Esaia 46:1-13
46 ʼE mapelu ia Pele,+ ʼe punou ia Nepo.
ʼE hili ʼonā fakatata* ki ni manu,+Ohage ko ni uta ʼe mamafa ki ni manu kua gaʼegaʼe.
2 Kua nā mapelu mo punou toko lua.ʼE mole feala ki te ʼu ʼatua ke nā haofaki te ʼu uta ʼaia,*Pea ʼe ʼave popula mo naua.
3 “Kotou fakalogo mai, hakoga ʼo Sakopo, pea mo koutou fuli te hakoga ʼo Iselaele ʼae ʼe toe,+Ia koutou ʼae neʼe au tokoni ki ai ʼi muʼa ʼo takotou tupu pea neʼe au fua koutou talu mai te fatu!+
4 ʼE mole au fetogi anai ʼo kaku ki tokotou temi matuʼa.+ʼE au tokoni atu anai ʼo kaku ki te hina ʼo ʼokotou fuluʼi ʼulu.
ʼE au fua anai koutou, ʼe au tokoni atu anai mo haofaki koutou ohage ko taku kua fai.+
5 ʼE kotou fakatatau koa ia au kia ai, peʼe au hage ko ai?+ʼE feala koa ke tou tatau?+
6 ʼE ʼi ai te hahaʼi ʼae ʼe maluku mai tanatou kato te aulo.ʼE natou fua te siliva ʼi te meʼa fua.
ʼE natou totogi he tagata tufuga ukamea ke ina fai he ʼatua.+
Pea ʼe natou tulolo leva ʼi ʼona muʼa ʼo atolasio ki ai.+
7 ʼE natou fua ia ia ʼi ʼonatou fuga ʼuma.+ʼE natou fua ʼo kaku ki tona tuʼuʼaga, ʼo fakatuʼu ki ai.
ʼE mole gaugaue ia ʼi tona tuʼuʼaga.+
ʼE natou kole tokoni ki ai kae ʼe mole ina tali age ia.ʼE mole feala ke ina haofaki he tahi ʼi te mamahi.+
8 Kotou manatuʼi te meʼa ʼaeni mo lototoʼa.
Kotou fakakaukauʼi lelei, kau talagataʼa!
9 Kotou manatuʼi te ʼu meʼa ʼo te temi muʼa,Kotou manatuʼi ko au te ʼAtua pea ʼe mole ʼi ai he tahi atu.
Ko au te ʼAtua pea ʼe mole ʼi ai he tahi ʼe hage ko au.+
10 Talu mai te kamataʼaga, ʼe au fakakikite te fakaʼosi,Pea mai te ʼu temi ʼafeā ʼe au tala te ʼu meʼa ʼae ʼe mole heʼeki hoko.+
ʼE au ui: ‘ ʼE hoko anai te meʼa ʼae neʼe au fakatotonu,+Pea ʼe au fakahoko anai ia meʼa fuli ʼae ʼe au fiafia ai.’+
11 ʼE au pauʼi he akuila mai te hopoʼaga ʼo te laʼa,*+Mai he fenua mamaʼo he tagata ʼe ina fakahoko anai te meʼa ʼae neʼe au fakatotonu.+
Neʼe au palalau pea ʼe au fakahoko anai.
Neʼe au fai te fakatuʼutuʼu pea ʼe au fakahoko moʼoni anai.+
12 Kotou fakalogo mai ia koutou ʼae ʼe uigataʼa,Ia koutou ʼae ʼe mamaʼo mai te faitotonu.
13 Kua fakaovi mai taku faitotonu,ʼE mole mamaʼo ia,Pea ʼe mole tuai anai taku haofaki.+
ʼE au fakahoko anai te fakamaʼuli ki Sione, pea ʼe au foaki anai toku taulekaleka ki Iselaele.”+
Nota
^ Peʼe “taula ʼatua.”
^ ʼE fakaʼuhiga ki te ʼu taula ʼatua ʼae ʼe hili ki te ʼu manu.
^ Peʼe “potu esite.”
