Selemia 8:1-22
8 ʼE ui e Sehova: “ ʼI te temi ʼaia, ʼe toʼo mai anai ki tuʼa te ʼu hui ʼo te ʼu hau ʼo Suta mai ʼonatou fale maka, mo te ʼu hui ʼo ʼona tama ʼaliki, mo te ʼu hui ʼo te kau pelepitelo, mo te ʼu hui ʼo te kau polofeta pea mo te ʼu hui ʼo te hahaʼi ʼo Selusalemi.
2 Pea ʼe fola anai ʼi muʼa ʼo te laʼa, ʼi muʼa ʼo te mahina pea ʼi muʼa ʼo te foʼi kautau katoa ʼo te ʼatu lagi,* ʼae neʼe leleiʼia mo tauhi ki ai te hahaʼi, ʼae neʼe natou mulimuli ki ai mo kumi, ʼae neʼe natou tulolo ki ai.+ ʼE mole tanaki anai mo tanu te ʼu hui ʼaia. ʼE liliu anai ko he meʼa fakagako kele.”+
3 Koʼeni te folafola ʼa Sehova ʼo te ʼatu kautau: “ ʼI te ʼu koga meʼa fuli ʼae ʼe au fakamavetevete ai te toe ʼo te famili agakovi ʼaeni, ʼe natou leleiʼia age anai te mate ʼi te maʼuli.”
4 “ ʼE tonu anai ke ke tala age kia natou: ‘Koʼeni te folafola ʼa Sehova:
“ ʼE mole toe tutuʼu ake anai koa ia natou ʼae ka fetoki?
Kapau ʼe toe fia liliu mai he tahi, ʼe mole toe liliu mai anai koa mo ia ʼae?
5 He koʼe ʼe hoko atu pe te heʼe agatonu ʼa te hahaʼi ʼaeni, te hahaʼi ʼo Selusalemi?
ʼE natou uigataʼa mo agakaka,ʼE mole natou fia liliu mai.+
6 Neʼe au tokagaʼi mo logo, kae ʼe mole moʼoni ʼanatou palalau.
Neʼe mole fakahemala pe la he tagata ʼi tana agakovi peʼe ina ui: ‘Kotea ʼae neʼe au fai?’+
ʼE natou tahi fai pe ohage ko natou fuli ʼae, ohage ko te ʼoho ʼa he hosi ki te tau.
7 ʼE iloʼi e te motuku te temi ʼae ʼe tonu ke alu ai.Pea ʼe toe liliu mai pe te lupe mo te kiʼi misi ʼi tonā temi totonu.
Kae ko taku ia hahaʼi ʼe mole mahino pe la ki te fakatuʼā ʼae neʼe tala e Sehova.” ’+
8 ‘ ʼE lava feafeaʼi hakotou ui: “ ʼE matou maʼu te poto mo te lao* ʼa Sehova”?
Neʼe fakaʼaogaʼi pe te peni* kaka+ ʼa te kau sikalaipe moʼo tohi ni loi.
9 Neʼe ufiufi te kau poto.+
Neʼe natou tekelili pea ʼe puke anai natou.
Koʼeni, neʼe natou liʼaki te folafola ʼa Sehova,Pea kotea te poto ʼae ʼe natou maʼu?
10 ʼE au foaki anai ʼonatou ʼohoana ki ʼihi tagataPea mo ʼanatou gaueʼaga ki ʼihi pule.+ʼE maʼu fakakaka e ia ʼae ʼe malalo mo ia ʼae ʼe maʼuhiga ʼonā koloa.+ʼE agakaka te polofeta mo te pelepitelo.+
11 Pea ʼe mole natou faiga fakamalotoloto ke fakamalolo te mahaki* ʼo te taʼahine ʼo taku hahaʼi ʼo natou ui:“ ʼE ʼi ai te tokalelei! ʼE ʼi ai te tokalelei!”
Kae ʼe mole maʼu te tokalelei.+
12 ʼE natou ufiufi koa ʼi te ʼu meʼa fakalialia ʼae neʼe natou fai?
Kailoa ia, ʼe mole natou ufiufi!
ʼE mole natou iloʼi pe la pe ʼe kotea te ufiufi!+
Koia ʼae ʼe natou fetoki anai ohage pe ko natou ʼae kua ʼosi fetoki.
Ka au fakatuʼā natou, ʼe natou tukia anai,’+ ko te ui ʼaia ʼa Sehova.
13 ʼE ui e Sehova: ‘ ʼE au matehi anai natou moka au fakatahiʼi.
ʼE mole toe maʼu anai he foʼi vite ʼi te fuʼu vite, peʼe ko he foʼi fiku ʼi te fuʼu fiku, ʼe fefe anai te ʼu lau.
Pea ʼe puli anai te ʼu meʼa ʼae neʼe au foaki age.’ ”
14 “He koʼe ʼe tou heheka ʼi heni?
Tou fakatahitahi pea tou ulu ki te ʼu kolo tau+ ke tou mamate ai,
He ʼe pulihi anai tatou e Sehova totatou ʼAtua.Pea ʼe ina fakainu tatou ʼaki he vai kona,+He neʼe tou agahala kia Sehova.
15 Neʼe fakaʼamu ki te tokalelei, kae neʼe mole hoko mai he meʼa ʼe lelei.Neʼe fakaʼamu ki he temi ʼo te fakamalolo, kae ko te mataku pe ia!+
16 ʼE logo te manava ʼa te ʼu hosi ʼo te fili mai Tane.
ʼE tekelili te fenua katoaʼI te logoaʼa ʼo te tagi ʼo ʼana hosi.
ʼE haʼu pea ʼe ina kai te fenua mo meʼa fuli ʼae ʼe maʼu ai,Te kolo pea mo ʼona hahaʼi.”
17 “ ʼE au ʼaumai anai ni gata kia koutou,Ni gata kafokona ʼe mole feala ke fakalalata,Pea ʼe natou ʼuʼusi moʼoni anai koutou,” ko te ui ʼaia ʼa Sehova.
18 ʼE mole he faitoʼo ki toku mamahi,ʼE mahaki toku mafu.
19 ʼE logo he kole tokoni mai he fenua mamaʼo.ʼE ko te tagi ʼa te taʼahine ʼo taku hahaʼi:
“ ʼE mole nofo koa la ia Sehova ʼi Sione?
Pe ʼe mole nofo koa la te hau ʼo Sione ʼi ai?”
“He koʼe neʼe natou fakamamahiʼi au ʼaki ʼanatou fakatata ʼae neʼe togi,ʼAki ʼonatou ʼatua matapule ʼae ʼe mole honatou ʼuhiga?”
20 “Kua fakalaka te taʼukai, kua ʼosi te temi mafana,Kae neʼe mole haofaki tatou!”
21 Kua au lotovaivai he ʼe mahaki te taʼahine ʼo taku hahaʼi.+Kua au lotomamahi.
Kua au mataku.
22 ʼE mole ʼi ai koa he lolo magoni ʼi Kileate?+
Peʼe mole ʼi ai koa he tahi ʼi ai ke ina faitoʼo?*+
He koʼe ʼe mole fakamalolo te taʼahine ʼo taku hahaʼi?+
Nota
^ ʼE fakaʼuhiga ki te ʼu fetuʼu.
^ Peʼe “faiakonaki.”
^ ʼE lagi ko he kauʼi kaho ʼe fakamasila.
^ Peʼe “faitoʼo te lavea.”
^ Peʼe “he toketa.”
