Te ʼu Gaue ʼa Te Kau Apositolo 4:1-37
4 ʼI te lolotoga palalau ʼa te toko lua ki te hahaʼi, neʼe olo age te kau pelepitelo, mo te pule ʼo te kau tagata leʼo ʼo te fale lotu pea mo te kau Satuseo.*+
2 Neʼe natou iita koteʼuhi neʼe faiakonaki te kau apositolo ki te hahaʼi pea natou tala fakahaha ia te fakatuʼuake ʼo Sesu mai te kau mate.+
3 Koia neʼe natou puke pea mo pilisoniʼi naua+ ʼo kaku ki te ʼaho ake, koteʼuhi neʼe kua afiafi.
4 Kae tokolahi ia natou ʼae neʼe fagono ki te akonaki neʼe natou tui, pea ko te kaugamalie ʼo te hahaʼi tagata neʼe ko te teitei toko 5000.+
5 ʼI te ʼaho ake neʼe fakatahitahi ʼi Selusalemi te kau pule, te kau takitaki pea mo te kau sekelipa,*
6 mo te pelepitelo pule ko Anasi,+ mo Kaifa,+ mo Soane, mo Alesatelo pea mo te ʼu kaiga fuli ʼo te pelepitelo pule.
7 Neʼe natou fakatuʼu ia Petelo mo Soane ʼi te lotolotoiga ʼo natou ʼo fakafehuʼi: “Ko te malohi fea peʼe ko te huafa ʼo ai ʼae neʼe kolua fai ai te meʼa ʼaia?”
8 Pea ko Petelo, ʼae neʼe fonu ʼi te laumalie maʼoniʼoni,+ neʼe ina ui kia natou:
“ ʼU pule ʼo te hahaʼi,
9 kapau ʼe fakafehuʼi maua ʼi te ʼaho nei ʼo ʼuhiga mo he gaue lelei neʼe ma fai ki te tagata maʼimoa,+ pea kapau ʼe kotou fia iloʼi pe ko ai ʼae neʼe ina fakamalolo te tagata ʼaeni,
10 ke kotou iloʼi e koutou fuli pea mo te hahaʼi fuli ʼo Iselaele ia te faʼahi ʼaeni: ʼE tuʼu ia te tagata ʼaeni ʼi ʼokotou muʼa pea kua malolo ʼuhi ko te huafa ʼo Sesu Kilisito* te tagata Nasaleti,+ ʼae neʼe kotou tutuki ki te pou+ kae neʼe fakatuʼuake ia e te ʼAtua mai te kau mate.+
11 ʼE ko ‘te maka ʼaia ʼae neʼe kotou meʼa noaʼi, kau tufuga, kua liliu ko te maka tafito ʼo te agele.’*+
12 Pea tahi, ʼe mole maʼu te haofaki ʼi he tahi age, koteʼuhi ʼe mole ʼi ai ʼi te lalo lagi he tahi age higoa+ neʼe kua foaki ki te tagata, ʼe tonu ke haofaki ai tatou.”+
13 ʼI tanatou tokagaʼi ia te palalau fakahagatonu* ʼa Petelo mo Soane, mo mahino neʼe mole nā ako* pea neʼe ko he ʼu tagata neʼe mole maʼuhiga,+ neʼe natou punamaʼuli ai. Pea neʼe natou mahino leva neʼe nā fakatahi mo Sesu.+
14 ʼI tanatou sisio ki te tagata ʼae neʼe fakamalolo ʼe tuʼu ʼi ʼonā tafa,+ neʼe mole hanatou tali ki ai.+
15 Koia neʼe natou fakatotonu age kia natou ke natou mavae ʼi te fale fono ʼo te Sanetualio.* Neʼe natou tautalaga leva,
16 ʼo natou ui: “Kotea ʼae ʼe tonu ke tou fai ki te ʼu tagata ʼaeni?+ Koteʼuhi neʼe nā fakahoko te milakulo fakaofoofo, neʼe ha ki te hahaʼi fuli ʼo Selusalemi,+ pea ʼe mole feala ke tou fakafisi ki ai.
17 Koia ke ʼaua naʼa hoko atu te mafola ʼo te faʼahi ʼaeni ʼi te hahaʼi, tou fakamatakuʼi naua pea mo ui age ke fakagata tanā palalau ʼi te huafa ʼaia.”+
18 Neʼe natou pauʼi leva naua pea mo fakatotonu age ke ʼaua naʼa nā toe palalau pea mo faiakonaki ʼi te huafa ʼo Sesu.
19 Kae neʼe tali age e Petelo pea mo Soane kia natou: “ ʼA koutou pe tona vakaʼi pe ʼe totonu ia muʼa ʼo te ʼAtua ke ma fakalogo atu, ʼi hamā fakalogo ki te ʼAtua.
20 Kae kia maua, ʼe mole feala ke ma tuku tamā palalau ki te ʼu meʼa ʼae neʼe ma sisio mo logo ki ai.”+
21 Pea hili tanatou toe fakamatakuʼi ia naua, neʼe natou tuku age ʼuhi he neʼe mole natou maʼu he tupuʼaga moʼo tauteaʼi ʼo naua pea ʼuhi ko te hahaʼi,+ he neʼe natou fakakololiaʼi fuli ia te ʼAtua ʼo ʼuhiga mo te meʼa ʼae neʼe hoko.
22 Koteʼuhi neʼe taʼu 40 tupu ia te tagata ʼae neʼe fakamalolo fakamilakulo.
23 ʼI te ʼosi tuku age ʼo Petelo mo Soane, neʼe nā olo leva ki te tahi ʼu tisipulo ʼo fakamatala te meʼa ʼae neʼe ui age kia naua e te kau pelepitelo pule mo te kau takitaki Sutea.
24 ʼI tanatou logo ki te faʼahi ʼaia, neʼe natou faikole fakatahi ki te ʼAtua, ʼo natou ui:
“Tuʼi ʼAliki, ʼe ko koe ʼae neʼe ke fakatupu te lagi, mo te kele, mo te tai pea mo te ʼu meʼa fuli ʼe maʼu ai,+
25 pea ʼaki tou laumalie maʼoniʼoni neʼe ke uga ai tau tagata faifekau ko Tavite,+ tamatou kui, ke palalau maʼa koe ʼo ina ui: ‘He koʼe ʼe gatutu te ʼu puleʼaga pea mo fakakaukauʼi e te hahaʼi he ʼu meʼa noa?
26 Kua malaga ake te ʼu hau ʼo te kele pea kua fakatahitahi te kau pule ke natou fakafeagai kia Sehova* pea mo tana fakanofo.’+
27 ʼE moʼoni, ko Helote mo Posio Pilato+ pea mo te ʼu tagata ʼo te ʼu puleʼaga pea mo te ʼu hahaʼi ʼo Iselaele neʼe natou fakatahitahi ʼi te kolo ʼaeni ʼo fakafeagai ki tau tagata faifekau maʼoniʼoni ko Sesu, ʼae neʼe ke fakanofo,+
28 ke natou fakahoko te meʼa ʼae neʼe fakatuʼutuʼu fakatomuʼa e tou nima pea mo tou finegalo.+
29 Pea ʼi te temi leva ʼaeni Sehova,* tokagaʼi ʼanatou fakamatakutaku, pea fakafealagia ki ʼau kaugana ke natou haga palalau ki tau folafola ʼaki he lototoʼa,
30 mo ke haga faoʼi tou nima moʼo fakamalolo pea mo fakahoko he ʼu milakulo mo he ʼu meʼa fakaofoofo*+ ʼi te huafa ʼo tau tagata faifekau maʼoniʼoni ko Sesu.”+
31 Pea ʼi tanatou ʼosi fai tanatou kole mamahi ʼaia,* neʼe galulu te koga meʼa ʼae neʼe natou fakatahitahi ai, pea neʼe natou fonu fuli ʼi te laumalie maʼoniʼoni,+ ʼo natou tala te folafola ʼa te ʼAtua ʼaki he lototoʼa.+
32 Pea ko te hahaʼi kaugamalie ʼae neʼe tui neʼe natou lototahi mo manatu* tahi, pea neʼe mole he tahi ia natou neʼe ʼi ai hana meʼa neʼe ina lau ʼaʼana, kae neʼe natou fakatahiʼi ʼonatou koloa fuli.+
33 Pea ʼaki he malohi lahi neʼe haga fakamoʼoni ia te kau apositolo ʼo ʼuhiga mo te fakatuʼuake ʼo te ʼAliki ko Sesu,+ pea neʼe fakaha e te ʼAtua tona ʼofa makehe kia natou fuli.
34 Neʼe mole he tahi neʼe nofo ʼi te faigataʼaʼia,+ koteʼuhi ko natou fuli ʼae neʼe natou maʼu ʼonatou moʼi kele peʼe ko ʼonatou ʼapi, neʼe natou fakatau pea mo ʼaumai tona totogi,
35 ʼo tuku kia vaʼe ʼo te kau apositolo.+ Pea neʼe tufa leva ʼo mulimuli ki te meʼa ʼae neʼe ʼaoga kia natou takitokotahi.+
36 Koia, ko Sosefo, ʼae neʼe toe fakahigoaʼi e te kau apositolo ko Palenapa+ (ko tona fakaʼuhiga “Foha ʼo Te Fakafimalie”), neʼe ko te tagata Levi, mai te motu ko Sipele,
37 neʼe ʼi ai tona moʼi kele, pea neʼe ina fakatau ʼo ina ʼaumai te falā ʼo tuku kia vaʼe ʼo te kau apositolo.+
Nota
^ Vakaʼi Te ʼu Kupu.
^ Vakaʼi Te ʼu Kupu.
^ Vakaʼi Te ʼu Kupu.
^ Klka. “te fuga agele.”
^ Peʼe “te lototoʼa.”
^ Ko tona fakaʼuhiga, neʼe mole nā ako ʼi te ʼu fale ako ʼa te kau lapi. Kae ʼe mole fakaʼuhiga leva neʼe mole nā popoto ʼi te lautohi mo te faitohi.
^ Vakaʼi Te ʼu Kupu.
^ Vakaʼi Te ʼu Fakamahino 1.5.
^ Vakaʼi Te ʼu Fakamahino 1.5.
^ Peʼe “he ʼu fakamelomelo.”
^ Peʼe “faikole fakamalotoloto.”
^ Klka. psukhê. Vakaʼi Te ʼu Kupu.
