ʼUluaki Hau 12:1-33
12 Neʼe alu leva ia Lopoame ki Sekemi, he neʼe ʼomai fuli te kau Iselaele ki Sekemi+ ke fakanofo hau ia ia.+
2 Pea neʼe logo ia Selopoamo, te foha ʼo Nepate ki ai. (ʼI te temi ʼaia, neʼe kei nofo ʼi Esipito he neʼe hola ʼuhi ko te Hau ko Salomone pea neʼe nofo ai leva ʼi Esipito.)+
3 Neʼe fekauʼi leva ʼihi tagata ke natou olo ʼo ʼaumai ia ia. Pea hili ʼaia, neʼe haʼu ia Selopoamo mo te hahaʼi katoa ʼo Iselaele kia Lopoame, ʼo natou ui age:
4 “Neʼe fakamamafa e tau tamai tamatou kavega.+ Kae kapau ʼe ke fakamaʼamaʼa te gaue kinakina mo te kavega mamafa* ʼae neʼe fakamaʼua mai e tau tamai kia matou, ʼe matou tauhi anai kia koe.”
5 Neʼe ina ui kia natou: “Kotou olo pea kotou toe liliu mai hili ʼaho ʼe tolu.” Pea neʼe olo ai te hahaʼi.+
6 Neʼe alu leva te Hau ko Lopoame ʼo kumi tokoni ki te kau matuʼa ʼae neʼe gaue maʼa tana tamai ko Salomone ʼi tana kei maʼuli. Neʼe ina fehuʼi age kia natou: “Kotea la he tali ʼe feala ke au fai ki te hahaʼi ʼaia?”
7 Neʼe natou tali age ki ai: “Kapau ʼi te ʼaho nei ʼe ke liliu ko te tagata faifekau ʼa te hahaʼi ʼaia, mo ke mulimuli ki tanatou kole pea mo ke tali lelei kia natou, ʼe natou liliu anai ko hau hahaʼi faifekau ʼo talu ai.”
8 Kae neʼe ina liʼaki te tokoni ʼae neʼe foaki age e te kau matuʼa kia ia, pea neʼe alu ʼo kumi tokoni ki te kau tupulaga ʼae neʼe lalahi ake mo ia pea neʼe liliu ko tana kau gaue.+
9 Neʼe ina fehuʼi age kia natou: “Kotea la he tali ʼe tonu ke tou fai ki te hahaʼi ʼae neʼe natou ui mai: ‘Ke ke fakamaʼamaʼa te kavega ʼae neʼe fakamaʼua mai e tau tamai kia matou’?”
10 Neʼe ui age e te kau tupulaga ʼae neʼe lalahi ake mo ia: “Neʼe ui atu e te hahaʼi ʼaia: ‘Neʼe fakamamafa e tau tamai tamatou kavega, kae ʼe tonu ke ke fakamaʼamaʼa,’ koia koʼeni te meʼa ʼae ʼe tonu ke ke ui kia natou: ‘ ʼE au toe agafefeka age anai au ʼi taku tamai.*
11 Neʼe fakamaʼua atu e taku tamai he kavega mamafa, kae ʼe au toe fakamamafa age anai takotou kavega. Neʼe tauteaʼi koutou e taku tamai ʼaki ni huipi, kae ʼe au tauteaʼi anai koutou ʼaki ni huipi ʼe haʼi ki ai he ʼu meʼa talatala.’ ”
12 Neʼe haʼu leva ia Selopoamo mo te hahaʼi fuli kia Lopoame ʼi te tolu ʼaho, he neʼe ui age e te hau kia natou: “Kotou toe liliu mai hili ʼaho ʼe tolu.”+
13 Kae neʼe tali fefeka age ia te hau ki te hahaʼi, ʼo ina liʼaki te tokoni ʼae neʼe fai age e te kau matuʼa kia ia.
14 Neʼe palalau ki te hahaʼi ʼo mulimuli ki te tokoni ʼa te kau tupulaga, ʼo ina ui: “Neʼe fakamamafa e taku tamai takotou kavega, kae ʼe au toe fakamamafa age anai au. Neʼe tauteaʼi koutou e taku tamai ʼaki ni huipi, kae ʼe au tauteaʼi anai koutou ʼaki ni huipi ʼe haʼi ki ai he ʼu meʼa talatala.”
15 Koia, neʼe mole fakalogo ia te hau ki te hahaʼi, koteʼuhi neʼe takitaki e Sehova te ʼu aluʼaga ʼaia,+ ke hoko ai te folafola ʼae neʼe fai e Sehova ʼaki ia Akisa,+ te tagata Silo kia Selopoamo, te foha ʼo Nepate.
16 ʼI te sisio ʼa te kau Iselaele fuli ki te mole fakalogo ʼa te hau kia natou, neʼe tali e te hahaʼi ki te hau: “ ʼE ʼi ai koa hotatou vahe ia Tavite? Kailoa, ʼe mole ʼi ai hotatou tofiʼa ʼi te foha ʼo Sese. Koia, hahaʼi ʼo Iselaele, kotou toe liliu ki ʼokotou ʼatua. Pea Tavite, ke ke tokaga pe ki tou loto fale!” Neʼe toe liliu ai te kau Iselaele ki ʼonatou ʼapi.*+
17 Kae neʼe hoko atu pe e Lopoame tana pule ki te kau Iselaele ʼae neʼe nonofo ʼi te ʼu kolo ʼo Suta.+
18 Neʼe fekauʼi leva e te Hau ko Lopoame ia Atolame+ ke alu ki te kau Iselaele. Ko Atolame ʼae neʼe pule ki te hahaʼi ʼae neʼe fakamaʼua e te hau ke natou gaue maʼa ia. Kae neʼe natou tuki makaʼi ia ia, ʼo mate ai. Neʼe lava heka te Hau ko Lopoame ki tana saliote ʼo hola ki Selusalemi.+
19 Pea neʼe fakafeagai te kau Iselaele+ ki te fale ʼo Tavite ʼo kaku mai ki te ʼaho nei.
20 ʼI te logo pe ʼa te kau Iselaele kua toe liliu mai ia Selopoamo, neʼe natou pauʼi ia ia ki te fakatahi pea mo fakanofo ia ia ko te hau ʼo Iselaele katoa.+ Neʼe mole he tahi ʼi te hahaʼi neʼe mulimuli ki te famili ʼo Tavite, gata pe ki te telepi ʼo Suta.+
21 ʼI te tau mai ʼa Lopoame ki Selusalemi, neʼe ina fakatahiʼi atu aipe te hahaʼi katoa ʼo Suta mo te telepi ʼo Pesamino. Neʼe ko te ʼu tagata ʼe toko 180 000 neʼe popoto ʼi* te tau. Neʼe fakatahiʼi natou e Lopoame, te foha ʼo Salomone, ke natou tauʼi te hahaʼi ʼo Iselaele pea ke ina toe maʼu ai ia te pule fakahau.+
22 Kae neʼe ui e te ʼAtua moʼoni kia Semaea,+ te tagata ʼa te ʼAtua moʼoni:
23 “ ʼE tonu ke ke ui kia Lopoame te foha ʼo Salomone, te hau ʼo Suta, mo te hahaʼi katoa ʼo Suta, mo Pesamino pea mo te toe ʼo te hahaʼi:
24 ‘Koʼeni te folafola ʼa Sehova: “ ʼE mole tonu ke kotou olo ʼo tauʼi ʼokotou tehina Iselaele. Kotou tahi liliu ki tona ʼapi, he neʼe au takitaki te aluʼaga ʼaia.” ’ ”+ Neʼe natou fakalogo ai ki te folafola ʼa Sehova ʼo natou toe liliu ki ʼonatou ʼapi, ohage pe ko tona fakatotonu age e Sehova.
25 Neʼe laga leva e Selopoamo ia te kolo ko Sekemi+ ʼi te potu moʼugaʼia ʼo Efalaimi pea neʼe nofo ai. Pea neʼe mavae mai ai ʼo ina laga ia te kolo ko Penuele.+
26 Neʼe ui e Selopoamo ʼi tona loto: “ ʼE toe liliu anai te puleʼaga ki te fale ʼo Tavite.+
27 Kapau ʼe haga olo te hahaʼi ʼaeni ʼo momoli ni sakilifisio ʼi te fale ʼo Sehova ʼi Selusalemi,+ ʼe toe maliu anai mo te loto ʼo te hahaʼi ʼaeni ki tonatou ʼaliki, ia Lopoame, te Hau ʼo Suta. ʼEi, ʼe natou matehi anai au, pea ʼe natou toe liliu anai kia Lopoame, te Hau ʼo Suta.”
28 Hili tana kumi tokoni, neʼe faʼu leva e te hau he ʼu ʼuhiʼi pipi aulo ʼe lua+ pea neʼe ina ui ki te hahaʼi: “ ʼE kinakina fau takotou olo ʼae ki Selusalemi. Hahaʼi ʼo Iselaele, koʼeni tou ʼAtua ʼae neʼe ina fakamavae koe mai te fenua ʼo Esipito.”+
29 Neʼe ina fakatuʼu leva te tahi ʼi Petele,+ pea mo te tahi ʼi Tane.+
30 Neʼe agahala ai te hahaʼi,+ pea neʼe natou olo ʼo kaku ʼosi ki Tane ke natou atolasio ai ki te ʼuhiʼi pipi aulo.
31 Pea neʼe ina laga he ʼu fale tauhi ʼi te ʼu faʼahi maʼoluga pea mo ina fakanofo he kau pelepitelo neʼe ina filifili mai te hahaʼi, kae neʼe mole ko he kau Levite.+
32 Neʼe toe fakatuʼutuʼu foki e Selopoamo he ʼaho lahi, ʼi te 15 ʼaho ʼo te valu mahina, ohage ko te ʼaho lahi ʼae neʼe fai ʼi Suta.+ Neʼe ina momoli ʼi te ʼaletale ʼae neʼe ina fai ʼi Petele+ ni sakilifisio ki te ʼu ʼuhiʼi pipi ʼae neʼe ina faʼu, pea ʼi Petele neʼe ina fakanofo he kau pelepitelo ke natou tauhi ʼi te ʼu faʼahi maʼoluga.
33 Pea neʼe ina kamata fai leva ni molaga ʼi te ʼaletale ʼae neʼe ina fai ʼi Petele, ʼi te 15 ʼaho ʼo te valu mahina, ʼi te mahina ʼae neʼe ina filifili pe e ia totonu. Neʼe ina fakatuʼutuʼu he ʼaho lahi maʼa te hahaʼi ʼo Iselaele, pea neʼe ina fai he ʼu sakilifisio ʼi te ʼaletale, ʼo tuku ke kohu te ʼu sakilifisio ʼaia.
Nota
^ Peʼe “mamahi.”
^ Hep. “ ʼE liliu anai toku kauʼi tuhi veliveli ʼo matolu age ʼi te koga loto ʼo taku tamai.”
^ Hep. “fale la.”
^ Hep. “filifili ki.”
