Fakakaukauʼi te aluʼaga ʼaeni: ʼE heʼeki faʼa fualoa te tau mai ʼa Karen ki te lafeti pea ʼe logo ki te leʼo ʼi tona tuʼa.

Ko tona kaumeʼa ko Jessica mo te ʼu foʼi piele. Pea ʼe ina fakatoʼo age kia Karen tana foʼi piele ʼo ina ui, “Tuku leva tau ui mai ʼae ʼe mole ke inu.”

Kaʼe ʼe toʼo pe la e Karen he ʼe ko tona kaumeʼa ia Jessica. Pea ʼe mole loto e Karen ke ui age e tona kaumeʼa ʼe mole poto ʼi te fakafiafia. Tahi ʼae faʼahi, ko Jessica ko te taʼahine agalelei. Pea kapau ʼe inu ia Jessica, ʼe mole hona ia kovi. Koia ʼe ui fenei ai e Karen: “Ko te kiʼi meʼa inu pe ia, kaʼe ʼe mole hage leva ko te toloke.”

Ka na pau la neʼe ke tau mo te aluʼaga ʼaia ʼo Karen, kotea ʼae ka ke fai anai?

Ke feala hau toʼo he tonu ʼe fakapotopoto ʼi te faʼahiga aluʼaga ʼaia, ʼe tonu ke ke iloʼi tou ʼuhiga moʼoni. ʼE fakaʼuhiga ki te ʼu meʼa ʼae ʼe ke logoʼi ʼi tou loto ʼo ʼuhiga mo koe totonu pea mo te ʼu meʼa ʼae ʼe maʼuhiga kia koe. ʼE ke maʼu ai anai te malohi ʼae ke ke taki e koe totonu tou maʼuli, kaʼe ʼe mole ke tuku ke taki e ʼihi.—1 Kolonito 9:26, 27, MN.

ʼE feafeaʼi hau maʼu te faʼahiga malohi ʼaia? ʼE lelei mo kapau ʼe ke kamata tali ki te ʼu fehuʼi ʼaeni.

Kapau ʼe ke iloʼi ʼou fealagia mo ʼou kalitate, pea ʼe toe malohi ai anai tau lotofalala.

FAʼIFAʼITAKI FAKATOHI-TAPU: Neʼe tohi fenei e te apositolo ko Paulo: “Kapau e mole au poto i te palalau, kae e mole au fena i te iloilo.” (2 Kolinito 11:6) ʼAki tana mahino lelei ki te Tohi-Tapu, neʼe feala kia Paulo ke tuʼu malohi moka neʼe ʼahiʼahiʼi e niʼihi. Neʼe mole ina tuku ke vaivai tana lotofalala ʼaki ʼanatou palalau fakalotomamahi.—2 Kolinito 10:10; 11:5.

SIVISIVI IA KOE TOTONU: Tohi hou faiva ʼe ke maʼu.

Fakamatala he kalitate ʼe ke maʼu. (Ohage la, ʼe ke lototokaga koa? ʼe ke lotofoaki koa? ʼe ke tuha koa mo te falala? ʼe ke tautonu tuʼumaʼu koa?)

Kapau ʼe ke tuku ke taki tou maʼuli e ʼou vaivaiʼaga, ʼe fakatupu tuʼutamaki anai kia koe totonu.

FAʼIFAʼITAKI FAKATOHI-TAPU: Neʼe mahino ia Paulo ki ʼona vaivaiʼaga. Koteʼuhi neʼe ina tohi fenei: “I te takele o toku loto, e au fakafiafia i te lao a te Atua; kae e au sio i oku kogasino ki he tahi age lao ae e tau fakafehagai ki te lao o toku atamai, pea e ina fakapopulai au i te lao o te agahala.”—Loma 7:22, 23.

SIVISIVI IA KOE TOTONU: Ko tou vaivaiʼaga fea ʼae ʼe tonu ke ke lolomi?

ʼE ke toʼo anai koa he takisi pea ke ui age ki te sofea ke ina foli liuliuga he kolo ʼo kaku ki te ʼago ʼo te motoka? ʼE mole ko he agapoto ʼaia pea ʼe puli ai mo tau foʼi falā.

Kotea te ako? Kapau ʼe ʼi ai hau ʼu fakatuʼutuʼu, ʼe mole pulinoa tou temi pea ʼe ke iloʼi lelei te meʼa ʼae ʼe tonu ke ke fai.

FAʼIFAʼITAKI FAKATOHI-TAPU: Neʼe tohi fenei e te apositolo ko Paulo: “E au lele, kae e mole au hoko lele feiape.” (1 Kolinito 9:26) Neʼe mole ina hoko fai feia pe ʼana gaue. Kaʼe neʼe ina fai hana ʼu fakatuʼutuʼu pea neʼe mulimuli ki ai ʼi tona maʼuli.—Filipe 3:12-14.

SIVISIVI IA KOE TOTONU: Tohi he ʼu fakatuʼutuʼu ʼe tolu ʼe ke fia fakahoko ʼo kamata atu nei ʼo aʼu ki te taʼu ʼae ka haʼu.

Kapau ʼe mole he ʼu moʼoni ʼe ke tui ki ai, ʼe ke lotolotolua anai. ʼE ke hage anai ko te feke ʼae ʼe fetogi lanu ʼo mulimuli ki te lanu ʼo te ʼulu maka ʼae ʼe nono ai. ʼE toe feia pe anai moka ʼe ke faʼifaʼitakiʼi ʼou kaugā ako. Pea ʼe ha ai anai ʼe mole ke fakaha tou ʼuhiga moʼoni.

Kaʼe moka ʼe ke fai he meʼa ʼo mulimuli ki te ʼu moʼoni ʼae ʼe ke tui ki ai, ʼe ke taupau maʼu anai tou ʼuhiga moʼoni, tatau aipe pe kotea ʼae ʼe fai atu e ʼihi.

FAʼIFAʼITAKI FAKATOHI-TAPU: ʼI tana kei tupulaga, neʼe ʼave mamaʼo ia Taniela mai tona famili. Logo la te aluʼaga ʼaia, kaʼe neʼe ina ‘fakapapau ʼi tona loto’ ʼe fakalogo anai ki te ʼu lao ʼa te ʼAtua. (Taniela 1:8) Koia neʼe ina taupau maʼu ia tona ʼuhiga moʼoni. Neʼe ina maʼuliʼi te ʼu moʼoni ʼae neʼe tui ki ai.

SIVISIVI IA KOE TOTONU: Kotea te ʼu moʼoni ʼae ʼe ke tui ki ai? Ohage la: ʼE ke tui koa ki te ʼAtua? Kapau koia, pea kotea tona tupuʼaga? He koʼe ʼe ke tui papau ko te ʼAtua ʼe maʼuli moʼoni?

ʼI tau manatu, ʼe lelei koa kia koe te ʼu lekula ʼa te ʼAtua ʼo ʼuhiga mo te aga ʼae ʼe tonu ke fai? Kapau koia, pea kotea tona tupuʼaga?

Koia, ʼe ke fia hage koa ko he lau ʼakau moamoa ʼe feʼaveʼaki e te matagi, peʼe ko he fuʼu ʼakau ʼe tuʼu malohi moka to he afā? Fakamalohiʼi ia koe totonu, pea ʼe ke hage anai ko te fuʼu ʼakau ʼaia. Pea ʼe feala ai anai ke ke tali ki te fehuʼi ʼaeni: Kotea Toku ʼUhiga Moʼoni?