ʼUluaki Hau 13:1-34
13 Neʼe fakatotonu leva e Sehova ki he tagata ʼa te ʼAtua+ ke mavae ʼi Suta ʼo alu ki Petele. Neʼe kei tuʼu ovi ia Selopoamo ki te ʼaletale,+ ʼo ina fai he ʼu sakilifisio neʼe ina tutu ke kohu.
2 Pea neʼe kalaga te tagata ʼa te ʼAtua ki te ʼaletale, ʼo mulimuli ki te meʼa ʼae neʼe fakatotonu age e Sehova, ʼo ina ui: “ ʼAletale, ʼaletale, koʼeni te folafola ʼa Sehova: ‘ ʼE tupu anai he foha ʼi te famili ʼo Tavite pea ʼe higoa anai ko Sosiasi!+ ʼAletale, ʼe ina fakaʼaogaʼi anai koe ke sakilifisioʼi ai te kau pelepitelo ʼo te ʼu faʼahi maʼoluga, ʼae ʼe natou fai he ʼu sakilifisio ia koe ʼo tutu ke kohu, pea ʼe ina tutu anai te ʼu huiʼi tagata ia koe.’ ”+
3 ʼI te ʼaho ʼaia, neʼe ina foaki he fakailoga,* ʼo ina ui: “Koʼeni te fakailoga* ʼae neʼe fakaha e Sehova: ʼE mafaʼa anai te ʼaletale pea ʼe mafola anai ʼi lalo te lefulefu* ʼae neʼe ʼi ai.”
4 ʼI te temi pe ʼae neʼe logo ai ia te hau ko Selopoamo ki te kalaga ʼa te tagata ʼa te ʼAtua moʼoni ki te ʼaletale ʼi Petele, neʼe ina toʼo kehe ai tona nima mai te ʼaletale ʼo ina faoʼi ʼo hinoʼi te tagata pea mo ui: “Kotou puke ia ia!”+ ʼI te moʼi temi pe ʼaia, neʼe mate noa* ai tona nima ʼae neʼe ina faoʼi ki te tagata, pea neʼe mole kei feala hona toe peluki.+
5 Neʼe mafaʼa ai te ʼaletale pea mo mafola ʼi lalo te lefulefu, ʼo mulimuli pe ki te fakailoga* ʼae neʼe fakaha age e Sehova ki te tagata ʼa te ʼAtua moʼoni.
6 Pea neʼe ui e te hau ki te tagata ʼa te ʼAtua moʼoni: “Fakalelei siʼou loto, kae ke ke kole ia te manavaʼofa* ʼo Sehova tou ʼAtua, pea mo ke hufakiʼi au ke toe lelei siʼoku nima.”+ Neʼe kole ai e te tagata ʼa te ʼAtua moʼoni ia te manavaʼofa ʼo Sehova, pea neʼe toe lelei ai te nima ʼo te hau.
7 Neʼe ui leva e te hau ki te tagata ʼa te ʼAtua moʼoni: “Ta olo ʼo kakai io ʼoku, pea ʼe au foaki atu anai he meʼa ʼofa.”
8 Kae neʼe ui age e te tagata ʼa te ʼAtua moʼoni: “Tatau aipe pe ʼe ke foaki mai te vaelua ʼo tou fale, kae ʼe mole au alu anai mo koe pea ʼe mole au kai anai he moʼi pane mo inu he moʼi vai ʼi te koga meʼa ʼaeni.
9 He ʼe koʼeni te meʼa ʼae neʼe fakatotonu mai e Sehova: ‘ ʼE mole tonu ke ke kai he moʼi pane mo inu he moʼi vai, pea ʼe mole tonu ke ke toe liliu ʼi te ala ʼae neʼe ke haʼu ai.’ ”
10 Koia, neʼe alu ai ʼi he tahi age ala, pea neʼe mole toe liliu ʼi te ala ʼae neʼe haʼu ai ki Petele.
11 Neʼe ʼi ai he polofeta kua matuʼa neʼe nofo ʼi Petele. Neʼe ʼomai ʼona foha ki tona ʼapi ʼo fakamatala age te ʼu meʼa fuli ʼae neʼe fai e te tagata ʼa te ʼAtua moʼoni ʼi te ʼaho ʼaia ʼi Petele, pea mo te ʼu palalau ʼae neʼe ina fai ki te hau. ʼI tanatou ʼosi fakamatala age ki tanatou tamai te faʼahi ʼaia,
12 neʼe fehuʼi age e tanatou tamai: “Neʼe alu ʼi te ala fea?” Pea neʼe fakaha age e ʼona foha ki ai te ala ʼae neʼe alu ai te tagata ʼa te ʼAtua moʼoni, ʼae neʼe haʼu mai Suta.
13 Neʼe ina ui leva ki ʼona foha: “Kotou teuteuʼi te asino maʼaku.” Neʼe natou teuteuʼi ai te asino pea neʼe heka leva ki ai.
14 Neʼe ina muliʼi te tagata ʼa te ʼAtua moʼoni, pea neʼe ina maʼu atu leva neʼe heka ʼi he lalo fuʼu ʼakau ʼe lahi. Pea neʼe ina ui age ki ai: “ ʼE ko koe koa te tagata ʼa te ʼAtua moʼoni ʼae neʼe haʼu mai Suta?”+ Pea neʼe ina tali age: “ ʼEi, ko au.”
15 Neʼe ui e te polofeta ki ai: “Ta olo ki toku ʼapi ʼo kai ai he moʼi pane.”
16 Kae neʼe ina ui age: “ ʼE mole feala ke au toe liliu mo koe peʼe ke au tali tau fakaafe, pea ʼe mole feala ke au kai he moʼi pane mo inu he moʼi vai mo koe ʼi te koga meʼa ʼaeni.
17 He neʼe fakatotonu mai e Sehova: ‘ ʼE mole tonu ke ke kai he moʼi pane mo inu he moʼi vai ʼi ai. ʼE mole tonu ke ke toe liliu ʼi te ala ʼae neʼe ke haʼu ai.’ ”
18 Kae neʼe ui age e te polofeta: “ ʼE au polofeta pe foki la ohage pe ko koe, pea neʼe fakaha mai e he ʼaselo te fakatotonu ʼaeni mai ia Sehova: ‘Ke ke toe liliu mo ia ki tou ʼapi, ke kai ai hana moʼi pane pea mo inu hana moʼi vai.’ ” (Neʼe ina kakaʼi ia ia.)
19 Neʼe toe liliu ai te tagata ʼa te ʼAtua mo ia, ʼo kai tana moʼi pane pea mo inu tana moʼi vai ʼi tona ʼapi.
20 Lolotoga tanā heheka ʼi te laupapa, neʼe fakaha age e Sehova he logo ki te polofeta ʼae neʼe toe liliu mai mo te tagata ʼa te ʼAtua,
21 pea neʼe kalaga te polofeta ki te tagata ʼa te ʼAtua moʼoni ʼae neʼe haʼu mai Suta: “Koʼeni te folafola ʼa Sehova: ‘Neʼe ke talagataʼa ki te fakatotonu ʼa Sehova pea neʼe mole ke fakahoko te fakatotonu ʼae neʼe fai atu e Sehova, tou ʼAtua,
22 kae neʼe ke toe liliu ʼo kai tau moʼi pane pea mo inu tau moʼi vai ʼi te koga meʼa ʼaeni, logo la neʼe au ui atu: “ ʼAua naʼa ke kai hau moʼi pane pea mo inu hau moʼi vai.” Koia ʼe mole tuku anai tou sino ki te fale maka ʼo ʼau kui.’ ”+
23 ʼI te ʼosi kai ʼa te tagata ʼa te ʼAtua moʼoni tana moʼi pane pea mo inu tana moʼi vai, neʼe teuteuʼi leva e te polofeta ʼae kua matuʼa te asino maʼa te tagata ʼaia.*
24 Neʼe alu ai leva, kae neʼe ʼohofi ia ia e he laione ʼi te ala ʼo ina matehi ai.+ Neʼe tuku tona sino ʼi te ala, pea neʼe tutuʼu ʼi ʼona tafa te asino pea mo te laione.
25 Neʼe fakalaka ʼi ai he ʼu tagata, ʼo natou sisio ki te tuku ʼo tona sino ʼi te ala pea mo te tuʼu ʼa te laione ʼi ʼona tafa. Neʼe natou olo ai ki te kolo ʼae neʼe nofo ai te polofeta ʼae kua matuʼa, ʼo natou fakamatala te faʼahi ʼaia.
26 ʼI te logo ki ai ʼa te polofeta ʼae neʼe toe liliu mo ia, neʼe ina ui atu aipe: “ ʼE ko te tagata ʼa te ʼAtua moʼoni ʼae neʼe talagataʼa ki te fakatotonu ʼa Sehova.+ Koia, neʼe tuku e Sehova ia ia ki te laione, ke ʼohofi ai ia ia pea mo matehi, ohage pe ko tona fakaha age e Sehova.”+
27 Neʼe ina ui leva ki ʼona foha: “Kotou teuteuʼi te asino maʼaku.” Pea neʼe natou teuteuʼi ai.
28 Neʼe alu ai leva pea neʼe ina maʼu te sino ʼo te tagata ʼe tuku ʼi te ala, pea mo te asino mo te laione ʼe tutuʼu ʼi ʼona tafa. Neʼe mole kai e te laione te sino ʼo te tagata pea neʼe mole ina ʼohofi te asino.
29 Pea neʼe fata e te polofeta te sino ʼo te tagata ʼa te ʼAtua moʼoni ʼo hili ki te asino, pea neʼe toe liliu mo ia ki tona kolo, ke tagi ki ai pea mo ʼavaifo ia ia.
30 Neʼe tuku leva e te polofeta ki tona fale maka te sino ʼo te tagata ʼa te ʼAtua, pea neʼe fetagihi te hahaʼi, ʼo ui: “Oiaue! Siʼoku tehina!”
31 Hili te ʼavaifo, neʼe ina ui ki ʼona foha: “Ka au mate, ʼe tonu ke kotou tuku toku sino ʼi te faʼahi ʼae ʼe tuku ai te sino ʼo te tagata ʼa te ʼAtua moʼoni. Kotou tuku ʼoku hui ia tafa ʼo ʼona hui.+
32 ʼE hoko moʼoni anai te folafola ʼa Sehova ʼae neʼe kalagaʼi e te tagata ʼaia ki te ʼaletale ʼi Petele pea mo te ʼu fale tauhi fuli ʼi te ʼu faʼahi maʼoluga ʼo te ʼu kolo ʼo Samalia.”+
33 Kae logo la te faʼahi ʼaia neʼe hoko, neʼe mole tafoki ia Selopoamo mai tana aga ʼae ʼe kovi. Kae neʼe hoko atu pe tana fakanofo he kau pelepitelo neʼe ina filifili mai te hahaʼi, ke natou tauhi ʼi te ʼu faʼahi maʼoluga.+ Neʼe ina fakanofo pelepitelo* he tahi pe neʼe fia pelepitelo, ʼo ina ui: “Ke liliu ko he pelepitelo pea ke tauhi ʼi te ʼu faʼahi maʼoluga.”+
34 Ko te agahala ʼaia ʼo te loto fale ʼo Selopoamo+ neʼe iku ai ki tonatou maumauʼi mo tonatou pulihi katoa ʼi te fuga kele.+
Nota
^ Peʼe “fakamelomelo.”
^ Peʼe “fakamelomelo.”
^ Ko te lefulefu ʼae kua lahi ai te gako ʼo te ʼu sakilifisio.
^ Peʼe “palalisia.”
^ Peʼe “fakamelomelo.”
^ Peʼe “ke ke fakamalū ifo te fofoga.”
^ Hep. “te polofeta ʼae neʼe toe liliu mai mo ia.”
^ Hep. “fakafonu te nima ʼo.”
