Lua Samuele 6:1-23
6 Pea neʼe toe fakatahiʼi e Tavite te kau tagata solia faiva fuli ʼo Iselaele, neʼe ko te toko 30 000 tagata.
2 Neʼe alu leva ia Tavite mo tana kau tagata fuli ki Paale-suta, ke natou toʼo mai ai te Aleka ʼo te ʼAtua moʼoni.+ ʼE fetapa te hahaʼi ʼi te muʼa Aleka ki te huafa ʼo Sehova ʼo te ʼatu kautau,+ ʼae ʼe ʼafio ʼi te ʼu fuga* kelupimi.+
3 Kae neʼe natou hili te Aleka ʼo te ʼAtua moʼoni ki he saliote foʼou+ ʼi tanatou ʼaumai mai te ʼapi ʼo Apinatape,+ ʼae neʼe tuʼu ʼi te kiʼi moʼuga. Neʼe taki te saliote foʼou ʼaia e Usea mo Akeso, te ʼu foha ʼo Apinatape.
4 Neʼe natou toʼo ai te Aleka ʼo te ʼAtua moʼoni mai te ʼapi ʼo Apinatape, ʼae neʼe tuʼu ʼi te kiʼi moʼuga pea neʼe haʼele ia Akeso ʼi muʼa ʼo te Aleka.
5 Neʼe fakafiafia ia Tavite mo te hahaʼi fuli ʼo Iselaele ia muʼa ʼo Sehova, ʼaki he ʼu meʼa faimaholo kehekehe neʼe faʼu ʼaki te ʼakau,* mo he ʼu alepa, mo he ʼu nafa,+ mo he ʼu simepale+ pea mo he tahi age ʼu meʼa faimaholo.+
6 Kae ʼi tanatou kaku atu ki te hahaʼaga fulumeto ʼo Nakone, neʼe faoʼi e Usea tona nima ʼo puke te Aleka ʼo te ʼAtua moʼoni,+ he neʼe meʼa pe ke to ʼuhi ko te ʼu pipi.
7 ʼI te lakaga ʼaia, neʼe to te hauhau ʼo Sehova kia Usea, pea neʼe matehi ia ia e te ʼAtua moʼoni+ ʼi ai ʼuhi ko tana aga heʼe fakaʼapaʼapa ʼaia.+ Neʼe mate ai, ia tafa ʼo te Aleka ʼo te ʼAtua moʼoni.
8 Kae neʼe ita* ia Tavite ʼi te to ʼo te hauhau ʼo Sehova kia Usea. Neʼe fakahigoa te koga meʼa ʼaia ko Pelesi-usea* ʼo kaku mai ki te ʼaho nei.
9 Neʼe mataku leva ia Tavite ia Sehova+ ʼi te ʼaho ʼaia, pea neʼe ina ui: “ ʼE lava feafeaʼi haku ʼaumai te Aleka ʼo Sehova?”+
10 Neʼe mole loto e Tavite ke ʼaumai te Aleka ʼo Sehova ki te faʼahi ʼae neʼe nofo ai, ʼi te Kolo ʼo Tavite.+ Kae neʼe ina fakatotonu ke ʼave ki te ʼapi ʼo Opeto-etome+ te tagata Kiete.
11 Neʼe tuku te Aleka ʼo Sehova ʼi te ʼapi ʼo Opeto-etome, te tagata Kiete lolotoga mahina ʼe tolu. Pea neʼe tapuakiʼi e Sehova ia Opeto-etome mo tona loto fale katoa.+
12 Neʼe fakaha age te logo ʼaeni ki te Hau ko Tavite: “ ʼE tapuakiʼi e Sehova te ʼapi ʼo Opeto-etome pea mo ʼana meʼa fuli, ʼuhi ko te Aleka ʼo te ʼAtua moʼoni.” Koia, neʼe alu ai ia Tavite ʼo toʼo te Aleka ʼo te ʼAtua moʼoni mai te ʼapi ʼo Opeto-etome ʼo ina ʼaumai ki te Kolo ʼo Tavite, ʼaki he ʼu fakafiafia.+
13 Pea ʼi te ʼosi fai e natou ʼae neʼe natou fata+ te Aleka ʼo Sehova ni laka ʼe ono, neʼe ina momoli ai he vitulo mo he manu neʼe sino lelei.
14 Pea neʼe meʼe ia Tavite ʼi tona malohi katoa ia muʼa ʼo Sehova. Neʼe ina tui* te efote* lino.*+
15 Neʼe ʼaumai e Tavite mo te hahaʼi fuli ʼo Iselaele ia te Aleka+ ʼo Sehova, mo natou kalaga fakafiafia+ pea mo pupuhi te fakatagi pupuhi.+
16 Kae ʼi te temi ʼae neʼe fakahu ai te Aleka ʼo Sehova ki te Kolo ʼo Tavite, neʼe sio ifo ia Mikale,+ te ʼofafine ʼo Saulo mai te matapa fakamalama ki te makahopohopo pea mo te meʼe ʼa te Hau ko Tavite ia muʼa ʼo Sehova. Neʼe kamata fehiʼa ai kia ia ʼi tona loto.+
17 Neʼe natou ʼaumai leva te Aleka ʼo Sehova ʼo hili ki tona tuʼuʼaga ʼi te fale la ʼae neʼe fakatuʼu e Tavite.+ Pea neʼe momoli e Tavite he ʼu holokoseta*+ mo he ʼu sakilifisio ʼo te tokalelei*+ ia muʼa ʼo Sehova.+
18 ʼI te ʼosi momoli e Tavite te ʼu holokoseta pea mo te ʼu sakilifisio ʼo te tokalelei, neʼe ina tapuakiʼi te hahaʼi ʼi te huafa ʼo Sehova ʼo te ʼatu kautau.
19 Neʼe ina toe tufa foki ki te hahaʼi fuli, te hahaʼi kaugamalie ʼo Iselaele, tagata mo fafine, ia he foʼi pane takafuafua, mo he foʼi keke neʼe fai ʼaki te fuaʼi palema mo he foʼi keke vite, pea neʼe mavae ai te hahaʼi fuli, ʼo tahi alu ki tona ʼapi.
20 ʼI te temi ʼae neʼe toe liliu ai ia Tavite ʼo tapuakiʼi tona loto fale, neʼe haʼu ia Mikale,+ te ʼofafine ʼo Saulo ʼo fakafelaveʼi mai kia ia. Neʼe ina ui age: “ ʼI meʼa fakaufiufi foki te meʼa ʼae neʼe fai e te hau ʼo Iselaele ʼi te ʼaho nei, ʼi tana huʼi tona kofu tuʼa ia mata ʼo te ʼu taʼahine kaugana ʼo ʼana kau pule, ohage pe ko he tagata vale!”+
21 Pea neʼe ui age e Tavite kia Mikale: “Neʼe au fakafiafia ia muʼa ʼo Sehova, ʼae neʼe ina filifili au kae mole ko tau tamai mo tona loto fale katoa, ʼo ina fakanofo au ke au takitaki ia Iselaele, te hahaʼi ʼa Sehova.+ Koia, ʼe au fakafiafia anai ia muʼa ʼo Sehova,
22 pea ʼe toe ʼasili age anai taku fakamalaloʼi ia au totonu, mo taku liliu ʼae ko he meʼa noa. Kae ko te ʼu taʼahine kaugana ʼae neʼe ke talanoa ki ai, ʼe natou fakakololiaʼi anai au.”
23 Pea neʼe mole maʼu he fanau ʼa Mikale,+ te ʼofafine ʼo Saulo ʼo kaku ki tona mate.
Nota
^ Peʼe lagi “ ʼi te vaha ʼo te ʼu.”
^ Hep. “te ʼakau ʼae ko te senelie.”
^ Peʼe “mamahi.”
^ Ko tona fakaʼuhiga “Neʼe To Te Hauhau Kia Usea.”
^ Hep. “Neʼe haʼi e Tavite tona koga loto ʼaki.”
^ Vakaʼi Te ʼu Kupu.
^ Vakaʼi Te ʼu Kupu.
^ Vakaʼi Te ʼu Kupu.
^ Vakaʼi Te ʼu Kupu.
