Te ʼu Gaue ʼa Te Kau Apositolo 5:1-42
-
Ko Ananiasi mo Safila (1-11)
-
ʼE lahi te ʼu milakulo ʼae ʼe fakahoko e te kau apositolo (12-16)
-
ʼE pilisoniʼi pea mo fakaʼateainaʼi natou (17-21, ʼuluaki koga)
-
ʼE toe ʼave natou kia muʼa ʼo te Sanetualio (21, lua koga-32)
-
‘Fakalogo ki te ʼAtua, kae mole ki te tagata’ (29)
-
-
Te tokoni ʼa Kamaliele (33-40)
-
Te faifakamafola ʼi te ʼu ʼapi (41, 42)
5 Kae neʼe ʼi ai te tagata neʼe higoa ko Ananiasi pea mo tona ʼohoana ko Safila, neʼe nā fakatau tonā moʼi kele.
2 Kae neʼe ina taʼofi fakafufu he koga ʼo te totogi, pea neʼe iloʼi e tona ʼohoana ia te faʼahi ʼaia. Neʼe ina ʼaumai leva te toe ʼo te totogi ʼo ina tuku kia vaʼe ʼo te kau apositolo.+
3 Kae neʼe ui e Petelo: “Ananiasi, he koʼe neʼe ke tuku ke fakaneke koe e Satana ke ke lotolahi ʼo loi+ ki te laumalie maʼoniʼoni,+ pea mo ke taʼofi fakafufu he koga ʼo te totogi ʼo te moʼi kele?
4 ʼI muʼa ʼo tau fakatau, neʼe mole koa la ko hou moʼi kele? Pea hili tona fakatau, neʼe mole ke faʼifaʼitaliha koa la mo tona totogi? He koʼe neʼe ke fakakaukauʼi ʼi tou loto ke ke fai ia te taʼi aga ʼaia? Neʼe mole ke loi ki te tagata, kae ki te ʼAtua.”
5 ʼI tana logo ki te ʼu palalau ʼaia, neʼe toka ifo ia Ananiasi ʼo mate. Pea neʼe manavasiʼi ia natou fuli ʼae neʼe logo ki te faʼahi ʼaia.
6 Pea neʼe tutuʼu ake te kau tupulaga, ʼo natou kofukofu ia ia ʼaki he ʼu kie, pea natou ʼave ki tuʼa ʼo ʼavaifo.
7 Hili ki ai teitei hola ʼe tolu, neʼe hu age tona ʼohoana kae neʼe mole ina iloʼi te meʼa ʼae neʼe hoko.
8 Neʼe ui e Petelo ki ai: “Fakaha mai, ʼe ko te totogi koa ʼaeni ʼo takolua fakatau te moʼi kele?” Neʼe ina tali: “ ʼEi, ʼe ko tona totogi ʼaia.”
9 Neʼe ui leva e Petelo ki ai: “He koʼe neʼe kolua felogoi tahi ke kolua ʼahiʼahiʼi ia te laumalie ʼo Sehova?* Sio, ʼe tutuʼu ʼi te matapa ia natou ʼae neʼe natou ʼavaifo tou ʼohoana, pea ʼe natou ʼave anai koe ki tuʼa.”
10 ʼI te moʼi temi pe ʼaia, neʼe toka ifo ki te ʼu vaʼe ʼo te apositolo ʼo mate. ʼI te hu age ʼa te kau tupulaga, neʼe natou maʼu atu ia ia kua mate. Pea neʼe natou ʼave ai ki tuʼa ʼo tuku ia tafa ʼo tona ʼohoana.
11 Koia, neʼe manavasiʼi ia te kokelekasio katoa pea mo natou fuli ʼae neʼe logo ki te ʼu meʼa ʼaia.
12 Pea neʼe lahi te ʼu milakulo mo te ʼu meʼa fakaofoofo* neʼe haga fakahoko e te kau apositolo ʼi te lotolotoiga ʼo te hahaʼi.+ Pea neʼe natou fakatahitahi fuli ʼi te faʼahi ʼae ʼe higoa ko te ʼAtu Pou ʼo Salomone.+
13 ʼE moʼoni, ko natou ʼae neʼe mole lelei ʼanatou fakatuʼutuʼu neʼe mole natou lotomalohi ke natou fakatahi mo te kau tisipulo. Kae neʼe vikiʼi pe natou e te hahaʼi.
14 Pea neʼe haga tuputupu aipe te kaugamalie ʼo natou ʼae neʼe tui ki te ʼAliki, tagata mo fafine.+
15 Neʼe natou fata te hahaʼi mahahaki ki te ʼu ala lalahi, ʼo fakatakoto ki he ʼu kiʼi palepale mo he ʼu moeʼaga, ke ha te ʼata ʼo Petelo ki ʼihi ia natou moka fakalaka ai.+
16 Neʼe haga ʼomai pe te hahaʼi tokolahi mai te ʼu kolo ʼo te ʼu tafaʼaki ʼo Selusalemi, ʼo natou ʼaumai te hahaʼi mahahaki mo natou ʼae neʼe fakamamahiʼi e te ʼu laumalie kovi, pea neʼe fakamalolo ia natou fuli.
17 Kae neʼe tuʼu ake te pelepitelo lahi mo natou fuli ʼae neʼe fakatahi mo ia, ʼae neʼe kau ki te magaʼi lotu ʼa te kau Satuseo, he neʼe natou maheheka.
18 Pea neʼe natou puke ai te kau apositolo ʼo pilisoniʼi.+
19 Kae lolotoga te poʼuli, neʼe avahi e te ʼaselo ʼa Sehova* te ʼu matapa ʼo te fale pilisoni,+ ʼo ina taki natou ki tuʼa pea ina ui age:
20 “Kotou olo ʼo tutuʼu ʼi te fale lotu, pea mo hoko atu takotou fakaha ki te hahaʼi te ʼu folafola fuli ʼo ʼuhiga mo te maʼuli ʼaeni.”
21 ʼI tanatou fakalogo ki te fakatotonu ʼaia, neʼe natou hu ki te fale lotu ʼi te kei hegihegi, pea natou faiakonaki ai.
ʼI te ʼomai ʼa te pelepitelo lahi pea mo natou ʼae neʼe fakatahi mo ia, neʼe natou kole ke fono te Sanetualio* mo te kau takitaki fuli ʼo te hahaʼi ʼo Iselaele. Neʼe natou fekauʼi te ʼu tagata leʼo ki te fale pilisoni, ke natou olo ʼo taki mai te kau apositolo.
22 Kae ʼi te tau atu ʼa te ʼu tagata leʼo ʼo te fale lotu ki te fale pilisoni, neʼe mole natou maʼu atu natou. Neʼe natou toe liliu ʼo fakamatala fenei:
23 “Neʼe fakamaʼumaʼu fakalelei te fale pilisoni, pea neʼe tutuʼu te ʼu tagata leʼo ʼi te ʼu matapa, kae ʼi tamatou avahi atu, neʼe mole ʼi ai he tahi ʼi loto.”
24 Koia, ʼi te logo ʼa te pule ʼo te ʼu tagata leʼo ʼo te fale lotu pea mo te ʼu pelepitelo pule ki te ʼu palalau ʼaia, neʼe natou feʼekeʼaki ʼo ʼuhiga mo te ikuʼaga ʼo te faʼahi ʼaia neʼe hoko.
25 Kae neʼe haʼu te tahi ʼo ina ui kia natou: “Koʼeni te ʼu tagata ʼae neʼe kotou pilisoniʼi, ʼe tutuʼu ʼi te fale lotu ʼo faiakonaki ki te hahaʼi.”
26 Neʼe olo leva te ʼu tagata leʼo ʼo te fale lotu mo tonatou pule ʼo taki mai natou, kae neʼe mole natou fai fakamalohi, he neʼe natou matataku naʼa taumakaʼi natou e te hahaʼi.+
27 Pea neʼe natou taki mai natou kia muʼa ʼo te Sanetualio. Pea neʼe fakafehuʼi natou e te pelepitelo lahi,
28 ʼo ina ui: “Neʼe matou fakatotonu fakalelei atu ke kotou fakagata takotou faiakonaki ʼi te huafa ʼaia,+ kae koʼeni kua mafola ʼi Selusalemi katoa takotou akonaki. ʼE kotou loto moʼoni ke to kia matou te toto ʼo te tagata ʼaia.”+
29 Neʼe tali e Petelo pea mo te tahi kau apositolo: “ ʼE tonu ke matou fakalogo* ki te ʼAtua ʼi hamatou fakalogo ki te tagata.+
30 Ko te ʼAtua ʼo ʼatatou kui neʼe ina fakatuʼuake ia Sesu, ʼae neʼe kotou matehi ʼo tautau ki he pou.*+
31 Neʼe hiki ake ia e te ʼAtua ki tona toʼomataʼu.+ Neʼe ina fakanofo ia ia ke ina haofaki te hahaʼi+ pea mo foaki kia natou te maʼuli.+ Neʼe feala ai ki te hahaʼi ʼo Iselaele ke natou fakahemala pea ke fakamolemole ʼanatou agahala.+
32 Pea ʼe matou fakamoʼoni ki te ʼu faʼahi ʼaia,+ ʼo feia pe mo te laumalie maʼoniʼoni,+ ʼae neʼe foaki e te ʼAtua kia natou ʼae ʼe fakalogo* kia te ia.”
33 ʼI tanatou logo ki ai, neʼe kovi ʼosi tonatou iita pea neʼe natou fia matehi te kau apositolo.
34 Kae neʼe tuʼu ake ʼi te Sanetualio ia te tagata Faliseo,* neʼe higoa ko Kamaliele.+ Neʼe ko he tagata faiako ʼo te Lao neʼe fakaʼapaʼapaʼi e te hahaʼi fuli. Pea neʼe ina fekauʼi ke ʼave muʼa te ʼu tagata ki tuʼa.
35 Neʼe ina ui leva: “ ʼU tagata ʼo Iselaele, kotou tokakaga ki te ʼu meʼa ʼae ka kotou fai ki te ʼu tagata ʼaia.
36 Ohage la, ki muʼa atu, neʼe tuʼu ake ia Teotasi ʼo ina ui ko ia ko he tagata maʼuhiga, pea neʼe lagolago ki tona faʼahi ia te ʼu tagata neʼe teitei toko 400. Kae neʼe matehi ia, mo mavetevete ia natou fuli ʼae neʼe mulimuli ia ia, pea mo to noa ʼanatou fakatuʼutuʼu.
37 ʼOsi ʼaia, neʼe tuʼu ake ia Sutasi te tagata Kalilea ʼi te temi ʼae neʼe tohi ai te hahaʼi ʼo te fenua, pea neʼe mulimuli ia ia he ʼu hahaʼi. Neʼe toe mate foki mo te tagata ʼaia, pea mo mavetevete ia natou fuli ʼae neʼe mulimuli ia ia.
38 Koia ʼi te aluʼaga ʼaeni, ʼe au tala atu kia koutou, kotou haganoa ki te ʼu tagata ʼaeni. Koteʼuhi kapau ʼe haʼu te fakatuʼutuʼu ʼaia peʼe ko te gaue ʼaia mai te tagata, ʼe to noa anai ia.
39 Kae kapau ʼe haʼu ia mai te ʼAtua, ʼe mole feala anai hakotou holoʼi.+ Kotou tokakaga pe naʼa kotou fakafeagai ki te ʼAtua.”+
40 Neʼe natou fakalogo leva ki tana tokoni. Neʼe natou pauʼi te kau apositolo ke olo age, pea ta natou+ mo fakatotonu age ke tuku tanatou palalau ʼi te huafa ʼo Sesu. Pea neʼe natou tuku leva natou ke olo.
41 Neʼe mavae ai te kau apositolo ʼi te Sanetualio, ʼo natou fakafiafia+ he neʼe ko he pilivilesio kia natou tonatou fakalainoaʼi ʼuhi ko te huafa ʼo Sesu.
42 Pea ʼi te ʼaho fuli, neʼe hoko atu pe tanatou faiakonaki pea mo tanatou tala te logo lelei ʼo ʼuhiga mo Kilisito* Sesu, ʼi te fale lotu pea mo te ʼu ʼapi.+
Nota
^ Vakaʼi Te ʼu Fakamahino 1.5.
^ Peʼe “te ʼu fakamelomelo.”
^ Vakaʼi Te ʼu Fakamahino 1.5.
^ Vakaʼi Te ʼu Kupu.
^ ʼE feala ke fakaʼuhiga ʼi te Fakakeleka “fakalogo ohage ko hakita fakalogo ki he pule.”
^ Peʼe “fuʼu ʼakau.”
^ ʼE feala ke fakaʼuhiga ʼi te Fakakeleka “fakalogo ohage ko hakita fakalogo ki he pule.”
^ Vakaʼi Te ʼu Kupu.
^ Vakaʼi Te ʼu Kupu.
