Taʼaga Lea 6:1-35
6 Siʼoku foha, kapau neʼe ke fakapapau ʼe ke huʼi anai te maʼua ʼo tou tatau,+Pe neʼe ke talaga mo he tahi ʼo tukuʼaki,+
2 Kapau ʼe liliu tau fakapapau ko he hele kia koe,ʼO ke haʼisia ai ʼi ʼau palalau,+
3 Siʼoku foha, fai te meʼa ʼaeni ke ke ʼateaina mai ai,He ʼe kua puleʼi koe e tou tatau:
Alu ki tou tatau ʼo fiamalalo mo kole mamahi ki ai.+
4 ʼAua naʼa ke moeʼi ʼou mata,Peʼe ke tulemoe.
5 Faiga ke ke ʼateaina ohage ko he tia fafine neʼe hola mai te ʼu nima ʼo te tagata kapu manu,Peʼe ko he manulele mai te ʼu nima ʼo te tagata puke manulele.
6 Tagata pikoʼelo, alu ʼo fakasiosio te foʼi lo,+Sioʼi tona agaaga ke ke liliu ai ʼo poto.
7 ʼE mole ʼi ai hona kamutoa, peʼe ko hona taupau peʼe ko hona pule,
8 Kae ʼe ina teuteuʼi tana meʼa kai ʼi te temi mafana,+ʼE ina tanaki tana meʼa kai lolotoga te taʼukai.
9 Tagata pikoʼelo, ʼe kaku anai ki ʼafea tau takoto?
Ko ʼafea ʼae ka ke tuʼu ake ai mai tau moe?
10 ʼAi pe hau kiʼi moe, hau kiʼi tulemoe,ʼAi pe hau kiʼi ʼukuma ke ke malolo,+
11 Pea ʼe hoko fakafokifa anai kia koe te masiva ohage ko he tagata kaihaʼa,ʼEi, ʼe hoko fakafokifa anai kia koe te fakaʼofaʼofa ohage ko he tagata kaihaʼa ʼe toʼo mahafu.+
12 ʼE haʼele kaka te tagata ʼae ʼe mole hona ʼaoga mo agakovi.+
13 ʼE kivi mata,+ mo tauaka ʼona vaʼe pea ʼe gaugaue ʼona kauʼi tuhi.
14 ʼE fiafia tona loto ʼi te fai ʼo te meʼa ʼae ʼe kovi.ʼE ina fai tuʼumaʼu ni fakatuʼutuʼu kovi+ pea mo fakahoko ni maveuveu.+
15 Koia ʼae ʼe hoko fakafokifa ai tona malaʼia,ʼE tauteaʼi anai ʼi he temi pe ʼe tahi pea ʼe mole feala ke fakamalolo.+
16 ʼE fehiʼa ia Sehova kia meʼa ʼe ono,Pea ʼe fakalialia kia meʼa ʼe fitu:
17 Te fialahi,+ te gutuloi,+ te fakapogi ʼo he tahi kae neʼe mole ina fai he meʼa ʼe kovi,+
18 Te loto ʼae ʼe ina fai ni fakatuʼutuʼu kaka,+ te ʼoho ki te meʼa ʼae ʼe kovi,
19 Te fakamoʼoni ʼe gutuloi tuʼumaʼu,+Pea mo he tahi pe ʼe fakatupu kē ʼi ni tehina.+
20 Siʼoku foha, fakalogo ki te fakatotonu ʼo tau tamai,Pea ʼaua naʼa ke siʼaki te ʼu ako ʼae neʼe foaki atu e tau faʼe.+
21 Haʼi tuʼumaʼu ki tou loto,Nonoʼo ki tou kia.
22 ʼE natou takitaki anai ʼou lakaʼaga,ʼE natou leʼoleʼo anai koe moka ke takoto,Pea ʼe natou akoʼi anai koe moka ke ʼala ake.
23 Ko te fakatotonu ʼe ko he malama taki,+Ko te lao ʼe ko he malama,+Pea ko te ʼu valoki mo te fakatonutonu ʼe ko te ala ʼaia ki te maʼuli.+
24 ʼE natou puipui anai koe mai te fafine agakovi,+Mo te ʼu palalau fakaoloolo ʼa te fafine faiaga.*+
25 ʼAua naʼa ke manumanū ʼi tou loto ki tona finelelei,+ʼAua naʼa ke tuku ke fakahalaʼi koe ʼi te taulekaleka ʼo tona fofoga,
26 He ʼe kei toe pe ki te tagata hana kiʼi moʼi pane ʼuhi ko te fafine paomutu,+Pea kapau ko he fafine ʼohoana, ʼe puli ai tona maʼuli.
27 ʼE tuku anai koa e he tagata he afi ki tona fatafata kae ʼe mole vela ai ʼona mutuʼi meʼa?+
28 Pe ʼe feala anai koa ke haʼele he tagata ʼi he ʼu mamala kakaha kae ʼe mole vela ai ʼona vaʼe?
29 ʼE toe feia pe anai mo ia ʼae ʼe momoe mo te ʼohoana ʼo tona tatau,Ko ia ʼae ʼe fāfā ki ai ʼe tauteaʼi anai.+
30 ʼE mole meʼa noaʼi he tagata kaihaʼaMo kapau ʼe kaihaʼa he ʼe fia kai.
31 Kae ka maʼu, ʼe ina totogi ʼo tuʼa fitu,ʼE tonu anai ke fakafisi ki te ʼu koloa fuli ʼo tona ʼapi.+
32 Ko he tahi pe ʼe tono mo he fafine ʼe mole aga fakapotopoto,Ko ia ʼae ka ina fai te aga ʼaia, ʼe tuʼutamakiʼia.+
33 ʼE tau pe anai mo te mamahi mo te fakalainoa,+Pea ʼe mole puli anai tona ufiufi.+
34 ʼE itaita anai te tagata ʼohoana ʼuhi ko tona maheka,ʼE mole manavaʼofa anai moka lagavaka.+
35 ʼE mole ina tali anai he totogi.ʼE mole fimalie anai tatau aipe pe ʼe kotea tau meʼa ʼofa.
Nota
^ Hep. “ ʼae ʼe mole iloʼi.” ʼE lagi ko he fafine neʼe fakamamaʼo mai te ʼu pelesepeto ʼa te ʼAtua.
