ʼUluaki Hau 5:1-18
5 Neʼe logo leva ia Hilame, te hau ʼo Tile,+ ki te kua fakanofo hau ʼo Salomone moʼo fetogi tana tamai. Neʼe ina fekauʼi ai ʼana hahaʼi faifekau ke olo kia Salomone, he neʼe kaumeʼa tuʼumaʼu pe ia Hilame mo Tavite.*+
2 Neʼe fakaha leva e Salomone kia Hilame:+
3 “ ʼE ke iloʼi lelei pe neʼe mole feala kia Tavite taku tamai ke ina laga he fale ke fakakololiaʼi ai te huafa ʼo Sehova tona ʼAtua, he neʼe ina tauʼi ʼona fili ʼae neʼe ʼomai mai te ʼu faʼahi fuli pe, ʼo kaku ki te foaki age leva e Sehova kia ia te malo ʼae ʼi ʼona fili.+
4 Kae ʼi te temi ʼaeni, neʼe foaki mai e Sehova toku ʼAtua te tokalelei ʼi ʼoku tafaʼaki fuli.+ ʼE mole he tahi ʼe fakafeagai mai kia au pea ʼe mole hoko ni tuʼutamaki.+
5 Koia, ʼe au fia laga he fale ke fakakololiaʼi ai te huafa ʼo Sehova toku ʼAtua, ohage pe ko te fakapapau ʼae neʼe fai e Sehova kia Tavite taku tamai, ʼi tana ui age: ‘Ko tou foha ʼae ka au tuku ke heka ʼi tou hekaʼaga fakahau moʼo fetogi ia koe, ʼe ko ia ʼae ka ina laga he fale ke fakakololiaʼi ai toku huafa.’+
6 Koia, ke ke fakatotonu ki tau hahaʼi ke natou tuʼusi maʼaku he ʼu fuʼu sete mai Lipane.+ Pea ʼe gaue anai ʼaku hahaʼi faifekau mo ʼau hahaʼi faifekau, pea ʼe au totogi anai te gaue ʼo ʼau hahaʼi faifekau ʼo mulimuli pe ki te totogi ʼae ʼe ke fakatuʼutuʼu anai ki ai, he ʼe ke iloʼi lelei pe, ʼe mole he tahi ia matou ʼe poto ʼi te tuʼusi ʼakau ohage ko te kau Sitoni.”+
7 ʼI te logo ʼa Hilame ki te ʼu folafola ʼaia ʼa Salomone, neʼe fiafia ʼosi pea neʼe ina ui: “Ke vikiʼi ia Sehova ʼi te ʼaho nei, he neʼe ina foaki kia Tavite he foha ʼe poto ke pule ki te toe hahaʼi kaugamalie ʼaia!”+
8 Pea neʼe fakaha age e Hilame kia Salomone: “Neʼe au fagono ki tau kole. ʼE au fai anai ia meʼa fuli ʼe ke loto ki ai, ʼo au foaki atu te ʼu ʼakau ʼae ko te sete pea mo te senelie.+
9 ʼE fetuku anai e taku hahaʼi faifekau te ʼu ʼakau ʼaia mai Lipane ki te tai, pea ʼe au haʼihaʼi anai ke fakatafea atu ʼi te tai ki te koga meʼa ʼae ʼe ke fakaha mai anai. Pea ʼe au veteki anai ʼi ai te ʼu ʼakau, pea ʼe ke haʼu leva ʼo ʼave. Pea ʼe ke foaki mai anai te meʼa kai ʼae ka au kole atu maʼa toku loto fale.”+
10 Koia, neʼe foaki ai e Hilame te ʼu ʼakau fuli ʼae ko te sete mo te senelie ʼae neʼe loto ki ai ia Salomone.
11 Pea ko te meʼa kai leva ʼae neʼe foaki age e Salomone maʼa te loto fale ʼo Hilame neʼe ko fua kole* fulumeto ʼe 20 000 pea mo fua kole lolo oliveto lelei* ʼe 20. Ko te ʼu meʼa ʼaia neʼe foaki e Salomone kia Hilame ʼi te taʼu fuli.+
12 Pea neʼe foaki e Sehova kia Salomone te poto ohage pe ko Tana fakapapau age ki ai.+ Neʼe tokalelei ia Hilame mo Salomone, pea neʼe nā fai he fuakava.
13 Neʼe fakamaʼua leva e te Hau ko Salomone he hahaʼi neʼe ʼomai mai Iselaele katoa ke natou gaue maʼa ia. Neʼe ko tagata ʼe toko 30 000.+
14 Neʼe ina fakatuʼutuʼu natou ko he ʼu kutuga ʼe taki 10 000 tagata, pea neʼe ina fekauʼi he kutuga ʼe tahi ʼi te mahina fuli ke olo ki Lipane. Neʼe natou nonofo ʼi Lipane ʼi he mahina katoa pea natou nonofo ʼi ʼonatou ʼapi lolotoga mahina ʼe lua. Pea ko Atonilane+ ʼae neʼe pule ki te ʼu tagata ʼaia neʼe fakamaʼua ke natou gaue maʼa te hau.
15 Neʼe ko kau gaue* ʼe 70 000 ʼa Salomone pea mo ʼana hahaʼi ta maka+ ʼe 80 000 neʼe gaue ʼi te ʼu moʼuga,+
16 pea mo tana kau takitaki gaue+ ʼe toko 3 300 neʼe natou tokakaga ki te kau gaue.
17 Neʼe fakatotonu e te hau ke natou keli he ʼu foʼi maka lalahi, he ʼu foʼi maka totogi kovi+ pea ke natou taʼataʼaga,+ ke fai ʼaki te fakatafito+ ʼo te fale.
18 Koia, ko te kau tufuga laga fale ʼa Salomone, mo te kau tufuga laga fale ʼa Hilame pea mo te kau Kepale+ neʼe natou taʼataʼaga te ʼu foʼi maka, pea neʼe natou teuteuʼi te ʼu ʼakau pea mo te ʼu foʼi maka moʼo fakatuʼu ʼaki te fale.
Nota
^ Peʼe “neʼe ʼofa tuʼumaʼu pe Hilame ia Tavite.”
^ Peʼe “lolo ʼo te ʼu oliveto ʼae neʼe tuki.”
^ Ko he kole ʼe tahi, neʼe ko lite ʼe 220. Vakaʼi Te ʼu Fakamahino 2.14.
^ Peʼe “hahaʼi fetuku meʼa mamafa.”
