Neemia 13:1-31
13 ʼI te ʼaho ʼaia, neʼe lau ai te tohi ʼa Moisese ke logo ki ai te hahaʼi,+ pea neʼe tohi ai ʼe mole tonu ʼi he temi ke kau ki te hahaʼi ʼae ʼe tauhi ki te ʼAtua moʼoni+ he Amone peʼe ko he Moape,+
2 koteʼuhi neʼe mole natou ʼomai ki te kau Iselaele mo he pane pea mo he vai, kae neʼe natou totogi ia Palaame ke faitutuku kia natou.+ Kae neʼe fakaliliu e tomatou ʼAtua te faitutuku ʼaia ko he tapuakina.+
3 ʼI te temi pe ʼae neʼe natou logo ai ki te Lao, neʼe natou kamata fakamavae leva mai Iselaele ia natou fuli ʼae neʼe hifo mai he kau matapule.*+
4 Kae ʼi muʼa ʼo te hoko ʼo te faʼahi ʼaia, ko te pelepitelo ʼae neʼe tokaga ki te ʼu fale tanakiʼaga meʼa* ʼo te fale* ʼo tomatou ʼAtua+ neʼe ko Eliasipe,+ te kaiga ʼo Topie.+
5 Pea neʼe ina foaki age ki ai he fale tanakiʼaga meʼa* ʼe lahi, ʼae ki muʼa atu neʼe tuku ai te molaga meʼa kai, mo te iseso hina,* mo te ʼu meʼa kehekehe, ʼo feia mo te vahe tahi ki te hogofulu ʼo te fulumeto,* mo te vino foʼou pea mo te lolo,+ ʼae neʼe tonu ke foaki ki te kau Levite,+ mo te kau hiva pea mo te kau tagata leʼo matapa. Neʼe toe tuku ai foki mo te ʼu meʼa ʼofa maʼa te kau pelepitelo.+
6 Pea neʼe mole au nofo ʼi Selusalemi ʼi te temi ʼaia, he neʼe au alu ki te hau ʼi te 32 taʼu+ ʼo te pule ʼa Aletasese,+ te Hau ʼo Papiloni. Pea ki muli age, neʼe au kole leva ki te hau ke au toe liliu.
7 Neʼe au tau atu leva ki Selusalemi pea neʼe au tokagaʼi te meʼa kovi ʼae neʼe fai e Eliasipe,+ ʼi tana foaki age kia Topie+ he fale tanakiʼaga meʼa ʼi te malaʼe ʼo te fale ʼo te ʼAtua moʼoni.
8 Neʼe mole au leleiʼia ʼosi te meʼa ʼaia neʼe ina fai, koia neʼe au laku ai ki tuʼa te ʼu meʼa fuli ʼa Topie ʼae neʼe tuku ʼi te fale tanakiʼaga meʼa.*
9 Hili ʼaia, neʼe au fakatotonu ke fakamaʼa te ʼu fale tanakiʼaga meʼa.* Pea neʼe au toe tanaki ki ai te ʼu meʼa ʼae ʼe ʼaoga ki te gaue ʼi te fale ʼo te ʼAtua moʼoni,+ mo te ʼu molaga meʼa kai pea mo te iseso hina.+
10 Neʼe au toe iloʼi foki neʼe mole foaki age ki te kau Levite tonatou vahe,+ koia neʼe mavae ai te kau Levite mo te kau hiva ʼae neʼe natou fai te gaue, ʼo tahi alu ki tana gaueʼaga.+
11 Koia neʼe au valokiʼi ai te ʼu tagata ʼae ʼe hoa ki te kau pule,+ ʼo au ui age: “He koʼe koa neʼe kotou meʼa noaʼi ia te fale ʼo te ʼAtua moʼoni?”+ Neʼe au fakatahitahiʼi leva natou pea mo au toe hinoʼi natou ki ʼanatou gaue.
12 Pea neʼe ʼaumai e Suta katoa te vahe tahi ki te hogofulu+ ʼo te fulumeto, mo te vino foʼou pea mo te lolo ki te ʼu fale tanakiʼaga meʼa.+
13 Neʼe au fakanofo leva ia Selemi, te pelepitelo, mo Satoke, te tagata hiki tohi* pea mo Petasa ʼi te kau Levite ke natou tokakaga ki te ʼu fale tanakiʼaga meʼa, pea neʼe tokoni kia natou ia Hanane, te foha ʼo Sakule, te foha ʼo Matania, he neʼe tuha ia te ʼu tagata ʼaia mo te falala. Ko tanatou gaue neʼe ko te foaki ki ʼonatou tehina ʼonatou vahe.
14 “Siʼoku ʼAtua, ke ke manatuʼi au+ ʼo ʼuhiga mo te faʼahi ʼaia, pea ʼaua naʼa ke galoʼi toku ʼofa agatonu ʼae neʼe au fakaha ki te fale ʼo toku ʼAtua pea mo te ʼu gaue ʼae ʼe fakahoko ai.”+
15 ʼI te ʼu ʼaho ʼaia, neʼe au sio ki te hahaʼi ʼi Suta neʼe natou molomoloki te ʼu vite ʼi te ʼu lomiʼaga vite ʼi te Sapato,+ mo natou ʼaumai ki Selusalemi ʼi te ʼaho ʼo te Sapato te fulumeto ʼae neʼe natou hili ki te ʼu asino, pea mo natou ʼaumai te vino, mo te ʼu fuaʼi vite, mo te ʼu fuaʼi fiku, pea mo te ʼu faʼahiga kavega kehekehe.+ Pea neʼe au fakatokaga age kia natou ke ʼaua naʼa natou fakatau ni meʼa ʼi te ʼaho ʼaia.*
16 Pea ko te kau Tile ʼae neʼe nonofo ʼi te kolo, neʼe natou ʼaumai ni ika pea mo te ʼu faʼahiga koloa kehekehe, ʼo fakatau ki te hahaʼi ʼo Suta pea ʼi Selusalemi, ʼi te Sapato.+
17 Pea neʼe au valokiʼi te kau ʼaliki ʼo Suta ʼo au ui age kia natou: “Kotea koa te meʼa kovi ʼaeni ʼe kotou fai, ʼo koutou moamoagaʼi ai te ʼaho ʼo te Sapato?
18 Neʼe mole koa la ko te meʼa ʼaia neʼe fai e ʼakotou kui, ʼo tupu ai te fakato e totatou ʼAtua te ʼu malaʼia fuli ʼaeni kia tatou pea mo te kolo ʼaeni? Pea ʼe kotou fakaʼaʼasili te hauhau ʼo te ʼAtua ki Iselaele ʼi takotou moamoagaʼi ia te Sapato.”+
19 Koia, ʼi te temi pe ʼae neʼe kamata malu ai te afiafi ʼi Selusalemi, ʼi muʼa ʼo te Sapato, neʼe au fakatotonu ke pupunu te ʼu matapa. Neʼe au toe ui age foki kia natou ke hoki avahi te ʼu matapa moka kua ʼosi ia te Sapato, pea neʼe au fakatuʼu ʼihi ʼo taku kau gaue ʼi te ʼu matapa, ke ʼaua naʼa ʼaumai ni koloa ʼi te ʼaho ʼo te Sapato.
20 Koia ko te kau faikoloa ʼae neʼe natou fakatau te ʼu faʼahiga koloa kehekehe neʼe natou nonofo ʼi te poʼuli ʼi tuʼa ʼo Selusalemi, tuʼa tahi peʼe tuʼa lua.
21 Pea neʼe au fai kia natou te fakatokaga ʼo au ui age: “He koʼe ʼe kotou nonofo ʼi te poʼuli ʼi te muʼa kaupa? Kapau ʼe kotou toe fai te faʼahi ʼaia, ʼe au kapu anai koutou.” Talu mai te ʼaho ʼaia, neʼe mole natou toe ʼomai ʼi te Sapato.
22 Pea neʼe au ui age ki te kau Levite ke natou fakamaʼa tuʼumaʼu ia natou pea ke natou ʼomai ʼo leʼo te ʼu matapa, ke taupau ai te ʼuhiga taputapu ʼo te Sapato.+ “Siʼoku ʼAtua, ke ke toe manatuʼi neʼe au fai te faʼahi ʼaia, pea mo ke ʼofa mai kia au ʼo mulimuli ki te lahi ʼo tou ʼofa agatonu.”+
23 ʼI te ʼu ʼaho ʼaia, neʼe au toe sio foki ki he kau Sutea neʼe ʼohoana mo* he ʼu fafine+ mai Asoti,+ mo Amone pea mo Moape.+
24 Ko te vaelua ʼo ʼonatou foha neʼe palalau ʼi te lea Fakaasoti pea ko te tahi vaelua neʼe palalau ʼi ni lea ʼa te ʼu faʼahiga hahaʼi kehekehe, kae neʼe mole poto pe la he tahi ia natou ʼi te palalau ʼi te lea ʼa te kau Sutea.
25 Koia, neʼe au fakatonutonuʼi ai natou pea mo fakatokaga natou ki te ʼu tautea ʼa te ʼAtua. Neʼe au ta ʼihi tagata+ pea mo fusi ʼonatou lauʼulu, pea neʼe au fakatotonu ke natou fakapapau ʼi te huafa ʼo te ʼAtua: “ ʼE mole tonu ke kotou foaki ʼokotou ʼofafine ki ʼonatou foha, pea ʼe mole tonu ke kotou tali ke ʼohoana ʼonatou ʼofafine mo ʼokotou foha peʼe ko koutou totonu.+
26 Neʼe mole agahala koa la ia Salomone te Hau ʼo Iselaele ʼuhi ko te faʼahi ʼaia? Neʼe mole he tahi age hau neʼe hage ko ia ʼi te ʼatu puleʼaga.+ Pea neʼe ʼofainaʼi e tona ʼAtua,+ ʼo ina fakanofo ke hau ʼi Iselaele katoa. Kae neʼe fakaneke ia ia e ʼona ʼohoana matapule ke agahala.+
27 Koia, ʼe ko he meʼa fakaufiufi ʼosi takotou fai te agahala lahi ʼaia ʼo tupu ai takotou heʼe agatonu ki totatou ʼAtua, ʼi takotou ʼohoanaʼi he ʼu fafine matapule.”+
28 Ko he tahi ʼo te ʼu foha ʼo Sosata,+ te foha ʼo Eliasipe,+ te pelepitelo lahi neʼe ʼohoana mo he ʼofafine ʼo Sanepala,+ te tagata Oloni. Koia neʼe au kapu ai ia ia.
29 “Siʼoku ʼAtua, ke ke manatuʼi pea mo ke tauteaʼi natou, he neʼe natou ʼulihi te gaue fakapelepitelo pea mo te fuakava ʼae neʼe fai e te kau pelepitelo+ pea mo te kau Levite.”+
30 Pea neʼe au fakamaʼa leva natou mai te ʼu faʼahiga meʼa heʼe maʼa kehekehe ʼae neʼe haʼu mai te kau matapule. Pea neʼe au hinoʼi he ʼu gaue ke fai e te kau pelepitelo pea mo te kau Levite, pea ke natou tahi tuʼu ʼi tana gaue.+
31 Pea neʼe au fai he fakatuʼutuʼu ʼo ʼuhiga mo te ʼaumai ʼo te fafie+ ʼi te temi ʼae kua fakatuʼutuʼu ki ai pea mo te ʼu ʼuluaki fua ʼae kua momoho.
“Siʼoku ʼAtua, ke ke manatuʼi au pea mo ke tapuakiʼi au.”+
Nota
^ Peʼe “ ʼae neʼe hafekasi.”
^ Peʼe “fale kai.”
^ Peʼe “fale lotu.”
^ Peʼe “fale kai.”
^ Peʼe lagi ko te olose.
^ Vakaʼi Te ʼu Kupu.
^ Peʼe “fale kai.”
^ Peʼe “fale kai.”
^ Peʼe “sekelipa.”
^ Peʼe lagi “Pea ʼi te ʼaho ʼaia neʼe au fakatokaga age ke ʼaua naʼa natou fakatau ni meʼa.”
^ Peʼe “neʼe natou ʼaumai ki ʼonatou loto fale.”
