Esekiele 27:1-36
-
Ko he hiva mate ki te tuʼutamaki ʼo Tile (1-36)
27 Neʼe toe palalau mai ia Sehova, ʼo ina ui:
2 “Kae kia koe foha ʼo te tagata, hiva he hiva mate ʼo ʼuhiga mo Tile,+
3 pea ke ui kia Tile:‘Ia koe ʼae ʼe nofo ʼi te huʼaga ʼo te tai,ʼAe ʼe faifakatau mo ni hahaʼi ʼo ni tuʼuga motu,Koʼeni te folafola ʼa te Tuʼi ʼAliki ko Sehova:
“Tile, neʼe ke ui koe:‘ ʼE au matalelei ʼosi.’+
4 Neʼe tuʼu ʼou tuʼakoi ʼi te loto tai.Neʼe fakamataleleiʼi ʼosi koe e ʼou tufuga.
5 Neʼe faʼu tou vaka ʼaki te ʼu lauʼi papa senelie ʼo Senili,+Pea faʼu tou fana ʼaki te fuʼu sete ʼo Lipane.
6 Neʼe faʼu ʼau foe ʼaki te fuʼu sene ʼo Pasani,Pea ko te taumuʼa ʼo tou vaka, neʼe fai ʼaki te fuʼu sipele, ʼae ʼe teuteuʼi ʼaki te ivuale mai te ʼu motu ʼo Kitimi.+
7 Neʼe faʼu tou la ʼaki te lino lanu mamaʼa ʼo Esipito.Neʼe fakamalumalu te fuga vaka ʼaki te filo ʼuʼui pea mo te fuluʼi ovi huʼa lotuma fakapoʼuli ʼae mai te ʼu motu ʼo Eliseka.+
8 Ko te hahaʼi ʼo Sitoni mo Alevate+ neʼe ko ʼau kau tauʼaʼalo.
Tile, ko ʼau tagata faiva neʼe ko ʼau kauvaka.+
9 Neʼe mono ʼou vaka e te ʼu tagata popoto mo faiva ʼo Kepale.+
Neʼe ʼomai te ʼu vaka fuli ʼo te tai mo ʼanatou kauvaka kio koe ʼo faifakatau.
10 Neʼe kau te ʼu tagata ʼo Pelesia, mo Lutime, mo Puti+ ʼi tau kautau, neʼe ko ʼau tagata tau.
Neʼe natou tau io koe ʼanatou meʼa tali tau mo ʼonatou puloga tau, pea neʼe natou fakamataleleiʼi ai koe.
11 Neʼe tutuʼu te ʼu tagata ʼo Alevate ʼae neʼe kau ʼi tau kautau ʼi te takafoli ʼo ʼou kaupa,Pea neʼe puipui ʼou tule e ni tagata lototoʼa.
Neʼe natou tau te ʼu meʼa tali tau takafuafua ʼi te takafoli ʼo ʼou kaupaPea neʼe natou fakamataleleiʼi ai koe.
12 “ ‘ “Neʼe faikoloa ia Talesisi+ mo koe koteʼuhi neʼe ke koloaʼia.+ Neʼe natou totogi ʼou koloa ʼaki te siliva, mo te ukamea, mo te etani, mo te pulu.+
13 Neʼe faifakatau mo koe ia Savani, mo Tupale,+ mo Meseke.+ Neʼe natou totogi ʼou koloa ʼaki ni kaugana+ mo ni meʼa kapa.
14 Neʼe foaki e te ʼu hologa ʼo Tokalama+ ni hosi gaue kele, ni hosi tau mo ni asino moʼo fetogi ʼaki ʼou koloa.
15 Neʼe faifakatau mo koe te hahaʼi ʼo Tetane.+ Neʼe ke fakaʼaogaʼi ni hahaʼi faifakatau ʼi ni tuʼuga motu. Neʼe natou foaki atu te ivuale+ mo te ʼakau maʼuhiga ko he tukuhau.
16 Neʼe faifakatau mo koe ia Etome koteʼuhi neʼe mahu ʼou koloa. Moʼo fetogi ʼaki ʼou koloa neʼe natou foaki ni maka ʼae ko te tulekoase, mo te fuluʼi ovi huʼa lotuma fakapoʼuli, mo ni tui fakailoga ʼe lanu mamaʼa, mo ni kie maʼuhiga, mo ni feo pea mo ni maka ʼae ko te lupi.
17 “ ‘ “Neʼe faifakatau mo koe ia Suta mo Iselaele. Neʼe natou foaki te fulumeto ʼo Miniti,+ ni meʼa kai lelei, ni meli,+ ni lolo mo ni lolo magoni+ moʼo fetogi ʼaki ʼou koloa.+
18 “ ‘ “Neʼe faifakatau mo koe ia Tamaso+ koteʼuhi neʼe mahu ʼou koloa pea neʼe ke koloaʼia ʼaupito. Neʼe ina foaki atu te vino ʼo Heleponi pea mo te fuluʼi ovi ʼo Saale.
19 Neʼe foaki e Vetani mo Savani ʼae mai Usale, te ukamea ʼae neʼe gaueʼi, mo te kasia* pea mo te kaho fakamagoni moʼo fetogi ʼaki ʼou koloa.
20 Neʼe ke maʼu mai Tetane+ ni tupenu ke heheka ai te ʼu tagata heka hosi.
21 Neʼe ke fakagaueʼi te kau Alape pea mo te ʼu pule fuli ʼo Keta,+ ʼae neʼe natou fakatau ni akeno, ni ovi tagata mo ni tao tagata.+
22 Neʼe faifakatau mo koe te ʼu tagata faifakatau ʼo Sepa mo Laema.+ Neʼe natou foaki ni kaloni kehekehe maʼuhiga pea mo ni faʼahiga maka maʼuhiga, ʼo toe feia pe mo te aulo moʼo fetogi ʼaki ʼou koloa.+
23 Neʼe faifakatau mo koe ia Halani,+ mo Kane, mo Eteni,+ mo te ʼu tagata faikoloa ʼo Sepa+ mo Asule+ pea mo Kilimati.
24 ʼI te fakatauʼaga koloa, neʼe natou fakatau ni teu matalelei, ni tapi lanu kehekehe, mo ni pulupulu ʼe lanu ʼuʼui neʼe tui fakailoga ʼe lanu mamaʼa, neʼe haʼihaʼi fuli ʼaki ni maea.
25 Neʼe fakaʼaogaʼi te ʼu vaka ʼo Talesisi+ moʼo fetuku ʼaki ʼou koloa,ʼO ke fonu ai mo mamafa* ʼi te moana.
26 Neʼe ʼave koe e tau kau tauʼaʼalo ʼi ni tai neʼe hou,Neʼe ke mou ai ʼi te moana ʼi te matagi ʼo te potu esite.
27 ʼI te ʼaho ʼae ʼe ke to ai, ʼe mou fuli anai ʼi te moanaʼOu koloa, ʼau meʼa lelei, ʼau fakatau, ʼau kauvaka,Te ʼu tagata ʼae ʼe natou mono ʼou vaka, ʼau tagata tau fuli+ pea mo te ʼu tagata ʼae ʼe natou fetogi ʼou koloa,+ʼEi, te hahaʼi fuli ʼaia neʼe io koe.+
28 ʼE galulu anai te ʼu matafenua moka kalaga ʼau kauvaka.
29 ʼE hihifo anai mai ʼonatou vaka ʼo tutuʼu ʼi te keleTe kau tauʼaʼalo fuli pea mo te kauvaka.
30 ʼE natou leʼo lalahi anai mo kalaga mamahi ʼo ʼuhiga mo koe.+ʼE natou laku anai te efu ki ʼonatou ʼulu pea mo teka makafulifuli ʼi te lefulefu.
31 ʼE natou tele anai ʼonatou ʼulu mo tui ni taga.*ʼE natou fetagihi mamahi anai mo tagilaulau ʼo ʼuhiga mo koe.
32 ʼE natou lotomamahi anai mo hiva he hiva mate ʼo ʼuhiga mo koe:
‘Ko ai koa ʼae ʼe hage ko Tile, pea kua nofo fakalogologo ʼi te ʼaho nei ʼi te loto tai?+
33 Neʼe ke fafaga he hahaʼi kaugamalie ʼi te tau mai ʼo ʼau meʼa lelei mai te moana.+
Neʼe ke fakakoloa te ʼu hau ʼo te kele ʼi te lahi ʼo tau maʼu koloa pea mo ʼau fakatau.+
34 Kae ʼi te temi nei, neʼe ke mou ʼi te moana ʼi te ʼu vai loloto.+Neʼe mou mo koe ʼau fakatau pea mo tau hahaʼi fuli.+
35 ʼE punamaʼuli anai te hahaʼi fuli ʼo te ʼu motu, ʼo natou sioʼi fakamamaʼu koe.+ʼE matataku anai ʼonatou hau+ pea ʼe iloga anai tanatou hoha ʼi ʼonatou fofoga.
36 ʼE veka anai te kau faifakatau ʼo te ʼu puleʼaga ʼuhi ko te meʼa ʼae neʼe hoko kia koe.
ʼE hoko fakapunamaʼuli anai mo fakamataku tou fakaʼosi,Pea ʼe ke puli anai ʼo talu ai.’ ” ’ ”+
