ʼUluaki Koloniko 21:1-30
21 Neʼe fakatuʼutuʼu leva e Satana* ke ina tauʼi ia Iselaele pea neʼe ina uga ia Tavite ke ina lau te hahaʼi ʼo Iselaele.+
2 Koia, neʼe ui e Tavite kia Soape+ mo te kau takitaki ʼo te hahaʼi: “Kotou olo ʼo lau te hahaʼi ʼo Iselaele mai Pele-sepa ki Tane.+ Pea kotou fakaha mai ke au iloʼi tonatou kaugamalie.”
3 Kae neʼe ui age e Soape: “ ʼOfa pe ke haga ia Sehova ʼo fakatuputupu te kaugamalie ʼo tana hahaʼi ʼo tuʼa 100! Siʼoku ʼaliki te hau, ʼe mole koa la kua natou tauhi fuli kia koe? He koʼe koa ʼe ke fia lau te hahaʼi? He koʼe koa ʼe lakahala anai ia Iselaele ʼuhi ko koe?”
4 Kae neʼe malohi age te folafola ʼa te hau ʼi ʼae ʼa Soape. Koia neʼe mavae ai ia Soape ʼo foli Iselaele katoa, hili ʼaia, neʼe toe liliu leva ki Selusalemi.+
5 Neʼe fakaha age e Soape kia Tavite te kaugamalie ʼo te hahaʼi ʼae neʼe tohi. ʼI Iselaele katoa, neʼe ko tagata ʼe tahi miliona teau afe neʼe popoto ʼi te fakaʼaogaʼi ʼo te heleta, pea ʼi Suta neʼe ko tagata ʼe toko 470 000 neʼe popoto ʼi te fakaʼaogaʼi ʼo te heleta.+
6 Kae neʼe mole lau te kaugamalie ʼo te ʼu telepi ʼo Levi pea mo Pesamino,+ he ʼe kia Soape neʼe kovi ʼaupito ia te fakatotonu ʼae neʼe fai e te hau.+
7 Neʼe kovi ʼaupito ki te ʼAtua moʼoni ia te faʼahi ʼaia, koia neʼe ina tauteaʼi ai ia Iselaele.
8 Neʼe ui leva e Tavite ki te ʼAtua moʼoni: “Neʼe lahi taku agahala+ ʼi taku fai te faʼahi ʼaia. Koia, fakalelei siʼou loto, fakamolemole mai ki taku agahala,+ he neʼe au agavale.”+
9 Neʼe ui leva e Sehova kia Kate,+ te tagata ʼae ʼe ina fakaha kia Tavite te ʼu meʼa ʼae neʼe ha:
10 “Alu pea ke ui age kia Tavite: ‘Koʼeni te folafola ʼa Sehova: “ ʼE au fakaha atu te ʼu aluʼaga ʼe tolu. Filifili te aluʼaga ʼae ʼe tonu anai ke au fakahoko kia koe.” ’ ”
11 Neʼe alu ai ia Kate kia Tavite ʼo ina ui age ki ai: “Koʼeni te folafola ʼa Sehova: ‘Ke ke filifili
12 pe ʼe tonu ke to he hoge lolotoga taʼu ʼe tolu,+ peʼe ke malo ʼou fili ia koe lolotoga mahina ʼe tolu pea ke taʼi koe e te heleta ʼo ʼou fili,+ peʼe tauteaʼi anai e te heleta ʼa Sehova ia te fenua+ ʼaki he taʼi mahaki lolotoga ʼaho ʼe tolu he ʼe fakaʼauha anai e te ʼaselo ʼa Sehova+ te fenua katoa ʼo Iselaele.’ Fakakaukauʼi te tali ʼae ʼe tonu ke au fakaha kia Ia ʼae neʼe ina fekauʼi mai au.”
13 Neʼe ui leva e Tavite kia Kate: “ ʼE au hoha ʼaupito. Fakalelei siʼou loto, kae ke au to ki te ʼu nima ʼo Sehova, he ʼe lahi ʼaupito tona manavaʼofa,+ kae ke ʼaua naʼa au to ki te ʼu nima ʼo te tagata.”+
14 Neʼe fakato leva e Sehova he taʼi mahaki+ ʼi Iselaele pea neʼe mamate ai te toko 70 000 hahaʼi ʼo Iselaele.+
15 Tahi ʼae meʼa, neʼe fekauʼi e te ʼAtua moʼoni he ʼaselo ke ina fakaʼauha ia Selusalemi. Kae ʼi tana ʼamanaki fai te faʼahi ʼaia, neʼe sio ia Sehova pea neʼe fakahemala* ʼo ʼuhiga mo te malaʼia ʼaia.+ Neʼe ina ui ai ki te ʼaselo ʼae neʼe ina fakaʼauha te hahaʼi: “Kua feʼauga,+ tuku ki lalo tou nima.” Neʼe tuʼu ovi te ʼaselo ʼa Sehova ki te hahaʼaga fulumeto ʼa Olanane+ te tagata Sepusi.+
16 ʼI te hiki ake e Tavite ʼona mata, neʼe sio ki te tuʼu ʼa te ʼaselo ʼa Sehova ʼi te vaha ʼo te kele mo te lagi, mo he heleta+ ʼi tona nima neʼe faoʼi ki Selusalemi. Neʼe punonou mo tulolo atu aipe ki te kele+ ia Tavite pea mo te kau takitaki ʼae neʼe natou tui ʼonatou taga.*+
17 Pea neʼe ui age e Tavite ki te ʼAtua moʼoni: “Neʼe mole ko au koa la ʼae neʼe au fakatotonu ke lau ia te hahaʼi? Neʼe ko au ʼae neʼe agahala, pea neʼe ko au ʼae neʼe au fai te meʼa ʼae ʼe kovi.+ Kae kotea ʼae neʼe fai e te ʼu ovi ʼaeni? Sehova e, siʼoku ʼAtua, fakalelei siʼou loto, tauteaʼi au pea mo te famili ʼo taku tamai, kae ʼaua naʼa ke fakahoko te malaʼia ʼaia ki tau hahaʼi.”+
18 Neʼe ui leva e te ʼaselo ʼa Sehova kia Kate+ ke ina ui kia Tavite ke alu pea ke ina fakatuʼu he ʼaletale maʼa Sehova ʼi te hahaʼaga fulumeto ʼa Olanane te tagata Sepusi.+
19 Neʼe alu ai ia Tavite, ʼo mulimuli ki te folafola ʼa Kate, ʼae neʼe palalau ʼi te huafa ʼo Sehova.
20 Neʼe lolotoga haha e Olanane te fulumeto, pea neʼe maliu leva ʼo sio ki te ʼaselo. Neʼe olo ʼona foha ʼe toko fa, ʼae neʼe fakatahi mo ia, ʼo fenonoʼi.
21 ʼI te sio ʼa Olanane ki te alu age ʼa Tavite kia ia, neʼe mavae atu aipe mai te hahaʼaga fulumeto ʼo alu ʼo tulolo ki te kele ia muʼa ʼo Tavite.
22 Neʼe ui e Tavite kia Olanane: “Fakatau* mai te koga meʼa ʼae ʼe tuʼu ai te hahaʼaga fulumeto, ke au laga ʼi ai he ʼaletale maʼa Sehova. Fakatau mai pea mo ke fakaha mai te totogi moʼoni ʼo te koga meʼa ʼaia, ke fakagata ai te malaʼia ʼae kua to ki te hahaʼi.”+
23 Kae neʼe ui e Olanane kia Tavite: “Toʼo maʼa koe, pea ke fai e siʼoku ʼaliki te hau te meʼa ʼae ʼe lelei kia ia.* Koʼeni, ʼe au foaki atu te ʼu pipi ke ke momoli ko he ʼu holokoseta, mo te saliote ke ke fakaʼaogaʼi moʼo fai fafie+ pea mo te fulumeto moʼo fai he molaga meʼa kai. ʼEi, ʼe au foaki atu te ʼu meʼa fuli ʼaia.”
24 Kae neʼe ui e te Hau ko Tavite kia Olanane: “Kailoa, kae ʼe tonu ke au foaki atu te totogi moʼoni ʼo te koga meʼa ʼaia, he ʼe mole au toʼo anai ʼau meʼa ʼo foaki kia Sehova pea ʼe mole au momoli anai he ʼu holokoseta neʼe mole au totogi.”+
25 Koia, neʼe fua ai e Tavite te ʼu sikele* aulo ʼe 600 ʼo ina foaki leva kia Olanane ʼo ʼuhiga mo te koga meʼa ʼaia.
26 Neʼe laga leva e Tavite he ʼaletale+ ʼi ai maʼa Sehova pea neʼe ina momoli he ʼu holokoseta mo he ʼu sakilifisio ʼo te tokalelei. Neʼe pauʼi kia Sehova pea neʼe tali age te ʼAtua ʼaki tana fakato ifo he afi+ mai te lagi, ʼo ina tutu te ʼu molaga ʼae neʼe ʼi te ʼaletale.
27 Neʼe fakatotonu leva e Sehova ki te ʼaselo+ ke ina toe ʼai tana heleta ki tona ʼaiʼaga.
28 ʼI te temi ʼaia, ʼi te sio ʼa Tavite neʼe tali age e Sehova kia ia ʼi te hahaʼaga fulumeto ʼa Olanane te tagata Sepusi, neʼe hoko atu pe tana fai ʼi ai he ʼu sakilifisio.
29 Kae ʼi te temi ʼaia, ko te tapenakulo ʼo Sehova ʼae neʼe faʼu e Moisese ʼi te toafa pea mo te ʼaletale ʼae neʼe momoli ai te ʼu holokoseta, neʼe tuʼu ʼi te faʼahi maʼoluga ʼo Kipeone.+
30 Kae neʼe mole feala ke alu ki ai ia Tavite ʼo fakafehuʼi ia te ʼAtua, he neʼe mataku ia ʼuhi ko te heleta ʼa te ʼaselo ʼa Sehova.
Nota
^ Peʼe lagi “e he tahi ʼe fakafeagai.”
^ Peʼe “lotomamahi.”
^ Vakaʼi Te ʼu Kupu.
^ Hep. “Foaki.”
^ Hep. “ki ʼona mata.”
^ Ko te mamafa ʼo he sikele ʼe tahi, neʼe ko kalame ʼe 11,4. Vakaʼi Te ʼu Fakamahino 2.14.
