Numelo 35:1-34
35 Neʼe hoko atu pe te palalau ʼa Sehova kia Moisese ʼi te toafa ʼo Moape, ʼae ʼe ovi ki te Solotane+ pea ʼe haga ki Seliko. Neʼe ina ui age:
2 “Ke ke fakatotonu ke filifili e te kau Iselaele mai tonatou tofiʼa he ʼu kolo, pea ke natou foaki ki te kau Levite ke nonofo ai.+ Pea ʼe natou foaki anai ki te kau Levite te ʼu koga meʼa lunaʼia ʼae ʼi te ʼu tafaʼaki ʼo te ʼu kolo ʼaia.+
3 ʼE nonofo anai te kau Levite ʼi te ʼu kolo ʼaia, kae ʼe tuku anai tanatou faga pipi, mo ʼanatou faga manu fuli pea mo ʼanatou meʼa ʼi te ʼu koga meʼa lunaʼia.
4 ʼE kotou fakafuafua fenei anai te ʼu koga meʼa lunaʼia ʼo te ʼu kolo ʼaia: ʼe kotou fakafuafua anai fasiga nima* ʼe 1 000 ʼo kamata atu ʼi te kaupa ʼae ʼe ina ʼa takai he kolo.
5 ʼE kotou fakafuafua anai, ʼi te tuʼa kolo, ko fasiga nima ʼe 2 000 ʼi te potu esite, mo fasiga nima 2 000 ʼi te potu saute, mo fasiga nima 2 000 ʼi te potu uesite pea mo fasiga nima 2 000 ʼi te potu noleto, kae tuʼu te kolo ʼi lotomalie. ʼE ko te ʼu koga meʼa lunaʼia ʼaia ʼo te ʼu kolo.
6 “ ʼE kotou foaki anai ki te kau Levite he ʼu kolo ʼe 6 ʼo te haofaki,+ ke hola ki ai te tagata ʼae neʼe ina matehi he tahi,+ pea ʼe kotou toe foaki anai mo he tahi ake ʼu kolo ʼe 42.
7 Koia, ʼe kotou foaki anai ki te kau Levite he ʼu kolo ʼe 48, mo ʼonatou koga meʼa lunaʼia.+
8 ʼE kotou filifili anai te ʼu kolo ʼaia mai te ʼu kele ʼo te kau Iselaele.+ ʼE lahi anai te ʼu kolo ʼae ʼe kotou filifili anai mai te ʼu telepi ʼae ʼe kaugamalie, pea ʼe mole lahi anai te ʼu kolo ʼae ʼe kotou filifili anai mai te ʼu telepi ʼae ʼe mole kaugamalie.+ ʼE tahi foaki anai e te telepi he ʼu kolo ki te kau Levite, ʼo mulimuli pe ki te lahi ʼo tona tofiʼa.”
9 Neʼe toe ui e Sehova kia Moisese:
10 “Ke ke ui ki te kau Iselaele: ‘ ʼE kotou fakalaka anai ʼi te Solotane ʼo hu ki te fenua ʼo Kanaane.+
11 ʼE kotou filifili anai he ʼu kolo ʼe tuʼu lelei, ke liliu ko he ʼu kolo ʼo te haofaki, pea ʼe tonu anai ke hola ki ai te tagata ʼae neʼe ina matehi he tahi kae neʼe mole loto ki ai.+
12 ʼE liliu anai te ʼu kolo ʼaia ko hokotou haofakiʼaga mai te tagata lagavaka,+ ke mole ina matehi te tagata ʼae neʼe ina fai he ligi toto kae heʼeki fakamauʼi e te hahaʼi.+
13 ʼE fakaʼaogaʼi anai te ʼu kolo ʼe ono ʼo te haofaki ʼae ka kotou foaki ki te fakatuʼutuʼu ʼaia.
14 ʼE kotou foaki anai he ʼu kolo ʼe tolu ʼi te faʼahi ʼaeni ʼo te Solotane+ pea mo he ʼu kolo ʼe tolu ʼi te fenua ʼo Kanaane,+ ke liliu ko he ʼu kolo ʼo te haofaki.
15 ʼE liliu anai te ʼu kolo ʼaia ʼe ono ko he haofakiʼaga ki te kau Iselaele, mo te kau matapule+ pea mo te hahaʼi mai he tahi age fenua, ia he tahi pe ʼe hola ki ai he neʼe ina matehi he tahi kae neʼe mole loto ki ai.+
16 “ ‘Kae kapau neʼe taʼi e he tagata he tahi ʼaki he koga ukamea ʼo mate ai, ʼe ko he tagata faifakapo ia. ʼE tonu ke matehi te tagata faifakapo.+
17 Pea kapau neʼe ina taʼi ʼaki he foʼi maka ʼo feala ke mate ai, pea neʼe mate leva ki muli age, ʼe ko he tagata faifakapo ia. ʼE tonu ke matehi te tagata faifakapo.
18 Pea kapau neʼe ina taʼi ʼaki he koga ʼakau ʼo feala ke mate ai, pea neʼe mate leva ki muli age, ʼe ko he tagata faifakapo ia. ʼE tonu ke matehi te tagata faifakapo.
19 “ ‘ ʼE matehi anai te tagata faifakapo e te tagata lagavaka.* Ka felaveʼi anai mo ia, pea ʼe ina matehi anai.
20 Kapau neʼe mate he tahi he neʼe humuki e he tagata neʼe fehiʼa ki ai, pe neʼe tukiʼi e he tagata ʼaki he meʼa he neʼe ina fia fai he meʼa ʼe kovi kia ia,+
21 pe neʼe ina taʼi ʼaki tona nima, ʼo mate ai, he neʼe fehiʼa ki ai, ʼe tonu anai ke matehi te tagata ʼae neʼe ina taʼi. ʼE ko he tagata faifakapo ia. ʼE matehi anai te tagata faifakapo e te tagata lagavaka moka felaveʼi anai mo ia.
22 “ ‘Kae kapau neʼe ina humuki he tahi kae neʼe mole ina tokagaʼi pea neʼe mole fehiʼa ki ai, pe neʼe ina tukiʼi ʼaki he meʼa kae neʼe mole ina fia fai he meʼa ʼe kovi kia ia,+
23 peʼe kapau neʼe ina fakato he foʼi maka ki he tahi kae neʼe mole sio ki ai, ʼo mate ai pea neʼe mole ko hona fili pe neʼe mole ina fia fai he meʼa ʼe kovi ki ai,
24 ʼe fakamauʼi anai e te hahaʼi ia te tagata ʼae neʼe ina taʼi he tahi pea mo te tagata lagavaka ʼo mulimuli ki te ʼu lekula ʼaia.+
25 ʼE haofaki anai e te hahaʼi te tagata ʼae neʼe ina matehi he tahi mai te ʼu nima ʼo te tagata lagavaka. ʼE natou toe fakaliliu anai ia ia ki te kolo ʼo te haofaki ʼae neʼe hola ki ai, pea ʼe tonu anai ke nofo ai ʼo kaku ki te mate ʼo te pelepitelo lahi ʼae neʼe tākai tona ʼulu ʼaki te lolo taputapu.+
26 “ ‘Kae kapau ʼe fakalaka ia te tagata ʼae neʼe ina matehi he tahi ʼi te ʼu tuʼakoi ʼo te kolo ʼo te haofaki ʼae neʼe hola ki ai,
27 pea kapau ʼe maʼu atu e te tagata lagavaka ʼi tuʼa atu ʼo te ʼu tuʼakoi ʼo te kolo ʼo te haofaki, ʼo ina matehi ai, ʼe mole lau anai ia ko he fakapo.
28 Koteʼuhi ʼe tonu ke nofo te tagata ʼae neʼe ina matehi he tahi ʼi te kolo ʼo te haofaki, ʼo kaku ki te mate ʼo te pelepitelo lahi. Kae ʼi te ʼosi mate ʼo te pelepitelo lahi, ʼe feala anai ke toe liliu ki tona moʼi kele.+
29 ʼE ko te ʼu lekula ʼaia ʼae ʼe kotou mulimuli anai ki ai moka kotou faifakamau, mai he taʼiake ki he tahi taʼiake, ʼi te ʼu koga meʼa fuli ʼae ʼe kotou nonofo ai anai.
30 “ ‘ ʼE feala anai ke ui neʼe faifakapo he tahi pea ʼe feala ke matehi+ mo kapau ʼe ʼi ai he ʼu hahaʼi moʼo fakamoʼoni ki ai.+ Kae ʼe mole matehi anai he tahi mo kapau ʼe ko he foʼi tokotahi pe ʼe fakamoʼoni ki ai.
31 ʼE mole kotou tali anai he totogi* ʼe foaki atu ki te maʼuli ʼo te tagata faifakapo ʼae ʼe tuha ke matehi, koteʼuhi ʼe tonu ke matehi.+
32 Pea ʼe mole kotou tali anai he totogi* ʼe foaki atu maʼa he tahi neʼe hola ki te kolo ʼo te haofaki, ke feala ai hana toe liliu ki tona moʼi kele kae heʼeki mate te pelepitelo lahi.
33 “ ‘ ʼE mole tonu anai ke ʼulihi te fenua ʼae ʼe kotou maʼuʼuli ai, he ʼe ʼulihi e te toto ia te fenua,+ pea ʼe feala ke molehi te lakahala ʼo ʼuhiga mo te ligi toto ʼae neʼe fai ʼi te fenua ʼaki pe te toto ʼo ia ʼae neʼe ina fai te ligi toto.+
34 ʼE mole tonu anai ke kotou ʼulihi te fenua ʼae ʼe kotou maʼuʼuli ai, pea mo au nofo ai. Koteʼuhi ko au, ia Sehova, ʼe au nofo ʼi te lotolotoiga ʼo te hahaʼi ʼo Iselaele.’ ”+
Nota
^ Neʼe satimeta 44,5 te fasiga nima ʼe tahi. Vakaʼi Te ʼu Fakamahino 2.14.
^ Hep. “te tagata lagavaka ʼo te toto.”
^ Vakaʼi Te ʼu Kupu.
^ Vakaʼi Te ʼu Kupu.
