Te ʼu Gaue ʼa Te Kau Apositolo 24:1-27
24 Hili ʼaho ʼe nima, neʼe tau age te pelepitelo lahi ko Ananiasi,+ mo ʼihi kau takitaki Sutea pea mo te tagata poto palalau* ko Teletulio. Neʼe natou fakaha age ki te kovana+ te ʼu tukugakovi ʼae ʼe natou fai kia Paulo.
2 Neʼe pauʼi leva ia Teletulio, ʼo ina tukugakoviʼi ia Paulo, ʼo ina ui ki te kovana:
“ ʼE matou tokagaʼi te tokalelei lahi ʼae ʼe matou maʼu ʼuhi ko koe pea mo te ʼu fetogi ʼae ʼe ke fakahoko ʼi te puleʼaga ʼaeni, ʼuhi ko tau fakakaukau poto.
3 Koia ʼe matou fakamoʼoni fuli ki te ʼu faʼahi ʼaia, Kovana Lahi ko Felise, pea mo fakafetaʼi ʼaupito atu.
4 Kae ke mole au pulihi tou temi, ʼe au kole atu ke ke agaʼofa ʼo fagono mai ʼi he kiʼi temi siʼi pe.
5 Koteʼuhi neʼe matou maʼu atu te tagata ʼaeni ʼe fakatupu maveuveu,*+ mo ina lagaʼi he ʼu agatuʼu+ ʼi te lotolotoiga ʼo te kau Sutea fuli, ʼi te ʼu potu fuli ʼo te kele, pea ʼe ko he takitaki ʼo te magaʼi lotu ʼa te kau Nasaleti.+
6 Neʼe ina toe faigaʼi foki ke ina moamoagaʼi te fale lotu, koia neʼe matou puke ai ia ia.+
7 * ——
8 Ka ke fakafehuʼi ia ia, ʼe ke iloʼi anai ʼe moʼoni te ʼu tukugakovi fuli ʼae ʼe matou fai.”
9 Neʼe toe lagolago foki mo te kau Sutea ki te ʼu tukugakovi ʼaia, ʼo natou ui ʼe moʼoni te ʼu faʼahi ʼaia.
10 Neʼe fakagafua age e te kovana ke palalau ia Paulo pea neʼe palalau leva:
“ ʼE au iloʼi lelei, ʼe ko koe ko te tuʼi fakamau ʼo te puleʼaga ʼaeni talu mai ni taʼu. Koia ʼe au fiafia ʼi te fakamahino ʼi ʼou muʼa toku aluʼaga.+
11 Kua hili ki ai ʼaho ʼe 12 talu mai te temi ʼae neʼe au hake ai ki Selusalemi ʼo tauhi ki te ʼAtua.+ Pea ʼe feala ke ke vakaʼi pe ʼe moʼoni te faʼahi ʼaia.
12 Neʼe mole natou maʼu au ʼe au lolotoga fihi mo he tahi ʼi te fale lotu peʼe au fakamaveuveuʼi te hahaʼi, ʼi te ʼu sinakoka peʼe ʼi te kolo.
13 Pea ʼe mole feala ke natou fakamoʼoni atu te ʼu tukugakovi ʼae ʼe natou fai ʼo ʼuhiga mo au.
14 Kae ʼe au tala atu kia koe te faʼahi ʼaeni, ʼe au foaki he tauhi taputapu ki te ʼAtua ʼo ʼaku kui+ ʼo mulimuli ki te tauhi ʼae ʼe natou fakahigoaʼi ko he magaʼi lotu. Pea ʼe au tui ki te ʼu meʼa fuli ʼae ʼe tuʼu ʼi te Lao pea mo te ʼu tohi ʼa te kau Polofeta.+
15 ʼE au falala ki te ʼAtua, ohage pe ko te ʼu tagata ʼaeni, pea ʼe matou ʼamanaki ʼe ʼi ai anai he fakatuʼuake+ ʼo te kau faitotonu mo te kau heʼe faitotonu.+
16 ʼUhi ko te faʼahi ʼaia, ʼe au faigaʼi tuʼumaʼu ke au taupau he leʼo ʼo loto ʼe maʼa ia muʼa ʼo te ʼAtua pea mo te tagata.+
17 Hili ni taʼu, neʼe au haʼu ʼo ʼaumai he ʼu meʼa ʼofa ki te kau masiva+ ʼo taku hahaʼi pea mo fai ni molaga.
18 ʼI taku lolotoga fakahoko te ʼu faʼahi ʼaia, neʼe natou maʼu au ʼi te fale lotu, kua au maʼa ʼo mulimuli ki te Lao,+ kae neʼe mole fakapupu te hahaʼi pe neʼe hoko ni maveuveu. Kae neʼe ʼi ai ʼihi Sutea mai te potu fenua ʼo Asia
19 ʼe tonu ke natou ʼomai ki heni ʼo tukugakoviʼi au, mo kapau neʼe natou maʼu haku hala.+
20 Peʼe ke fakaha atu e te ʼu tagata ʼaeni te kovi ʼae neʼe natou maʼu ʼi tanatou fakamauʼi au ia muʼa ʼo te Sanetualio,*
21 naʼa meʼa age pe ko taku kalagaʼi ʼi te lotolotoiga ʼo natou: ‘ ʼI te ʼaho nei ʼe fakamauʼi au ʼi ʼokotou muʼa, ʼuhi ko taku tui ki te fakatuʼuake ʼo te kau mate!’ ”+
22 Kae neʼe iloʼi lelei pe e Felise te ʼu faʼahi ʼo ʼuhiga mo te Ala ʼaia,+ koia neʼe ina toe holoʼi te fakamau, ʼo ina ui: “Hoki au fai anai he tonu ʼo ʼuhiga mo te faʼahi ʼaia moka tau mai ia Lisiasi te kamutoa.”
23 Pea neʼe ina fakatotonu age ki te pule solia ke leʼoleʼo ia Paulo kae ke tuku age hona ʼateaina, pea ke fakagafua ki tana hahaʼi ke natou tokakaga ki te ʼu meʼa ʼae ʼe ʼaoga kia ia.
24 Hili he ʼu ʼaho, neʼe haʼu ia Felise mo tona ʼohoana ko Tulusila, te fafine Sutea pea neʼe ina fekauʼi ke ʼaumai ia Paulo. Neʼe fagono leva ki tana palalau age ʼo ʼuhiga mo te tui kia Kilisito* Sesu.+
25 Kae ʼi te palalau age leva ʼa Paulo ʼo ʼuhiga mo te faitotonu, mo te lotololomi pea mo te fakamau ʼae ka hoko mai,+ neʼe mataku ia Felise ʼo ina ui: “Alu muʼa, pea ka maʼu hoku faigamalie, ʼe au toe fakatotonu anai ke ʼaumai koe.”
26 Pea neʼe toe ʼamanaki foki ʼe foaki age anai e Paulo hana paʼaga. Koia, neʼe liuliuga ai tana fekauʼi ke haʼu ke nā faipalalau.
27 Kae hili taʼu ʼe lua, neʼe fetogi leva e Polokio Feseto ia Felise. Pea neʼe loto e Felise ke ʼofainaʼi ia ia e te kau Sutea,+ koia neʼe ina tuku ai ia Paulo ke pilisoniʼi.
Nota
^ Peʼe “poto ʼi te lao.”
^ Klka. “ ʼe ko he taʼi mahaki.”
^ Vakaʼi Te ʼu Fakamahino 1.3.
^ Vakaʼi Te ʼu Kupu.
^ Vakaʼi Te ʼu Kupu.
