Selemia 13:1-27
13 Koʼeni te folafola ʼa Sehova: “Alu ʼo totogi he kiliʼi pipi lino pea ke haʼi ki tou koga loto, kae ʼaua naʼa ke palapalaʼi.”
2 Koia neʼe au alu ai ʼo totogi mai he kiliʼi pipi, ohage ko tona fakatotonu mai e Sehova pea neʼe au haʼi ki toku koga loto.
3 Pea neʼe toe palalau mai ia Sehova ʼo tuʼa lua, ʼo ina ui mai:
4 “Toʼo te kiliʼi pipi ʼae neʼe ke totogi mo ke haʼi ki tou koga loto, pea ke alu leva ki te vaʼe Efalate, pea ʼi te potu ʼaia ʼe ke fufu anai ʼi he ava ʼo he ʼutu.”
5 Neʼe au alu leva ki te vaʼe Efalate pea neʼe au fufu ai toku kiliʼi pipi ohage pe ko tona fakatotonu mai e Sehova.
6 Hili ʼaia ni ʼaho, neʼe ui mai e Sehova: “Alu ki te vaʼe Efalate, pea ke toʼo te kiliʼi pipi ʼae neʼe au fakatotonu atu ke ke fufu ai.”
7 Neʼe au alu ai ki te vaʼe Efalate, neʼe au keli ʼi te faʼahi ʼae neʼe au fufu ai te kiliʼi pipi pea neʼe au toʼo ake. Neʼe au tokagaʼi kua maumau te kiliʼi pipi, neʼe mole kei ʼi ai hona ʼaoga.
8 Neʼe toe palalau mai ia Sehova ʼo ina ui mai:
9 “Koʼeni te folafola ʼa Sehova: ‘ ʼE feia anai taku pulihi te fiameʼalahi ʼa te hahaʼi ʼo Suta, pea mo te toe fiameʼameʼa ʼa te hahaʼi ʼo Selusalemi.+
10 ʼE mole fia fakalogo te hahaʼi agakovi ʼaia ki ʼaku folafola,+ ʼe natou uigataʼa ʼo mulimuli pe ki ʼonatou holi kovi+ pea ʼe natou fakalogo ki ʼihi ʼatua, ʼe natou tauhi kia natou mo tulolo ʼi ʼonatou muʼa. ʼE natou liliu anai ohage ko te kiliʼi pipi ʼaia ʼe mole kei ʼi ai hona ʼaoga.’
11 ‘Ohage pe ko he kiliʼi pipi ʼe nonoʼo ʼi he koga loto ʼo he tagata, neʼe toe feia pe taku haʼi te puleʼaga katoa ʼo Iselaele pea mo te puleʼaga katoa ʼo Suta ʼi toku koga loto,’ ko te ui ʼaia ʼa Sehova, ‘ke natou liliu ko haku hahaʼi,+ ko he meʼa matalelei ke au logologona ai+ pea mo vikiʼi ai au. Kae neʼe mole natou fia fakalogo.’+
12 “ ʼE tonu anai ke ke fakaha age kia natou te logo ʼaeni: ‘Koʼeni te folafola ʼa Sehova, te ʼAtua ʼo Iselaele: “ ʼE tonu ke fofonu te ʼu ʼaiʼaga vino lalahi fuli ʼi te vino.” ’ Kae ʼe natou tali atu anai: ‘ ʼE matou iloʼi lelei pe ʼe tonu ke fofonu te ʼu ʼaiʼaga vino lalahi fuli ʼi te vino.’
13 ʼE ke tali age anai kia natou: ‘Koʼeni te folafola ʼa Sehova: “ ʼE au fakafonu anai te hahaʼi fuli ʼo te fenua ʼaeni ʼaki te vino,+ te ʼu hau ʼae ʼe natou ʼafio ʼi te hekaʼaga fakahau ʼo Tavite, te kau pelepitelo, te kau polofeta pea mo te hahaʼi fuli ʼo Selusalemi ʼo kaku ki tanatou konahihia.
14 ʼE au faiga anai ke natou felalikiʼaki, te ʼu tamai ʼo feia mo te ʼu foha,” ko te ui ʼaia ʼa Sehova.+ “ ʼE mole au manavaʼofa anai, ʼe mole au lotomamahi anai pea ʼe mole au ʼofa tuʼa tahi anai kia natou. ʼE mole ʼi ai anai he meʼa ka ina taʼofi taku pulihi ia natou.” ’+
15 Kotou fagono mo tokaga mai.
ʼAua naʼa kotou fiameʼalahi, he neʼe palalau ia Sehova.
16 Kotou fakakololia kia Sehova tokotou ʼAtuaʼI muʼa ʼo tana fakato te poʼuliPea mo tukia ai ʼokotou vaʼe ʼi te fakapoʼuli ʼi te ʼu moʼuga.
ʼE kotou fakaʼamu anai ki te malama,Kae ʼe fakapoʼuli anai ia,ʼE ina fetogi anai te malama ko he fakapoʼuli gaogao.+
17 Pea kapau ʼe mole kotou fia fakalogo,ʼE au tagi fakafufu anai ʼuhi ko takotou fiameʼalahi.
ʼE lahi anai te hali ʼo ʼoku loʼimata, ʼei, ʼe tafe lahi anai,+Koteʼuhi neʼe ʼave popula te faga ovi ʼa Sehova.+
18 Fakaha age ki te hau mo tana faʼe:+ ‘Kolua nonofo ki te kele,He ʼe to anai mai ʼokolua ʼulu tokolua kolona matalelei.’
19 Kua pupunu* te ʼu kolo ʼo te potu saute, pea ʼe mole ʼi ai he tahi ke ina avahi.
Kua ʼave popula ia Suta katoa pea kua fakapopulaʼi ia natou fuli.+
20 Hiki ake ʼou mata pea ke sio kia natou ʼae ʼe ʼomai mai te potu noleto.+
ʼE ʼifea te faga ovi ʼae neʼe foaki atu, ʼau ovi matalelei?+
21 Kotea ʼae ka ke ui moka fakatuʼā anai koeE natou ʼae neʼe ke ui ko hou ʼu kaumeʼa lelei?+
ʼE mole ke mamahi anai koa ohage ko he fafine ʼe fanau?+
22 ʼE ke ui anai: ‘He koʼe neʼe hoko kia au te ʼu meʼa ʼaia?’+
Neʼe hoko ʼuhi ko te mamafa ʼo tau agahala. Ko te tupuʼaga la ʼaia ʼo te haeʼi ʼo tou lalo kofu+
Pea mo te lahi ʼo te mamahi ʼo ʼou mulivaʼe.
23 ʼE feala koa ki he tagata Kusi* ke ina fetogi tona kili peʼe ki he leopa ʼona pulepule?+
Kapau koia, pea ʼe feala mo koutou ke kotou fai te meʼa ʼae ʼe lelei,Ia koutou ʼaena kua mahani ʼi te fai ʼo te meʼa ʼae ʼe kovi.
24 Koia ʼe au fakamavetevete anai koutou ohage ko te fueʼi e te matagi ʼo te toafa te luna moamoa.+
25 Koʼena te meʼa ʼae ka hoko anai kia koe. Koʼena te vahe ʼae neʼe au fakafuafua maʼa koe,” ko te ui ʼaia ʼa Sehova,“Koteʼuhi neʼe ke galoʼi au,+ pea ʼe ke tui ki ni loi.+
26 Koia ʼe au hueʼi anai tou kofu ke aʼu ki tou fofoga,Pea ʼe ha ai anai tou ufiufi,+
27 ʼAu faitono,+ ʼou holi kovi,Pea mo tau faiaga fakaufiufi.
Neʼe au sio ki tau aga fakalialia+ʼI te ʼu kiʼi moʼuga, ʼi te vao matuʼa.
Malaʼia kia koe Selusalemi!
ʼE ke heʼe maʼa anai koa ʼo kaku ki ʼafea?”+
