Te ʼu Gaue ʼa Te Kau Apositolo 10:1-48
-
Te meʼa ʼae neʼe ha age kia Kolonelio (1-8)
-
ʼE sio ia Petelo ki he ʼu manu kua fakamaʼa e te ʼAtua (9-16)
-
ʼE alu ia Petelo kio Kolonelio (17-33)
-
ʼE tala e Petelo te logo lelei ki te hahaʼi ʼae ʼe mole Sutea (34-43)
-
“ ʼE mole fakapalatahi te ʼAtua” (34, 35)
-
-
ʼE foaki te laumalie maʼoniʼoni ki te hahaʼi ʼae ʼe mole Sutea pea ʼe papitemaʼi ai natou (44-48)
10 Pea ʼi Sesalea, neʼe ʼi ai te tagata neʼe higoa ko Kolonelio, ko he pule solia* ʼi te foʼi solia* Italia.
2 Neʼe ko he tagata tauhi lotu lelei neʼe manavasiʼi ki te ʼAtua fakatahi mo tona loto fale katoa. Neʼe lahi te ʼu meʼa ʼofa neʼe ina fai ki te kau masiva pea neʼe faikole mamahi tuʼumaʼu ki te ʼAtua.
3 ʼI te vaʼevaʼe hola tolu hili hoʼata,*+ neʼe ʼi ai te meʼa neʼe ha ki ai. Neʼe sio lelei ai ki te ʼaselo ʼa te ʼAtua neʼe haʼu ʼo pauʼi: “Kolonelio!”
4 Neʼe sio fakamamaʼu ia Kolonelio ki ai ʼi tana mataku, pea neʼe ina ui: “ ʼE au fakalogo atu ʼAliki.” Neʼe ina tali age: “Kua hake ki te ʼAtua ʼau faikole pea mo ʼau meʼa ʼofa ki te kau masiva pea ʼe mole ina galoʼi.+
5 Koia ʼi te lakaga nei, fekauʼi he ʼu tagata ki Sope ke olo ʼo kumi mai te tagata ko Simone ʼae ʼe toe higoa ko Petelo.
6 ʼE fakaʼapi te tagata ʼaia e Simone, te tagata fai kiliʼi manu ʼe nofo ovi ki te tai.”
7 ʼI te ʼosi mavae ʼa te ʼaselo ʼae neʼe palalau mo ia, neʼe ina pauʼi atu aipe ʼana tagata faifekau ʼe toko lua pea mo te tagata solia tauhi lotu lelei.
8 Neʼe ina fakamatala kia natou ia meʼa fuli pea ina fekauʼi ke olo ki Sope.
9 ʼI te ʼaho ake, lolotoga tanatou fagona pea mo tanatou fakaovi ki te kolo, neʼe hake ia Petelo ki te fuga fale ʼi te vaʼevaʼe fetapa,* ʼo faikole ai.
10 Pea neʼe fia kai leva. Lolotoga te teuteuʼi ʼo te meʼa kai, neʼe sio ki te meʼa neʼe ha age.+
11 Neʼe sio ai ki te ava ʼo te lagi, pea neʼe hifo ifo ki te kele te meʼa neʼe hage ko he kie lino* lahi ʼi ʼona tapa ʼe fa.
12 Neʼe maʼu ai te ʼu faʼahiga manu kehekehe ʼe vaʼe fa, mo te ʼu manu totolo ʼo te kele pea mo te ʼu manulele.
13 Neʼe ui leva e te leʼo ki ai: “Petelo, tuʼu ake, matehi he manu pea ke kai!”
14 Kae neʼe ui e Petelo: “Kailoa ia ʼAliki, koteʼuhi neʼe heʼeki au kai he meʼa ʼe ʼuli pea mo heʼe maʼa.”+
15 Pea neʼe toe ui e te leʼo ki ai, ko tona tuʼa lua ʼaia: “Tuku tau ui ʼae ʼe ʼuli te ʼu meʼa ʼae kua fakamaʼa e te ʼAtua.”
16 Neʼe hoko tuʼa tolu te faʼahi ʼaia, pea neʼe toʼo ake aipe te kie lino ki te lagi.
17 Neʼe fakakaukauʼi e Petelo te fakaʼuhiga ʼo te meʼa ʼae neʼe ha age ki ai. Kae lolotoga te temi ʼaia, neʼe fakalavelave e te ʼu tagata ʼae neʼe fekauʼi age e Kolonelio pe ʼe tuʼu ʼifea te ʼapi ʼo Simone. Pea neʼe natou ʼomai leva ʼo tutuʼu ʼi te matapa.+
18 Neʼe natou pauʼi pea mo fehuʼi pe ʼe nofo ʼi ai ia Simone ʼae ʼe toe higoa ko Petelo.
19 ʼI te kei fakakaukauʼi e Petelo ia te meʼa ʼae neʼe ha age, neʼe ui age e te laumalie maʼoniʼoni:+ “Koʼeni ʼe kumi koe e te ʼu tagata ʼe toko tolu.
20 Koia, tuʼu ake ʼo hifo, pea ke alu mo natou, ʼaua naʼa ke lotolotolua koteʼuhi ko au ʼae neʼe au fekauʼi mai natou.”
21 Neʼe hifo leva ia Petelo ki te ʼu tagata ʼo ina ui: “ ʼE ko au ʼae ʼe kotou kumi. Kotea ʼae ʼe kotou ʼomai ai?”
22 Neʼe natou tali: “Ko te pule solia ko Kolonelio+ ʼe ko he tagata faitotonu mo manavasiʼi ki te ʼAtua, pea ʼe palalau lelei te puleʼaga katoa ʼo te kau Sutea ʼo ʼuhiga mo ia. Neʼe fakatotonu age e te ʼAtua ʼaki te ʼaselo maʼoniʼoni ke kumi age koe ki tona ʼapi pea ke fagono ki te ʼu meʼa ʼae ʼe tonu ke ke fakaha.”
23 Neʼe ina fakaafe natou ki fale pea natou nonofo ai mo ia.
ʼI te ʼaho ake, neʼe tuʼu ake ia ʼo alu mo natou, pea neʼe kaugā olo mo ia ʼihi tehina mai Sope.
24 Pea neʼe hu ki Sesalea ʼi te ʼaho ʼae neʼe hoa mai ki ai. ʼE mahino ia, neʼe fakaatalitali ia Kolonelio kia natou pea neʼe ina fakatahiʼi ʼona kaiga mo ʼona kaumeʼa lelei.
25 ʼI te tau age ʼa Petelo, neʼe alu ia Kolonelio ʼo fakafetaulaki kia ia, ʼo tuʼutuli ifo ki ʼona vaʼe pea mo hu ki ai.
26 Kae neʼe fakatuʼu ake ia e Petelo, ʼo ina ui: “Tuʼu ake, ko au ko he tahi tagata pe.”+
27 ʼI tanā lolotoga faipalalau, neʼe hu ki te loto fale pea neʼe sio ki te hahaʼi kaugamalie ʼae neʼe fakatahitahi ai.
28 Neʼe ina ui kia natou: “ ʼE kotou iloʼi lelei ʼe mole gafua ke fakatahi peʼe fakaovi he Sutea ki he tagata ʼo he tahi lanu.+ Kae neʼe fakaha mai e te ʼAtua ʼe mole tonu ke au ui ʼe ʼuli peʼe heʼe maʼa he tagata.+
29 Koia ʼi takotou kumi age au, neʼe mole au fakafisi kae neʼe au haʼu. ʼI te lakaga nei ʼe au fia fakalavelave atu te tupuʼaga ʼo takotou kumi age au.”
30 Neʼe ui leva e Kolonelio: “Kua hili ki ai ʼaho ʼe fa, neʼe au faikole ʼi toku loto fale. ʼI te hola tolu hili hoʼata,* ohage pe ko te hola ʼaeni, neʼe tuʼu ʼi ʼoku muʼa he tagata neʼe teu gigila
31 pea neʼe ina ui mai: ‘Kolonelio, kua tali tau faikole e te ʼAtua pea ʼe mole ina galoʼi ʼau meʼa ʼofa ki te kau masiva.
32 Koia, fekauʼi he ʼu tagata ki Sope ke natou kumi mai te tagata ko Simone ʼae ʼe toe higoa ko Petelo. ʼE fakaʼapi te tagata ʼaia e Simone, te tagata fai kiliʼi manu ʼe nofo ovi ki te tai.’+
33 Neʼe au fekauʼi atu aipe ke kumi mai koe, pea neʼe ke manavaʼofa ʼo haʼu. Koia ʼi te lakaga nei, kua matou fakatahitahi fuli ia muʼa ʼo te ʼAtua, ke matou fagono ki te ʼu meʼa fuli ʼae neʼe fakatotonu atu e Sehova* ke ke fakaha mai.”
34 Neʼe palalau leva ia Petelo ʼo ina ui: “Kua au mahino lelei leva ʼi te lakaga nei, ʼe mole fakapalatahi te ʼAtua,+
35 kae ʼi te ʼu puleʼaga fuli pe, ʼe ina tali leleiʼi te tagata ʼae ʼe manavasiʼi kia te ia mo ina maʼuliʼi te faitotonu.+
36 Neʼe ina fakaha ki te ʼu foha ʼo Iselaele ia te logo lelei ʼo ʼuhiga mo te tokalelei+ ʼae ʼe maʼu ʼaki ia Sesu Kilisito,* ʼe ko ia te ʼAliki ʼo te tagata fuli pe.+
37 ʼE kotou iloʼi te logo ʼae neʼe talanoaʼi ʼi Sutea katoa, ʼo kamata mai Kalilea+ ʼi te ʼosi faifakamafola ʼa Soane ʼo ʼuhiga mo te papitema.
38 ʼE ko te logo ʼo ʼuhiga mo Sesu te tagata mai Nasaleti. Neʼe fakanofo ia ia e te ʼAtua ʼaki te laumalie maʼoniʼoni+ pea mo te malohi, ʼo fealuʼaki ai ʼi te fenua katoa ʼo fai he ʼu gaue lelei pea mo fakamalolo ia natou fuli ʼae neʼe fakamamahiʼi e te Tevolo,+ koteʼuhi neʼe nofo te ʼAtua mo ia.+
39 Pea ʼe matou fakamoʼoni ki te ʼu meʼa fuli ʼae neʼe ina fai ʼi te fenua ʼo te kau Sutea pea mo Selusalemi. Kae neʼe natou matehi ia ia ʼo tautau ki he pou.*
40 Neʼe fakatuʼuake ia e te ʼAtua ʼi te tolu ʼaho+ pea mo fakagafua ke ha ki ʼihi,
41 mole ki te hahaʼi fuli, kae ki te kau fakamoʼoni ʼae neʼe hinoʼi fakatomuʼa e te ʼAtua, ia matou ʼae neʼe kakai mo iinu mo ia ʼi tona ʼosi fakatuʼuake mai te kau mate.+
42 Pea neʼe ina fakatotonu mai ke matou faifakamafola ki te hahaʼi pea mo fakamoʼoni+ ʼe ko ia ʼae neʼe fakanofo e te ʼAtua ke tuʼi fakamau ki te kau maʼuli mo te kau mate.+
43 ʼE fakamoʼoni ia te kau polofeta fuli ʼo ʼuhiga mo ia.+ Pea neʼe natou ui ko ʼae ʼe tui kia te ia ʼe fakamolemole anai ʼana agahala ʼaki tona huafa.”+
44 ʼI te kei lolotoga palalau ʼa Petelo ki te ʼu faʼahi ʼaia, neʼe maʼu e natou fuli ʼae neʼe fagono ki te folafola ia te laumalie maʼoniʼoni.+
45 Neʼe punamaʼuli ai te ʼu tisipulo ʼae neʼe silikosisioʼi* pea* neʼe ʼomai tahi mo Petelo, koteʼuhi neʼe toe maʼu foki e te hahaʼi ʼae neʼe mole Sutea ia te meʼa ʼofa ʼo te ʼAtua ʼae ko te laumalie maʼoniʼoni.
46 Neʼe natou logo ki tanatou palalau ʼi te ʼu lea matapule pea mo tanatou fakavikiviki ki te ʼAtua.+ Koia neʼe ui e Petelo:
47 “Kua maʼu e te hahaʼi ʼaeni ia te laumalie maʼoniʼoni ohage pe ko tatou. Koia ko ai koa ʼae ʼe feala ke ina taʼofi tanatou papitema ʼaki te vai?”+
48 Neʼe ina fakatotonu ai leva ke papitemaʼi natou ʼi te huafa ʼo Sesu Kilisito.+ Pea neʼe natou kole age ke nofo mo natou ʼi he ʼu kiʼi ʼaho.
Nota
^ ʼE pule ki he kau solia ʼe toko 100.
^ Neʼe ko te kau solia Loma ʼe toko 600.
^ Klka. “vaʼevaʼe hiva hola.”
^ Klka. “vaʼevaʼe ono hola.”
^ Vakaʼi Te ʼu Kupu.
^ Klka. “hiva hola.”
^ Vakaʼi Te ʼu Fakamahino 1.5.
^ Vakaʼi Te ʼu Kupu.
^ Peʼe “fuʼu ʼakau.”
^ Peʼe “fakainu vai.”
^ Peʼe “te ʼu tagata agatonu ʼae.”
