ʼE fakamoʼoni e te hahaʼi sivi Tohi-Tapu ko te huafa ʼo te ʼAtua, ʼae ʼe tohi ʼaki te Tetalakalame (יהוה), neʼe ha teitei tuʼa 7 000 ʼi te temi ʼae neʼe tohi ai te ʼu Tohi Fakahepeleo. Kae maʼa te tokolahi, neʼe mole tuʼu ʼi te ʼu Tohi Fakakeleka Fakakilisitiano. Koia, tokolahi te kau faifakaliliu ʼi totatou temi ʼe mole natou fakaʼaogaʼi ia te huafa ʼo Sehova moka natou fakaliliu ia te Tauhi Foʼou. Pea ka natou fakaliliu ia te ʼu vaega ʼae ʼe toʼo mai te ʼu Tohi Fakahepeleo ʼae ʼe tuʼu ai te Tetalakalame, ʼe natou tohi “ ʼAliki” kae mole ko te huafa ʼo te ʼAtua.

Neʼe mole mulimuli ki ai ia te Tohi-Tapu Fakaliliu ʼo Te Malama Foʼou. ʼE ina fakaʼaogaʼi tuʼa 237 ia te huafa ʼo Sehova ʼi te ʼu Tohi Fakakeleka Fakakilisitiano. a Neʼe fai e te kau faifakaliliu ia te tonu ʼaia, he neʼe natou tokagaʼi ia te ʼu faʼahi maʼuhiga ʼaeni ʼe lua: (1) Ko te ʼu tohi Fakakeleka ʼafeā ʼae ʼe tou maʼu ia ʼaho nei ʼe mole ko te ʼu ʼuluaki tohi ʼaia neʼe fai ʼi te kamata. ʼI te ʼu tohi ʼe lauʼi afe ʼae ʼe tou maʼu ia ʼaho nei, ʼe lahi te ʼu tohi neʼe fai kae neʼe kua hili ki ai teitei taʼu ʼe 200 ʼi te kua ʼosi tohi ʼo te ʼu ʼuluaki tohi. (2) ʼI te temi ʼaia, ko natou ʼae neʼe natou hiki ia te ʼu tohi ʼafeā neʼe natou fetogi ia te Tetalakalame ʼaki te kupu Kurios, ʼae ko tona fakaʼuhiga ʼi te Fakakeleka ko “ ʼAliki,” pe neʼe natou hiki he ʼu tohi ʼafeā neʼe kua ʼosi fai ai te fetogi ʼaia.

Kae neʼe maʼu e te Komite Faifakaliliu ʼo Te Malama Foʼou ia he ʼu fakamoʼoni neʼe tuʼu te Tetalakalame ʼi te ʼu ʼuluaki tohi Fakakeleka. Tou vakaʼi te ʼu fakamoʼoni ʼaia.

• Neʼe tuʼu ia te Tetalakalame ʼi te ʼu hiki ʼo te ʼu Tohi Fakahepeleo ʼae neʼe fakaʼaogaʼi ʼi te temi ʼo Sesu pea mo ʼana apositolo. ʼI te temi muʼa, neʼe tokosiʼi ia natou ʼae neʼe fakafifihi ki te manatu ʼaia. Ia ʼaho nei, ʼe fakamoʼoni ki te manatu ʼaia ia te ʼu hiki ʼo te ʼu Tohi Fakahepeleo ʼae neʼe fai ʼi te temi ʼo te kau ʼuluaki Kilisitiano pea neʼe maʼu ʼi Kumilani.

• ʼI te temi ʼo Sesu pea mo ʼana apositolo, neʼe toe tuʼu ia te Tetalakalame ʼi te ʼu fakaliliu ʼo te ʼu Tohi Fakahepeleo ki te Fakakeleka. Lolotoga ni sekulo, neʼe manatu ia te hahaʼi sivi Tohi-Tapu neʼe mole tuʼu ia te Tetalakalame ʼi te ʼu tohi ʼo te Septante, ʼae ʼe ko te fakaliliu ʼo te ʼu Tohi Fakahepeleo ki te Fakakeleka. Pea ʼi te vaelua ʼo te ʼu taʼu 1900, neʼe fakaha ki te kau sivi Tohi-Tapu ia te ʼu kogaʼi  tohi kua ʼafeā ʼo te Septante, ʼae neʼe fakaʼaogaʼi ʼi te temi ʼo Sesu. Neʼe maʼu ʼi te ʼu kogaʼi tohi ʼaia ia te huafa ʼo te ʼAtua, neʼe tohi ʼaki te ʼu mataʼi tohi Fakahepeleo. Koia ʼi te temi ʼo Sesu, ko te ʼu hiki ʼo te ʼu Tohi Fakahepeleo ʼae neʼe fakaliliu ki te Fakakeleka neʼe tuʼu ai te huafa ʼo te ʼAtua. Kae ʼi te ʼu taʼu 300 H.T.S. ko te ʼu tohi tafito ʼo te Septante, ohage ko te Codex Vaticanus pea mo te Codex Sinaiticus, neʼe mole kei tuʼu ai te huafa ʼo te ʼAtua, mai te tohi ʼo Senesi kia Malakia (ʼi te ʼu vaega ʼae neʼe tuʼu ai ʼi te ʼu tohi ʼafeā). Koia ʼe mole tou punamaʼuli ai, ko te ʼu tohi ʼae neʼe taupau talu mai te temi ʼaia ʼe mole kei maʼu ai ia te huafa ʼo te ʼAtua ʼi te Tauhi Foʼou ʼae ko te ʼu Tohi Fakakeleka.

  Neʼe ui fakahagatonu e Sesu: “Neʼe au haʼu ʼi te huafa ʼo taku Tamai.” Neʼe ina toe fakaha lelei foki neʼe ina fai ʼana gaue ʼi “te huafa ʼo [tana] Tamai”

• ʼE fakaha ʼi te ʼu Tohi Fakakeleka Fakakilisitiano neʼe talanoa tuʼumaʼu ia Sesu ʼo ʼuhiga mo te huafa ʼo te ʼAtua pea neʼe ina fakaha ki te hahaʼi. (Soane 17:6, 11, 12, 26) Neʼe ui fakahagatonu e Sesu: “Neʼe au haʼu ʼi te huafa ʼo taku Tamai.” Neʼe ina toe fakaha lelei foki neʼe ina fai ʼana gaue “ ʼi te huafa ʼo [tana] Tamai.”—Soane 5:43; 10:25.

• Mai tona ʼuhiga ʼae ko te ʼu Tohi Fakakeleka Fakakilisitiano ko te hoko atu pe ia ʼo te ʼu Tohi Fakahepeleo ʼae neʼe tohi ʼaki te takitaki ʼa te ʼAtua, ʼe mole matatonu anai ke pulihi feiaʼi te huafa ʼo te ʼAtua. ʼI te vaʼe vaelua ʼo te ʼuluaki sekulo, neʼe ui e te tisipulo ko Sakopo ki te kau tagata ʼafeā ʼi Selusalemi: “Kua fakamatala fakalelei mai e Simone te hoki tokaga ʼae ʼa te ʼAtua ki te hahaʼi ʼae ʼe mole Sutea, ke ina filifili mai ia natou he hahaʼi ke natou fua tona huafa.” (Gaue 15:14) Ka na pau la neʼe mole iloʼi pe neʼe mole fakaʼaogaʼi te huafa ʼo te ʼAtua ʼi te temi ʼaia, neʼe mole feala ke palalau feia ia Sakopo.

• ʼE ha te fakanounou ʼo te huafa ʼo Sehova ʼi te ʼu Tohi Fakakeleka Fakakilisitiano. ʼE lahi te ʼu higoa ʼi te ʼu Tohi Fakakeleka Fakakilisitiano neʼe haʼu mai te huafa ʼo te ʼAtua. ʼI tona fakahagatonu, ʼe fakamahino ʼi te ʼu tohi, ko te huafa ʼo Sesu ko tona fakaʼuhiga “Ko Sehova ʼe Ina Haofaki.”

• ʼE fakaha ʼi te ʼu tohi Fakasutea ʼafeā neʼe fakaʼaogaʼi e te kau Kilisitiano Sutea ia te huafa ʼo te ʼAtua ʼi ʼanatou tohi. Ohage ko te tohi Tossefta ʼae ʼe tanaki ai te ʼu lao neʼe palalauʼi pea neʼe ʼosi tona tohi ʼi te teitei taʼu 300 H.T.S. ʼE ui fenei ai ʼo ʼuhiga mo te ʼu tohi Fakakilisitiano ʼae neʼe tutu ʼi he ʼaho ʼo te Sapato: “Ko te ʼu tohi ʼo te ʼu Evaselio pea mo te ʼu tohi ʼo te ʼu heletiko [lagi ko te kau Kilisitiano Sutea] ʼe tonu ke tutu katoa, ʼei, ʼe tonu ke tutu te ʼu tohi ʼaia ʼe maʼu ai te Huafa ʼo te ʼAtua.” ʼE toe maʼu ʼi te tohi  pe ʼaia te ʼu palalau neʼe fai e te tagata faiako ʼo te Lao ko Lapi Yossé ia te Kalilea, ʼae neʼe maʼuli ʼi te kamata ʼo te ʼu taʼu 100 H.T.S. ʼE ina fakamahino pe ʼe kotea ʼae neʼe tonu ke fai ʼi te tahi ʼu ʼaho ʼo te vahaʼa. ʼE ina ui: “ ʼE tuʼutuʼusi te ʼu faʼahi ʼae ʼe tuʼu ai te Huafa ʼo te ʼAtua [ʼi te ʼu tohi ʼaia ʼa te kau Kilisitiano], ʼe tanaki fakalelei anai pea ʼe tutu leva tona toe.”

• ʼE fakamoʼoni e ʼihi hahaʼi sivi Tohi-Tapu neʼe lagi ha ia te huafa ʼo te ʼAtua ʼi te ʼu vaega ʼo te ʼu Tohi Fakahepeleo ʼae ʼe fakaʼaogaʼi ʼi te ʼu Tohi Fakakeleka Fakakilisitiano. ʼI te kupu tafito “Te Tetalakalame ʼi Te Tauhi Foʼou,” ʼe ui ʼi te tikisionalio Fakatohi-tapu  (The Anchor Bible Dictionary): “ ʼE ʼi ai te ʼu fakamoʼoni ʼe fakaha ai neʼe toe maʼu te Tetalakalame, te Huafa ʼo te ʼAtua ʼae ko Yahweh, ʼi te Tauhi Foʼou ʼi te temi ʼae neʼe tohi ai. ʼE tuʼu ʼi ʼihi vaega peʼe ʼi te ʼu vaega fuli ʼo te Tauhi ʼAfeā, ʼae ʼe fakaʼaogaʼi ʼi te Tauhi Foʼou.” Pea ʼe ui fenei e te tagata sivi Tohi-Tapu ko George Howard: “Neʼe kei maʼu pe ia te Tetalakalame ʼi te ʼu hiki ʼae neʼe fai ʼo te Tohi-Tapu [Septante] ʼi te lea Fakakeleka. Neʼe ko te Tohi-Tapu ʼaia ʼae neʼe fakaʼaogaʼi e te ʼEkelesia ʼo te kamata. Koia ʼe feala ke tou manatu ko natou ʼae neʼe natou tohi te Tauhi Foʼou, neʼe natou taupau ia te Tetalakalame ʼi te ʼu vaega ʼae neʼe natou fakaʼaogaʼi.”

•   Neʼe fakaʼaogaʼi e te kau faifakaliliu iloa ʼo te Tohi-Tapu ia te huafa ʼo te ʼAtua ʼi te ʼu Tohi Fakakeleka Fakakilisitiano. Koʼeni ʼanatou Tohi-Tapu pea neʼe fai ʼihi ʼi muʼa ʼo te ta ʼo te Fakaliliu ʼo Te Malama Foʼou: A Literal Translation of the New Testament . . . From the Text of the Vatican Manuscript, neʼe fakaliliu e Herman Heinfetter (1863), The Emphatic Diaglott, neʼe fakaliliu e Benjamin Wilson (1864), Les Saints Évangiles Traduction Nouvelle neʼe fakaliliu e Henri Lasserre (1887), ʼae ʼe maʼu ai te huafa ʼo “Sehova” ʼi ni vaega, Bible de Darby (1940), ʼae ʼe tuʼu ai te huafa ʼo “Sehova” ʼi te ʼu kiʼi nota, The New Testament Letters, neʼe fakaliliu e John Wand, ko te ʼEpikopo ʼo Lonitoni (1946), Bible de Chouraqui (1985), ʼae ʼe tohi ai te ʼu mataʼi tohi “IHVH,” te ʼu Evaselio pea mo te Apokalipesi, neʼe fakaliliu e C. Tresmontant (neʼe ta ʼo kamata mai te 1984 ki te 1988), ʼe tohi ai “yhwh.” Pea ʼi te kamata ʼo te ʼu taʼu 1900, neʼe fakaʼaogaʼi e te tagata Sepania ko Pablo Besson ia te huafa ʼo “Jehová” ia Luka 2:15 pea mo Suta 14. Neʼe ina toe fakaha ʼi te ʼu kiʼi nota ʼe 100 tupu, ʼe feala ke fakaliliu te ʼu vaega ʼaki te huafa ʼo te ʼAtua. ʼI muʼa atu ʼo te ʼu fakaliliu ʼaia, ʼo kamata mai te ʼu taʼu 1500, ko te ʼu fakaliliu ʼo te ʼu Tohi Fakakeleka Fakakilisitiano ki te Fakahepeleo neʼe fakaʼaogaʼi lahi ai te Tetalakalame. ʼI te lea Fakasiamani pe, ʼe fakaʼaogaʼi ia te huafa ʼo “Sehova” (peʼe ko “Yahweh”) ʼi te ʼu fakaliliu ʼe 11 ʼo te ʼu Tohi Fakakeleka Fakakilisitiano. Pea ʼe ko kau faifakaliliu  ʼe toko fa neʼe natou tohi ʼi te ʼu palotesi ia te huafa ʼo te ʼAtua, ʼo hoa ki te kupu “ ʼAliki.” Ko te ʼu Tohi-Tapu ʼe 70 tupu ʼi te Fakasiamani ʼe fakaʼaogaʼi ai ia te huafa ʼo te ʼAtua ʼi te ʼu kiʼi nota peʼe ʼi te ʼu fakamatala.

• ʼE tuʼu ia te huafa ʼo te ʼAtua ʼi te ʼu Tohi Fakakeleka Fakakilisitiano ʼae neʼe fakaliliu ia lea ʼe teau tupu. ʼE fakaʼaogaʼi lahi ia te huafa ʼo te ʼAtua ʼi te ʼu lea ʼo Afelika, mo te kau Initia ʼo Amelika, mo Asia, mo Eulopa pea mo te ʼu motu ʼo te Pasifika. (Vakaʼi te lisi ʼae ʼi te  pasina 2190 mo te 2191.) Neʼe fakaʼaogaʼi e te kau faifakaliliu ʼaia ia te huafa ʼo te ʼAtua ʼo mulimuli pe ki te ʼu fakamahino ʼae neʼe tou vakaʼi ʼi muʼa atu. Pea ko ʼihi ʼi te ʼu fakaliliu ʼaia ʼo te ʼu Tohi Fakakeleka Fakakilisitiano neʼe ta heʼeki faʼa fualoa. Ohage la ko te Tohi-Tapu Fakalotuma (1999), ʼae ʼe tuʼu ai te huafa ʼo “Jihova” tuʼa 51 ia vaega ʼe 48, mo te Tohi-Tapu ʼi te lea Batak Toba (1989) mai Itonesia ʼae ʼe fakaʼaogaʼi tuʼa 110 ai te huafa ʼo “Jahowa.”

ʼE mahino papau ia, ʼe ʼi ai te tupuʼaga lelei ʼo te toe fakatuʼu ʼo te huafa ʼo te ʼAtua, ko Sehova, ʼi te ʼu Tohi Fakakeleka Fakakilisitiano. Neʼe ko te faʼahi ʼaia neʼe fai e te kau faifakaliliu ʼo te Fakaliliu ʼo Te Malama Foʼou. ʼE natou fakaʼapaʼapa lahi ki te huafa ʼo te ʼAtua pea mo tokakaga ke mole natou toʼo he faʼahi neʼe tuʼu ʼi te ʼu ʼuluaki tohi.—Fakaha 22:18, 19.