Taʼaga Lea 15:1-33
15 ʼE puli te ita ʼi he tali ʼe malū,*+Kae ʼe fakatupu ita he palalau fefeka.*+
2 Ka palalau te kau poto, ʼe natou fakaʼaogaʼi lelei te ʼatamai malama,+Kae ʼe hoko palalau te kau agavale.
3 ʼE sio ia Sehova kia meʼa fuli:ʼE ina sioʼi tatau te hahaʼi agakovi mo agalelei.+
4 ʼE hage te ʼu palalau malū ko he fuʼu ʼakau ʼo te maʼuli,+Kae ʼe fakatupu mamahi te ʼu palalau kaka.
5 ʼE mole fakaʼapaʼapa tuʼa tahi te agavale ki tona fakatonutonuʼi e tana tamai,+Kae ko he tahi ʼe ʼatamai ʼe ina tali tona akonakiʼi.+
6 ʼE lahi te ʼu koloa ʼi te ʼapi ʼo te tagata faitotonu,Kae ʼe tuʼutamakiʼia pe te tagata agakovi ʼi ʼana gaue.+
7 ʼE haʼu te ʼatamai malama mai te ʼu laugutu ʼo te kau poto,+Kae ʼe mole haʼu ia mai te loto ʼo te kau vale.+
8 ʼE fakalialia ia Sehova ki te ʼu sakilifisio ʼa te kau agakovi,+Kae ʼe fiafia ia ʼi te ʼu faikole ʼa te kau faitotonu.+
9 ʼE fakalialia ia Sehova ki te aga ʼa te tagata agakovi,+Kae ʼe ʼofa ia ki ʼae ʼe ina kumi te faitotonu.+
10 ʼE hage ʼe kovi* te fakatonutonu kia ia ʼae ʼe ina siʼaki te ala ʼae ʼe totonu,+ʼE mate anai ia ia ʼae ʼe fehiʼa ki te fakatonutonu.+
11 ʼE mole puli he meʼa kia Sehova ʼi te Faitoka* mo te koga meʼa ʼo te fakaʼauha.*+
Kae ʼe feafeaʼi age la ki te loto ʼo te tagata!+
12 ʼE mole leleiʼia e te tagata vava te tagata ʼae ʼe ina fakatonutonuʼi ia ia.+
ʼE mole alu tuʼa tahi pe la ʼo kole tokoni ki te tagata poto.+
13 ʼE matamalimali he tahi moka ʼe fiafia tona loto,Kae ʼe puli te lotomalohi ʼi te mamahi.+
14 ʼE kumi e ia ʼae ʼe ʼatamai te ʼatamai malama,+Kae ʼe fia fai pe te kau vale ki te agavale.+
15 ʼE kovi fuli pe te ʼu ʼaho ʼo te tagata ʼae ʼe mamahi,+Kae ko ia ʼae ʼe fiafia* ʼe kau tuʼumaʼu ki he kaitahi.+
16 ʼE lelei age te veliveli ʼo te ʼu koloa kae manavasiʼi kia Sehova+ʼI te lahi ʼo te ʼu koloa mo ni tuʼania.+
17 ʼE lelei age he pa lauʼakau ʼae ʼe maʼu ai te ʼofa,+ʼI he vitulo gako kae ʼe maʼu ai te fehiʼa.+
18 ʼE fakatupu kē te tagata itaita,+Kae ko ia ʼae ʼe tuai ʼi te ita ʼe ina fakatokatoka.+
19 ʼE hage te ala ʼo te tagata pikoʼelo ko he ʼa ʼakau talatala,+Kae ʼe hage te ala ʼo te hahaʼi faitotonu ko he ala laulahi mo tokalelei.+
20 ʼE fakafiafiaʼi e he foha poto tana tamai,+Kae ʼe meʼa noaʼi e he tagata vale tana faʼe.+
21 ʼE fiafia te tagata ʼae ʼe mole aga fakapotopoto ʼi tana agavale,+Kae ʼe haʼele fakahagatonu te tagata ʼae ʼe fakasiosio tonu.+
22 ʼE to noa anai te ʼu fakatuʼutuʼu ʼi te mole kumi tokoni,Kae ʼe hoko ia moka ʼe lahi te kau faitokoni.+
23 ʼE fiafia he tagata ʼi tana fai he tali ʼe tonu.+ʼI meʼa fakafiafia leva te fai ʼo he palalau lelei ʼi tona temi tonu!+
24 ʼE hake ki te ala ʼo te maʼuli ia ia ʼae ʼe fakasiosio poto,+Pea ʼe maliu kehe ia mai te ala ʼae ʼe hifo ki te Faitoka.*+
25 ʼE holoʼi anai e Sehova te ʼapi ʼo te tagata fiameʼalahi,+Kae ʼe ina taupau anai te ʼu tuʼakoi ʼo te kele ʼo te fafine vitua.+
26 ʼE fakalialia ia Sehova ki te ʼu puleʼaki kaka ʼa te tagata agakovi,+Kae ʼe maʼa ki ʼona mata te ʼu palalau ʼae ʼe lelei.+
27 ʼE fakatupu fihifihia ki tona famili ia ia ʼae ʼe ina maʼu fakakaka ʼona koloa,+Kae ʼe maʼuli anai ia ia ʼae ʼe fehiʼa ki te ʼu meʼa ʼofa ʼae ʼe foaki fakafufu.+
28 ʼE metitasio te tagata faitotonu ʼi muʼa ʼo tana tali,*+Kae ʼe puʼaki mai e te kau agakovi ni leakovi.
29 ʼE mamaʼo ia Sehova mai te kau agakovi,Kae ʼe logo ia ki te faikole ʼa te kau faitotonu.+
30 ʼE fiafia te loto moka matamalimali he tahi,ʼE fakamalohiʼi te ʼu hui e he logo lelei.+
31 ʼE kau ʼi te kau popotoIa ia ʼae ʼe fakalogo ki te fakatonutonu ʼae ʼe maʼu ai te maʼuli.+
32 ʼE meʼa noaʼi te maʼuli e natou fuli ʼae ʼe lituʼa ki te fakatonutonu,+Kae ko ia ʼae ʼe ʼatamai ʼe ina tali te fakatonutonu.+
33 ʼE maʼu te poto ʼi te manavasiʼi kia Sehova,+Pea ʼe maʼu te kololia ʼi te fiamalalo.+
Nota
^ Peʼe “fakalotomamahi.”
^ Peʼe “lelei.”
^ Peʼe “fefeka.”
^ Vakaʼi Te ʼu Kupu.
^ Peʼe “mo te Apatone.”
^ Peʼe “lelei tona loto.”
^ Vakaʼi Te ʼu Kupu.
^ Peʼe “ ʼE teuteuʼi e te tagata faitotonu tana tali,” peʼe “ ʼE fakakaukau te tagata faitotonu ʼi muʼa ʼo tana palalau.”
