ʼUluaki Koloniko 22:1-19
22 Pea neʼe ui e Tavite: “ ʼE tuʼu anai ʼi heni te fale ʼo Sehova, te ʼAtua moʼoni pea mo te ʼaletale ʼae ʼe momoli ai e Iselaele te ʼu holokoseta.”+
2 Neʼe fakatotonu leva e Tavite ke fakatahiʼi te hahaʼi matapule+ ʼae neʼe nonofo ʼi te fenua ʼo Iselaele, pea neʼe ina fakanofo natou ko he hahaʼi ta maka ke natou taʼataʼaga te ʼu maka ʼae ka fakaʼaogaʼi ki te laga ʼo te fale lotu* ʼo te ʼAtua moʼoni.+
3 Neʼe toe lahi foki mo te ukamea ʼae neʼe teuteuʼi e Tavite ke faʼu ʼaki te ʼu faʼo ʼo te ʼu kaumatapa ʼo te ʼu matapa pea mo te ʼu meʼa fakamaʼu. Neʼe lahi ʼaupito mo te kapa ʼo mole feala ai ke fua,+
4 pea mo te ʼakau ko te sete+ ʼae neʼe mole feala tona lau. Koteʼuhi neʼe lahi ʼaupito te ʼakau ko te sete ʼae neʼe ʼaumai e te kau Sitoni+ mo te kau Tile+ kia Tavite.
5 Pea neʼe ui e Tavite: “Ko Salomone toku foha ʼe kei tamasiʼi pea ʼe heʼeki ina iloʼi he meʼa,*+ pea ko te fale ʼae ka laga maʼa Sehova ʼe tonu ke taulekaleka ʼaupito,+ ke iloʼi ai ʼi te ʼu fenua fuli tona logologona mo tona matalelei.+ Koia, ʼe au teuteuʼi anai he ʼu meʼa maʼa ia.” Neʼe lahi ai te ʼu meʼa ʼae neʼe teuteuʼi e Tavite ʼi muʼa ʼo tona mate.
6 Tahi ʼae meʼa, neʼe ina pauʼi tona foha ko Salomone pea neʼe ina fakatotonu age ke ina laga he fale lotu maʼa Sehova, te ʼAtua ʼo Iselaele.
7 Neʼe ui e Tavite ki tona foha ko Salomone: “Neʼe au loto moʼoni ke au laga he fale ke fakakololiaʼi ai te huafa ʼo Sehova, toku ʼAtua.+
8 Kae neʼe ui mai e Sehova: ‘Neʼe lahi te ligi toto mo te ʼu tau ʼae neʼe ke fai. ʼE mole ke laga anai he fale ke fakakololiaʼi ai toku huafa,+ koteʼuhi neʼe lahi tau ligi toto ʼi te kele ʼi ʼoku muʼa.
9 Koʼeni, ʼe ke maʼu anai hou foha+ pea ʼe ko he tagata anai ʼo te tokalelei,* pea ʼe au foaki anai kia ia te tokalelei, ʼo au fakaʼateainaʼi anai ia ia mai ʼona fili fuli ʼae ʼi ʼona tafaʼaki,+ he ʼe higoa anai ko Salomone.*+ Pea ʼe au foaki anai ki Iselaele te tokalelei mo te fimalie ʼi tona temi pule.+
10 ʼE ko ia ʼae ka ina laga he fale ke fakakololiaʼi ai toku huafa.+ ʼE liliu anai ko toku foha pea ʼe au liliu anai ko tana tamai.+ ʼE au fakatuʼu anai tona hekaʼaga fakahau pea mo tana pule ki Iselaele ke malohi ʼo talu ai.’+
11 “Koia, siʼoku foha, ke nofo ia Sehova mo koe pea ke iku lelei tau laga ia te fale ʼo Sehova, tou ʼAtua, ohage pe ko te meʼa ʼae neʼe ina ui ʼo ʼuhiga mo koe.+
12 Kae ʼofa pe ke foaki atu e Sehova te poto mo te ʼatamai+ ʼi te temi ʼae ka ina foaki atu ai te pule ki Iselaele, ke feala ai hau taupau te lao ʼa Sehova, tou ʼAtua.+
13 ʼE lava lelei anai te ʼu meʼa ʼae ka ke fai mo kapau ʼe ke mulimuli fakalelei ki te ʼu lao+ pea mo te ʼu lekula ʼae neʼe fakatotonu e Sehova ke foaki e Moisese ki Iselaele.+ Ke ke lotomalohi mo lototoʼa. ʼAua naʼa ke mataku.+
14 Neʼe au kinakina ʼi te teuteuʼi maʼa te fale ʼo Sehova he ʼu taleta* aulo ʼe 100 000, mo he ʼu taleta siliva ʼe tahi miliona, mo he kapa pea mo he ukamea+ ʼe lahi ʼaupito ʼo mole feala ai ke fua. Pea neʼe au teuteuʼi ni ʼakau mo ni maka,+ kae ʼe ke toe hilifaki anai he tahi ʼu meʼa ki ai.
15 ʼE kaugamalie te ʼu tagata ʼae ʼe gaue maʼa koe: ko he kau ta maka, mo he kau tufuga maka,+ mo he kau tufuga ʼakau pea mo he ʼu tagata faiva ʼi te ʼu gaue kehekehe.+
16 ʼE mole malau te aulo, mo te siliva, mo te kapa pea mo te ukamea.+ Koia, ke ke kamata te gaue pea ke nofo ia Sehova mo koe.”+
17 Pea neʼe fakatotonu leva e Tavite ki te kau ʼaliki fuli ʼo Iselaele ke natou tokoni ki tona foha ko Salomone, ʼo ina ui:
18 “ ʼE mole nofo koa la ia Sehova tokotou ʼAtua mo koutou? Pea neʼe mole kua ina foaki atu koa la te tokalelei ʼi te ʼu potu fuli pe? Neʼe ina tuku mai kia au te hahaʼi ʼo te fenua, pea kua fakalogo te fenua kia Sehova mo tana hahaʼi.
19 Koia, kotou fakatotonu ke kotou kumi ia Sehova, tokotou ʼAtua mo tokotou loto katoa pea mo tokotou malohi* katoa.+ Pea kotou kamata laga te sagatualio ʼo Sehova, te ʼAtua moʼoni,+ ke ʼaumai ai te aleka ʼo te fuakava ʼa Sehova pea mo te ʼu meʼa taputapu kehekehe ʼa te ʼAtua moʼoni+ ki te fale ʼae ka laga ke fakakololiaʼi ai te huafa ʼo Sehova.”+
Nota
^ Hep. “fale.”
^ Peʼe “heʼeki tokalelei.”
^ Hep. “malolo.”
^ ʼE haʼu mai te kupu Fakahepeleo ko tona fakaʼuhiga “Tokalelei.”
^ Ko te mamafa ʼo he taleta ʼe tahi, neʼe ko kilo ʼe 34,2. Vakaʼi Te ʼu Fakamahino 2.14.
^ Hep. nèphèsh. Vakaʼi Te ʼu Kupu.
