Lua Hau 7:1-20
7 Neʼe ui leva e Eliseo: “Kotou fagono ki te folafola ʼa Sehova. Koʼeni te folafola ʼa Sehova: ‘Apogipogi, ʼi te temi pe ʼaeni, ʼi te matapa* ʼo Samalia, ʼe totogi anai he fua sea* falena lelei ʼe tahi kia sikele* ʼe tahi, pea mo he fua sea olose ʼe lua kia sikele ʼe tahi.’ ”+
2 Pea neʼe ui e te pule solia ʼae neʼe falala ki ai te hau ki te tagata ʼa te ʼAtua moʼoni: “Tatau aipe pe ʼe avahi e Sehova te ʼatu lagi,* kae ʼe feala koa ke hoko moʼoni te faʼahi* ʼaia?”+ Neʼe ina tali age ki ai: “ ʼE ke sio mata anai ki ai,+ kae ʼe mole ke kai anai.”+
3 Neʼe ʼi ai te ʼu tagata kilia ʼe toko fa ʼi te huʼaga ʼo te matapa ʼo te kolo,+ pea neʼe natou feuiʼaki: “He koʼe koa ʼe tou heheka ʼi heni ʼo kaku ki totatou mamate?
4 Kapau ʼe tou olo ki te kolo kae lolotoga to te hoge ʼi te kolo,+ ʼe tou mamate anai ʼi ai. Pea kapau ʼe tou nonofo ʼi heni, ʼe tou mamate pe anai. Koia tou olo ki te nofoʼaga ʼo te kau Silia. Kapau ʼe natou tuku tatou ke tou maʼuʼuli, pea ʼe tou maʼuʼuli anai, kae kapau ʼe natou matehi tatou, pea ʼe tou mamate anai.”
5 Koia, ʼi te malu ʼo te afiafi, neʼe natou olo ai ki te nofoʼaga ʼo te kau Silia. ʼI tanatou kaku atu ki te ʼu tafaʼaki ʼo te nofoʼaga ʼo te kau Silia, neʼe mole ʼi ai he tahi.
6 Neʼe mole ʼi ai he tahi koteʼuhi neʼe fakatupu e Sehova te logoaʼa ʼo he ʼu saliote tau mo he ʼu hosi, te logoaʼa ʼo he foʼi kautau kaugamalie, ke logo ki ai te nofoʼaga ʼo te kau Silia.+ Pea neʼe natou feuiʼaki: “Koʼeni, neʼe totogi e te hau ʼo Iselaele te ʼu hau ʼo te kau Heti pea mo te ʼu hau ʼo Esipito ke natou ʼomai ʼo tauʼi tatou!”
7 Neʼe natou tutuʼu atu aipe ʼo feholaki ʼi te malu ʼo te afiafi, kae liʼaki ʼonatou fale la, mo ʼanatou hosi, mo ʼanatou asino pea mo te nofoʼaga katoa. Neʼe natou feholaki ke haofaki ai ʼonatou maʼuli.*
8 ʼI te kaku atu ʼa te ʼu tagata kilia ʼaia ki te ʼu tafaʼaki ʼo te nofoʼaga, neʼe natou feulufi leva ki he fale la ʼo natou kamata kakai mo iinu. Neʼe natou toʼo mai ai te siliva, mo te aulo pea mo he ʼu teu, ʼo natou olo ʼo fufu. Neʼe natou toe liliu mai ʼo feulufi ki he tahi age fale la pea neʼe natou toʼo mai ai he tahi age ʼu meʼa ʼo olo ʼo fufu.
9 Ki muli age, neʼe natou feuiʼaki leva: “Ko te meʼa ʼaeni ʼe tou fai ʼe mole lelei. ʼE ko he ʼaho fiafia ʼaeni, pea ʼe tonu ke tou tala te logo lelei ʼaia ki te hahaʼi! Kapau ʼe tou nonofo fakalogologo pea mo fakatalitali ʼo kaku ki te mafoata, ʼe tonu anai ke tauteaʼi tatou. Koia, tou foimo olo ʼo fakaha ki te hahaʼi ʼo te fale hau.”
10 Neʼe natou olo ai ʼo pauʼi te ʼu tagata leʼo ʼo te matapa ʼo te kolo pea neʼe natou fakamatala age kia natou: “Neʼe matou olo ki te nofoʼaga ʼo te kau Silia, kae neʼe mole he tahi, neʼe mole matou logo ki he meʼa. Neʼe ko te ʼu hosi pe mo te ʼu asino neʼe haʼi pea neʼe natou tuku feia te ʼu fale la.”
11 Neʼe kalaga atu aipe te ʼu tagata leʼo matapa ʼo fakaha ia te logo ʼaia ki te hahaʼi ʼo te fale hau.
12 Neʼe tuʼu ake aipe te hau ʼi te poʼuli pea neʼe ina ui ki ʼana hahaʼi faifekau: “Fakalelei ʼokotou loto, kae tuku muʼa ke au fakaha atu te fakatuʼutuʼu ʼa te kau Silia. ʼE natou iloʼi lelei pe ʼe tou fia kakai,+ koia neʼe natou tuku ai te nofoʼaga kae natou olo ʼo fenonoʼi ʼi te vao, ʼo natou ui: ‘ ʼE natou mavae anai mai te kolo, pea ʼe tou puke maʼuli anai natou pea mo hu ki te kolo.’ ”+
13 Pea neʼe ui age e he tahi ʼi ʼana hahaʼi faifekau: “Fakalelei siʼou loto, ke filifili he ʼu tagata mo he ʼu hosi ʼe nima ʼi te ʼu hosi ʼae kei toe ʼi te kolo, pea ke natou olo ʼo vakaʼi pe kotea ʼae neʼe hoko moʼoni. Tatau aipe pe ʼe natou olo peʼe natou nonofo ʼi heni, kae ʼe natou mamate anai ohage pe ko tatou ʼaeni ʼe kei toe ʼi te kau Iselaele.”
14 Neʼe natou toʼo ai he ʼu saliote ʼe lua mo te ʼu hosi, pea neʼe fekauʼi natou e te hau ke olo ki te nofoʼaga ʼo te kau Silia. Neʼe ina ui age kia natou: “Kotou olo ʼo vakaʼi.”
15 Neʼe natou olo ʼi te faʼahi ʼae neʼe olo ai te kau Silia ʼo kaku ki te Solotane. Pea neʼe leta ʼi te ala te ʼu teu mo te ʼu meʼa kehekehe ʼae neʼe liʼaki e te kau Silia ʼi tanatou feholaki ʼi tonatou matataku. Neʼe toe liliu leva te ʼu tagata ʼave logo ʼaia ʼo fakamatala age ki te hau.
16 Neʼe mavae ai te hahaʼi mai te kolo ʼo natou olo ʼo toʼo ia meʼa fuli ʼae neʼe ʼi te nofoʼaga ʼo te kau Silia. Koia, neʼe totogi ai he fua sea falena lelei ʼe tahi kia sikele ʼe tahi, pea mo he fua sea olose ʼe lua kia sikele ʼe tahi, ohage pe ko tona fakaha e Sehova.+
17 Pea neʼe fakanofo e te hau te pule solia ʼae neʼe falala ki ai ke ina leʼo te matapa ʼo te kolo. Kae neʼe malamalaki ia ia e te hahaʼi ʼo mate ai ʼi te matapa, ohage pe ko tona fakaha e te tagata ʼa te ʼAtua moʼoni ki te hau ʼi te temi ʼae neʼe alu ai te hau ki ai.
18 Neʼe hoko te aluʼaga ʼaia ohage pe ko tona ui e te tagata ʼa te ʼAtua moʼoni ki te hau: “Apogipogi, ʼi te temi pe ʼaeni, ʼi te matapa ʼo Samalia, ʼe totogi anai he fua sea olose ʼe lua kia sikele ʼe tahi, pea mo he fua sea falena lelei ʼe tahi kia sikele ʼe tahi.”+
19 Kae neʼe ui e te pule solia ki te tagata ʼa te ʼAtua moʼoni: “Tatau aipe pe ʼe avahi e Sehova te ʼatu lagi,* kae ʼe feala koa ke hoko moʼoni te faʼahi* ʼaia?” Neʼe tali age e Eliseo: “ ʼE ke sio mata anai ki ai, kae ʼe mole ke kai anai.”
20 Pea ʼe ko te meʼa pe ʼaia neʼe hoko kia ia, he neʼe malamalaki ia ia e te hahaʼi ʼi te matapa ʼo te kolo ʼo mate ai.
Nota
^ Peʼe “te ʼu fakatauʼaga koloa.”
^ Ko he sea ʼe tahi, neʼe ko lite ʼe 7,33. Vakaʼi Te ʼu Fakamahino 2.14.
^ Ko te mamafa ʼo he sikele ʼe tahi, neʼe ko kalame ʼe 11,4. Vakaʼi Te ʼu Fakamahino 2.14.
^ Peʼe “te ʼu matapa ʼo te ʼatu lagi.”
^ Hep. “folafola.”
^ Hep. nèphèsh. Vakaʼi Te ʼu Kupu.
^ Peʼe “te ʼu matapa ʼo te ʼatu lagi.”
^ Hep. “folafola.”
