ʼUluaki Kolonito 15:1-58
15 ʼE au fakamanatuʼi atu leva, ʼu tehina, ia te logo lelei ʼae neʼe au tala atu kia koutou,+ ʼae neʼe kotou toe tali foki pea ʼe kei kotou tutuʼu malohi ai.
2 Kapau ʼe kotou taupau maʼu te logo lelei ʼae neʼe au tala atu, ʼe haofaki koutou. Kae kapau ʼe mole kotou taupau maʼu, pea ʼe mole he ʼaoga ʼo takotou liliu ʼo tui.
3 Koteʼuhi neʼe au akoʼi atu kia koutou te ʼu meʼa maʼuhiga ʼaeni neʼe toe fakaha mai kia au: Neʼe mate ia Kilisito* ʼuhi ko ʼatatou agahala ohage ko tona ui ʼi te ʼu Tohi Taputapu,+
4 neʼe ʼavaifo leva,+ ʼei, pea neʼe fakatuʼuake+ ʼi te tolu ʼaho+ ohage ko tona ui ʼi te ʼu Tohi Taputapu.+
5 Pea neʼe ha kia Sefasi,*+ pea ki te toko Hogofulu-ma-lua.+
6 Hili ia, neʼe ha ki te ʼu tehina ʼe toko 500 tupu ʼi he temi pe ʼe tahi,+ pea tokolahi ʼe kei nonofo mo tatou, kae kua mamate ʼihi.*
7 Hili ia neʼe ha kia Sakopo,+ pea ki te kau apositolo fuli.+
8 Kae neʼe toe ha fakamuli mai kia au,+ ʼo au hage ai ko he tamasiʼi neʼe fanauʼi fakatomuʼa.
9 Koteʼuhi ʼe ko au ʼae ʼe veliveli ʼosi ʼi te kau apositolo, pea ʼe mole tuha mo au ke fakahigoaʼi au ko he apositolo, he neʼe au fakatagaʼi te kokelekasio ʼa te ʼAtua.+
10 Kae ʼaki te ʼofa makehe ʼo te ʼAtua, ko au ko he apositolo. Pea neʼe mole vaʼiganoa tana fakaha mai ia tona ʼofa makehe, he neʼe lahi age taku gaue kinakina ia natou fuli. Kae neʼe mole au fai ʼaki toku malohi, kae ʼaki te ʼofa makehe ʼo te ʼAtua ʼae neʼe au maʼu.
11 Koia tatau aipe pe ʼe ko au peʼe ko natou ʼae ʼe faifakamafola, kae ʼe matou palalau fuli ki he logo ʼe tahi, pea koʼena te logo ʼae neʼe kotou tui ki ai.
12 Kapau ʼe tou fakamafola ko Kilisito neʼe fakatuʼuake mai te kau mate,+ pea he koʼe koa ʼe ui e ʼihi ia koutou ʼe mole fakatuʼuake te kau mate?
13 Kapau la ʼe mole fakatuʼuake te kau mate, pea neʼe mole fakatuʼuake ia Kilisito.
14 Kae kapau la neʼe mole fakatuʼuake ia Kilisito, pea ʼe mahino ia ʼe vaʼiganoa tatatou faifakamafola, ʼo feia mo takotou tui.
15 Pea ʼe tou toe liliu foki ko he kau fakamoʼoni loi ʼa te ʼAtua,+ ʼi tatatou ui ʼae neʼe ina fakatuʼuake ia Kilisito kae neʼe mole ina fakatuʼuake ia ia,+ mo kapau foki ʼe mole fakatuʼuake moʼoni ia te kau mate.
16 Koteʼuhi kapau la ʼe mole tonu ke fakatuʼuake te kau mate, pea neʼe mole fakatuʼuake ia Kilisito.
17 Pea kapau la neʼe mole fakatuʼuake ia Kilisito, ʼe mole he ʼaoga ʼo takotou tui, pea ʼe kei kotou nonofo pe ʼi ʼakotou agahala.+
18 Pea kua pulinoa foki mo te ʼu tisipulo ʼa Kilisito ʼae kua mamate.+
19 Kapau ʼe tou falala kia Kilisito ʼi te maʼuli pe ʼaeni, pea ʼe tou fakaʼofaʼofa lahi age tatou ʼi te hahaʼi fuli.
20 Kae ʼe kua fakatuʼuake ia Kilisito, pea ʼe ko ia ʼae neʼe ʼuluaki fakatuʼuake* mai te kau mate.+
21 Mai tona aluʼaga ʼae neʼe haʼu te mate ʼaki he tagata,+ ʼo toe feia aipe, ʼaki he tagata ʼe feala ke fakatuʼuake te kau mate.+
22 Koteʼuhi ohage pe ko te mamate ʼa te hahaʼi fuli ʼuhi ko Atama,+ ʼo toe feia aipe ʼe toe maʼuʼuli ake anai te hahaʼi fuli ʼaki ia Kilisito.+
23 Kae ʼe tahi mulimuli pe ki tona aluʼaga: Ko ia ʼae neʼe ʼuluaki fakatuʼuake,* ʼe ko Kilisito,+ hili ia ko natou ʼae ʼe kau mo Kilisito lolotoga tana ʼi heni.*+
24 Pea ʼi te fakaʼosi, ʼe ina fakatoʼo age anai te Puleʼaga ki tona ʼAtua pea mo Tamai, ʼi tana kua ʼosi pulihi te ʼu puleʼaga fuli, mo te ʼu pule fuli pea mo te ʼu malohi fuli.+
25 Koteʼuhi ʼe tonu ke ʼafio ʼo kaku ki te tuku e te ʼAtua ʼona fili fuli ki ʼona lalo vaʼe.+
26 Pea ko te fili fakamuli, ia te mate, ʼe pulihi anai ia.+
27 Koteʼuhi ko te ʼAtua “neʼe ina tuku ia meʼa fuli ki ʼona lalo vaʼe.”+ Kae ʼi te ui ʼae “neʼe ina tuku ia meʼa fuli ki ʼona lalo vaʼe,”+ ʼe mahino ia ʼe mole kau ai ia Ia ʼae neʼe ina tuku age ia meʼa fuli kia te ia.+
28 Kae ka ʼosi tuku age anai ia meʼa fuli kia te ia, pea ʼe fakalogo anai te ʼAlo kia Ia ʼae neʼe ina tuku age ia meʼa fuli,+ ke liliu ai te ʼAtua ko meʼa fuli maʼa te hahaʼi fuli.+
29 Kapau la ʼe mole koia, kotea anai ka hoko kia natou ʼae ʼe papitema ke natou mamate ai?+ Kapau la ʼe mole tonu ke fakatuʼuake te kau mate, pea kotea te ʼuhiga ʼo tanatou papitema ke natou mamate ai?
30 Pea kotea te ʼuhiga ʼo tatatou tuʼutamakiʼia ʼi te temi fuli?+
31 ʼI te ʼaho fuli ʼe feala ke au mate. ʼE au fakamoʼoni ki ai, ʼu tehina, ʼaki taku fiameʼameʼa ʼo ʼuhiga mo koutou, kau tisipulo ʼa Kilisito Sesu totatou ʼAliki.
32 Kapau neʼe au tauʼi te ʼu manu fekai ʼi Efeso, ohage ko tona fai e te tahi ʼu tagata,*+ kotea tona ʼaoga kia au? Kapau la ʼe mole tonu ke fakatuʼuake te kau mate, “tou kakai pea mo iinu he ʼe tou mamate anai apogipogi.”+
33 ʼAua naʼa fakahalaʼi koutou. Ko te ʼu fakakaugā kovi ʼe ina maumauʼi te ʼu agamahani ʼae ʼe lelei.*+
34 Kotou aga fakapotopoto ʼo kotou fai te meʼa ʼae ʼe faitotonu pea ʼaua naʼa kotou agahala, koteʼuhi ʼe mole maʼu e ʼihi ia koutou te ʼatamai malama ʼo ʼuhiga mo te ʼAtua. ʼE au palalau feia atu ke kotou ufiufi ai.
35 Kae ʼe ui anai e he tahi: “ ʼE feafeaʼi anai te fakatuʼuake ʼo te kau mate? ʼE feafeaʼi anai ʼonatou sino?”+
36 Tagata vale! Ka ke to he pulapula, ʼe tonu muʼa ke mate ke feala hana maʼuli ake.
37 ʼE mole ke to te meʼa ʼae kua ʼosi homo, kae ʼe ke to he tegaʼi fulumeto peʼe ko he tahi age faʼahiga pulapula.
38 Pea ʼe fakahomo ake e te ʼAtua, ʼo mulimuli ki tona loto pea ʼe ina foaki ki te ʼu pulapula takitahi he sinoʼi ʼakau ʼe alu tonu mo ia.
39 ʼE mole tatau te ʼu kakano, ʼe kehe pe te kakano ʼo te tagata, mo ʼae ʼo te faga manu, mo ʼae ʼo te ʼu manulele pea mo ʼae ʼo te ʼu ika.
40 Pea ʼe ʼi ai te ʼu sino ʼi selo+ pea mo te ʼu sino ʼi te kele,+ kae ʼe kehe pe te kololia ʼo te ʼu sino ʼae ʼi selo, pea mo te kololia ʼo te ʼu sino ʼae ʼi te kele.
41 ʼE kehe pe te gigila ʼo te laʼa, mo te gigila ʼo te mahina+ pea mo te gigila ʼo te ʼu fetuʼu. Pea ʼe toe kehekehe pe foki mo te gigila ʼo te ʼu fetuʼu takitahi.
42 ʼE toe feia mo te fakatuʼuake ʼo te kau mate. Ko te sino ʼae ʼe mate ʼe pala kae ko te sino ʼae ʼe fakatuʼuake ʼe mole pala.+
43 ʼE mate ʼi te fakalainoa kae ʼe fakatuʼuake ʼi te kololia.+ ʼE mate ʼi te vaivai kae ʼe fakatuʼuake ʼi te malohi.+
44 ʼE mate ko he sino fakakakano kae ʼe fakatuʼuake ko he sino fakalaumalie. Kapau ʼe ʼi ai he sino fakakakano ʼe toe ʼi ai foki mo he sino fakalaumalie.
45 Ohage ko tona tohi: “Ko te ʼuluaki tagata, ia Atama, neʼe liliu ko he tahi* ʼe maʼuli.”+ Pea ko te Atama fakamuli neʼe liliu ko he laumalie ʼe ina foaki te maʼuli.+
46 Kae ko te ʼuluaki sino ʼe mole fakalaumalie, kae ʼe fakakakano pea ki muli age ʼe fakalaumalie.
47 Ko te ʼuluaki tagata neʼe toʼo mai te kele pea neʼe fakatupu ʼaki te efu.+ Kae ko te lua tagata neʼe hifo mai selo.+
48 ʼE tatau pe ia natou ʼae neʼe fakatupu ʼaki te efu mo ia ʼae neʼe fakatupu ʼaki te efu. Pea ʼe tatau pe ia natou ʼae ʼi selo mo ia ʼae neʼe hake ki selo.+
49 Pea ohage pe ko tatatou hage ko ia ʼae neʼe fakatupu ʼaki te efu,+ ʼe tou toe hage pe anai ko ia ʼae neʼe hake ki selo.+
50 Kae ʼu tehina, ʼe au tala atu te faʼahi ʼaeni, ʼe mole feala ke maʼu ʼi te Puleʼaga ʼo te ʼAtua ia te kakano mo te toto, pea ʼe mole feala ke liliu te sino ʼae ʼe pala ko he sino ʼe mole pala.
51 ʼE au tala atu he meʼa fakalilo tapu:* ʼE mole ko tatou fuli ʼae ka mamate fualoa, kae ʼe fetogi fuli anai tatou,+
52 ʼi he moʼi temi ʼe tahi, ʼi hona aluʼaga fakafokifa, lolotoga te pupuhi ʼo te fakatagi pupuhi fakamuli. Koteʼuhi ʼe pupuhi anai te fakatagi pupuhi,+ pea ʼe fakatuʼuake anai te kau mate ʼaki he sino ʼe mole pala, pea ʼe fetogi anai tatou.
53 Koteʼuhi ko te sino ʼae ʼe pala ʼe tonu ke fetogi ʼaki he sino ʼe mole pala,+ pea ko te sino ʼae ʼe mate ʼe tonu ke fetogi ʼaki he sino ʼe maʼuli tuputupua.+
54 Kae ka fetogi te sino ʼae ʼe pala ʼaki he sino ʼe mole pala pea mo te sino ʼae ʼe mate ʼaki he sino ʼe maʼuli tuputupua, ʼe hoko ai anai te folafola ʼaeni neʼe tohi: “Kua pulihi te mate ʼo talu ai.”+
55 “Mate, ʼe ʼifea tau malo? Mate, ʼe ʼifea tou kafokona?”+
56 Ko te kafokona ʼae ʼe ina fakatupu te mate ʼe ko te agahala,+ pea ko te malohi ʼo te agahala ʼe ko te Lao.*+
57 Kae tou fakafetaʼi ki te ʼAtua, he ʼe ina foaki mai te malo ʼaki totatou ʼAliki ko Sesu Kilisito!+
58 Koia ʼoku tehina ʼofaina, kotou tutuʼu malohi,+ mo taʼofi maʼu, pea ke lahi tuʼumaʼu+ ʼakotou gaue ʼi te ʼAliki, ʼi takotou iloʼi ʼae ʼe mole vaʼiganoa takotou gaue kinakina+ ʼi te ʼAliki.
Nota
^ Vakaʼi Te ʼu Kupu.
^ ʼE toe higoa ko Petelo.
^ Klka. “kua momoe ʼihi.”
^ Klka. “te ʼu ʼuluaki fua.”
^ Klka. “te ʼu ʼuluaki fua.”
^ Vakaʼi Te ʼu Kupu.
^ Peʼe lagi “ ʼaki te sio fakatagata.”
^ Peʼe “fakatupu kovi ki te ʼu faʼahiga aga ʼae ʼe lelei.”
^ Klka. psukhê. Vakaʼi Te ʼu Kupu.
^ Vakaʼi Te ʼu Kupu.
^ Peʼe “ ʼe ko te Lao ʼae ʼe ina foaki ki te agahala ia tona malohi.”
