Te ʼu Gaue ʼa Te Kau Apositolo 20:1-38
20 ʼI te ʼosi ʼo te maveuveu, neʼe fakatahiʼi e Paulo te kau tisipulo pea hili tana fakalotomalohiʼi ia natou pea mo tauʼine kia natou, neʼe alu leva ki Masetonia.
2 ʼI tana fakalaka ʼi te potu fenua ʼaia, neʼe lahi tana fakalotomalohiʼi ia te ʼu tisipulo ʼae neʼe ʼi ai. Pea neʼe tau leva ki Keleka.
3 Neʼe nofo ʼi ai mahina ʼe tolu. Neʼe ʼamanaki heka ki he vaka ke alu ki Silia, kae neʼe ina fai leva te tonu ʼae ke toe liliu ʼi te ala ʼo Masetonia koteʼuhi neʼe fonofono te kau Sutea ke natou matehi ia ia.+
4 Neʼe olo mo ia ia Sopatele, te foha ʼo Pilusi mai Pelea, mo Alisitake+ mo Sekonito mai Tesalonika, mo Kaiusi mai Telepe, mo Timoteo+ pea mai te potu fenua ʼo Asia, ia Tisike+ mo Tolofime.+
5 Neʼe muʼamuʼa te ʼu tagata ʼaia ʼo natou talitali mai ʼi Toloasi.
6 Kae ʼi Filipe, hili te ʼAho Lahi ʼo Te ʼu Pane Hala Fakatupu,+ neʼe matou heheka ki he vaka pea hili ʼaho ʼe nima neʼe matou tau leva ki Toloasi. Neʼe matou nonofo ʼi ai ʼaho ʼe fitu.
7 ʼI te ʼuluaki ʼaho ʼo te vahaʼa, ʼi tamatou fakatahitahi ʼae ke matou kakai, neʼe palalau age ia Paulo kia natou, he neʼe tonu ke mavae ʼi te ʼaho ake. Neʼe hoko atu tana palalau ʼo kaku ki te maʼupo.
8 Pea neʼe lahi te ʼu malama ʼi te koga fale fata ʼae neʼe matou fakatahitahi ai.
9 Neʼe ʼi ai te tama neʼe higoa ko Etise, neʼe heka ʼi te matapa fakamalama pea neʼe tulemoe ʼi te lolotoga palalau ʼae ʼa Paulo. Neʼe maʼumoea leva ʼo to ifo mai te tolu lau fata pea neʼe lagaʼi ake kua mate.
10 Kae neʼe hifo ia Paulo ʼo punou ki ai pea mo faʼufua ki ai,+ ʼo ina ui: “Tuku takotou hoha koteʼuhi kua maʼuli.”*+
11 Neʼe toe hake leva pea neʼe ina tofitofi te pane ʼo kai. Neʼe fualoa te hoko atu ʼo tana palalau, ʼo kaku ki te mafoata, pea neʼe alu leva.
12 Neʼe natou ʼave te tama kua maʼuli pea neʼe lahi tanatou fiafia.
13 Neʼe matou muʼamuʼa ki te vaka pea matou heheka ai ʼo folau ki Asosi, ʼae neʼe matou fakatuʼutuʼu ke fakaheka ai ia Paulo, koteʼuhi ʼi tana ʼosi foaki te ʼu fakatotonu ʼaia, neʼe ina fakatuʼutuʼu ke alu lalo ki ai.
14 ʼI tana kua tau leva ki Asosi, neʼe heka mo matou ki te vaka ʼo matou olo ki Mitilene.
15 Pea ʼi te ʼaho ake, neʼe matou mavae leva mai ai ʼo olo vaka ʼo tau ia muʼa ʼo te motu ko Kiosi. ʼI te lua ʼaho, neʼe matou tau ki Samosi, pea ʼi te tolu ʼaho ki Mile.
16 Neʼe fai e Paulo te tonu ʼae ke folau vaka ʼo fakalaka ʼi Efeso+ ke ʼaua naʼa tuʼu ʼi te potu fenua ʼo Asia, koteʼuhi neʼe fia tau fakavilivili ki Selusalemi+ ʼi te ʼAho Lahi ʼo Te Penikosite, mo kapau neʼe feala.
17 Kae mai Mile, neʼe ina fekauʼi ke pauʼi age ia te kau tagata ʼafeā ʼo te kokelekasio ʼo Efeso.
18 ʼI tanatou tau age, neʼe ina ui kia natou: “ ʼE kotou iloʼi lelei pe taku aga ʼae ia koutou talu mai te ʼuluaki ʼaho ʼae neʼe tuʼu ai ʼoku vaʼe ʼi te potu fenua ʼo Asia.+
19 Neʼe au kaugana ki te ʼAliki mo he agavaivai* katoa,+ pea mo ni loʼimata mo ni ʼahiʼahi ʼuhi ko te ʼu fonofono ʼa te kau Sutea ke natou matehi au,
20 kae neʼe mole au tuku taku fakaha atu te ʼu meʼa ʼae ʼe ʼaoga* pea mo taku akoʼi koutou ia muʼa ʼo te hahaʼi+ pea mo te ʼu ʼapi.+
21 Neʼe au foaki he fakamoʼoni katoa ki te kau Sutea mo te kau Keleka ke natou fakahemala+ mo tafoki ki te ʼAtua pea ke natou tui ki totatou ʼAliki ko Sesu.+
22 Pea ʼi te temi leva ʼaeni, ʼe uga au e te laumalie maʼoniʼoni ke au alu ki Selusalemi, logo la ʼe mole au iloʼi pe kotea ʼae ka hoko kia au ʼi ai,
23 gata pe ki te fakaha tuʼa lahi mai e te laumalie maʼoniʼoni ʼi te ʼu kolo fuli pe, ʼe pilisoniʼi mo fakatagaʼi anai au.+
24 Kae ʼe mole maʼuhiga kia au toku maʼuli,* kehe pe ke au lava fakaʼosi taku lele+ pea mo te minisitelio ʼae neʼe au maʼu mai te ʼAliki ko Sesu, ʼae ko te fakamoʼoni katoa ki te logo lelei ʼo te ʼofa makehe ʼo te ʼAtua.
25 “Pea ʼe au iloʼi ʼe mole he tahi ia koutou ʼae neʼe au fakamafola ki ai te Puleʼaga ʼe toe sio anai kia au.
26 ʼE au kole atu ke kotou fakamoʼoni ʼi te ʼaho nei ki te faʼahi ʼaeni: ʼE au maʼa mai te toto ʼo te tagata fuli,+
27 koteʼuhi neʼe mole au tuku taku fakaha atu te finegalo katoa ʼo* te ʼAtua.+
28 Kotou tokakaga kia koutou totonu+ pea mo te faga ovi fuli, ʼae neʼe fakanofo koutou e te laumalie maʼoniʼoni ke kotou leʼoleʼo,+ pea ohage ko he tauhi ovi kotou taupau ia te kokelekasio ʼa te ʼAtua,+ ʼae neʼe ina totogi ʼaki te taʼataʼa ʼo tona ʼAlo.+
29 ʼE au iloʼi, hili taku mavae, ʼe ulu atu anai kia koutou he ʼu tagata ʼe natou hage ko he ʼu lupo fekai+ pea ʼe mole natou agalelei anai ki te faga ovi,
30 pea mai ia koutou totonu, ʼe tutuʼu ake anai ni tagata ʼe natou fakamafola ni akonaki kaka, ke mulimuli te ʼu tisipulo ia natou.+
31 “Koia kotou nonofo ʼalaʼala pea kotou manatuʼi, lolotoga taʼu ʼe tolu,+ ʼi te ʼaho mo te po, neʼe au faitokoni tuʼumaʼu kia koutou takitokotahi pea mo tagi.
32 ʼI te temi leva ʼaeni, ʼe au tuku koutou ki te ʼAtua pea mo te folafola ʼo tona ʼofa makehe, he ʼe feala ke fakalotomalohiʼi koutou ʼaki te folafola ʼaia pea ke foaki atu te tofiʼa ʼae ʼe maʼu e te kau maʼoniʼoni fuli.+
33 Neʼe mole au manumanū ki te siliva, peʼe ko te aulo, peʼe ko he teu ʼo he tagata.+
34 ʼE kotou iloʼi lelei neʼe au gaue ke au maʼu te ʼu meʼa ʼae neʼe ʼaoga kia au+ pea mo natou ʼae neʼe fakatahi mo au.
35 Ia meʼa fuli, neʼe au fakaha atu ʼe tonu ke feia takotou gaue kinakina+ moʼo tokoni kia natou ʼae ʼe vaivai. Pea ʼe tonu ke kotou manatuʼi te ʼu folafola ʼaeni ʼa te ʼAliki ko Sesu: ‘ ʼE lahi age te fiafia moka kita foaki,+ ʼi takita tali.’ ”
36 Pea ʼi tana ʼosi fai te ʼu palalau ʼaia, neʼe tuʼutuli ifo mo natou fuli ʼo faikole.
37 Pea neʼe natou faifetagihi fuli, mo faʼufua kia Paulo ʼo ʼuma mamahi ki ai,
38 koteʼuhi neʼe natou lotomamahi, tafito ʼi tana ui ʼae ʼe mole natou toe sisio anai kia ia.+ Neʼe natou olo leva ʼo tuku ia ia ki te vaka.
Nota
^ Peʼe “ ʼe nofo tona maʼuli [Klka. psukhê] ia ia.” Vakaʼi te kupu “Psukhê” ʼi Te ʼu Kupu.
^ Peʼe “fiamalalo.”
^ Peʼe “lelei kia koutou.”
^ Klka. psukhê. Vakaʼi Te ʼu Kupu.
^ Peʼe “fakatuʼutuʼu katoa ʼa.”
