ʼI NEW YORK (U.S.A.) ʼe fakamatala e te tagata: “Ko toku foha ko Sonatane neʼe ʼalu ki tona ʼu kaumeʼa ʼi he koga meʼa ʼe mole faʼa mamaʼo. Ko toku ʼohoana, ia Valetina, neʼe mole ina leleiʼia tana taʼi ʼalu ʼaia. Neʼe ina tuʼaniaʼi tuʼumaʼu te ʼu tuʼutāmaki ʼe feala ke hoko ʼi te ala. Kae neʼe holi ia Sonatane ke ina ʼiloʼi te fai hila, pea ko tona ʼu kaumeʼa ʼe ʼi ai tonatou fale gāue ʼe feala ke ʼalu ʼo gāue ai. Neʼe ʼau nofo ʼi tomatou ʼapi ʼi te potu hihifo ʼo Manhattan, ʼi te kolo ʼo New York. Ka neʼe ʼalu toku ʼohoana ʼo fakasiosio ki tona famili ʼi Porto Rico. ʼI taku manatu, ‘kua vave pe te liliu mai ʼa Sonatane.’ ʼOsi ʼaia pea tatagi te meʼa lomi ʼo te matapā. ‘ ʼE ʼau ʼiloʼi papau ko ia nei pe.’ Ka neʼe mole ko ia. Ko te ʼu polisi pea mo te ʼu hahaʼi fetuku mahaki. ‘ ʼE ke ʼiloʼi koa la te pelemi ʼaenī?’ neʼe ko te fehuʼi ʼaia ʼa te polisi. ‘Ei, ko te pelemi ʼo toku foha, ko Sonatane.’ ‘ ʼE mātou ʼōmai ʼo fakahā atu te logo fakatupu mamahi. Neʼe hoko ki ai te tuʼutāmaki, pea . . . ko tou foha, . . . ko tou foha kua mate.’ Ko te ʼuluaki meʼa neʼe ʼau ʼui, ‘ ʼE mole ko he moʼoni!’ Ko te tuʼutāmaki fakamataku ʼaia neʼe ina avahi ai he mataʼi lavea ʼi ʼomātou loto, pea ʼi te hili ʼo he ʼu taʼu neʼe mole heʼeki māpunu pe la ia te lavea ʼaia.”

 Ko he tāmai ʼi Barcelone (Sepania) neʼe ina tohi fēnei: “Neʼe mātou liliu mai ki Sepania ʼi te lolotoga ʼo te ʼu taʼu 1960. Ko Malia, toku ʼohoana, pea mo ʼama tamaliki ʼaē e toko tolu, ko Tavite, ko Pakito, pea mo Isapela, ko tonatou ʼu taʼu neʼe 13, 11, 9, neʼe mātou fakatahitahi ko he famili fiafia.

“ ʼI he ʼaho ʼo Malesio 1963, neʼe haʼu ia Pakito mai te faleako ʼo ina ʼui mai ʼe mamahi ʼaupito tona foʼi ʼulu. Neʼe mātou feʼuiʼaki pe koteā tona tupuʼaga—ka neʼe mole faʼa fualoa. ʼI te hili pe ʼo hola e tolu pea mate ia. Neʼe mate ʼuhi he neʼe puna te toto ʼi tona ʼuto.

“Kua hili ia taʼu e 30 ki te mate ʼo Pakito. ʼO aʼu mai ki te ʼaho nei, ʼe kei mātou logoʼi aipe te mamahi lahi ʼaē ʼo tana kua puli. Ki te ʼu mātuʼa ko he puli ʼo he tamasiʼi, ʼe ko he puli ia ʼo he koga ʼo tonatou sino—tatau aipe peʼe haʼele te temi ki muʼa peʼe ko he toe maʼu ʼo he tahi ʼu tamaliki ʼe mole feala ia ke nātou molehi te mamahi ʼaia.”

Ko te ʼu hisitolia ʼaia e lua, ʼaē ʼe ʼasi mai ai neʼe mamate te ʼu fānau ʼa te ʼu mātuʼa, ʼe fakahā mai pe e feafeaʼi te loloto pea mo te loaloaga ʼo he lavea mokā mate he tamasiʼi. ʼI moʼoni leva ʼo te palalau ʼaenī ʼa te  tōketā ʼi tana tohi ʼaē: “ ʼI te agamāhani, ko te mate ʼo he tamasiʼi ʼe ko he meʼa fakamamahi pea mo fakamataku age ia, ʼi te mate ʼo he tahi kua matuʼa, koteʼuhi ʼe mole tou ʼamanaki ʼe feala ke mate ia te tamasiʼi. . . . Ko te mate ʼo he tamasiʼi ko tona faka ʼuhiga ko te puli ʼo he ʼu fakaʼamu ki te temi ka haʼu, te ʼu felogoi [ʼa he tama, ʼa he taʼahine, ʼa he mokopuna], te ʼu fakamatala . . . ʼe mole heʼeki hoko.” Pea ko te logoʼi ʼaia ʼo te mamahi ʼi he mate ʼo he tahi neʼe kita ʼofa mamahi ai, ʼe toe tatau mo te meʼa ʼaē ʼe logoʼi e he fafine neʼe tō tona fatu.

Ko he fafine neʼe tau mo he mamahi neʼe ina fakamatala fēnei: “Ko toku ʼohoana, ia Lusele, neʼe gāue ko he tagata tokoni ki te kau mahaki ʼi te koga meʼa ʼi te Pasifika, lolotoga te Lua Tau Faka Malamanei. Neʼe mamata ia ki te ʼu tau fakamataku pea neʼe hāo ia mai ai. ʼI tana liliu mai ki Amelika neʼe tokalelei tona maʼuli. Ki muli age neʼe gāue ia ko te minisi ʼo te Folafola ʼa te ʼAtua. ʼI te vaha ʼo tona taʼu 60 pea mo te 65 neʼe kamata ai tana logoʼi te mamahi ʼi tona mafu. Neʼe gāue mālohi ia ʼi tona maʼuli. Pea, ʼi he ʼaho ʼo Sūlio 1988, neʼe ina logoʼi te mamahi ʼi tona mafu pea mate aipe ia. Ko tona mate neʼe fakatupu mamahi. Neʼe mole ʼau ʼalu pe la ʼo tauʼinē mo ia. Neʼe mole ko hoku ʼohoana pe. Neʼe ko toku kaumeʼa lelei. Neʼe ma maʼuli tahi ʼi te ʼu taʼu e 40. ʼI te temi nei ʼe ʼau tau mo te faigataʼaʼia ʼaē ko te nofo tokotahi.”

ʼE ko he ʼu fakamatala ʼaia ʼo te ʼu tuʼutāmaki ʼe lauʼi afe ʼe tau mo te ʼu famili ʼi te malamanei katoa ʼi te ʼaho fuli. Ohage ko te ʼui anai e te tokolahi ʼe tau mo te mamahi ʼaia, ko te mate ʼaē ʼe ina toʼo takotou fānau, tokotou ʼohoana tagata, tokotou ʼohoana fafine, ʼakotou mātuʼa, tokotou kaumeʼa, ʼe ko te meʼa tonu ʼaia, ʼaē neʼe ʼui e te ʼapositolo ko Paulo, “ko te fili fakaʼosi.” Ko te ʼuluaki meʼa ʼe tautau hoko mokā fakahā mai kia tatou he logo fakamataku e lagi ko te fakafisi, “ ʼE mole ko he moʼoni! ʼE mole ʼau tui ʼau ki te logo ʼaia.” Ko ʼihi ʼu aga ʼe tautau hoko, ʼe hoki tou vakaʼi anai ki muli mai.—1 Kolonito 15:25, 26.

Kae, ia muʼa ʼo tatatou vakaʼi te ʼu meʼa ʼaē ʼe tou logoʼi ʼuhi ko te mamahi, tou tali muʼa ki he ʼu fehuʼi maʼuhiga. Ko te faka ʼuhiga ʼo te mate ʼe ko te puli ʼosi koa ʼo ia ʼaē kua mate? ʼE ʼi ai koa he ʼamanaki ke feala ai hatatou toe sisio kia nātou ʼaē kua mamate ʼaē ʼe tou ʼoʼofa mamahi ai?

Neʼe foaki mai e te tagata faitohi faka Tohi-Tapu ko Paulo te ʼamanaki fakafimālie mokā fakaʼauha ia te “fili fakaʼosi,” ʼaē ko te mate. Neʼe ina tohi fēnei: “Ko te mate ʼe tonu anai ke fakaʼauha.” “Ko te fili fakaʼosi, ia te mate ʼe tonu ke fakaʼauha.” (1 Kolonito 15:26, The New English Bible) He koʼe neʼe tui moʼoni ia Paulo ki te faʼahi ʼaia? Koteʼuhi neʼe akoʼi ia e ia ʼaē neʼe fakatuʼuake mai te mate, ia Sesu Kilisito. (Gāue 9:3-19) Koia la ʼaia neʼe feala ai te tohi e Paulo: “Koteʼuhi neʼe haʼu te mate mai te tagata [ia Atama], ka ko te fakatuʼuake mai te mate ʼe haʼu foki ia mai te tagata [ko Sesu Kilisito]. ʼAki ia Atama neʼe tou liliu fuli ʼo mamate, kae ʼaki ia Kilisito ʼe toe fakaliliu ai te hahaʼi fuli ki te maʼuli.”—1 Kolonito 15:21, 22.

Neʼe loloto te mamahi ʼo Sesu ʼi tana felāveʼi ʼaē mo he fafine vitua ʼi te kolo ʼo Naini pea mo tana sio ʼaē ki te mate ʼo tana tama. ʼE fakamatala mai e te Tohi-Tapu: “ ʼI te fakaōvi atu [ʼa Sesu] ki te kolo [ko Naini], koʼeni ʼe fua age ki tuʼa te mate, ko te tama ʼulu tokotahi ʼa tana faʼe. Pea, ko ia neʼe ko te fafine vitua. Neʼe ʼi ai te hahaʼi tokolahi mai te kolo ʼe ʼōmai fakatahi mo ia. Pea ʼi te sio age ʼa te ʼAliki ki ai, neʼe fonu ʼi te ʼofa ki ai, pea neʼe ina ʼui age: ‘Tuku tau tagi.’ Pea neʼe ʼunuʼunu atu ia ʼo fā ki te palepale, pea neʼe tutuʼu te ʼu tagata ʼaē neʼe nātou ʼamo ia te mate, pea neʼe ina ʼui age: ‘Tūpulaga, ʼe ʼau ʼui atu kia koe, tuʼu ake!’ Pea ʼi te temi pe ʼaia, neʼe mafuta ake ai ʼo nofo pea kamata palalau; pea ina tuku age ai ia ia ki tana faʼe. ʼI te temi ʼaia neʼe hake ia nātou fuli ʼaia te manavasiʼi, pea neʼe nātou faka kolōlia ia te ʼAtua, ʼo ʼui maʼa nātou: ‘Ko te  polofeta lahi kua fakatupu ia tatou,’ pea, ‘ko te ʼAtua kua ina fakahaga tana tokaga ki tana hahaʼi.’ ” Koutou fakatokagaʼi, pe neʼe feafeaʼi te hake ia Sesu te ʼofa, ʼo feala ai tana fakatuʼuake te tama ʼa te fafine vitua! Koutou fakakaukauʼi muʼa te ʼu meʼa ka hoko ʼi te temi ka haʼu!—Luka 7:12-16.

Ia muʼa ʼo te hahaʼi, neʼe fai e Sesu te fakatuʼuake ʼe mole feala ia ke galo. Neʼe ko he fakamoʼoni ʼo te toe fakatuʼuake ʼaē neʼe kua fakakikite ʼi muʼa ʼo te hoko ʼo te faʼahi ʼaenī, ko he fakatuʼuake ki te maʼuli ʼi te kele ʼo fakalogo ki te “lagi foʼou.” ʼI te faʼahi ʼaia neʼe ʼui e Sesu: “ ʼAua naʼa koutou punamaʼuli ki te meʼa ʼaenī, ʼe hoko mai te hola ʼaē ʼe ko nātou fuli ʼe nonofo ʼi te falemaka fakamanatu ʼe nātou logo anai ki tona leʼo pea ʼe nātou hū mai ai anai ki tuʼa.”—Fakahā 21:1, 3, 4; Soane 5:28, 29; 2 Petelo 3:13.

Ia nātou ʼaē neʼe mamata ki te fakatuʼuake neʼe kau ai ia Petelo, mo ʼihi ʼi te toko 12 ʼaē neʼe feʼaluʼaki mo Sesu ʼi tona fagona. Neʼe nātou logo kia Sesu ʼaē kua fakatuʼuake mai te mate ʼe palalau age ʼi te Tai ʼo Kalilea. ʼE fakamatala fēnei mai e te Tohi-Tapu: “Neʼe ʼui age e Sesu kia nātou: ‘ ’Ōmai, ʼo kakai.’ ʼE mole he tahi ʼi tana ʼu tisipulo neʼe lotomālohi ʼo fehuʼi age: ‘Ko ai ia koe?’ koteʼuhi neʼe nātou ʼiloʼi ko ia ko te ʼAliki. Neʼe haʼu ia Sesu ʼo toʼo te foʼi pane pea ina foaki age kia nātou, pea ina toe fai feiā ʼaki te ʼu ika. Ko te tuʼa tolu leva ʼaia ʼo te hā ʼa Sesu ki tana ʼu tisipulo ʼi te hili ʼo tona fakatuʼuake mai te mate.”—Soane 21:12-14.

Koia, neʼe feala ai ke faitohi ia Petelo ʼaki tana ʼiloʼi papau: “Manuʼia te ʼAtua ko te Tāmai ʼo totatou ʼAliki ko Sesu Kilisito, heʼe ʼi te lahi ʼo tona manavaʼofa, neʼe ina tuku mai kia tatou te toe tupu ki he ʼamanaki maʼuli ʼaki te toe fakatuʼuake ʼo Sesu Kilisito mai te mate.”—1 Petelo 1:3.

Neʼe fakahā e te ʼapositolo ko Paulo ia tana ʼamanaki moʼoni ʼi tana ʼui ʼaē: “ ʼE ʼau tui ki te ʼu meʼa fuli ʼaē ʼi te Lao pea mo te meʼa ʼaē ʼe tohi ʼi te ʼu Polofeta; pea ʼe ʼau maʼu te falala ki te ʼAtua, ko he falala ʼe toe maʼu foki e te ʼu tagata ʼaenī, ʼe ʼi ai anai he toe fakatuʼuake mai te mate ʼo te hahaʼi agatonu pea mo te hahaʼi heʼe agatonu.”—Gāue 24:14, 15.

Koia ko te hahaʼi ʼe lauʼi miliona ʼe feala ke nātou maʼu te ʼamanaki mālohi ʼaē, ke nātou toe sisio ki te hahaʼi ʼaē neʼe nātou ʼoʼofa mamahi ai ʼi te kele ʼi he ʼu ʼaluʼaga kehekehe. Koteā anai te ʼu ʼaluʼaga ʼaia? ʼE lahi te ʼu manatu ʼe fakatafito ki te Tohi-Tapu ʼo ʼuhiga mo te falala ʼaē ko nātou neʼe tou ʼoʼofa mamahi ai ʼaē kua mamate, ʼe talanoa anai kiai ʼi te fakaʼosi ʼo te kaupepa ʼaenī, ʼi te kupu tāfito ʼaē “Ko Te ʼAmanaki Moʼoni Maʼa Te Kau Mate.”

Kae ʼuluaki ʼe lelei muʼa ke tou vakaʼi te ʼu fehuʼi ʼe feala ke lagaʼi mokā mate he tahi ʼe koutou ʼofa mamahi ai: ʼE ko he meʼa lelei koa tatatou mamahi feiā? E feafeaʼi koa haku maʼuli mo toku mamahi? Koteā koa te meʼa ʼe feala ke fai e ʼihi ke feala ai haku tauʼi te mamahi ʼaia? E feafeaʼi koa haku tokoni ki niʼihi ʼe tau mo te mamahi? Pea ko te fehuʼi tāfito leva, koteā koa te talanoa ʼa te Tohi-Tapu ʼo ʼuhiga mo te ʼamanaki moʼoni ʼa te kau mate? ʼE ʼau toe sio anai koa kia nātou ʼaē neʼe ʼau ʼofa mamahi ai? Pea ʼi te faʼahi fea?