Numelo 6:1-27
6 Pea neʼe toe ui e Sehova kia Moisese:
2 “Ke ke ui age ki te kau Iselaele: ‘Kapau ʼe fai e he tagata peʼe ko he fafine he fakapapau makehe, ke ina foaki ia ia totonu kia Sehova ke liliu ko he Nasilea,*+
3 ʼe mole tonu anai ke inu ki he vino peʼe ki he tahi age faʼahiga kava. ʼE mole tonu anai ke inu ki he vinika neʼe fai ʼaki te vino peʼe ko he vinika neʼe fai ʼaki he tahi age faʼahiga kava.+ ʼE mole tonu anai ke inu ki he meʼa inu neʼe fai ʼaki ni fuaʼi vite, peʼe kai ki ni fuaʼi vite ʼe foʼou peʼe moamoa.
4 ʼI te temi katoa ʼo tona Nasilea, ʼe mole tonu anai ke kai ki he meʼa pe mai te fuʼu vite, pe ʼe ko ni fuaʼi vite kei mumui peʼe ko tona kili.
5 “ ‘ ʼI te temi katoa ʼae ʼe ina fakapapau ai ke liliu ko he Nasilea, ʼe mole kosi anai tona ʼulu.+ ʼE ina tuku anai ke loloa tona lauʼulu ke ha ai ʼe maʼoniʼoni, ʼo kaku pe anai ki te ʼosi ʼo te temi ʼae neʼe tuku keheʼi ai maʼa Sehova.
6 Pea ʼe mole tonu anai ke fakaovi ki he tahi kua mate ʼi te temi katoa ʼae ʼe tuku keheʼi ai ia ia maʼa Sehova.
7 Tatau aipe pe ʼe ko tana tamai, peʼe ko tana faʼe, peʼe ko hona tehina peʼe ko hona tokolua ʼae kua mate, ʼe mole feala anai ke ina ʼulihi ia ia totonu,+ koteʼuhi ʼe ha ʼi tona ʼulu te fakailoga ʼae ko ia ko te Nasilea ʼa te ʼAtua.
8 “ ‘ ʼI te temi katoa ʼo tona Nasilea, ʼe maʼoniʼoni anai kia Sehova.
9 Kae kapau ʼe mate fakafokifa he tahi ʼi ʼona tafa,+ ʼo ʼulihi ai tona lauʼulu ʼae ko te fakata ʼo tona tuku keheʼi maʼa te ʼAtua, ʼe tonu anai ke tele tona ʼulu+ ʼi te ʼaho ʼo tona fakamaʼa. ʼE tele anai tona ʼulu ʼi te fitu ʼaho.
10 Pea ʼi te valu ʼaho, ʼe ina ʼaumai anai ki te pelepitelo he taluaʼi lupe peʼe ko he taluaʼi kulukulu kei mui, ʼi te huʼaga ʼo te fale la ʼo te fono.
11 ʼE teuteuʼi anai e te pelepitelo te molaga ʼo te agahala ʼaki he manulele ʼe tahi pea mo he holokoseta* ʼaki te tahi age manulele, pea ʼe ina momoli anai ke fakamolemole ai tana agahala,+ ʼo tupu ko he tahi kua mate. Pea ʼe fakamaʼoniʼoniʼi anai e te Nasilea ia ia totonu* ʼi te ʼaho ʼaia.
12 Pea ʼe ina toe tuku keheʼi anai ia ia totonu maʼa Sehova lolotoga tona temi Nasilea, pea ʼe ina ʼaumai anai he ovi tagata kei mui ʼe taʼu tahi, ke momoli ohage ko he sakilifisio fakatokatoka.* Kae ʼe mole lau anai te ʼu ʼaho ki muʼa atu, he neʼe ina ʼulihi ia ia totonu lolotoga tona temi Nasilea.
13 “ ‘Koʼeni te lao ʼo ʼuhiga mo ia ʼae ʼe Nasilea: Ka katoa te temi ʼo tona Nasilea,+ ʼe ʼaumai anai ia ia ki te huʼaga ʼo te fale la ʼo te fono.
14 ʼE ina momoli ai anai kia Sehova tana molaga: ko he ovi tagata kei mui ʼe taʼu tahi mo heʼe mele, ʼe momoli ohage ko he holokoseta,+ mo he akeno fafine ʼe taʼu tahi mo heʼe mele ʼe momoli ohage ko he molaga ʼo te agahala,+ mo he ovi tagata ʼe heʼe mele ʼe momoli ohage ko he sakilifisio ʼo te tokalelei,*+
15 mo he kato pane takafuafua* hala fakatupu neʼe fai ʼaki te falena lelei pea neʼe natu ʼaki he moʼi lolo, mo he ʼu foʼi fakapaku hala fakatupu pea neʼe vali ʼaki te lolo. ʼE momoli anai te ʼu meʼa ʼaia fakatahi mo te molaga meʼa kai+ pea mo te ʼu molaga vino.+
16 ʼE ʼave anai e te pelepitelo te ʼu meʼa ʼaia kia muʼa ʼo Sehova pea ʼe ina momoli anai tana molaga ki te agahala pea mo tana holokoseta.
17 ʼE momoli anai e te pelepitelo te ovi tagata kia Sehova ohage ko he sakilifisio ʼo te tokalelei, ʼo feia mo te kato pane hala fakatupu. Pea ʼe ina toe momoli fakatahi anai mo te molaga meʼa kai+ pea mo te molaga vino.
18 “ ‘ ʼE tele anai e ia ʼae ʼe Nasilea tona ʼulu ʼae neʼe heʼeki kosi+ ʼi te huʼaga ʼo te fale la ʼo te fono. Pea ʼe ina toʼo anai ʼona fuluʼi ʼulu ʼae neʼe tuku ke loloa ʼi tona temi Nasilea ʼo ʼai ki te afi ʼae ʼe momoli ai te sakilifisio ʼo te tokalelei.
19 Pea ʼe toʼo anai e te pelepitelo te alaga muʼa ʼae kua moho+ ʼo te ovi tagata, mo he pane takafuafua* hala fakatupu ʼe tahi ʼi te kato, mo he foʼi fakapaku hala fakatupu. Pea ʼe ina tuku anai te ʼu meʼa ʼaia ki te ʼu nima ʼo te Nasilea, ʼi tana ʼosi tele tona ʼulu ʼae neʼe ha ai te fakailoga ʼo tona ʼuhiga Nasilea.
20 Pea ʼe lu anai e te pelepitelo te ʼu meʼa ʼaia ohage ko he molaga ʼe lu ia muʼa ʼo Sehova.+ ʼE ko he meʼa taputapu ki te pelepitelo, ʼo feia mo te fatafata ʼo te molaga ʼae ʼe lu pea mo te alaga ʼo te vahe taputapu.+ Hili ʼaia, ʼe feala anai ke inu e ia ʼae neʼe Nasilea he moʼi vino.
21 “ ‘Koʼeni te lao ʼo ʼuhiga mo ia ʼae ʼe Nasilea+ pea ʼe ina fai he fakapapau: Kapau ʼe ina fai he fakapapau pea ʼe ina lava foaki kia Sehova he molaga ʼe laka age ʼi te ʼu meʼa ʼae ʼe fakamaʼua ʼi tona temi Nasilea, ʼe tonu anai ke ina fakahoko tana fakapapau ʼo mulimuli ki te lao ʼo tona temi Nasilea.’ ”
22 Pea neʼe ui e Sehova kia Moisese:
23 “Ke ke ui age kia Alone mo ʼona foha: ‘ ʼE kotou tapuakiʼi fenei+ anai te hahaʼi ʼo Iselaele, ʼo kotou ui age kia natou:
24 “ ʼOfa pe ke tapuakiʼi koutou e Sehova,+ pea ke ina puipui koutou.
25 ʼOfa pe ke fakaha atu e Sehova tona agalelei,+ pea ke ʼofa kia koutou.
26 ʼOfa pe ke fakaha atu e Sehova tona ʼofa, pea ke ina foaki atu te tokalelei.” ’+
27 Pea ʼe natou fakaʼaogaʼi anai toku huafa moʼo tapuakiʼi te hahaʼi ʼo Iselaele,+ ke feala ai haku tapuakiʼi natou.”+
Nota
^ Hep. nazir, ko tona fakaʼuhiga “Ia Ia ʼAe Neʼe Tuku Keheʼi,” peʼe “Ia Ia ʼAe Neʼe Foaki.”
^ Vakaʼi Te ʼu Kupu.
^ Hep. “tona ʼulu,” ʼe mahino ia, ʼe ina tuku anai ke toe loloa tona lauʼulu.
^ Peʼe “sakilifisio ki te lakahala.” Vakaʼi te kupu “Sakilifisio fakatokatoka” ʼi Te ʼu Kupu.
^ Vakaʼi Te ʼu Kupu.
^ Neʼe hage ko he ʼu mama.
^ Neʼe hage ko he mama.
