Lua Samuele 9:1-13
-
ʼE fakaha e Tavite tona ʼofa agatonu kia Mefiposete (1-13)
9 Pea neʼe ui leva e Tavite: “ ʼE kei toe koa he tahi ʼi te famili ʼo Saulo ke au fakaha age kia ia toku ʼofa agatonu ʼuhi ko Sonatane?”+
2 Pea neʼe ʼi ai he tagata faifekau ʼo te famili ʼo Saulo neʼe higoa ko Tesipa.+ Neʼe ʼave ia ia kia Tavite, pea neʼe fehuʼi age e te hau ki ai: “Ko koe koa ko Tesipa?” Neʼe ina tali age: “Ko au tau tagata faifekau.”
3 Neʼe hoko atu e te hau: “ ʼE kei toe koa he tahi ʼi te famili ʼo Saulo ke au fakaha age kia ia te ʼofa agatonu ʼo te ʼAtua?” Neʼe tali e Tesipa ki te hau: “ ʼE kei toe te foha ʼo Sonatane kae ʼe maʼimoa ʼona vaʼe.”*+
4 Neʼe fehuʼi age e te hau ki ai: “ ʼE ʼifea ia ia?” Neʼe tali e Tesipa ki te hau: “ ʼE nofo ʼi te fale ʼo Makile,+ te foha ʼo Amiele, ʼi Lotepale.”
5 Neʼe fekauʼi atu aipe e te Hau ko Tavite he tahi ke alu ʼo kumi mai ia ia mai te fale ʼo Makile, te foha ʼo Amiele, ʼi Lotepale.
6 ʼI te temi pe ʼae neʼe haʼu ai ia Mefiposete, te foha ʼo Sonatane, te foha ʼo Saulo kia Tavite, neʼe tuʼutuli ifo atu aipe mo tulolo. Pea neʼe ui age e Tavite: “Mefiposete!” pea neʼe ina tali age: “Koʼeni au ʼae ko tau tagata faifekau.”
7 Neʼe ui age e Tavite ki ai: “ ʼAua naʼa ke mataku, koteʼuhi ʼe au fakaha moʼoni atu anai toku ʼofa agatonu+ ʼuhi ko Sonatane, tau tamai. ʼE au liufaki atu anai te ʼu kele fuli ʼo Saulo, tau kui pea ʼe ke kai* tuʼumaʼu anai ʼi toku laupapa.”+
8 Neʼe tulolo ai leva ia Mefiposete, ʼo ina ui: “Ko ai koa ia au, ke ke tokagaʼi ia* au ʼae ʼe hage ko he kuli mate?”+
9 Pea neʼe pauʼi e te hau ia Tesipa, te tagata faifekau ʼa Saulo, ʼo ina ui ki ai: “ ʼE au foaki te ʼu meʼa fuli ʼa Saulo pea mo tona loto fale katoa ki te mokopuna ʼo tou pule.+
10 Ko koe, mo ʼou foha pea mo tau hahaʼi faifekau ʼe kotou gaueʼi anai te ʼu kele maʼa ia, pea ʼe kotou tanaki anai ʼona fua, moʼo taupau te famili ʼo te mokopuna ʼo tou pule. Kae ʼe kai tuʼumaʼu pe anai ia Mefiposete, te mokopuna ʼo tou pule, ʼi toku laupapa.”+
Neʼe maʼu e Tesipa ʼona foha ʼe toko 15 pea mo ʼana hahaʼi faifekau ʼe toko 20.+
11 Neʼe ui leva e Tesipa ki te hau: “Siʼoku ʼaliki hau, ʼe au fai anai te ʼu meʼa fuli ʼae ʼe ke fakatotonu mai.” Koia, neʼe kai ia Mefiposete ʼi te laupapa ʼo Tavite* ohage ko he foha ʼo te hau.
12 Neʼe toe ʼi ai foki he foha ʼo Mefiposete neʼe kei veliveli pea neʼe higoa ko Mika.+ Neʼe liliu ai ia natou fuli ʼae neʼe nonofo ʼi te fale ʼo Tesipa ko he hahaʼi faifekau ʼa Mefiposete.
13 Pea neʼe maʼuli ia Mefiposete ʼi Selusalemi, he neʼe kai tuʼumaʼu pe ʼi te laupapa ʼo te hau.+ Neʼe maʼimoa ʼona vaʼe.+
Nota
^ Peʼe “ketu.”
^ Hep. “kai pane.”
^ Hep. “ke maliu mai tou fofoga kia.”
^ Peʼe lagi “toku laupapa.”
