ʼUluaki Koloniko 19:1-19
19 Neʼe mate leva ia Nakase te hau ʼo te kau Amone, pea neʼe fetogi ia ia e tona foha.+
2 Neʼe ui e Tavite: “ ʼE au fakaha anai toku ʼofa agatonu+ kia Hanune te foha ʼo Nakase he neʼe fakaha mai e tana tamai kia au tona ʼofa agatonu.” Koia, neʼe fekauʼi e Tavite he ʼu tagata ʼave logo ke natou olo ʼo fakafimalieʼi ia ia ʼuhi ko te mate ʼo tana tamai. Kae ʼi te temi ʼae neʼe hu ai te kau tagata faifekau ʼa Tavite ki te fenua ʼo te kau Amone+ ʼo fakafimalieʼi ia Hanune,
3 neʼe ui e te kau ʼaliki ʼo te kau Amone kia Hanune: “ ʼE ke manatu koa neʼe fekauʼi mai e Tavite ʼana tagata ke natou fakalotofimalieʼi koe he ʼe ina fia fakaʼapaʼapaʼi tau tamai? ʼE mole koa la ʼomai ʼana tagata faifekau kia koe ke natou vakavakaʼi mo sioʼi te fenua, pea ke natou maumauʼi?”
4 Koia, neʼe toʼo ai e Hanune te kau tagata faifekau ʼa Tavite ʼo ina tele ʼonatou kava+ mo tuʼusi ʼonatou kofu ʼi ʼonatou koga loto. Pea neʼe ina tuku leva ke natou olo.
5 ʼI te fakaha age kia Tavite te meʼa ʼae neʼe fai ki te ʼu tagata ʼaia, neʼe ina foimo fekauʼi atu aipe he tahi ʼu tagata ke olo kia natou, koteʼuhi neʼe natou ufiufi ʼosi. Neʼe ui e te hau kia natou: “Kotou nonofo ʼi Seliko+ ʼo kaku ki te loloa ʼo ʼokotou kava, pea hoki kotou toe liliu mai leva.”
6 Ki muli age, neʼe tokagaʼi leva e te kau Amone tonatou kua fehiʼaʼinaʼi e Tavite. Koia, neʼe fekauʼi ai e Hanune mo te kau Amone he kau tagata ʼave logo ke olo mo he ʼu taleta* siliva ʼe 1 000 ʼo totogi ʼaki he ʼu saliote pea mo he ʼu tagata heka hosi mai Mesopotamia,* mo Alame-maaka pea mo Tesopa.+
7 Koia neʼe natou totogi ai te ʼu saliote ʼe 32 000, ʼo feia mo te hau ʼo Maaka pea mo tana hahaʼi. Neʼe natou olo ai leva ʼo fakatuʼu tonatou nofoʼaga ia muʼa ʼo Metepa.+ Neʼe mavae te kau Amone mai ʼonatou kolo, ʼo natou fakatahitahi pea mo natou olo ki te tau.
8 ʼI te logo ʼa Tavite ki ai, neʼe ina fekauʼi ia Soape+ pea mo te foʼi kautau katoa, ʼo kau ai mo ʼana tagata tau malolohi.+
9 Neʼe ʼomai te kau Amone ʼo fakaʼatu ki te tau ʼi te huʼaga ʼo te kolo, kae neʼe tutuʼu te ʼu hau ʼae neʼe ʼomai ʼo tokoni kia natou ʼi te tuʼa kolo.
10 ʼI te sio ʼa Soape ʼe tauʼi ia ia mai muʼa pea mai muli, neʼe ina filifili ai he kau tagata toʼa mai te kautau ʼa Iselaele pea neʼe ina fakaʼatu ke natou tauʼi te kau Silia.+
11 Neʼe ina tuku leva te toe ʼo te kau tagata ke takitaki e* tona tehina ko Apisai,+ pea ke ina fakaʼatu ke natou tauʼi te kau Amone.
12 Pea neʼe ina ui age: “Kapau ʼe malolohi age te kau Silia+ ia au, pea ʼe ke haʼu anai ʼo haofaki au. Kae kapau ʼe malolohi age te kau Amone ia koe, ʼe au haofaki anai koe.
13 ʼE tonu ke tou malolohi mo lototoʼa+ ʼuhi ko tatatou hahaʼi mo te ʼu kolo ʼo totatou ʼAtua, pea ʼe fai anai e Sehova te meʼa ʼae ʼe lelei ki ʼona mata.”
14 Pea neʼe olo leva ia Soape mo tana kau tagata ʼo tauʼi te kau Silia, kae neʼe natou feholaki.+
15 ʼI te sisio ʼa te kau Amone ki te kua feholaki ʼa te kau Silia, neʼe natou toe feholaki mo natou ia muʼa ʼo Apisai te tehina ʼo Soape, ʼo hu ki te kolo. Hili ʼaia, neʼe toe liliu leva ia Soape ki Selusalemi.
16 ʼI te sisio ʼa te kau Silia ki te kua malo ʼa Iselaele, neʼe natou fekauʼi ai he ʼu tagata ʼave logo ke olo ʼo pauʼi te kau Silia ʼae neʼe ʼi te potu fenua ʼo te Vai Tafe.*+ Pea neʼe takitaki natou e Sofase, te pule ʼo te foʼi kautau ʼa Atatesele.+
17 Neʼe fakaha age te faʼahi ʼaia kia Tavite. Neʼe ina foimo fakatahiʼi atu aipe ia Iselaele katoa ʼo natou fakalaka ʼi te Solotane, ʼo natou olo ai ʼo fakaʼatu ke natou tauʼi te kau Silia. Neʼe alu ai ia Tavite ʼo tauʼi te kau Silia, pea neʼe natou fetauʼaki ai.+
18 Kae neʼe feholaki te kau Silia ia muʼa ʼo Iselaele. Neʼe matehi e Tavite te ʼu tagata taki saliote ʼe toko 7 000 mo te kau solia Silia neʼe haʼele lalo ʼe toko 40 000. Pea neʼe ina matehi ia Sofase te pule ʼo te foʼi kautau.
19 ʼI te logo ʼa te ʼu tagata faifekau ʼa Atatesele ki te kua malo ʼa Iselaele,+ neʼe natou foimo kumi ai te tokalelei mo Tavite pea neʼe natou fakalogo leva kia ia.+ Neʼe mole toe fia tokoni te kau Silia ki te kau Amone.
Nota
^ Ko te mamafa ʼo he taleta ʼe tahi, neʼe ko kilo ʼe 34,2. Vakaʼi Te ʼu Fakamahino 2.14.
^ Hep. “Alame-nahalaime.”
^ Hep. “ki te ʼu nima ʼo.”
^ ʼE fakaʼuhiga ki te Efalate.
