—Hepeleo 13:18.

2. ʼE fakamolemole gafua te hahaʼi kia natou ʼae ʼe natou fakaha ʼanatou lakahala.

   ʼE ui fenei ʼi te Tohi-Tapu: “Ko ia ae e ina fufu ana agahala e mole manuia, kae ko ia ae e ina fakaha natou pea e ina liaki natou e ina mau te manavaofa.”—Taaga Lea 28:13.

3. Ko te faʼahi tafitō, ke fiafia ai te ʼAtua.

   ʼE ui fenei ʼi te Tohi-Tapu: “E fakalialia [ia Sehova] ki te u tagata agakovi [peʼe kakā], kae ko te kaumea aia o te u tagata maonioni.”—Taaga Lea 3:32.

Ko Karina ʼe taʼu 20, neʼe mole ina fakaha ki tana tamai tana tuʼā he neʼe lele gaholo tana motoka. Kaʼe neʼe mole feala ke ina fufu fualoa te aluʼaga ʼaia. Koteʼuhi ʼe ui e Karina, “Hili ki ai te taʼu katoa, neʼe maʼu e taku tamai taku tuʼā. Neʼe au hoha ai.”

Kotea te ako? ʼE ui fenei e Karina: “Kapau ʼe tou fufu ʼatatou lakahala, pea ʼe ʼaʼasili ai tona ia kovi. Pea ʼe ʼi ai pe anai hona ʼu fua kovi ki ʼamuli.”

ʼE ui fenei ʼi te Tohi-Tapu: “E tou tukia fuli i te u mea kehekehe.” (Sakopo 3:2) Ohage pe ko tatatou vakaʼi, ʼe ke agavaivai mo agafakapotopoto mo kapau ʼe ke fakaha ʼau lakahala pea ʼe tonu ke ke foimo fakahoko.

ʼE tonu foki ke ke taʼofi he ako mai ʼau lakahala. ʼE ui fenei e te taʼahine ʼe higoa ko Vera: “ ʼE au faigaʼi ke au taʼofi he ʼu ako mai ʼaku lakahala, ke au liliu ai ko he tahi kua fakapotopoto. Ka toe hoko mai la he tahi ʼu aluʼaga, ʼe au iloʼi anai pe kotea ʼae ʼe tonu ke au fai.” Tou vakaʼi pe ʼe feafeaʼi hau fakahoko te faʼahi ʼaia.

ʼE ke toʼo te lelue ʼa tau tamai pea ʼe ke maumauʼi. Kotea ka ke fai anai?

• ʼE mole ke fakaha pea ʼe ke fakaʼamu ke mole tokagaʼi e tau tamai.

• ʼE ke tala te moʼoni ki tau tamai.

• ʼE ke fakaha ki tau tamai, kaʼe ʼe ke tukugakoviʼi he tahi kehe.

ʼE mole ke maʼu tau sivi koteʼuhi neʼe mole ke ako fakalelei. Kotea ka ke fai anai?

• ʼE ke tukugakoviʼi te sivi ʼuhi neʼe faigataʼa.

• ʼE ke tali ʼau nota ʼae ʼe kovi, he neʼe mole ke ako fakalelei.

• ʼE ke ui ko te tagata faiako ʼe fehiʼa ia koe.

 Toe vakaʼi te ʼu aluʼaga ʼe lua ʼae neʼe hoki ʼosi atu. Fakakaukauʼi age muʼa mo ka na pau la ko koe te tamai ʼi te ʼuluaki aluʼaga peʼe ko koe ko te tagata faiako ʼi te lua aluʼaga. Kotea anai te manatu ʼa tau tamai mo tau tagata faiako ʼo ʼuhiga mo koe, mo kapau ʼe ke fakaha ʼau lakahala? Kotea anai tanā manatu ʼo ʼuhiga mo koe, mo kapau ʼe ke fufu ʼau lakahala?

ʼI te lakaga ʼaeni, fakakaukau ki he lakahala neʼe ke fai lolotoga te taʼu kua hili atu, pea mo ke tali ki te ʼu fehuʼi ʼaeni.

Neʼe kotea tau lakahala? Kotea ʼae neʼe ke fai ʼo ʼuhiga mo te lakahala ʼaia?

• Neʼe au fufu.

• Neʼe au tukugakoviʼi he tahi kehe.

• Neʼe au tala taku lakahala.

Kapau neʼe mole ke fakaha tau lakahala, kotea ʼae neʼe ke logoʼi ki ʼamuli?

• Neʼe au logo fimalie pe au, neʼe mole tokagaʼi e he tahi.

• Neʼe au tukugakoviʼi pe ia au, neʼe tonu ke au fakaha te moʼoni.

Kotea ʼae neʼe feala ke ke fai ke lelei age tau fakatokatoka ʼo tau lakahala?

Kotea te ako neʼe ke taʼofi mai tau lakahala?

He koʼe ʼe fufu e ʼihi ʼanatou lakahala?

Kotea anai te manatu ʼa ʼihi ʼo ʼuhiga mo koe mo kapau ʼe ke faiga tuʼumaʼu ke ke fufu ʼau lakahala? Kaʼe kotea anai te manatu ʼa ʼihi ʼo ʼuhiga mo koe mo kapau ʼe ke fakaha ʼau lakahala?—Luka 16:10.