Esekiele 28:1-26
28 Neʼe toe palalau mai ia Sehova, ʼo ina ui:
2 “Foha ʼo te tagata, fakaha ki te pule ʼo Tile: ‘Koʼeni te folafola ʼa te Tuʼi ʼAliki ko Sehova:
“ ʼE ke ui tuʼumaʼu ʼi tou fialahi:+ ‘Ko au ko te ʼatua.
ʼE au heka ʼi te hekaʼaga ʼo he ʼatua ʼi te loto tai.’+
Kae ʼe mole ke ʼatua, ko koe pe ko te tagata,Tatau aipe pe ʼe ke ui ʼi tou loto ko koe ko te ʼatua.
3 ʼE ke poto age koa la koe ia Taniela?+
ʼE ke mahino koa la koe ki te ʼu meʼa fakalilo fuli?
4 Neʼe ke koloaʼia ʼuhi ko tou poto mo tau fakasiosio tonu,Pea neʼe ke tanaki te aulo mo te siliva ʼi ʼou fale tanakiʼaga koloa.+
5 Neʼe ke liliu ai ʼo maʼu koloa ʼosi ʼuhi ko ʼou faiva ʼi te faifakatau,+Pea neʼe fialahi ai tou loto ʼuhi ko ʼou koloa.” ’
6 “ ‘Koia koʼeni te folafola ʼa te Tuʼi ʼAliki ko Sehova:
“ ʼI tau ui ʼae ʼi tou loto ko koe ko te ʼatua,
7 ʼE au fekauʼi mai anai he kau matapule moʼou tauʼi, te puleʼaga ʼae ʼe agamalohi.+ʼE natou fakaʼaogaʼi anai ʼanatou heleta moʼo maumauʼi te ʼu meʼa matalelei fuli ʼae neʼe ke maʼu ʼaki tou poto,Pea ʼe natou ʼulihi anai tou taulekaleka.+
8 ʼE natou fakahifo anai koe ki te luo,*Pea ʼe natou fakapogi anai koe ʼi te moana.+
9 ʼE ke toe ui anai koa kia ia ʼae ka ina matehi koe: ‘Ko au ko te ʼatua’?
ʼE mole ke ʼatua, ʼe ke tagata pe ʼi te ʼu nima ʼo natou ʼae ka natou fakalainoaʼi koe.” ’
10 ‘ ʼE matehi anai koe e te kau matapule, ohage ko he tahi ʼe mole silikosisio,Koteʼuhi neʼe au palalau,’ ko te ui ʼaia ʼa te Tuʼi ʼAliki ko Sehova.”
11 Pea neʼe toe palalau mai ia Sehova, ʼo ina ui:
12 “Foha ʼo te tagata, hiva he hiva mate ʼo ʼuhiga mo te hau ʼo Tile mo ui age: ‘Koʼeni te folafola ʼa te Tuʼi ʼAliki ko Sehova:
“Neʼe ko koe te faʼifaʼitakiʼaga ʼo te lelei tukupau,Neʼe lahi tou poto+ pea neʼe ke taulekaleka.+
13 Neʼe ke nofo ʼi Eteni, te ʼoloto ʼo te ʼAtua.
Neʼe teuteuʼi koe ʼaki te ʼu maka maʼuhiga fuli:Te lupi, te topasi, te sasipa, te kisolite, te onise, te sate, te safile, te tulekoase+ pea mo te emelote.Neʼe fakapipiki fuli te ʼu maka ʼaia ʼaki te aulo.
Neʼe teuteuʼi ʼi te ʼaho ʼae neʼe fakatupu ai koe.
14 Neʼe au fakanofo koe ko te kelupimi leʼoleʼo.
Neʼe ke ʼi te moʼuga taputapu ʼo te ʼAtua,+ pea neʼe ke fealuʼaki ʼi te ʼu maka kakaha.
15 Neʼe lelei tukupau tau aga talu mai te ʼaho ʼae neʼe fakatupu ai koeʼO kaku ki te ʼaho ʼae neʼe ke heʼe faitotonu ai.+
16 ʼI tau faifakatau tuʼumaʼu,+Neʼe ke agamalohi mo agahala ai.+
Koia ʼe au kapu anai koe mai te moʼuga ʼo te ʼAtua koteʼuhi kua ke heʼe maʼa pea ʼe au pulihi anai koe,+Te kelupimi leʼoleʼo, ʼo mamaʼo mai te ʼu maka kakaha.
17 Neʼe fialahi tou loto ʼuhi ko tou taulekaleka.+
Neʼe puli tou poto ʼuhi ko tou kololia.+
ʼE au li anai koe ki te kele.+
ʼE sioʼi anai koe e te ʼu hau, ʼo punamaʼuli.
18 Neʼe ke ʼulihi ʼau sagatualio ʼuhi ko tau lakahala mamafa pea mo tau faifakatau kaka.
ʼE au tafu anai he afi ia koe, pea ʼe ke vela anai.+
ʼE au fakaliliu anai koe ko he lefulefu ʼi te kele, ia muʼa ʼo natou fuli ʼae ʼe natou sioʼi koe.
19 ʼE punamaʼuli anai ia natou fuli ʼae neʼe natou iloʼi koe ʼi te ʼu puleʼaga, pea mo sioʼi fakamamaʼu koe.+
ʼE hoko fakapunamaʼuli anai mo fakamataku tou fakaʼosi,Pea ʼe ke puli anai ʼo talu ai.” ’ ”+
20 Neʼe toe palalau mai ia Sehova, ʼo ina ui:
21 “Foha ʼo te tagata, haga ki Sitoni+ mo fakakikite te malaʼia ʼae ka to ki ai.
22 ʼE tonu anai ke ke ui: ‘Koʼeni te folafola ʼa te Tuʼi ʼAliki ko Sehova:
“Sitoni, ʼe au tauʼi anai koe mo fakakololiaʼi ia au ʼi te lotolotoiga ʼo koe.ʼE iloʼi moʼoni anai ko au ia Sehova moka au fakahoko taku fakamau kia ia pea moka fakamaʼoniʼoniʼi au ʼaki ia ia.
23 ʼE au fakahoko anai ʼi ai ni taʼi mahaki pea ʼe hahali anai te toto ʼi ʼona ala.
ʼE mamate anai te hahaʼi ʼi te lotolotoiga ʼo ia moka tauʼi natou ʼaki te heleta ʼi ʼonatou tafaʼaki fuli.Pea ʼe iloʼi moʼoni anai ko au ia Sehova.+
24 “ ‘ “ ʼOsi ʼaia, ʼe mole toe ʼa takai anai te hahaʼi ʼo Iselaele e ni ʼakau talatala, mo fakatupu lavea, mo fakatupu mamahi,+ e te ʼu puleʼaga ʼae ʼe natou meʼa noaʼi. Pea ʼe iloʼi moʼoni anai ko au te Tuʼi ʼAliki ko Sehova.” ’
25 “ ‘Koʼeni te folafola ʼa te Tuʼi ʼAliki ko Sehova: “ ʼE fakamaʼoniʼoniʼi anai au ia muʼa ʼo te ʼu puleʼaga+ ʼaki taku hahaʼi ko Iselaele moka au toe fakaliliu mai natou mai te ʼu puleʼaga ʼae neʼe mavetevete ai.+ Pea ʼe natou nonofo anai ʼi tonatou fenua,+ ʼae neʼe au foaki ki taku kaugana ko Sakopo.+
26 ʼE natou maʼuli fimalie ai anai,+ mo laga ni ʼapi mo to ni gaueʼaga vite.+ ʼEi, ʼe natou maʼuli fimalie anai moka au fakahoko taku fakamau kia natou fuli ʼae ʼi ʼonatou tafaʼaki pea mo natou meʼa noaʼi.+ Pea ʼe natou iloʼi moʼoni anai ko au ia Sehova tonatou ʼAtua.” ’ ”
Nota
^ Peʼe “fale maka.”
