Lua Samuele 23:1-39
23 Koʼeni te ʼu palalau fakaʼosi ʼa Tavite:+
“Ko te folafola ʼa Tavite, te foha ʼo Sese,+Pea ko te folafola ʼa te tagata ʼae neʼe fakakololiaʼi,+Te tagata fakanofo+ ʼa te ʼAtua ʼo Sakopo,Te tagata hiva mālie ʼo te ʼu hiva+ ʼo Iselaele.
2 Neʼe palalau te laumalie ʼo Sehova ʼaki ia au,+Pea neʼe nofo tana folafola ʼi toku ʼalelo.+
3 Neʼe palalau te ʼAtua ʼo Iselaele,Pea neʼe ui mai e te ʼUtu ʼo Iselaele:+
‘Ka faitotonu te tagata ʼae ʼe pule ki te hahaʼi,+Pea ʼe pule ʼo manavasiʼi ki te ʼAtua,+
4 ʼE hage pe ko te malama ʼo te uhu moka mu mai te laʼa,+He uhu ʼe mole kauʼaoa.
ʼE hage pe ko te malama ʼi te ʼosi to ʼo te ʼua,ʼO fakahomo ake te luna mai te kele.’+
5 ʼE mole feia koa la toku famili ia muʼa ʼo te ʼAtua?
Koteʼuhi neʼe ina fai mo au he fuakava ʼe heʼe gata,+Pea ʼe ina fakatuʼutuʼu ia meʼa fuli mo fakamoʼoni ki ai.
Pea mai tona aluʼaga ʼae ʼe katoa toku haofaki mo toku fiafia ʼuhi ko te fuakava ʼaia,ʼE mole ko te tupuʼaga koa la ʼaia ʼo tana fakatuputupu ʼae ke lahi?+
6 Kae ʼe liʼaki te ʼu tagata fuli ʼae ʼe mole honatou ʼuhiga+ ohage pe ko he ʼu ʼakau talatala,He ʼe mole feala ke toʼo ʼaki te ʼu nima.
7 Ka fāfā he tagata ki ai,ʼE tonu ke ʼi ai hana meʼa gaue ukamea mo te ʼakau ʼo he tao,Pea ʼe tonu ke tutu katoa natou ʼi te afi ʼi te koga meʼa ʼaia.”
8 Koʼeni te ʼu higoa ʼo te ʼu tagata tau malolohi ʼa Tavite:+ Ko Sosete-pasepete, te tagata Takemoni, ʼae neʼe pule ki te ʼu tagata tau malolohi ʼe toko tolu.+ ʼI te tahi ʼaho, neʼe ina matehi te ʼu tagata ʼe toko 800 ʼaki tana tao.
9 Neʼe hoa ki ai ia Eleasale,+ te foha ʼo Toto,+ te foha ʼo Akoki pea neʼe kau ʼi te ʼu tagata tau malolohi ʼe toko tolu ʼae neʼe olo mo Tavite ʼo tauʼi ia te kau Filisitini. Neʼe natou fakatahitahi ai ki te tau, pea ʼi te temi ʼae neʼe holomuli ai te ʼu tagata ʼo Iselaele ʼo olo,
10 neʼe tuʼu pe ia Eleasale ʼo hoko atu tana matehi te kau Filisitini, ʼo kaku ki te mate noa ʼo tona nima kae kei ina puke pe tana heleta.+ Koia, ʼi te ʼaho ʼaia, neʼe foaki ai e Sehova he toe malo lahi ki Iselaele.+ Pea neʼe mulimuli te hahaʼi ia Eleasale ke natou olo ʼo toʼo te ʼu koloa ʼo te hahaʼi ʼae neʼe natou matehi.
11 Neʼe hoa ki ai ia Samema, te foha ʼo Ake, te tagata Alalite. Neʼe fakatahitahi te kau Filisitini ʼi Lehi, pea neʼe ʼi ai te gaueʼaga lenitili ʼi ai. Pea neʼe feholaki te hahaʼi ʼuhi ko te kau Filisitini.
12 Kae neʼe tuʼu ʼi te gaueʼaga, ʼo tauʼi te kau Filisitini ke mole natou toʼo te gaueʼaga ʼaia, pea neʼe ina matehi natou. Neʼe foaki ai e Sehova he toe malo lahi ki Iselaele.+
13 Lolotoga te taʼukai, neʼe hihifo te ʼu tagata ʼe toko tolu ʼo te ʼu tagata pule ʼe toko 30 kia Tavite ʼi te ʼana ʼo Atulami,+ pea neʼe fakatuʼu e he kau solia Filisitini tonatou nofoʼaga ʼi te Potu Fenua Laulelei ʼo Lefaimi.+
14 Neʼe nofo ia Tavite ʼi tona nonoʼaga ʼi te moʼuga,+ pea neʼe ʼi ai he kau solia Filisitini ʼi Petelehemi.
15 Pea neʼe fakaʼamuʼamu leva ia Tavite: “Ka na neʼe feala la ke au inu he moʼi vai mai te tane vai ʼae ʼe ovi ki te matapa ʼo Petelehemi!”
16 Neʼe ulufi ai e te ʼu tagata tau malolohi ʼe toko tolu te nofoʼaga ʼo te kau Filisitini, ʼo natou ohu he moʼi vai mai te tane vai ʼae neʼe ovi ki te matapa ʼo Petelehemi, pea neʼe natou ʼaumai kia Tavite. Kae neʼe mole ina fia inu ia, ʼo ina huaʼi ai ia muʼa ʼo Sehova.+
17 Neʼe ina ui: “Sehova e, ʼe mole feala ke au fai te faʼahi ʼaia. ʼE tonu koa ke au inu te toto+ ʼo te ʼu tagata ʼaeni neʼe feala ke tuʼutamakiʼia ʼonatou maʼuli* ʼi tanatou olo ʼo ohu mai te moʼi vai?” Koia, neʼe mole ina fia inu ai. Ko te ʼu meʼa ʼaia neʼe fai e ʼana tagata tau malolohi ʼe toko tolu.
18 Ko Apisai,+ te tehina ʼo Soape, te tama ʼa Teselusa,+ neʼe pule ki te tahi age ʼu tagata ʼe toko tolu. Neʼe ina matehi te toko 300 ʼaki tana tao, pea neʼe iloa ohage ko te ʼu ʼuluaki tagata tau ʼe toko tolu.+
19 Logo la neʼe lahi age tona iloa ʼi te ʼu tagata ʼe toko tolu ʼae neʼe pule ki ai, kae neʼe mole tatau ia mo te ʼu ʼuluaki tagata tau ʼe toko tolu.
20 Ko Penaia,+ te foha ʼo Seosata neʼe ko he tagata lototoʼa* pea neʼe ina fai ni meʼa lalahi ʼi Kapiteseele.+ Neʼe ina matehi te ʼu foha ʼe lua ʼo Aliele, te tagata Moape, pea neʼe hifo ki te loto tane vai ʼo matehi ai he laione ʼi he ʼaho nive.+
21 Neʼe ina toe matehi foki mo he toe tagata Esipito neʼe lahi ʼaupito. Logo la neʼe toʼo e te tagata Esipito he tao ʼi tona nima, kae neʼe haʼu ia ʼo tauʼi ia ia ʼaki he koga ʼakau pea neʼe ina faʼao te tao mai te nima ʼo te tagata Esipito, ʼo ina matehi ʼaki.
22 Ko te ʼu meʼa ʼaia neʼe fai e Penaia, te foha ʼo Seosata, pea neʼe iloa ohage ko te ʼu ʼuluaki tagata tau malolohi ʼe toko tolu.
23 Logo la neʼe lahi age tona iloa ʼi te ʼu tagata ʼe toko tolugofulu, kae neʼe mole tatau ia mo te ʼu ʼuluaki tagata tau ʼe toko tolu. Kae neʼe fakanofo ia ia e Tavite ke pule ki ʼana tagata leʼo.
24 Neʼe kau ia Asaele+ te tehina ʼo Soape, ʼi te toko tolugofulu ʼaeni: ko Elesanane, te foha ʼo Toto mai Petelehemi,+
25 mo Samema te tagata Halote, mo Elika te tagata Halote,
26 mo Eletesi+ te tagata Paleti, mo Ila+ te foha ʼo Isese mai Tekoa,
27 mo Apiesele+ te tagata Anatote,+ mo Mepunai te tagata Husa,
28 mo Tesalemone te tagata Akoki, mo Maalai+ te tagata Netofa,
29 mo Elepe te foha ʼo Paana, te tagata Netofa, mo Itai te foha ʼo Lipai mai Kipease ʼo te kau Pesamino,
30 mo Penaia+ te tagata Pilatoni, mo Hitai mai te ʼu vai tafe* ʼo Kaasi,+
31 mo Api-alepone te tagata Alapa, mo Asimaveti te tagata Pasu-limi,
32 mo Eliapa te tagata Salepone, mo te ʼu foha ʼo Sasene, mo Sonatane,
33 mo Samema te tagata Alalite, mo Asiame te foha ʼo Salale, te tagata Alalite,
34 mo Elifeleti te foha ʼo Akasepai, te foha ʼo te tagata Maakate, mo Eliame te foha ʼo Asitofele,+ te tagata Kilone,
35 mo Eteselo te tagata Kalemelo, mo Paalai te tagata Alapi,
36 mo Sikuale te foha ʼo Natane mai Tesopa, mo Pani te tagata Kate,
37 mo Teseleke te tagata Amone, mo Nahalai te tagata Peeloti ʼae neʼe ina toʼo te ʼu mahafu ʼa Soape, te tama ʼa Teselusa,
38 mo Ila te tagata Itele, mo Kalepe te tagata Itele,+
39 pea mo Ulia+ te tagata Heti. Neʼe fakatahiʼi fuli leva ko te toko 37.
Nota
^ Hep. nèphèsh. Vakaʼi Te ʼu Kupu.
^ Hep. “neʼe ko te foha ʼo he tagata lototoʼa.”
^ Vakaʼi Te ʼu Kupu.
