Hiva ʼa Salomone 2:1-17
-
Te finemui (1)
-
“Ko au pe ko he matalaʼi safalani”
-
-
Te tauhi ovi (2)
-
‘ ʼE hage toku ʼofaʼaga ko he lilio’
-
-
Te finemui (3-14)
-
“ ʼAua naʼa kotou uga ke au manako kae ʼe heʼeki au logoʼi” (7)
-
ʼE ina fakaha te ʼu palalau ʼa te tauhi ovi (10, lua koga-14)
-
“Ta olo fakatahi, siʼoku mafu” (10, lua koga, 13)
-
-
-
Te ʼu tokolua ʼo te finemui (15)
-
“Kotou puke te ʼu lenato maʼa matou”
-
-
Te finemui (16, 17)
-
“Ko toku ʼofaina ʼaʼaku ia, pea ko au ʼa ia” (16)
-
2 “Ko au pe ko he matalaʼi safalani ʼo te matafenua,Ko he lilio ʼo te ʼu potu fenua laulelei.”+
2 “Ohage ko he lilio ʼi te vao talatala,ʼE feia toku ʼofaʼaga ʼi te kau finemui.”
3 “Ohage ko he fuʼu pome ʼi te vao matuʼa,ʼE feia toku ʼofaina ʼi te kau talavou.
ʼE au manumanū ke au heka ʼi tona malu,Pea ʼe malie tona fuaʼi ʼakau ki toku gutu.
4 Neʼe ina fakahu au ki te fale ʼo te ʼu kaitahi,Pea ʼe hage tona ʼofa ko he fuka ʼi ʼoluga ia au.
5 Fakamalohiʼi au ʼaki ni keke fuaʼi vite,+Fakafimalieʼi au ʼaki ni pome,He ʼe au mahaki ʼi te laukau.
6 ʼE ʼuluga toku ʼulu ki tona nima hema,Pea ʼe ina ʼaofi au ʼaki tona nima mataʼu.+
7 ʼAki te ʼu tia fafine+ ʼo te vao,ʼE au kole atu ke kotou fakapapau ʼu taʼahine ʼo Selusalemi:
ʼAua naʼa kotou uga ke au manako kae ʼe heʼeki au logoʼi.+
8 ʼE au logo ki te leʼo ʼo toku ʼofaina!
Kotou sisio koʼeni ʼe haʼu,ʼE haʼu ʼi te ʼu moʼuga mo hopohopo ʼi te ʼu kiʼi moʼuga.
9 ʼE hage toku ʼofaina ko he tia, ko he ʼuhiʼi tia.+
Kua tau mai, ʼe tuʼu ʼi tuʼa ʼo tomatou kaupa,ʼE sio mai ʼi te ʼu matapa fakamalama,ʼAe ʼe vagavaga.
10 ʼE ui mai e siʼoku ʼofaina:
‘Tuʼu ake siʼoku ʼofaʼaga,Kae ta olo fakatahi, siʼoku mafu.
11 Koʼeni, kua ʼosi te temi nive.
ʼE mole kei to te ʼua, kua gata ia.
12 Kua fisi te ʼu matalaʼi ʼakau ʼo te fenua,+Kua hoko mai te temi fakagata ʼo te ʼu fuʼu ʼakau,+Pea kua logo te tagi ʼa te ʼu kulukulu ʼi totatou fenua.+
13 ʼI te fuʼu fiku, kua momoho tautonu ʼona fua.+Kua fisi te ʼu fuʼu vite pea kua ʼaele magoni.
Tuʼu ake siʼoku ʼofaʼaga pea ke haʼu!
Ta olo fakatahi, siʼoku mafu.
14 Siʼaku lupe, ʼae ʼe nofo ʼi te ʼutu,+ʼI te ʼu luo ʼo te mata mato,ʼE au fia sio kia koe mo logo ki tou leʼo,+He ʼe mālie pea ʼe ke hoihoifua lelei.’ ”+
15 “Kotou puke te ʼu lenato maʼa matou,Te ʼu ʼuhiʼi lenato ʼae ʼe natou maumauʼi te ʼu gaueʼaga vite,He ʼe kua fisi.”
16 “Ko toku ʼofaina ʼaʼaku ia, pea ko au ʼa ia.+
ʼE ina taki tana faga manu+ ʼi te ʼulu lilio.+
17 ʼI muʼa ʼo te hoko mai ʼo te ʼaele mokomoko pea mo te hola ʼo te malu,Siʼoku ʼofaina, ke ke mavae fakavilivili,Ohage ko te tia+ peʼe ko te ʼuhiʼi tia+ ʼi te ʼu moʼuga ʼae ʼe ta vaha ai.
