Lua Petelo 3:1-18
3 Kau ʼofaina, ko te lua tohi ʼaeni ʼe au fai atu. Pea ohage pe ko taku fai ʼi taku ʼuluaki tohi, ʼe au fakaʼalaʼala ʼokotou fealagia fakakaukau ʼaki he fakamanatu+ ke kotou fakakaukau poto.
2 Ke kotou manatuʼi te ʼu folafola ʼae neʼe tala ʼi muʼa atu* e te kau polofeta maʼoniʼoni, pea mo te fakatotonu ʼa te ʼAliki mo Fakamaʼuli ʼae neʼe fakaha atu e te kau apositolo.*
3 Koia, ke kotou iloʼi te faʼahi ʼaeni: ʼI te ʼu ʼaho fakamuli, ʼe ʼomai anai he kau vava mo ʼanatou nukinuki, ʼo natou mulimuli ki ʼonatou holi+
4 pea mo natou ui: “ ʼE ʼifea koa tana ʼi heni* ʼae neʼe fakapapauʼi mai?+ Koteʼuhi, talu mai te temi ʼae neʼe mamate* ai ʼatatou kui, ʼe kei tatau pe ia meʼa fuli ohage ko te kamataʼaga ʼo te fakatupu ʼo te malamanei.”+
5 Koteʼuhi ʼe mole natou fia iloʼi te faʼahi ʼaeni: ʼI te temi muʼa neʼe ʼi ai te lagi, pea ʼaki te folafola ʼa te ʼAtua neʼe ha te kele mai te vai pea mo tuʼu ʼi te lotomalie ʼo te vai.+
6 Pea ʼaki te ʼu meʼa ʼaia neʼe fakaʼauha te malama ʼo te temi ʼaia ʼi te lomaki.+
7 Kae ʼaki te folafola pe ʼaia, ko te lagi pea mo te kele ʼae ʼe tuʼu ʼi te temi nei, ʼe taʼofi ki te afi pea mo taupau ʼo kaku ki te ʼaho ʼo te fakamau pea mo te fakaʼauha ʼo te hahaʼi ʼae ʼe mole fakaʼapaʼapa ki te ʼAtua.+
8 Kae kau ʼofaina, ʼaua naʼa galo kia koutou te faʼahi ʼaeni: Kia Sehova,* ko he ʼaho ʼe tahi ʼe hage ia ko he ʼu taʼu ʼe afe pea ko he ʼu taʼu ʼe afe ʼe hage ia ko he ʼaho ʼe tahi.+
9 ʼE mole tuai ia Sehova* ʼo ʼuhiga mo tana fakapapau,+ ohage ko te manatu ʼa ʼihi, kae ʼe kataki fualoa kia koutou he ʼe mole loto ia ke fakaʼauha he tahi, kae ʼe loto ia ke kaku te hahaʼi fuli ki te fakahemala.+
10 Kae ko te ʼaho ʼo Sehova*+ ʼe haʼu anai ohage ko he tagata kaihaʼa,+ pea ʼe molehi anai te lagi+ ʼi he toe logoaʼa,* kae ʼe vela anai ʼo gosigosi te ʼu meʼa ʼae ʼi te lagi mo te kele, pea ʼe ha anai te kele mo te ʼu gaue ʼae ʼe fai ʼi ai.+
11 Mai tona aluʼaga ʼae ʼe tonu ke puli feia te ʼu meʼa fuli ʼaia, kotou fakakaukauʼi pe ʼe tonu ke kotou liliu ko he faʼahiga hahaʼi feafeaʼi. ʼE tonu ke kotou agamaʼa pea mo fai he ʼu gaue ʼe ha ai takotou pipiki ki te ʼAtua,
12 ʼo kotou fakaatalitali pea mo manatuʼi tuʼumaʼu ia* te hoko mai* ʼo te ʼaho ʼo Sehova,*+ ʼae ka fakaʼauha ai te lagi+ ʼaki te afi, pea mo huhuʼa anai te ʼu meʼa ʼae ʼi te lagi mo te kele ʼi tonatou vela.
13 Kae ʼo mulimuli ki tana fakapapau, ʼe tou fakaatalitali ki he lagi foʼou mo he kele foʼou,+ pea ʼe maʼu ai anai te faitotonu.+
14 Koia, kau ʼofaina, ʼi takotou fakaatalitali ki te ʼu meʼa ʼaia, kotou faiga malohi ke ʼosi age la, ʼe ina maʼu mai koutou ʼe kotou maʼa, mo heʼe mele pea ʼi te tokalelei.+
15 Tahi ʼae meʼa, ko te kataki fualoa ʼo totatou ʼAliki ʼe fakaʼuhiga ki tokotou haofaki, ohage pe ko tona toe tohi atu e totatou tehina ʼofaina ko Paulo ʼo mulimuli ki te poto ʼae neʼe foaki age ki ai.+
16 Neʼe palalau ʼo ʼuhiga mo te ʼu meʼa ʼaia ʼi te ʼu tohi fuli ʼae neʼe ina fai. Kae ʼe ʼi ai ʼihi meʼa ʼe faigataʼa te mahino ki ai, pea ʼe ʼave keheʼi te ʼu meʼa ʼaia e natou ʼae ʼe mole faʼa mahino ki ai* pea mo vaivai ʼi te tui, ohage ko tanatou fai mo te toe ʼo te ʼu Tohi Taputapu, pea ʼe fakaʼauha anai natou.
17 Koia, kau ʼofaina, ʼi takotou iloʼi fakatomuʼa te faʼahi ʼaia, kotou tokakaga ke ʼaua naʼa fakaheʼi koutou fakatahi mo natou ʼaki te kaka ʼa te hahaʼi agakovi, ʼo mole kei kotou tutuʼu malohi ʼi te tui.+
18 Kae ke haga tuputupu ia koutou te ʼofa makehe ʼo te ʼAtua pea mo te ʼatamai malama ʼo ʼuhiga mo Sesu Kilisito* totatou ʼAliki pea mo Fakamaʼuli. Ke fakakololiaʼi ia ia ʼi te temi nei ʼo talu ai. Ameni.
Nota
^ Peʼe “te ʼu meʼa ʼae neʼe fakakikite.”
^ Klka. “ ʼakotou apositolo.”
^ Vakaʼi Te ʼu Kupu.
^ Klka. “momoe.”
^ Vakaʼi Te ʼu Fakamahino 1.5.
^ Vakaʼi Te ʼu Fakamahino 1.5.
^ Ko tona fakaʼuhiga, he logoaʼa ʼo he meʼa ʼe fakalaka fakavilivili.
^ Vakaʼi Te ʼu Fakamahino 1.5.
^ Peʼe “holi malohi ki.” Klka. “fakaviliviliʼi.”
^ Klka. “te ʼi heni.”
^ Vakaʼi Te ʼu Fakamahino 1.5.
^ Peʼe “neʼe mole ako.”
^ Vakaʼi Te ʼu Kupu.
