Esekiele 31:1-18
-
Te to ʼa Esipito, te fuʼu sete ʼae neʼe lahi ʼaupito (1-18)
31 Neʼe toe palalau mai ia Sehova ʼi te 11 taʼu, ʼi te ʼuluaki ʼaho ʼo te tolu mahina, ʼo ina ui:
2 “Foha ʼo te tagata, ui age kia Falaone te hau ʼo Esipito pea mo ʼana kautau:+‘Ko ai ʼae ʼe malohi ohage ko koe?
3 Neʼe ʼi ai he tagata Asilia, he fuʼu sete ʼo Lipane,Neʼe matalelei ʼona vaʼa mo matolu ʼona lau, ʼo feala he fakamalumalu ai, pea neʼe lahi ʼaupito.Neʼe kaku tona tumutumu ki te ʼu ʼao.
4 Neʼe maʼuli ʼi te lahi ʼo te ʼu vai, pea neʼe fakavai e te ʼu matapuna vai loloto ʼo tupu ai ʼo maʼoluga.
Neʼe ʼi ai ni liuʼa ʼi te takafoli ʼo te koga meʼa ʼae neʼe to ai.Pea neʼe fakavai te ʼu fuʼu ʼakau fuli ʼo te vao e ʼonatou tafega vai.
5 Koia ʼae neʼe maʼoluga age ai ʼi te ʼu fuʼu ʼakau fuli ʼo te vao.
Neʼe lahi pea mafola ʼona vaʼaʼI te lahi ʼo te vai ʼae mai ʼona liuʼa.
6 Neʼe fai moeʼaga te ʼu manulele fuli ʼo te lagi ʼi ʼona vaʼa,Neʼe fananau te ʼu manu fuli ʼo te vao ʼi ʼona lalo vaʼa,Pea neʼe fakamalumalu fuli ai te ʼu puleʼaga kaugamalie.
7 Neʼe fakaofoofo mo matalelei mo mafola ʼona vaʼa,He neʼe ulu loloto ʼona aka ʼi ni vai lahi.
8 Neʼe mole he fuʼu sete ʼi te ʼoloto ʼo te ʼAtua+ neʼe tatau mo ia.
Neʼe mole he fuʼu senelie neʼe hage ʼona vaʼa ko ʼona vaʼa.Neʼe mole he fuʼu palatane neʼe hage ʼona vaʼa ko ʼona vaʼa,
Pea neʼe mole he fuʼu ʼakau ʼi te ʼoloto ʼo te ʼAtua neʼe matalelei ohage ko ia.
9 Neʼe au fakaliliu ia ia ko he fuʼu ʼakau matalelei ʼe matolu ʼona lau,Pea neʼe maheheka fuli ki ai te ʼu fuʼu ʼakau ʼo Eteni, te ʼoloto ʼo te ʼAtua moʼoni.’
10 “Koia koʼeni te folafola ʼa te Tuʼi ʼAliki ko Sehova: ‘Neʼe liliu ia* ʼo lahi ʼaupito, neʼe kaku tona tumutumu ki te ʼu ʼao pea neʼe liliu ʼo fiameʼalahi ʼuhi ko tona maʼoluga.
11 Koia ʼe au tuku anai ia ia ki te nima ʼo te pule malohi ʼo te ʼu puleʼaga.+ ʼE ina tauʼi anai ia ia pea ʼe au liʼaki anai ʼuhi ko tana agakovi.
12 ʼE tuʼusi anai ia ia mo liʼakina ʼi te u moʼuga e ni matapule ʼe kau ki te ’u puleʼaga ʼae ʼe agamalohi. ʼE maluku anai ʼona lau ʼi te ʼu potu fenua laulelei fuli, mo fetoki ʼona vaʼa ki te ʼu liuʼa fuli ʼo te fenua.+ Pea ʼe mavae anai te ʼu puleʼaga fuli ʼo te kele ʼi tona malumalu mo natou liʼaki ia ia.
13 ʼE nonofo anai te ʼu manulele fuli ʼo te lagi ʼi tona tafito ʼae neʼe tuʼusi, mo te ʼu manu fuli ʼo te vao ʼi ʼona vaʼa.+
14 ʼE mole toe lahi feia anai he fuʼu ʼakau neʼe to ovi ki te ʼu vai mo kaku tona tumutumu ki te ʼu ʼao, pea ʼe mole toe kaku anai ki te ʼu ʼao he fuʼu ʼakau neʼe fakavai lelei ʼuhi ko tona maʼoluga. ʼE tuku anai ia natou fuli ki te mate ʼi te fenua ʼae ʼi te lalo kele, mo te ʼu foha ʼo te tagata ʼae kua hihifo ki te luo.’*
15 “Koʼeni te folafola ʼa te Tuʼi ʼAliki ko Sehova: ‘ ʼI te ʼaho ʼae ka hifo ai ki te Faitoka,* ʼe putu anai te hahaʼi. ʼEi, ʼe au ʼaofi anai te ʼu vai loloto mo ʼona liuʼa ke mole toe tafe ai te ʼu vai lahi. ʼE au fakapoʼuliʼi anai ia Lipane ʼuhi ko ia, pea ʼe moamoa ai te ʼu fuʼu ʼakau fuli ʼo te vao.
16 ʼE au fakagalulu anai te ʼu puleʼaga ʼi te logoaʼa ʼo tana to, moka au fakahifo ia ia ki te Faitoka* mo natou fuli ʼae kua hihifo ki te luo. Pea ʼe fimalie anai ʼi te fenua ʼae ʼi te lalo kele, te ʼu fuʼu ʼakau fuli ʼo Eteni,+ te ʼu fuʼu ʼakau matalelei mo lelei tukupau ʼo Lipane, ia natou fuli ʼae ʼe fakavai leleiʼi.
17 Neʼe natou hihifo ki te Faitoka* ohage pe ko ia, ki te hahaʼi ʼae neʼe matehi ʼaki te heleta.+ ʼE fakatahi mo ia, ia natou ʼae neʼe lagolago ki ai mo ina fakamalumaluʼi ʼi te ʼu puleʼaga.’+
18 “ ‘ ʼE mole he fuʼu ʼakau ʼi Eteni neʼe tatau tona kololia mo tona lahi mo koe.+ Kae ʼe fakahifo fakatahi anai ia koe mo te ʼu fuʼu ʼakau ʼo Eteni ki te fenua ʼae ʼi te lalo kele. ʼE ke takoto anai mo te hahaʼi neʼe mole silikosisioʼi, mo te hahaʼi ʼae neʼe matehi ʼaki te heleta. Ko te meʼa ʼaia ʼae ka hoko kia Falaone pea mo ʼana kautau fuli,’ ko te ui ʼaia ʼa te Tuʼi ʼAliki ko Sehova.”
Nota
^ Hep. “Neʼe ke liliu.”
^ Peʼe “fale maka.”
^ Vakaʼi Te ʼu Kupu.
^ Vakaʼi Te ʼu Kupu.
^ Vakaʼi Te ʼu Kupu.
