Tuʼi Fakamau 13:1-25
13 Neʼe toe fai e te kau Iselaele te meʼa ʼae ʼe kovi kia mata ʼo Sehova.+ Pea neʼe tuku leva natou e Sehova ki te ʼu nima ʼo te kau Filisitini+ lolotoga taʼu ʼe 40.
2 ʼI te temi ʼaia, neʼe ʼi ai te tagata neʼe higoa ko Manoa.+ Neʼe ko he tagata Solea,+ mai te telepi ʼo Tane.+ Neʼe paʼa tona ʼohoana pea neʼe mole maʼu hana fanau.+
3 ʼI te tahi ʼaho, neʼe ha te ʼaselo ʼa Sehova ki te fafine, ʼo ina ui age ki ai: “Koʼeni, ʼe ke paʼa pea neʼe mole ke maʼu hau fanau, kae ʼe ke faitama anai pea ʼe ke fanauʼi anai he tamasiʼi tagata.+
4 Koia, ke ke tokaga naʼa ke inu he moʼi vino peʼe ko he tahi age kava,+ pea ʼaua naʼa ke kai he meʼa ʼe heʼe maʼa.+
5 ʼEi, ʼe ke faitama anai pea ʼe ke fanauʼi anai he tamasiʼi tagata. ʼE mole tonu anai ke kosi tona ʼulu+ he ʼe liliu anai te tamasiʼi ko he Nasilea* ʼa te ʼAtua, ʼi te temi pe ʼae ka fanauʼi ai. Pea ʼe ina haofaki anai ia Iselaele mai te ʼu nima ʼo te kau Filisitini.”+
6 Pea neʼe alu leva te fafine ʼo ui ki tona ʼohoana: “Neʼe haʼu he tagata ʼa te ʼAtua moʼoni ʼo palalau mai kia au. Neʼe hage ko he ʼaselo ʼa te ʼAtua moʼoni pea neʼe fakaofoofo* ʼaupito tona agaaga. Neʼe mole au fehuʼi age pe ʼe haʼu maifea, pea neʼe mole ina fakaha mai tona higoa.+
7 Kae neʼe ina ui mai: ‘Koʼeni, ʼe ke faitama anai pea ʼe ke fanauʼi anai he tamasiʼi tagata. ʼAua naʼa ke inu he moʼi vino peʼe ko he tahi age kava. Pea ʼaua naʼa ke kai he meʼa ʼe heʼe maʼa, he ʼe liliu anai te tamasiʼi ko he Nasilea ʼa te ʼAtua, ʼi te temi pe ʼae ka fanauʼi ai, ʼo kaku ki tona mate.’ ”
8 Pea neʼe kole mamahi e Manoa kia Sehova: “Sehova, fakalelei siʼou loto, kae ke toe liliu mai tau tagata faifekau ʼae neʼe hoki ke fekauʼi mai, pea ke ina akoʼi mai te faʼahiga pusiaki ʼo tamā tamasiʼi ʼaeni ka tupu.”
9 Neʼe tali e te ʼAtua moʼoni te kole ʼa Manoa. Neʼe toe haʼu leva te ʼaselo ʼa te ʼAtua moʼoni ki te fafine ʼi tana nofo ʼi tuʼa atu ʼo te kolo. Kae neʼe mole nofo ia Manoa, tona ʼohoana mo ia.
10 Pea neʼe foimo lele atu aipe te fafine ki tona ʼohoana, ʼo ui age ki ai: “Koʼeni, kua toe ha mai te tagata ʼae neʼe haʼu ʼo palalau mai kia au ʼi te tahi ʼaho.”+
11 Neʼe olo ai leva ia Manoa mo tona ʼohoana ki te tagata. Pea neʼe ina fehuʼi age ki ai: “ ʼE ko koe koa te tagata ʼae neʼe palalau ki toku ʼohoana?” Neʼe ina tali age: “ ʼEi, ko au.”
12 Pea neʼe ui e Manoa: “ ʼOfa pe ke hoko ʼau palalau! ʼE tonu anai ke feafeaʼi te maʼuli ʼo te tamasiʼi? Pea kotea anai ka ina fai?”+
13 Pea neʼe ui e te ʼaselo ʼa Sehova kia Manoa: “ ʼE tonu anai ke tokaga tou ʼohoana ki te ʼu meʼa fuli ʼae neʼe au fakaha age ki ai.+
14 ʼE mole ina kai anai he ʼu fuaʼi vite peʼe ko he meʼa pe neʼe fai ʼaki te vite. ʼE mole ina inu anai he moʼi vino peʼe ko he tahi age kava.+ Pea ʼe mole ina kai anai he meʼa ʼe heʼe maʼa.+ ʼE tonu anai ke mulimuli ki te ʼu meʼa fuli ʼae neʼe au fakatotonu age.”
15 Pea neʼe ui e Manoa ki te ʼaselo ʼa Sehova: “Fakalelei siʼou loto, ke ke nofo muʼa ʼi heni. ʼE ma olo anai ʼo teuteuʼi maʼa koe he tao kei mui.”+
16 Kae neʼe tali age e te ʼaselo ʼa Sehova kia Manoa: “Tatau aipe pe ʼe au nofo, kae ʼe mole au kai anai ki tau meʼa kai. Kae kapau ʼe ke fia momoli he holokoseta kia Sehova, ʼe feala pe tau momoli.” Neʼe mole iloʼi e Manoa neʼe ko te ʼaselo ʼa Sehova.
17 Pea neʼe fehuʼi age e Manoa ki te ʼaselo ʼa Sehova: “Ko ai tou higoa?+ ʼE ma fia iloʼi ke feala hamā fakamaʼuhigaʼi koe moka hoko anai ʼau palalau.”
18 Kae neʼe tali age e te ʼaselo ʼa Sehova: “He koʼe ʼe ke fia iloʼi toku higoa kae ʼe ko he higoa taulekaleka?”
19 Neʼe toʼo ai leva e Manoa te tao ʼae ʼe kei mui mo te molaga meʼa kai, ʼo momoli kia Sehova ʼi te fuʼu maka. Pea neʼe fai e te ʼAtua he meʼa fakaofoofo kae sio mata ki ai ia Manoa mo tona ʼohoana.
20 Neʼe hake ia te ʼaselo ʼa Sehova ki te lagi ʼi te afi ʼae neʼe haʼu mai te ʼaletale, kae sio mata ki ai ia Manoa mo tona ʼohoana. Neʼe nā tulolo atu aipe ki te kele.
21 Neʼe mahino ai leva ia Manoa neʼe ko te ʼaselo ʼa Sehova. Neʼe mole toe ha te ʼaselo ʼa Sehova kia Manoa mo tona ʼohoana.+
22 Neʼe ui e Manoa ki tona ʼohoana: “ ʼE mahino ia, ʼe ta mamate anai he neʼe ta sisio ki te ʼAtua.”+
23 Kae neʼe ui age e tona ʼohoana: “Ka na neʼe loto la e Sehova ke ina matehi taua, neʼe mole ina tali te holokoseta+ mo te molaga meʼa kai ʼae neʼe ta momoli. Pea kapau la neʼe ko tona loto ʼaia, neʼe mole ina fakaha mai te ʼu meʼa fuli ʼaeni pea mo ina fai mai ni palalau feia.”
24 Ki muli age, neʼe fanauʼi leva e te fafine he tamasiʼi tagata, pea neʼe ina fakahigoa ko Samisoni.+ Neʼe lahilahi ake te tamasiʼi pea neʼe tapuakiʼi ia ia e Sehova.
25 Pea neʼe hifo te laumalie ʼo Sehova kia ia,+ ʼi tana nofo ʼi Masane-tane,+ ʼi te vaha ʼo Solea mo Esetaoli.+
