Taʼaga Lea 7:1-27
7 Siʼoku foha, fakalogo ki ʼaku palalau,Pea mo taupau fakalelei ʼaku fakatotonu.+
2 Fakalogo ki ʼaku fakatotonu pea ʼe ke maʼuli anai.+Ke maʼuhiga kia koe ʼaku ako ohage ko te maʼuhiga ʼo tou kanoʼi mata.
3 Haʼi ki ʼou kauʼi tuhi,Tohi ki tou loto.+
4 Ui age ki te poto: “Ko koe ko toku tokolua,”
Pea toe ui age ki te ʼatamai: “Ko koe ko toku kaiga,”
5 Ke puipui ai koe mai te fafine faiaga,*+Mai te fafine ʼae ʼe ina fai he ʼu aga heʼe ʼaoga* pea mo he ʼu palalau fakaoloolo.+
6 Neʼe au sio mai toku ʼapi,ʼI te matapa fakamalama vagavaga
7 Ki te hahaʼi ʼae ʼe hoko tui,Pea neʼe au tokagaʼi ʼi te kau tupulaga he tama neʼe mole aga fakapotopoto.+
8 Neʼe fakalaka ʼo ovi ki te ala ʼo te fafine ʼaia,Pea neʼe alu ʼi te ala ʼae ʼe tuʼu ai tona ʼapi,
9 ʼI te malū ʼo te afiafi,+ʼI te vave poʼuli.
10 Pea neʼe au sio ki te haʼu ʼa te fafine ki te tama,Neʼe teu ohage ko he fafine paomutu+ pea neʼe kaka tona loto.
11 Ko he fafine logoaʼa mo matasoka,+
ʼE mole nofo maʼu ʼi tona ʼapi.
12 ʼI ʼihi temi, ʼe nofo ʼi te ʼu ala, ʼi ʼihi temi, ʼe nofo ʼi te ʼu malaʼe lalahi,ʼE nofo ovi ki te ʼu magaʼi ala fuli ʼo lamalama.+
13 Pea koʼeni kua ina puke pea mo ʼuma ki ai.Neʼe pauʼu ʼo ina ui age:
14 “Neʼe tonu ke au momoli te ʼu sakilifisio ʼo te tokalelei.*+
Pea neʼe au fakahoko ʼaku fakapapau ʼi te ʼaho nei.
15 Koia ʼae neʼe au haʼu ai ʼo fakafelaveʼi mai kia koe,ʼO kumi koe, pea koʼeni kua au maʼu koe!
16 Neʼe au teuteuʼi toku moeʼaga ʼaki ni kie taulekaleka,Mo te lino* lanu kehekehe mai Esipito.+
17 Pea neʼe au fakamagoni ʼaki te mila,* mo te aloese pea mo te kasia.*+
18 Haʼu la ke ta konana ʼi te ʼofa ʼo kaku ki te uhu,Ta fefakafiafiaʼaki ʼi te laukau mamahi.
19 ʼE puli toku ʼohoana ʼi fale,Kua folau mamaʼo ia.
20 Neʼe alu ia mo tana paʼaga,Pea ʼe hoki liliu mai ʼi te kua katoa ʼo te mahina.”
21 ʼE ina fakahalaʼi te tama ʼaki tana poto palalau.+
ʼE ina fakalalata ʼaki ni palalau fakaoloolo.
22 Fokifa pe kua ina muliʼi ohage ko he vitulo ʼe ʼave ke tamateʼi,Peʼe ko he tagata vale ʼe ʼave ke haʼihaʼi moʼona fakatuʼā,+
23 ʼO kaku ki te fanahi ʼo tona ʼate e he kauʼi nahau.ʼE hage pe ko he manulele ʼe ʼoho ki he hele, ʼe mole ina iloʼi ʼe mate ai anai.+
24 Siʼoku foha, ʼi te temi nei, fakalogo mai,Tokagaʼi ʼaku palalau.
25 ʼAua naʼa hehe tou loto ʼi ʼona ala.
ʼAua naʼa ke haʼele ai.+
26 Tokolahi neʼe lavevea kovi ia ia,+ʼEi, neʼe ina matehi te tokolahi.+
27 Ko te alu ki tona ʼapi ʼe hage ko te alu ki te Faitoka,*ʼE hifo ia ki te ʼu potu fakapoʼuli ʼo te mate.
Nota
^ Hep. “matapule.” ʼE lagi ko he fafine neʼe fakamamaʼo mai te ʼu pelesepeto ʼa te ʼAtua.
^ Hep. “ ʼae ʼe mole iloʼi.” ʼE lagi ko he fafine neʼe fakamamaʼo mai te ʼu pelesepeto ʼa te ʼAtua.
^ Vakaʼi Te ʼu Kupu.
^ Vakaʼi Te ʼu Kupu.
^ Vakaʼi Te ʼu Kupu.
^ Vakaʼi Te ʼu Kupu.
^ Vakaʼi Te ʼu Kupu.
