ʼUluaki Kolonito 13:1-13
-
Te ʼofa ʼe ko he ala ʼe lelei tukupau (1-13)
13 Kapau ʼe au palalau ʼi te ʼu lea ʼa te tagata pea mo te kau ʼaselo, kae ʼe mole au maʼu ia te ʼofa, ʼe au hage ko he pele ʼe tagi peʼe ko he simepale ʼe logoaʼa.
2 Kapau ʼe au maʼu te fealagia ʼae ko te faifakakikite, mo te mahino ki te ʼu meʼa fakalilo tapu* fuli mo te ʼatamai malama katoa,+ pea kapau ʼe au maʼu katoa ia te tui ʼo feala ai ke au hiki te ʼu moʼuga, kae ʼe mole au maʼu ia te ʼofa, ʼe mole he ʼaoga ʼo te meʼa ʼae ʼe au fai.+
3 Pea kapau ʼe au foaki ʼoku koloa fuli moʼo fafaga ʼihi+ pea kapau ʼe au foaki toku maʼuli ke au fiameʼameʼa ai, kae ʼe mole au maʼu ia te ʼofa,+ ʼe mole hona ʼaoga kia au.
4 Ko he tahi ʼe ʼofa,+ ʼe kataki fualoa+ ia pea mo agalelei.+ Pea ʼe mole maheka+ ia. ʼE mole laupisi, ʼe mole fiameʼalahi,+
5 ʼe mole ina fai he aga ʼe kovi,*+ ʼe mole ina kumi te ʼu meʼa ʼae ʼe lelei kia ia,+ ʼe mole hoko ita.+ ʼE mole ina manatuʼi te kovi ʼae neʼe fai age kia ia.+
6 ʼE mole fakafiafia ia ʼi te heʼe faitotonu+ kae ʼe fakafiafia ia ʼi te moʼoni.
7 ʼE ina ʼutakiʼi ia meʼa fuli,+ ʼe tui ia kia meʼa fuli,+ ʼe falala kia meʼa fuli+ pea ʼe ina katakiʼi ia meʼa fuli.+
8 Ko te ʼofa ʼe mole puli anai ʼi he temi. Kae ko te fealagia ʼae ko te faifakakikite peʼe ko te palalau ʼi te ʼu lea kehekehe, peʼe ko te ʼatamai malama, ʼe pulihi anai.
9 Koteʼuhi ʼe mole katoa totatou ʼatamai malama+ pea ʼe mole katoa tatatou faifakakikite,
10 kae ka tou maʼu katoa anai te ʼatamai malama pea mo te faifakakikite, pea ʼe pulihi anai ia te meʼa ʼae ʼe mole katoa.
11 ʼI taku kei veliveli, neʼe au palalau ohage ko he tamasiʼi, neʼe au manatu ohage ko he tamasiʼi, neʼe au fakakaukau ohage ko he tamasiʼi. Kae ʼi te temi leva ʼaeni, kua au liliu ko he tagata pea kua au liʼaki ia te ʼu agaaga ʼo he tamasiʼi.
12 ʼI te temi ʼaeni, ʼe nenefu tatatou sio ohage ʼe tou sisio ʼi he sioʼata ukamea, kae hili ia ʼe tou sisio lelei anai ohage ʼe tou fehagaʼaki mo he tahi. ʼI te temi nei, ʼe mole katoa toku ʼatamai malama kae ʼe au maʼu anai ʼi he ʼaho he ʼatamai malama ʼe lelei* ohage ko toku iloʼi lelei e te ʼAtua.
13 Koia ʼe maʼu anai te ʼu faʼahi ʼaeni ʼe tolu: te tui, mo te ʼamanaki pea mo te ʼofa. Kae ko ia ʼae ʼe lahi ʼi te ʼu faʼahi ʼaia ʼe ko te ʼofa.+
