ʼE lagi ui e ʼihi ko he fakaliliu ʼe mulimuli ki te ʼu kupu ʼe lelei he ʼe feala ke maʼu ai te manatu totonu ʼo te ʼu ʼuluaki lea ʼae neʼe tohi ai te Tohi-Tapu. Kae ʼi ʼihi temi ʼe mole koia ʼaia. Koʼeni ni tupuʼaga:

• ʼE mole he lea ʼe tatau mo he tahi age lea he ʼe kehekehe te ʼu kupu, mo tonatou faʼahiga fakaʼaogaʼi pea mo tonatou fefakahoahoaʼaki. Neʼe tohi e te tagata faiako ʼo te lea Fakahepeleo ko Samuel Driver: “ ʼE mole tatau [te ʼu lea] he ʼe kehekehe te fakaʼaogaʼi ʼo te ʼu kupu mo ʼonatou haʼuʼaga . . . pea mo te fefakahoahoaʼaki ʼo te ʼu manatu moʼo faʼufaʼu he falasisi.” ʼE tahi mulimuli pe te lea ki ni faʼahiga fakakaukau. ʼE toe ui e te tagata faiako ko Driver: “Koia ʼe takitahi pe te lea mo te faʼahiga faʼufaʼu ʼo te ʼu falasisi.”

• ʼE mole he lea ʼi te temi nei ʼe ina maʼu ni kupu pea mo he faʼahiga fakaʼaogaʼi ʼo ni kupu ʼe tatau mo te ʼu ʼuluaki lea ʼae neʼe tohi ki ai te Tohi-Tapu. Koia ʼe mole mahino gafua ai mo totonu ia he fakaliliu ʼe mulimuli ki te ʼu kupu.

• ʼE fakalogo te fakaʼuhiga ʼo he kupu peʼe kupusiga palalau ki tona tuʼuʼaga.

ʼI ʼihi temi, ʼe feala kia ia ʼae ʼe faifakaliliu ke mulimuli ki te ʼu kupu kae ʼe tonu ke fakapotopoto.

 Koʼeni ʼihi aluʼaga ʼe feala ke mahino hala ki ai ʼihi mo kapau ʼe fakaliliu ʼo mulimuli ki te ʼu kupu:

• ʼE fakaʼaogaʼi ʼi te Tohi-Tapu te kupu “moe” moka talanoa ki te moe peʼe ki te mate. (Mateo 28:13; Soane 11:11) Ka fakaʼuhiga te kupu moe ki te mate, ʼe feala pe ke fakaʼaogaʼi e te kau faifakaliliu te kupu “moe ʼi te mate” peʼe “mate” ke mahino gafua te kau lautohi.—1 Kolonito 7:39; 1 Tesalonika 4:13; 2 Petelo 3:4.

• Ia Efeso 4:14, neʼe fakaʼaogaʼi e te apositolo ko Paulo he kupusiga Fakakeleka ko tona fakaʼuhiga “te gaoʼi ʼae ʼe fai e te tagata ko te lulu.” ʼE fakaʼuhiga te kupusiga ʼafeā ʼaia ki he agakaka ʼi te lulu. ʼE lahi te ʼu lea ʼe mole mahino anai te vaega moka fakaʼaogaʼi te kupusiga ʼafeā ʼaia. Kae ʼe mahino gafua age mo kapau ʼe fakaliliu “te hahaʼi kaka.”

• Ia Loma 12:11, ʼe maʼu ai he kupusiga Fakakeleka ko tona fakaʼuhiga “ ʼi te ʼatamai ʼae ʼe pula.” Kae ʼe mole ko te manatu totonu ʼaia. Koia neʼe fakaliliu ʼaki te kupusiga ʼaeni “faʼafai ʼuhi ko te laumalie.”

• ʼI tana Akonaki ʼi Te Moʼuga, neʼe fakaʼaogaʼi e Sesu he kupusiga ʼe tau fakaliliu “Manuia natou ae e masiva i te loto.” (Mateo 5:3, Ko te Tohi Tapu i te fakauvea) Kae ʼe lahi te ʼu lea ʼe mole mahino anai ki te kupusiga ʼaia mo kapau ʼe fakaliliu ʼo mulimuli ki te ʼu kupu. ʼI te manatu ʼa te hahaʼi ʼi ʼihi lea, ʼe fakaʼaoga te kupusiga “masiva ʼi te loto” ki he tahi ʼe ʼulu vale peʼe lotovaivai. Kae ʼe palalau ia Sesu ʼi heni ki te manuʼia. ʼE mole ko te kumi ʼo te ʼu meʼa ʼae ʼe ʼaoga ki te faʼahi fakasino, kae ko te iloʼi ʼae ʼe ʼaoga te takitaki ʼa te ʼAtua. (Luka 6:20) Koia ʼe totonu age te ʼu fakaliliu ʼaeni, “ia natou ʼae ʼe natou mahino ʼe ʼaoga kia natou te ʼu meʼa fakalaumalie,” peʼe “ia natou ʼae ʼe natou iloʼi tonatou masiva fakalaumalie.”—Mateo 5:3; Segond 21.

• ʼE lahi te ʼu vaega Fakatohi-tapu ʼe fakaliliu te kupu Fakahepeleo ʼaki te kupu “maheka” ʼi te Fakaʼuvea, ʼae ʼe fakaʼuhiga ʼi te agamahani ki he tahi ʼe ita ki tona kaiga he neʼe mole nofo agatonu, peʼe ki he tahi ʼe manumanū ki te ʼu koloa ʼo he tahi. (Taʼaga Lea 6:34; Esaia 11:13) Kae ʼe toe fakaʼuhiga te kupu Fakahepeleo ki he meʼa ʼe lelei. Ohage la, ʼe feala pe ke  fakaʼuhiga ki te “faʼafai” ʼa Sehova, peʼe ki tana puipui fakamalotoloto ʼana kaugana, peʼe ki tana “fakamaʼua ke pipiki ʼateaina pe kia te ia.” (Ekesote 34:14; 2 Hau 19:31; Esekiele 5:13; Sakalia 8:2) Pea ʼe toe fakaʼuhiga ki te “faʼafai” ʼo ʼana kaugana agatonu kia te ia pea mo tana tauhi maʼa, peʼe ko ‘tanatou mole tali ke heʼe agatonu kia te ia.’—Pesalemo 69:9; 119:139; Numelo 25:11.

• ʼE lahi te ʼu fakaʼuhiga ʼo te kupu Fakahepeleo ʼae ʼe tau fakaʼaogaʼi moʼo talanoa ki te nima. ʼI ʼihi vaega, ʼe feala ke fakaliliu te kupu ʼaia ʼaki te ʼu kupu “lotofoaki,” “pule” peʼe “tuʼulaga moʼo puleʼi.” (1 Hau 10:13; Taʼaga Lea 18:21; Selemia 5:31) Koia ʼi te Tohi-Tapu ʼaeni, ʼe lahi tona faʼahiga fakaliliu.

ʼE ha ʼaki ai, ka fakaliliu te Tohi-Tapu, ʼe mole tonu ke tatau tuʼumaʼu pe te kupu ʼae ka fakaʼaogaʼi moʼo fakaliliu he manatu. ʼE tonu kia ia ʼae ʼe faifakaliliu ke fakapotopoto moka ina filifili ni kupu ʼi tana lea moʼo fakaha lelei te ʼu manatu ʼo te lea ʼae neʼe ʼuluaki tohi ai te Tohi-Tapu. ʼE tonu foki ke toe mulimuli te fefakahoahoaʼaki ʼo te ʼu falasisi ki te ʼu lekula ʼo tatatou lea ke faigafua tona lau.

Kae ʼaua naʼa fetogi e ia ʼae ʼe faifakaliliu te manatu ʼo te Tohi-Tapu ʼo mulimuli ki tana mahino, he ʼe feala ai ke fetogi tona fakaʼuhiga. ʼO feafeaʼi? ʼE feala pe ke ina hilifaki ni manatu hala ki he vaega, peʼe ke ina molehi ni faʼahi maʼuhiga. Logo la ko te faʼahiga fakaliliu faʼifaʼitaliha ʼaia ʼo te Tohi-Tapu ʼe faigafua tona lau, kae ʼe mole ko te logo moʼoni ʼaia mai te ʼAtua.

ʼE feala pe ke mulimuli ia ia ʼae ʼe faifakaliliu ki te ʼu akonaki ʼae ʼe tui ki ai. Ohage la ʼe ui ia Mateo 7:13: ʼE “laulahi ia te ala ʼae ʼe ina taki ki te fakaʼauha.” Koia neʼe filifili e ʼihi kau faifakaliliu ʼi heni te kupu “ifeli” ʼi te kupu “fakaʼauha,” ʼae ko tona fakaʼuhiga moʼoni ʼi te Fakakeleka.

ʼE tonu foki ke manatuʼi e ia ʼae ʼe faifakaliliu neʼe tohi te Tohi-Tapu ʼi te lea ʼae ʼe palalauʼi mahani e te hahaʼi, ohage ko te kau gaue kele, te kau tauhi ovi pea mo te kau gelu. (Neemia 8:8, 12; Gaue 4:13) Koia ʼe tonu ke mahino gafua te fakaliliu ʼo te Tohi-Tapu ki te faʼahiga hahaʼi fuli ʼae ʼe fakamalotoloto, pe neʼe natou  ako peʼe kailoa. ʼE mole fakaʼaogaʼi ai ni kupu ʼe faigataʼa kae ko ni kupu ʼe iloʼi lelei e te hahaʼi pea mo tasilo.

ʼE lahi te ʼu Tohi-Tapu ʼi te temi nei, neʼe molehi faʼifaʼitaliha ai e te kau faifakaliliu ia te huafa ʼo te ʼAtua ʼae ko Sehova. Kae ʼe tuʼu te huafa ʼaia ʼi te ʼu tohi ʼafeā. (Vakaʼi Te ʼu Fakamahino 1.4.) ʼE lahi te ʼu Tohi-Tapu ʼe fetogi ai te huafa ʼaia ʼaki he higoa fakatuʼulaga ohage ko “ ʼAliki.” Pea ko ʼihi Tohi-Tapu ʼe mole fakaha ai ʼe ʼi ai te huafa ʼo te ʼAtua. Tou vakaʼi te faikole ʼa Sesu ʼae ʼe tuʼu ia Soane 17. ʼE fakaliliu fenei ʼi ʼihi Tohi-Tapu te vaega 6 mo te 26: “Neʼe au fakaha ia koe kia natou ʼae neʼe ke foaki mai,” pea “Neʼe au fakailo ia koe kia natou.” Kae ʼe totonu age te fakaliliu fenei ʼo te faikole ʼa Sesu: “Neʼe au fakaha ia tou huafa ki te hahaʼi ʼae neʼe ke foaki mai,” pea “Neʼe au fakaha age tou huafa.”

ʼE ui ʼi te ʼuluaki palalau ʼo te ʼuluaki ta ʼo te Fakaliliu ʼo Te Malama Foʼou ʼi te lea Fakapilitania: “Neʼe matou faigaʼi ke matou fakaliliu te manatu totonu ʼo mulimuli ki te ʼu kupu mo kapau neʼe feala pea ke tasilo te manatu.” ʼE faigaʼi e te Komite Faifakaliliu ʼo Te Malama Foʼou ke fakapotopoto ʼo ina fakaʼaogaʼi ni kupu mo ni faʼahiga palalau ʼe mulimuli ki te ʼu lea ʼae neʼe ʼuluaki tohi ai te Tohi-Tapu kae ʼe mole faigataʼa te mahino ki ai. Ka fakaliliu feia te Tohi-Tapu ʼe faigafua tona lau pea ʼe feala ai ke tui papau te kau lautohi ko te Folafola totonu ʼa te ʼAtua ʼae ʼe natou lau.—1 Tesalonika 2:13.