ʼUluaki Hau 21:1-29
21 Hili ʼaia, neʼe ʼi ai leva he aluʼaga neʼe hoko ʼo ʼuhiga mo te gaueʼaga vite ʼa Napote, te tagata Siseleele. Neʼe tuʼu te gaueʼaga vite ʼaia ʼi Siseleele,+ ʼo ovi ki te fale hau ʼo Akapo, te hau ʼo Samalia.
2 Neʼe ui e Akapo kia Napote: “Foaki mai kia au tau gaueʼaga vite ke au to ai he ʼu lauʼakau, he ʼe tuʼu ovi mai ki toku fale. ʼE au foaki atu anai he gaueʼaga vite ʼe lelei age moʼona fetogi. Peʼe kapau ʼe ke loto ki ai, ʼe au totogi atu anai tau gaueʼaga vite.”
3 Kae neʼe ui e Napote kia Akapo: “ ʼE au fakaʼapaʼapa kia Sehova koia ʼe mole feala ke au foaki atu te tofiʼa ʼo ʼaku kui.”+
4 Koia, neʼe toe liliu ai ia Akapo ki tona fale, pea neʼe ita mo lotomamahi ʼuhi ko te tali age ʼa Napote, te tagata Siseleele: “ ʼE mole au foaki atu anai te tofiʼa ʼo ʼaku kui.” Neʼe takoto leva ki tona palepale, ʼo haga ki te kaupa, pea neʼe mole fia kai.
5 Neʼe haʼu leva tona ʼohoana ko Sesapele+ ʼo fehuʼi age ki ai: “He koʼe ʼe ke lotomamahi feia, ʼo tupu ai tau mole fia kai?”
6 Neʼe ina tali age: “Koteʼuhi neʼe au ui age kia Napote, te tagata Siseleele: ‘Foaki mai tau gaueʼaga vite kae ʼe au totogi atu. Peʼe kapau ʼe ke loto ki ai, ʼe au foaki atu anai he tahi age gaueʼaga vite moʼona fetogi.’ Kae neʼe ina tali mai: ‘ ʼE mole au foaki atu anai taku gaueʼaga vite.’ ”
7 Neʼe ui age e tona ʼohoana ko Sesapele: “Pe ʼe mole koa la ko koe te hau ʼo Iselaele? Tuʼu ake ʼo kai pea ke fiafia tou loto. ʼE au foaki atu anai te gaueʼaga vite ʼa Napote, te tagata Siseleele.”+
8 Neʼe ina fai ai he ʼu tohi ʼi te higoa ʼo Akapo pea neʼe ina fakamaʼu te ʼu tohi ʼaia ʼaki te fakailoga ʼo te hau.+ Neʼe ina momoli leva ki te kau takitaki+ mo te kau ʼaliki ʼae neʼe nonofo ʼi te kolo ʼo Napote.
9 Neʼe ina tohi ai: “Kotou tala he sesunio, pea kotou fakaheka ia Napote ia muʼa ʼo te hahaʼi fuli.
10 Pea kotou fakaheka he ʼu tagata ʼe toko lua ʼe mole honā ʼuhiga ke hahaga kia ia. Ke nā tukugakoviʼi leva ia ia:+ ‘Neʼe ke laukovi ki te ʼAtua pea mo te hau!’+ Pea kotou ʼave leva ia ia ki te tuʼa kolo ʼo tuki makaʼi ʼo kaku ki tona mate.”+
11 Koia, neʼe fai ai e te ʼu tagata ʼo te kolo ʼo Napote, ia te kau takitaki mo te kau ʼaliki ʼae neʼe nonofo ʼi tona kolo, te ʼu meʼa ʼae neʼe tohi e Sesapele ke natou fai.
12 Neʼe natou tala he sesunio pea neʼe natou fakaheka ia Napote ia muʼa ʼo te hahaʼi fuli.
13 Neʼe ʼomai leva te ʼu tagata ʼe toko lua ʼe mole honā ʼuhiga, ʼo heheka ʼo hahaga mai kia ia. Pea neʼe nā tukugakoviʼi leva ia Napote ia muʼa ʼo te hahaʼi: “Neʼe laukovi ia Napote ki te ʼAtua pea mo te hau!”+ Hili ʼaia, neʼe ʼave ia ia e te hahaʼi ki te tuʼa kolo ʼo natou tuki makaʼi ʼo kaku ki tona mate.+
14 Pea neʼe natou fakaha leva kia Sesapele: “Kua tuki makaʼi ia Napote ʼo kaku ki tona mate.”+
15 ʼI te logo pe ʼae ʼa Sesapele neʼe tuki makaʼi ia Napote ʼo kaku ki tona mate, neʼe ina ui age kia Akapo: “Tuʼu ake pea ke alu ʼo toʼo maʼa koe te gaueʼaga vite ʼa Napote, te tagata Siseleele,+ ʼae neʼe mole ina loto ke ke totogi age, he ʼe kua mate ia Napote.”
16 ʼI te logo pe ʼae ʼa Akapo kua mate ia Napote, neʼe tuʼu ake ai ʼo alu ki te gaueʼaga vite ʼa Napote, te tagata Siseleele ʼo toʼo maʼa ia.
17 Kae neʼe ui leva e Sehova kia Elia,+ te tagata Tisipe:
18 “Tuʼu ake pea ke alu kia Akapo, te hau ʼo Iselaele, ʼae ʼe nofo ʼi Samalia.+ ʼE nofo nei ʼi te gaueʼaga vite ʼa Napote, ʼae neʼe alu ʼo toʼo maʼa ia.
19 Pea ʼe tonu ke ke ui age ki ai: ‘Koʼeni te folafola ʼa Sehova: “Neʼe ke fakapogi koa he tagata+ pea mo toe toʼo tana gaueʼaga?” ’+ Pea ke ke ui leva ki ai: ‘Koʼeni te folafola ʼa Sehova: “ ʼI te koga meʼa ʼae neʼe ʼemo ai e te ʼu kuli te toto ʼo Napote, ʼe toe ʼemo anai e te ʼu kuli tou toto.” ’ ”+
20 Pea neʼe ui leva e Akapo kia Elia: “Toku fili, kua ke maʼu au!”+ Neʼe ina tali age: “ ʼEi, kua au maʼu koe. Neʼe ui e te ʼAtua: ‘Neʼe ke fakatotonu ke ke fai te meʼa ʼae ʼe kovi kia mata ʼo Sehova,+
21 koia ʼe au fakahoko anai kia koe he malaʼia, pea ʼe au tafiʼi anai koe pea mo pulihi katoa ʼi tou famili ia te hahaʼi tagata fuli,*+ maʼia mo ia ʼae ʼe mole hona ʼuhiga ʼi Iselaele.+
22 Pea ʼe au fai anai ki tou famili te meʼa pe ʼae neʼe au fai ki te famili ʼo Selopoamo,+ te foha ʼo Nepate pea mo te famili ʼo Paesa,+ te foha ʼo Akisa, he neʼe ke fakatupu toku hauhau pea mo uga ia Iselaele ke agahala.’
23 Pea koʼeni te folafola ʼa Sehova ʼo ʼuhiga mo Sesapele: ‘ ʼE kai anai e te ʼu kuli ia Sesapele ʼi te kele ʼae ʼe ʼi Siseleele.+
24 Ko he tahi pe ʼo te famili ʼo Akapo ʼe mate ʼi te kolo, ʼe kai anai e te ʼu kuli. Pea ko he tahi pe ʼe mate ʼi te tuʼa kolo, ʼe kai anai e te ʼu manulele.+
25 ʼE mahino ia, neʼe heʼeki ʼi ai he tahi neʼe hage ko Akapo,+ ʼae neʼe ina fakatotonu ke ina fai te meʼa ʼae ʼe kovi kia mata ʼo Sehova pea neʼe uga ia ia e tona ʼohoana ko Sesapele ke ina fai te ʼu meʼa ʼaia.+
26 Neʼe kovi ʼosi age tana aga ʼi tana tauhi ʼae ki te ʼu fakatata fakalialia,* ohage pe ko te kau Amole fuli ʼae neʼe kapu e Sehova ia muʼa ʼo te kau Iselaele.’ ”+
27 ʼI te logo pe ʼae ʼa Akapo ki te ʼu folafola ʼaia, neʼe ina hae ʼona teu pea mo ʼaofi ia ia ʼaki he taga.* Neʼe sesunio, mo takoto mo te taga ʼaia pea neʼe haʼele lotomamahi.
28 Pea neʼe ui leva e Sehova kia Elia, te tagata Tisipe:
29 “Neʼe ke sio koa ki te fakamalalo ifo ʼa Akapo ʼuhi ko au?+ Neʼe ina fakamalaloʼi ifo ia ia ʼi ʼoku muʼa, koia ʼe mole au fakahoko anai te malaʼia ʼi tona temi maʼuli. ʼE au fakahoko anai te malaʼia ki tona famili ʼi te temi maʼuli ʼo tona foha.”+
Nota
^ Hep. “he tahi ʼe livai ki he kaupa.” Neʼe ko he kupusiga palalau neʼe fai ki he ʼu tagata ʼe kita fehiʼa ki ai.
^ ʼI te Fakahepeleo, ʼe lagi haʼu mai he tahi kupu ʼe fakaʼuhiga ki te ʼu faifekau manu. ʼE fakaʼaogaʼi moʼo fakaha te fehiʼa.
^ Vakaʼi Te ʼu Kupu.
