Te ʼu Meʼa ʼAe Neʼe Fakaha Kia Soane 18:1-24
18 Hili ʼaia, neʼe au sio ki he tahi ʼaselo ʼe ina maʼu he pule lahi, ʼe hifo mai te lagi, pea neʼe malamagia te kele ʼi tona kololia.
2 Pea neʼe kalaga ʼaki he leʼo lahi: “Kua to ia ia! Kua to ia Papiloni Lahi,+ pea kua liliu ko he nofoʼaga ʼo te kau temonio pea mo he koga meʼa ʼe fenonoʼi ai te kau temonio pea mo te ʼu manulele fuli ʼae ʼe heʼe maʼa mo fehiʼaʼinaʼi!+
3 Koteʼuhi kua konahihia te ʼu puleʼaga fuli ʼi te vino ʼo ʼana felaveʼi fakasino heʼe ʼaoga,*+ pea neʼe fai e te ʼu hau ʼo te kele he ʼu felaveʼi fakasino heʼe ʼaoga mo ia,+ pea neʼe maʼu koloa te hahaʼi fakatau koloa* ʼo te kele ʼuhi ko te ʼu tuʼuga koloa ʼae neʼe tanaki e te fafine ʼaia pea neʼe mole ufiufi ai.”
4 Pea neʼe au logo ki he tahi leʼo mai te lagi ʼe ina ui: “Siʼaku hahaʼi, kotou mavae mai ia ia,+ mo kapau ʼe mole kotou fia kau mo ia ki ʼana agahala, pea mo kapau ʼe mole kotou loto ke hoko kia koutou he koga ʼo ʼona tautea.+
5 Koteʼuhi kua lahi ʼana agahala ʼo kaku ki te lagi,+ pea neʼe manatuʼi e te ʼAtua ʼana gaue heʼe faitotonu.*+
6 Kotou liufaki age ki ai te aga ʼae neʼe ina fai ki te hahaʼi,+ ʼei, kotou liufaki age ki ai ʼo liuga lua te ʼu meʼa ʼae neʼe ina fai.+ ʼI te ipu+ ʼae neʼe ina teuteuʼi ai he meʼa inu, kotou teuteuʼi ʼo liuga lua he meʼa inu maʼa ia.+
7 Ke lahi tona mamahi pea mo tona lotomamahi ohage pe ko tana fakakololiaʼi ia ia totonu pea mo tana maʼuli koloaʼia ʼo mole ufiufi ai. Koteʼuhi ʼe ina haga ui ʼi tona loto: ‘ ʼE au ʼafio ohage ko he fineʼaliki, ʼe mole au vitua, pea ʼe mole au lotomamahi anai ʼi he temi.’+
8 Koia, ʼi he ʼaho pe ʼe tahi, ʼe hoko mai anai kia ia ʼona tautea, ʼae ʼe ko te mate, mo te putu pea mo te hoge pea ʼe tutu katoa anai ia ia ʼaki te afi,+ koteʼuhi ʼe malohi ia Sehova* ʼAtua, ʼae neʼe ina fakamauʼi ia ia.+
9 “Pea ko te ʼu hau ʼo te kele ʼae neʼe natou fai he ʼu felaveʼi fakasino heʼe ʼaoga* mo ia pea mo maʼuʼuli mo ia ʼi ʼona tuʼuga koloa ʼae ʼe mole ufiufi ai, ʼe natou fetagihi anai pea mo tuki fatafata ʼi tonatou lotomamahi ʼo ʼuhiga mo ia, ʼi tanatou sisio ʼae ki te kohu ʼo tona vela.
10 ʼE natou tutuʼu anai mai mamaʼo ʼuhi ko tanatou matataku ʼi tona mamahi pea mo natou ui: ‘ ʼI meʼa fakaʼofaʼofa leva, ʼi meʼa fakaʼofaʼofa leva te meʼa ʼaeni kua hoko kia koe, Papiloni, te kolo lahi+ pea mo malohi, koteʼuhi neʼe tauteaʼi koe ʼi he hola pe ʼe tahi!’
11 “ ʼE toe fetagihi mo lotomamahi foki mo te hahaʼi fakatau koloa ʼo te kele ʼo ʼuhiga mo ia, koteʼuhi ʼe mole kei totogi e he tahi ʼonatou tuʼuga koloa:
12 te aulo, mo te siliva, mo te ʼu maka maʼuhiga, mo te ʼu mataʼi tofe, mo te ʼu kie lino, mo te ʼu kie huʼa lotuma fakapoʼuli, mo silika pea mo kula, pea mo te ʼu meʼa fuli ʼae ʼe fai ʼaki te ʼu ʼakau magoni, mo te ʼu meʼa fuli ʼae ʼe fai ʼaki te ivuale,* mo te ʼu ʼakau maʼuhiga, mo te kapa, mo te ukamea pea mo te maka matalelei,
13 pea mo te kasia,* mo te faʼahiga logologoago mai Initia, mo te iseso, mo te lolo magoni, mo te iseso hina,* mo te vino, mo te lolo oliveto, mo te falena ʼae ʼe lelei, mo te fulumeto, mo te ʼu faga pipi, mo te ʼu faga ovi, mo te ʼu hosi, mo te ʼu saliote, mo te ʼu kaugana pea mo te hahaʼi.*
14 ʼEi, kua mamaʼo mai ia koe te ʼu meʼa lelei ʼae neʼe ke* holi ki ai, pea kua puli io koe te ʼu meʼa kai kano lelei fuli mo te ʼu meʼa taulekaleka fuli, pea ʼe mole toe maʼu anai ʼi he temi.
15 “Ko te hahaʼi fakatau koloa ʼae neʼe natou fakatau te ʼu koloa ʼaia pea mo natou maʼu paʼaga ʼuhi ko ia, ʼe natou tutuʼu anai mai mamaʼo ʼuhi ko tanatou matataku ʼi tona mamahi pea ʼe natou fetagihi anai mo lotomamahi,
16 ʼo natou ui: ‘ ʼI meʼa fakaʼofaʼofa leva, ʼi meʼa fakaʼofaʼofa leva te meʼa ʼaeni kua hoko ki te kolo lahi, ʼae neʼe ina kofuʼi te ʼu teu lino, mo huʼa lotuma fakapoʼuli pea mo kula, pea neʼe ina fakamataleleiʼi ia ia ʼaki te ʼu meʼa aulo, mo te ʼu maka maʼuhiga pea mo te ʼu mataʼi tofe!+
17 Neʼe maumauʼi te ʼu tuʼuga koloa ʼaia ʼi he hola pe ʼe tahi!’
“Pea neʼe tutuʼu mai mamaʼo te ʼu kapiteni vaka fuli, mo te hahaʼi folau vaka, mo te kau vaka pea mo te hahaʼi fuli ʼae ʼe maʼuʼuli ki te tai,
18 pea neʼe natou kalaga ʼi tanatou sisio ki te kohu ʼo tona vela: ‘ ʼE ʼi ai koa he tahi age kolo ʼe tatau mo te kolo lahi ʼaeni?’
19 Neʼe natou laku te efu ki ʼonatou ʼulu, mo fetagihi, mo lotomamahi pea mo kalaga: ‘ ʼI meʼa fakaʼofaʼofa leva, ʼi meʼa fakaʼofaʼofa leva te meʼa ʼaeni kua hoko ki te kolo lahi, ʼae neʼe liliu ai te hahaʼi fuli ʼae ʼe maʼu vaka ʼo koloaʼia ʼuhi ko ʼona tuʼuga koloa! Neʼe maumauʼi ia ia ʼi he hola pe ʼe tahi!’+
20 “Kotou fakafiafia ʼo ʼuhiga mo te meʼa ʼae neʼe hoko kia ia, ia koutou ʼae ʼi selo+ pea mo koutou kau maʼoniʼoni,+ ʼo feia mo te kau apositolo pea mo te kau polofeta, koteʼuhi kua fakamauʼi ia ia e te ʼAtua ʼuhi ko te ʼu meʼa ʼae neʼe ina fai kia koutou!”+
21 Pea neʼe hiki e te ʼaselo malohi he maka lahi neʼe hage ko he maka momosi fulumeto pea neʼe ina li ki te tai, ʼo ina ui: “ ʼE li tuʼa tahi feia anai ia Papiloni te kolo lahi, pea ʼe mole toe maʼu anai ia ia.+
22 Pea ʼe mole toe logo anai io koe, Papiloni, te hiva ʼo te kau hiva ʼae ʼe ta alepa, mo he tahi ʼe faimaholo, mo puhi fagufagu pea mo pupuhi he fakatagi pupuhi. Pea ʼe mole toe gaue anai io koe he tagata tufuga, pea ʼe mole toe logo anai io koe he tahi ʼe ina momosi te fulumeto.
23 ʼE mole toe mu anai io koe he malama, pea ʼe mole toe logo anai io koe te ʼu leʼo ʼo te tagata mo te fafine ʼae neʼe hoki ʼohoana age pe, koteʼuhi ko ʼau hahaʼi fakatau koloa neʼe ko ni tagata maʼu tuʼulaga ʼo te kele, pea neʼe ke fakaheʼi te ʼu puleʼaga fuli ʼuhi ko ʼau gaue faifakalauʼakau.+
24 ʼEi, neʼe maʼu ʼi te kolo ʼaia te toto ʼo te kau polofeta, mo te kau maʼoniʼoni+ pea mo natou fuli ʼae neʼe matehi ʼi te kele.”+
Nota
^ Klka. pornéïa. Vakaʼi Te ʼu Kupu.
^ Peʼe “hahaʼi fakatau koloa feoloʼaki.”
^ Peʼe “ ʼana aga ʼae ʼe kovi.”
^ Vakaʼi Te ʼu Fakamahino 1.5.
^ Vakaʼi Te ʼu Kupu.
^ ʼE ko he meʼa maʼuhiga ʼe lanu hina pea ʼe haʼu mai te ʼu nifoʼi alefani pea mo ʼihi manu.
^ Vakaʼi Te ʼu Kupu.
^ Vakaʼi Te ʼu Kupu.
^ Klka. psukhê. Vakaʼi Te ʼu Kupu.
^ Klka. psukhê. Vakaʼi Te ʼu Kupu.