Ki Te Kau Efeso 4:1-32
4 Koia ko au ʼae ʼe pilisoni+ ʼi toku ʼuhiga tisipulo ʼa te ʼAliki, ʼe au kole mamahi atu ke kotou haʼele ʼi hona aluʼaga ʼe tuha+ mo tokotou pauʼi.
2 Kotou agavaivai*+ pea mo agamalū tuʼumaʼu, mo kataki fualoa,+ ʼo kotou fekatakiʼaki ʼi te ʼofa,+
3 mo kotou maʼuʼuli ʼi te tokalelei, ʼo kotou faiga moʼoni ke kotou taupau takotou logo tahi ʼae ʼe kotou maʼu mai te laumalie maʼoniʼoni.+
4 ʼE ko te sino ʼe tahi,+ mo te laumalie ʼe tahi,+ ohage pe ko te pauʼi ʼo koutou ki te ʼamanaki ʼe tahi,+
5 mo te ʼAliki ʼe tahi,+ mo te tui ʼe tahi, mo te faʼahiga papitema ʼe tahi.
6 Pea ʼe ko te ʼAtua mo Tamai ʼe tahi ʼa te hahaʼi fuli, pea ʼe ina puleʼi te hahaʼi fuli. ʼE natou fakaha fuli te ʼatamai malama ʼo ʼuhiga mo ia, pea ʼe gaue tona malohi ia natou fuli.
7 Kua fakaha mai e te ʼAtua tona ʼofa makehe kia tatou takitokotahi, pea neʼe ko Kilisito* ʼae neʼe ina foaki mai kia tatou takitokotahi te meʼa ʼofa ʼaia.+
8 Koteʼuhi ʼe ui ʼi te folafola ʼa te ʼAtua: “ ʼI tana hake ki ʼoluga, neʼe ina ʼave he kau popula, pea neʼe ina foaki he ʼu tagata ohage ko ni meʼa ʼofa.”+
9 Kotea te fakaʼuhiga ʼo te ui ʼae neʼe “hake ki ʼoluga”? Ko tona fakaʼuhiga, neʼe hifo ifo muʼa ia ki te kele.
10 Pea ko ia ʼae neʼe hifo ifo, ʼe ko ia pe ʼae neʼe hake+ ʼo maʼoluga age ʼi te ʼatu lagi,+ ke ina fakahoko ia meʼa fuli pe.
11 Neʼe ina foaki ʼihi ko he kau apositolo,+ mo ʼihi ko he kau polofeta,+ mo ʼihi ko he kau faifakamafola ʼo te logo lelei,+ mo ʼihi ko he ʼu tagata tauhi ovi pea mo faiako,+
12 ke natou fakatonutonuʼi* te kau maʼoniʼoni, mo fakahoko te gaue fakaminisitelio, pea mo lagalaga te sino ʼo Kilisito.*+
13 ʼE natou fai anai te faʼahi ʼaia ʼo kaku ki tatatou logo tahi fuli ʼi te tui pea mo maʼu te ʼatamai malama totonu ʼo ʼuhiga mo te ʼAlo ʼo te ʼAtua, ke tou liliu ko he ʼu tagata kua fotufotuʼa,+ kua katoa totatou ʼuhiga fotufotuʼa ohage ko Kilisito.
14 Koia tou tuku tatatou hage ko te kihiʼi tamaliki, koteʼuhi ko ʼae ʼe mulimuli ki te ʼu akonaki loi ʼa te hahaʼi kaka ʼe hage anai ko he vaka ʼe fetaʼaki e te ʼu peau mo te matagi.+
15 Kae tou fakaha te moʼoni pea ʼaki te ʼofa, tou tuputupu ia meʼa fuli ʼo mulimuli kia ia ʼae ʼe ko te ʼulu ʼo te sino,* ia Kilisito.+
16 ʼUhi ko ia, ʼe pipiki fakatahi te ʼu koga fuli ʼo te sino+ pea mo natou fetokoniʼaki moʼo foaki te meʼa ʼae ʼe ʼaoga ki te sino. Ka gaue lelei te ʼu koga sino takitahi, ʼe tokoni ai ki te tuputupu ʼo te sino katoa ke malohi ʼi te ʼofa.+
17 Koia koʼeni te meʼa ʼae ʼe au ui pea mo fakamoʼoni ia muʼa ʼo te ʼAliki: ʼE mole kei tonu ke kotou maʼuʼuli ohage ko te hahaʼi ʼo te malama,+ ʼae ʼe vaʼiganoa ʼonatou ʼatamai.+
18 ʼE fakapoʼuli ʼanatou fakakaukau, mo natou mamaʼo mai te maʼuli ʼae ʼe haʼu mai te ʼAtua, ʼuhi ko tanatou mole fia iloʼi ia te ʼAtua pea mo tanatou mole kei logoʼi he meʼa ʼi ʼonatou loto.
19 ʼE mole kei natou ufiufi, ʼo natou fakahoko te ʼu aga fakalialia*+ pea mo fai fakavalevale te ʼu aga heʼe maʼa fuli.
20 Kae neʼe kotou ako ʼe mole feia ia Kilisito,
21 mo kapau neʼe kotou logo kia ia pea neʼe akoʼi koutou ʼo mulimuli ki te moʼoni ʼae neʼe akoʼi e Sesu.
22 Neʼe kua kotou ako ʼe tonu ke kotou liʼaki ia te ʼuluagaaga ʼafeā+ ʼae ʼe alu tahi mo ʼakotou aga ʼafeā pea ʼe ʼaʼasili kovi ʼuhi ko ʼokotou holi kaka.+
23 Kae ʼe tonu ke hoko atu takotou fakafoʼou ia takotou faʼahiga manatu,*+
24 pea ʼe tonu ke kotou kofuʼi ia te ʼuluagaaga foʼou+ ʼae neʼe fakatupu ʼo mulimuli ki te finegalo ʼo te ʼAtua pea ʼe fakatafito ki te faitotonu mo te agatonu moʼoni.
25 Koia ʼi te temi nei, ʼi takotou kua liʼaki ia te kaka, kotou tahi fakaha ia te moʼoni ki ʼokotou tatau,+ koteʼuhi ko tatou ko he ʼu koga sino ʼe pipiki tahi.+
26 Kotou iita kae ʼaua naʼa kotou agahala.+ ʼAua naʼa kotou iita+ ʼo kaku ki te to ʼo te laʼa.
27 Pea ʼaua naʼa kotou tuku he faigamalie ki te Tevolo ke ina fakaneke koutou ke kotou fai he meʼa ʼe kovi.+
28 Ko ʼae neʼe kaihaʼa ke ʼaua naʼa toe kaihaʼa, kae ke gaue kinakina ʼo ina fai he gaue ʼe lelei+ ke ina maʼu ai he meʼa moʼo foaki ki ʼae ʼe nofo ʼi te faigataʼaʼia.+
29 ʼAua naʼa haʼu mai ʼokotou gutu he palalau ʼe kovi,*+ kae ko he palalau pe ʼe ina fakalotomalohiʼi ʼihi moka ʼe ʼaoga, ke fua lelei ai kia natou ʼae ʼe logo.+
30 Pea tahi ʼae, ʼaua naʼa kotou fakalotomamahiʼi ia te laumalie maʼoniʼoni ʼo te ʼAtua.+ Neʼe fakailoga koutou ʼaki te laumalie maʼoniʼoni ʼaia+ ki te ʼaho ʼae ka fakaʼateainaʼi ai koutou ʼaki te totogi.*+
31 Kotou fakamamaʼo mai ia koutou ia te lotokovi fuli pe,+ mo te ita, mo te hauhau, mo te kalaga, mo te laukovi,+ ʼo toe feia aipe mo te ʼu agakovi fuli.+
32 Kae ke kotou feagaleleiʼaki, mo fonu ʼi te manavaʼofa,+ ʼo kotou fefakamolemoleʼaki ʼaki he lotolelei ohage ko te fakamolemole ʼa te ʼAtua kia koutou ʼaki ia Kilisito.+
Nota
^ Peʼe “fiamalalo.”
^ Vakaʼi Te ʼu Kupu.
^ Peʼe “akoʼi.”
^ ʼE fakaʼuhiga ki te kokelekasio.
^ Ko tona fakaʼuhiga, te pule.
^ Klka. asélgéïa. Vakaʼi Te ʼu Kupu.
^ Peʼe “fakafoʼou te malohi ʼae ʼe ina puleʼi ʼokotou ʼatamai.”
^ Klka. “pala.”
^ Vakaʼi Te ʼu Kupu.
