Neʼe ha ʼi te 1950 ʼi te lea Fakapilitania te ʼu Tohi Fakakeleka Fakakilisitiano ʼo Te Malama Foʼou pea ʼi te 1961 neʼe ha katoa ai leva te Tohi-Tapu Fakaliliu ʼo Te Malama Foʼou. Talu mai ai kua feala ki te ʼu lauʼi hogofulu miliona hahaʼi tanatou lau te Tohi-Tapu ʼaia ʼe totonu mo maʼu gafua ia lea ʼe 210 tupu pea neʼe fakaliliu mai te ʼu lea ʼae neʼe ʼuluaki tohi ai te Tohi-Tapu.

Kua fetogi te ʼu lea ʼi te ʼu taʼu ʼe 50 ʼae kua hili. Neʼe mulimuli te Komite Faifakaliliu ʼo Te Malama Foʼou ʼo te temi nei ki te fetogi ʼaia ke malave ki te loto ʼo te kau lautohi. Koia neʼe fai ai ni fetogi ʼo ʼuhiga mo te ʼu kupu mo te faʼahiga palalau ʼi te fakaliliu ʼaeni, ohage la:

• Ni kupu Fakatohi-tapu ʼe mahino gafua. ʼI te Tohi-Tapu ʼaeni kua mahino gafua age ʼihi kupu ʼe fakaʼaogaʼi ʼi te tahi ʼu Tohi-Tapu Fakaʼuvea. Ohage la moka talanoa ki te tutuki ʼo Sesu ki te pou fakamamahi ʼe fakaʼaogaʼi ai te kupu “kolusifikoʼi” ʼae ʼe maʼu ai te manatu neʼe tutuki ia Sesu ki te koluse. Kae ʼe fakaʼaogaʼi ʼi te Tohi-Tapu ʼaeni te kupuʼi palalau neʼe “tutuki ʼi te pou” moʼo fakamahino te manatu totonu ʼae neʼe mate ia Sesu ʼi he pou.

  Neʼe lahi te ʼu faiga neʼe fai ʼo ʼuhiga mo te Tohi-Tapu Fakaʼuvea ʼaeni ke mulimuli ki te ʼu lea ʼae neʼe ʼuluaki tohi ai te Tohi-Tapu ʼo ina fakaʼaogaʼi ni kupu ʼe mahino gafua pea kua mahani ki ai te tokolahi. Neʼe fai ʼaki he toe fakaʼeteʼete te ʼu fetogi fuli ʼaia ʼaki ni faikole pea mo he toe fakaʼapaʼapa ʼo ʼuhiga mo te gaue ʼae neʼe fakahoko e te ʼuluaki Komite Faifakaliliu.

ʼE maʼu ʼi te Tohi-Tapu ʼaeni te ʼu kiʼi nota, ohage la:

• “Peʼe” Ko te tahi fakaliliu ʼo te lea Fakahepeleo, peʼe Fakaalamea, peʼe Fakakeleka ʼe tatau pe te manatu.—Senesi 1:2, kiʼi nota ʼi te kupuʼi palalau “te malohi”; Sosue 1:8, “leʼo veliveli.”

• “Peʼe lagi” Ko te tahi faʼahiga fakaliliu ʼo te manatu kae ʼe ʼi ai tona kiʼi kehekehe.—Senesi 21:6, “ ʼe natou kakata fakatahi anai mo au”; Sakalia 14:21, “Kanaane.”

•  “Hep.” “Klka.” Ko he fakaliliu ʼe mulimuli ki te ʼu kupu ʼo te lea Fakahepeleo, peʼe Fakaalamea, peʼe Fakakeleka peʼe ko te ʼuluaki fakaʼuhiga ʼo he kupu ʼo te ʼu lea ʼaia.—Ekesote 32:9, “uigataʼa”; Tito 2:14, “haofaki.”

• Fakaʼuhiga mo te tahi ʼu fakamahino Fakaʼuhiga ʼo te ʼu higoa (Senesi 3:17, “Atama”; Ekesote 15:23, “Mala”), fakamahino ki te ʼu meʼa fua (Senesi 24:22, “sikele”), peʼe fakaʼuhiga kia ai peʼe kitea (Senesi 38:5, “ia”), manatu ʼaoga ʼe maʼu ʼi Te ʼu Fakamahino peʼe ʼi Te ʼu Kupu.—Senesi 2:4, “Sehova”; Mateo 5:22, “Seʼeni.”

ʼI te kamata ʼo te Tohi-Tapu ʼe talanoa te koga ʼaeni “Kotea ʼAe ʼe Tou Ako Mai Te Folafola ʼa Te ʼAtua?” ki te ʼu akonaki tafito ʼo te Tohi-Tapu. ʼI te fakaʼosi ʼo te Tohi-Tapu ʼe maʼu ai “Te ʼu Tohi ʼo Te Tohi-Tapu,” te “Lisi ʼo Te ʼu Kupu,” pea mo “Te ʼu Kupu Mo ʼOna Fakaʼuhiga.” ʼI te koga ʼaia ʼe maʼu ai te fakaʼuhiga ʼo ni kupuʼi palalau Fakatohi-tapu. ʼE maʼu ʼi Te ʼu Fakamahino 1 te ʼu koga ʼaeni: “Te ʼu Pelesepeto ʼo Te Fakaliliu ʼo Te Tohi-Tapu,” “ Te ʼu Agaaga ʼo Te Fakaliliu ʼAeni,” “Neʼe Puipui Feafeaʼi Te Tohi-Tapu ʼo Kaku Mai Ki Te Temi Nei?” “Te Huafa ʼo Te ʼAtua ʼi Te ʼu Tohi Fakahepeleo,” “Te Huafa ʼo Te ʼAtua ʼi Te ʼu Tohi Fakakeleka Fakakilisitiano,” “Te Kau Polofeta Mo Te ʼu Hau ʼo Suta Pea Mo Iselaele,” pea mo “Te ʼu Aluʼaga Tafito ʼAe Neʼe Hoko ʼi Te Maʼuli ʼo Sesu ʼi Te kele.” ʼE maʼu ʼi Te ʼu Fakamahino 2 ni mape, mo ni pāki pea mo ʼihi faʼahi ʼe ʼaoga ki te ako loloto ʼo te Tohi-Tapu.

ʼE kamata te ʼu tohi fuli ʼo te Tohi-Tapu ʼaki Te ʼu Manatu Fakanounou ʼo te ʼu kapite pea ʼe toe maʼu ai mo te ʼu numelo ʼo te ʼu vaega. ʼE feala ai kia ia ʼae ʼe lautohi ke mahino ki te manatu katoa ʼo he tohi. ʼE maʼu te tahi ʼu vaega ʼi te lotomalie ʼo te ʼu pasina fuli.