Te ʼu Gaue ʼa Te Kau Apositolo 3:1-26
3 ʼI te tahi ʼaho neʼe hake ia Petelo mo Soane ki te fale lotu, ʼi te temi faikole, ko te vaʼevaʼe hola tolu hili hoʼata.*
2 Pea neʼe fata age ki ai ia he tagata neʼe maʼimoa talu mai tana tupu. ʼI te ʼaho fuli, neʼe tuku ovi ia ia ki te matapa ʼo te fale lotu ʼae ʼe higoa ko Taulekaleka, ke feala hana kolekole he ʼu meʼa ʼofa* kia natou ʼae neʼe hu ki te fale lotu.
3 ʼI tana sio ki te ʼamanaki hu ʼa Petelo mo Soane ki te fale lotu, neʼe ina kolekole age he ʼu meʼa ʼofa.
4 Kae neʼe sioʼi fakamamaʼu e Petelo mo Soane ia ia, pea neʼe ui age e Petelo: “Sio mai kia maua.”
5 Neʼe sio fakamamaʼu leva ʼi tana ʼamanaki ʼae ʼe ina maʼu anai he meʼa mai ia naua.
6 Kae neʼe ui e Petelo: “ ʼE mole au maʼu he siliva mo he aulo. Kae ko te meʼa ʼae ʼe au maʼu ʼe au foaki atu kia koe. ʼI te huafa ʼo Sesu Kilisito,* te tagata Nasaleti, ʼe au ui atu, ke ke haʼele!”+
7 Pea neʼe fa ki tona nima mataʼu ʼo lagaʼi ake.+ Neʼe malohi atu aipe ʼona vaʼe.+
8 Neʼe mahiki+ mo kamata haʼele pea neʼe hu ai mo naua ki te fale lotu. Neʼe haʼele, mo hopohopo pea mo fakavikiviki ki te ʼAtua.
9 Pea neʼe sisio te hahaʼi fuli ki tana haʼele pea mo fakavikiviki ki te ʼAtua.
10 Pea neʼe natou iloʼi neʼe ko te tagata ʼae neʼe heka mahani ʼi te fale lotu, ʼi te Matapa ʼae ʼe higoa ko Taulekaleka, ʼo fakaatalitali ki he ʼu meʼa ʼofa.+ Neʼe natou punamaʼuli lahi ai pea mo ʼofolele ʼo ʼuhiga mo te meʼa ʼae neʼe hoko ki ai.
11 ʼI te kei tapiki ʼa te tagata kia Petelo mo Soane, neʼe feleleʼi age te hahaʼi fuli kia natou ʼi te faʼahi ʼae ʼe higoa ko te ʼAtu Pou ʼo Salomone+ pea neʼe natou punamaʼuli ʼi te meʼa ʼae neʼe hoko.
12 ʼI te sio ʼa Petelo ki te faʼahi ʼaia, neʼe ina ui ki te hahaʼi: “ ʼU tagata ʼo Iselaele, he koʼe ʼe kotou punamaʼuli ʼi te aluʼaga ʼaeni? Pea he koʼe ʼe kotou sioʼi fakamamaʼu feiaʼi maua, ohage kua lava haʼele ia te tagata ʼaeni ʼaki toma malohi peʼe ko tamā pipiki ki te ʼAtua?
13 Ko te ʼAtua ʼo Apalahamo, mo Isaake pea mo Sakopo,+ te ʼAtua ʼo ʼatatou kui, neʼe ina fakakololiaʼi tana Tagata Faifekau+ ko Sesu,+ ʼae neʼe kotou tuku ki ʼona fili+ pea mo fakafisi ki ai ia muʼa ʼo Pilato, kae neʼe kua ina fakatotonu ke ina fakaʼateainaʼi ia ia.
14 ʼEi, neʼe kotou fakafisi ki te tagata maʼoniʼoni mo faitotonu ʼaia, kae neʼe kotou kole ke tuku atu ia te tagata faifakapo.+
15 Neʼe kotou matehi ia Ia ʼae neʼe fakanofo ke ina foaki te maʼuli.+ Kae neʼe fakatuʼuake ia e te ʼAtua mai te kau mate, pea ʼe matou fakamoʼoni ki ai.+
16 Pea ʼaki tona huafa pea mo tamā tui ki tona huafa, kua fakamalohiʼi te tagata ʼaeni ʼe kotou sisio ki ai pea mo iloʼi. Pea ʼe ko te tui ʼae ʼe ma maʼu ʼuhi ko Sesu, neʼe fakamalolo katoa ai te tagata ʼaeni ia muʼa ʼo koutou fuli.
17 Pea ʼe au iloʼi, ʼu tehina, neʼe mole kotou mahino ki te meʼa ʼae neʼe kotou fai,+ ohage pe ko ʼokotou pule.+
18 Kae neʼe fakahoko ai e te ʼAtua te ʼu meʼa ʼae neʼe ina tala fakatomuʼa ʼaki te kau polofeta fuli, ʼi tanatou ui ʼae ʼe tonu ke mamahi ia Kilisito.+
19 “Koia, kotou fakahemala+ pea kotou maliu mai,*+ ke molehi ai ʼakotou agahala,+ pea ʼe foaki anai e Sehova* he fimalie
20 pea ʼe ina fekauʼi anai ia Kilisito, ʼae neʼe ina fakanofo maʼa koutou, ia Sesu.
21 ʼE tonu ke taʼofi ia ia ʼaia ʼi selo, ʼo kaku ki te temi ʼae ka toe fakatuʼu ai ia meʼa fuli ʼae neʼe palalau ki ai te ʼAtua ʼaki ʼana polofeta maʼoniʼoni ʼo te temi muʼa.
22 Neʼe ui e Moisese: ‘ ʼE fakanofo anai e Sehova* tokotou ʼAtua ʼi ʼokotou tehina he polofeta ohage ko au maʼa koutou.+ ʼE tonu anai ke kotou fakalogo ki te ʼu meʼa fuli ʼae ʼe ina fakaha atu.+
23 Koia, ko he tahi* ʼe mole fakalogo ki te Polofeta ʼaia, ʼe matehi anai mo pulihi mai te lotolotoiga ʼo te hahaʼi.’+
24 Pea ko te kau polofeta fuli ʼo kamata mai ia Samuele, ia natou ʼae neʼe faifakakikite, neʼe natou toe talanoa fakahagatonu foki ʼo ʼuhiga mo te ʼu ʼaho ʼaeni.+
25 ʼE ko koutou te ʼu foha ʼo te kau polofeta pea mo te fuakava ʼae neʼe fai e te ʼAtua mo ʼakotou kui,+ ʼi tana ui kia Apalahamo: ‘Pea ʼe tapuakina anai te ʼu famili fuli ʼo te kele ʼaki tou hakoga.’+
26 Ko te ʼAtua, hili tana fakanofo tana Tagata Faifekau, neʼe ina ʼuluaki fekauʼi mai ia ia kia koutou,+ ke tapuakina ai koutou ʼi tana tokoni atu ke kotou liʼaki ʼakotou aga ʼae ʼe kovi.”
Nota
^ Klka. “te hiva hola.”
^ Klka. “meʼa ʼofa ki te kau masiva.” Vakaʼi Te ʼu Kupu.
^ Vakaʼi Te ʼu Kupu.
^ Peʼe “toe liliu mai ki te ʼAtua.”
^ Vakaʼi Te ʼu Fakamahino 1.5.
^ Vakaʼi Te ʼu Fakamahino 1.5.
^ Klka. psukhê. Vakaʼi Te ʼu Kupu.
