Taʼaga Lea 3:1-35
3 Siʼoku foha, ʼaua naʼa ke galoʼi taku akonaki,Kae fakalogo ʼi tou loto katoa ki ʼaku fakatotonu,
2 He ʼe ke maʼuli anai ʼo fualoa,Pea mo tokalelei.+
3 Ke mole puli ia koe te manavaʼofa* mo te agatonu.*+
Ke ke haʼi ki tou kia,Pea ke ke tohi ki tou loto.+
4 ʼE ʼofainaʼi anai koe pea ʼe iloʼi anai tau fakasiosio potoE te ʼAtua mo te tagata.+
5 Falala kia Sehova+ ʼi tou loto katoa,Kae ʼaua naʼa ke falala ki tou ʼatamai.+
6 Tokagaʼi ia ia ia meʼa fuli ʼae ʼe ke fakahoko,+Pea ʼe ina fakatotonu anai ʼou ala.+
7 ʼAua naʼa ke fia poto.+
Manavasiʼi kia Sehova ʼo maliu mai te kovi.
8 ʼE ko he faitoʼo lelei anai ki tou sinoPea malohi ai mo ʼou hui.
9 Fakamaʼuhigaʼi ia Sehova ʼaki ʼau meʼa lelei tukupau,+Pea mo te ʼu ʼuluaki fua* ʼo ʼau taʼukai fuli.*+
10 Pea ʼe fonu maumau anai ʼou fale tanakiʼaga meʼa,+Pea ʼe toe feia pe anai mo ʼou tane vino foʼou.
11 Siʼoku foha, ʼaua naʼa ke liʼaki tou akonakiʼi e Sehova,+Pea ʼaua naʼa ke fakalialia ki tana fakatonutonu,+
12 He ʼe fakatonutonuʼi e Sehova ia natou ʼae ʼe ʼofa ai,+Ohage ko te fakatonutonuʼi e he tamai tona foha ʼofaina.+
13 Manuʼia te tagata ʼae ʼe ina maʼu te poto,+Mo te tagata ʼae ʼe liliu ʼo fakasiosio tonu,
14 He ʼe lelei age te maʼu ʼo te poto ʼi te siliva,Pea ʼe fua lelei age ia ʼi te aulo.+
15 ʼE maʼuhiga age ia ʼi te ʼu feo,*ʼE maʼuhiga lahi age ia ia meʼa fuli ʼae ʼe ke fakaʼamu ki ai.
16 ʼE maʼu he maʼuli loaloaga ʼi tona nima mataʼu,Mo te koloa pea mo te kololia ʼi tona nima hema.
17 ʼE fakafiafia te haʼele ʼi ʼona ala,Pea ʼe tokalelei ʼona ala fuli.+
18 ʼE ko he fuʼu ʼakau ʼo te maʼuli maʼa natou ʼae ʼe natou puke,Pea ʼe kalagaʼi anai te manuʼia ʼo natou ʼae ʼe natou puke maʼu.+
19 Neʼe fakatuʼu e Sehova te kele ʼaki te poto.+
Pea neʼe ina toe fakatuʼu malohi te lagi ʼaki te fakasiosio tonu.+
20 Neʼe ina avahi te ʼu vai loloto ʼaki tona ʼatamai malama,Pea neʼe hifo te hahau mai te lagi kauʼaoa.+
21 Siʼoku foha, ke ʼaua naʼa mamaʼo te ʼu meʼa ʼaia* mai ʼou mata.
Taupau te aga fakapotopoto mo te fealagia fakakaukau,
22 ʼE ke maʼu ai anai te maʼuli,Pea ʼe ko he kahoa ki tou kia.
23 Koia ʼe ke haʼele fimalie anai ʼi tou ala,Pea ʼe mole tukia anai tou vaʼe ki he meʼa.+
24 Moka ke takoto, ʼe mole ke mataku anai ki he meʼa,+ʼEi, moka ke takoto, ʼe ke moe fimalie anai.+
25 ʼE mole ke tuʼania anai he aluʼaga fakamataku ʼe hoko fakafokifa,+Peʼe ko te afā ʼae ka to ki te kau agakovi.+
26 ʼE foaki atu anai e Sehova he lotofalala,+ʼE ina puipui anai tou vaʼe mai te ʼu hele fuli.+
27 ʼAua naʼa ke fakafisi te fai ʼo te meʼa ʼae ʼe lelei kia natou ʼae ʼe ʼaoga ki ai,+Kapau ʼe feala ke ke tokoni kia natou.+
28 ʼAua naʼa ke ui ki tou tatau: “Alu koe, hoki ke toe haʼu! ʼE au foaki atu anai hau meʼa apogipogi,”
Kapau ʼe feala ke ke foaki age ʼi te temi pe ʼaia.
29 ʼAua naʼa ke fai ni fakatuʼutuʼu kovi ki tou tatau,+He ʼe nofo mo he lotofimalie ʼi ʼou tafa.
30 ʼAua naʼa ke hoko kē mo he tagata+Mo kapau neʼe mole ina fai atu he meʼa ʼe kovi.+
31 ʼAua naʼa ke maheka ki te tagata agamalohi,+Pea ʼaua naʼa ke faʼifaʼitakiʼi ʼana aga,
32 Koteʼuhi ʼe fakalialia ia Sehova ki he tahi ʼe agakaka,+Kae ʼe kaumeʼa lelei ia mo te hahaʼi faitotonu.+
33 ʼE to te malaʼia ʼo Sehova ki te ʼapi ʼo te tagata agakovi,+Kae ʼe ina tapuakiʼi te ʼapi ʼo te kau faitotonu.+
34 ʼE ina vaʼi te kau vava,+Kae ʼe ʼofa ia ki te kau agavaivai.+
35 ʼE fakaʼapaʼapaʼi anai te kau popoto, ko tonatou fakapale ʼaia,Kae ʼe leleiʼia e te kau agavale te meʼa ʼae ʼe fakaufiufi.+
Nota
^ Peʼe “ ʼofa agatonu.”
^ Peʼe “moʼoni.”
^ Peʼe “te vahe lelei tukupau.”
^ Peʼe “te ʼu koloa fuli ʼae neʼe ke maʼu mai ai.”
^ Vakaʼi Te ʼu Kupu.
^ ʼE lagi fakaʼuhiga ki te ʼu agaaga ʼo te ʼAtua ʼae ʼe palalau ki ai te ʼu vaega ki muʼa atu.
