Senesi 31:1-55
31 Ki muli age, neʼe logo ia Sakopo ki te ui e te ʼu foha ʼo Lapane: “Neʼe toʼo e Sakopo te ʼu meʼa fuli ʼo tatatou tamai, pea neʼe ina maʼu ʼona koloa fuli ʼaia ʼuhi ko te ʼu meʼa ʼo tatatou tamai.”+
2 ʼI te sio ʼa Sakopo ki te fofoga ʼo Lapane, neʼe ina tokagaʼi leva neʼe mole kei tatau tana aga kia ia ohage ko te temi muʼa.+
3 Ki muli age, neʼe ui e Sehova kia Sakopo: “Toe liliu ki te fenua ʼo ʼau kui mo tou famili,+ pea ʼe au nofo tuʼumaʼu pe anai mo koe.”
4 Neʼe fekauʼi leva e Sakopo he tahi ke alu ʼo kumi mai ia Lasele pea mo Lea ke ʼomai ki te koga meʼa lunaʼia, ʼae neʼe nofo ai mo tana faga manu.
5 Pea neʼe ina ui age kia naua:
“ ʼE au sio kua fetogi te aga ʼa takolua tamai kia au,+ kae ʼe nofo pe te ʼAtua ʼo taku tamai mo au.+
6 ʼE kolua iloʼi lelei pe neʼe au gaue ki takolua tamai ʼaki toku malohi katoa.+
7 Neʼe kakaʼi au e takolua tamai pea neʼe ina fetogi tuʼa hogofulu toku totogi. Kae neʼe mole fakagafua e te ʼAtua ke ina fai mai he meʼa ʼe kovi.
8 Kapau neʼe ina ui: ‘Ko te ʼu manu pulepule ʼe ko tou totogi anai ʼaia,’ pea neʼe fanauʼi e te faga manu katoa he ʼu ʼuhi pulepule. Kae kapau neʼe ina ui: ‘Ko te ʼu manu matohitohi ʼe ko tou totogi anai ʼaia,’ pea neʼe fanauʼi e te faga manu katoa he ʼu ʼuhi matohitohi.+
9 Koia neʼe toʼo ai e te ʼAtua te faga manu ʼo takolua tamai ʼo foaki mai kia au.
10 ʼI te tahi ʼaho, ʼi te feholiʼaki ʼa te ʼu manu, neʼe au hiki ake ʼoku mata pea neʼe au sio ʼi he meʼa neʼe ha, neʼe matohitohi mo pulepule te ʼu tao tagata ʼae neʼe olo ʼo tauʼi te ʼu tao fafine.+
11 Pea neʼe ui mai e te ʼaselo ʼa te ʼAtua moʼoni ʼi te meʼa ʼae neʼe ha: ‘Sakopo!’ pea neʼe au tali age: ‘Koʼeni au.’
12 Neʼe ina hoko atu: ‘Fakalelei siʼou loto, ke ke hiki ake ʼou mata pea ke sio, ʼe matohitohi mo pulepule te ʼu tao tagata fuli ʼae ʼe olo ʼo tauʼi te ʼu tao fafine, koteʼuhi neʼe au sio ki te ʼu meʼa fuli ʼae ʼe fai e Lapane kia koe.+
13 Ko au te ʼAtua moʼoni ʼo Petele,+ te koga meʼa ʼae neʼe ke huaʼi ai he lolo ʼi ʼoluga ʼo he pou, pea neʼe ke fai ai he fakapapau kia au.+ ʼI te temi nei, ke ke mavae ʼi te fenua ʼaeni, pea ke ke toe liliu ki te fenua ʼae neʼe ke tupu ai.’ ”+
14 Pea neʼe tali age e Lasele mo Lea ki ai: “ ʼE kei ʼi ai koa homa tofiʼa ʼi te loto fale ʼo tamā tamai?
15 ʼE mole ma hage koa la kia ia ko ni matapule, he neʼe ina fakatau maua pea ʼe ina fakaʼaogaʼi te falā ʼae neʼe totogi ʼaki maua?+
16 Ko te ʼu koloa fuli ʼae neʼe toʼo e te ʼAtua mai tamā tamai ʼe ʼa maua pea mo ʼama fanau.+ Koia, ke ke fai te ʼu meʼa fuli ʼae neʼe ui atu e te ʼAtua.”+
17 Neʼe fakaheka leva e Sakopo ʼana fanau pea mo ʼona ʼohoana ki te ʼu kamelo.+
18 Neʼe ina toʼo tana faga manu katoa mo te ʼu koloa fuli ʼae neʼe ina maʼu.+ Neʼe ina toʼo ia tana faga manu ʼae neʼe ina maʼu ʼi Patane-alame, pea neʼe alu leva ki tana tamai ko Isaake, ʼi te fenua ʼo Kanaane.+
19 Neʼe kua alu ia Lapane ʼo tele tana faga ovi. Kae neʼe kaihaʼa e Lasele te ʼu fakatata*+ ʼo tana tamai.+
20 Neʼe kakaʼi e Sakopo ia Lapane, te tagata Alamea he neʼe mole ina fakaha age tana alu.
21 Neʼe hola ai ʼo fakalaka ʼi te Vai Tafe,*+ ia ia mo tona famili pea mo ʼona koloa fuli. Pea neʼe alu leva ki te potu moʼugaʼia ʼo Kileate.+
22 ʼI te tolu ʼaho, neʼe fakaha age kia Lapane kua hola ia Sakopo.
23 Neʼe alu ai mo ʼona tehina* ʼo tuli ia ia lolotoga ʼaho ʼe fitu, pea neʼe natou maʼu atu ia ia ʼi te potu moʼugaʼia ʼo Kileate.
24 Kae neʼe ha age leva te ʼAtua kia Lapane, te tagata Alamea,+ ʼi te poʼuli ʼi he moemisi.+ Neʼe ina ui age ki ai: “Tokaga ki te ʼu meʼa ʼae ka ke ui kia Sakopo, pe ʼe lelei peʼe kovi.”+
25 Neʼe fakatuʼu e Sakopo tona fale la ʼi te moʼuga, pea neʼe fakatuʼu e Lapane mo ʼona tehina tonatou nofoʼaga ʼi te potu moʼugaʼia ʼo Kileate. Pea neʼe alu ai leva ia Lapane kia Sakopo.
26 Neʼe ui e Lapane kia Sakopo: “He koʼe neʼe ke fai te meʼa ʼaia? He koʼe neʼe ke kakaʼi au ʼo ke ʼave ʼoku ʼofafine ohage ko ni fafine neʼe ʼave popula ʼi he tau?
27 He koʼe neʼe ke kakaʼi au pea neʼe ke hola fakafufu kae mole ke fakaha mai? Ka na neʼe ke fakaha mai la, neʼe feala pe ke matou fakafiafia mo hiva, mo ta te nafa mo te alepa pea hoki matou tuku leva koe ke ke alu.
28 Kae neʼe mole ke tuku mai he faigamalie ke au tauʼine mo ʼoku mokopuna* pea mo ʼoku ʼofafine. Neʼe mole ko he meʼa fakapotopoto ʼaena neʼe ke fai.
29 ʼE feala pe* ke au fai he meʼa ʼe kovi kia koutou. Kae neʼe palalau mai ia te ʼAtua ʼo takotou tamai ʼanapo, ʼo ina ui mai: ‘Tokaga ki te ʼu meʼa ʼae ka ke ui kia Sakopo, pe ʼe lelei peʼe kovi.’+
30 Koia, neʼe ke mavae he neʼe ke toe fia liliu ki tau tamai, kae he koʼe neʼe ke kaihaʼa ʼaku fakatata?”+
31 Neʼe tali e Sakopo kia Lapane: “Neʼe au alu fakafufu he neʼe au mataku. Pea neʼe au manatu ʼe feala pe ke ke toʼo fakamalohi ʼou ʼofafine.
32 Koia, kapau ʼe ke maʼu he tahi ʼe nofo mo ʼau fakatata, ʼe mate anai. Ia muʼa ʼo ʼotā tehina, alu ʼo vakaʼi te ʼu meʼa ʼae ʼe au maʼu, pea ke toʼo te meʼa ʼae ʼa koe.” Kae neʼe mole iloʼi e Sakopo neʼe kaihaʼa e Lasele te ʼu fakatata ʼaia.
33 Koia, neʼe hu ai ia Lapane ki te fale la ʼo Sakopo, mo te fale la ʼo Lea, pea mo te fale la ʼo te ʼu fafine kaugana ʼe lua,+ kae neʼe mole ina maʼu he meʼa. Neʼe mavae leva mai te fale la ʼo Lea ʼo hu ki te fale la ʼo Lasele.
34 Kae neʼe toʼo e Lasele te ʼu fakatata. Pea neʼe ina fufu ʼi te lalo hekaʼaga ʼae neʼe ʼi tana kamelo, ʼo ina hekaʼi ai. Neʼe hue e Lapane te fale la katoa, kae neʼe mole ina maʼu he meʼa.
35 Pea neʼe ui e Lasele ki tana tamai: “Siʼoku ʼaliki, ʼaua naʼa ke ita. ʼE mole feala haku tuʼu ki ʼoluga ʼi ʼou muʼa he ʼe au mahaki fakafafine.”+ Neʼe ina haga kumi fakalelei kae neʼe mole ina maʼu te ʼu fakatata.+
36 Pea neʼe ita leva ia Sakopo ʼo ina tukugakoviʼi ia Lapane. Neʼe ui e Sakopo kia Lapane: “Kotea te hala ʼae neʼe au fai? Pea kotea te agahala ʼae neʼe au fai ke ke tuli fakakinau ai au?
37 Kua ke hue ʼaku meʼa fuli, pea neʼe ke maʼu koa la he meʼa ʼe haʼu mai tou loto fale? Ke ke ʼaumai te meʼa ʼaia ki heni, ia muʼa ʼo ʼoku tehina pea mo ʼou tehina, pea ke natou fakamauʼi ia taua.
38 Lolotoga te ʼu taʼu ʼe 20 ʼae neʼe au nofo ai mo koe, neʼe heʼeki to he ʼu ʼuhi ʼo ʼau ovi mo ʼau tao,+ pea neʼe mole au kai te kanoʼi manu ʼo te ʼu ovi tagata ʼo tau faga manu.
39 Neʼe heʼeki au ʼaumai kia koe he manu neʼe matehi e he ʼu manu fekai.+ Neʼe au totogi e au totonu te manu ʼae neʼe puli. Pea kapau neʼe kaihaʼa he manu ʼi te ʼaho peʼe ko te poʼuli, neʼe ke tukugakoviʼi au.
40 Neʼe au tali mamahi ʼi te vevela ʼo te laʼa ʼi te ʼaho pea mo te momoko ʼi te poʼuli, pea neʼe mole au mamoe.+
41 Neʼe au nofo ʼi tou loto fale lolotoga taʼu ʼe 20. Neʼe au gaue kia koe lolotoga taʼu ʼe 14 ke au maʼu ʼou ʼofafine ʼe lua, pea neʼe au tauhi tau faga manu lolotoga taʼu ʼe 6. Pea neʼe ke fetogi tuʼa hogofulu toku totogi.+
42 Ka na pau la neʼe mole nofo te ʼAtua ʼo taku tamai+ mo au, ia te ʼAtua ʼo Apalahamo pea mo te ʼAtua ʼae ʼe manavasiʼi ki ai ia Isaake,+ neʼe ke tuku au ke au alu ʼatea. Kae neʼe sio te ʼAtua ki toku mamahi pea mo taku gaue kinakina, ko te tupuʼaga la ʼaia ʼo tana fakatonutonuʼi koe ʼanapo.”+
43 Neʼe tali age e Lapane kia Sakopo: “Ko te ʼu fafine ʼaeni ʼe ko ʼoku ʼofafine, pea ko te ʼu fanau ʼaeni ʼe ko ʼoku mokopuna, pea ko te faga ovi ʼaeni ʼe ko taku faga ovi, pea ko meʼa fuli ʼae ʼe ke sio ki ai ʼe ʼaʼaku pea mo ʼoku ʼofafine. ʼE lava feafeaʼi haku fai he meʼa ʼe kovi kia naua peʼe ki ʼanā fanau?
44 Haʼu pea ke ta fai he fuakava, ke liliu ko he fakamoʼoni maʼa taua.”
45 Koia, neʼe toʼo ai e Sakopo he foʼi maka ʼo ina fakatuʼu ohage ko he pou.+
46 Pea neʼe ui e Sakopo ki ʼona tehina: “Kotou tae he ʼu maka!” Neʼe natou tae ai he ʼu maka ʼo natou tanaki fakatuʼuga. Hili ʼaia, neʼe natou kakai ai leva ʼi te tuʼuga maka ʼaia.
47 Neʼe fakahigoaʼi e Lapane ko Sekale-saatuta* kae neʼe fakahigoaʼi e Sakopo ko Kaleti.*
48 Neʼe ui leva e Lapane: “Ko te tuʼuga maka ʼaeni ʼe ko he fakamoʼoni maʼa taua ʼi te ʼaho nei.” Koia ʼae neʼe fakahigoaʼi ai ko Kaleti.+
49 Neʼe toe fakahigoaʼi foki ko te Tule Leʼo, he neʼe ui e Lapane: “Ke leʼo e Sehova ia koe pea mo au moka ʼe mole ta toe fesioʼaki anai.
50 Kapau ʼe ke gaohi koviʼi ʼoku ʼofafine pea mo ke ʼohoana mo he tahi age ʼu fafine, ke ke manatuʼi, tatau aipe pe ʼe mole sio he tagata ki ai kae ʼe sio mai anai te ʼAtua, ʼae ʼe ko he fakamoʼoni maʼa taua.”
51 Pea neʼe toe ui e Lapane kia Sakopo: “Koʼeni te tuʼuga maka, pea koʼeni te pou ʼae neʼe au fakatuʼu ʼi te vaha ʼo koe pea mo au.
52 ʼE fakamoʼoni anai e te tuʼuga maka ʼaeni pea mo te pou ʼaeni ki te faʼahi ʼaeni:+ ʼE mole au fakalaka anai ʼi ai ke au alu atu ʼo fai he meʼa ʼe kovi kia koe, pea ʼe mole ke fakalaka anai ʼi ai ke ke haʼu ʼo fai mai he meʼa ʼe kovi.
53 Ke fakamauʼi taua e te ʼAtua ʼo Apalahamo,+ ia te ʼAtua ʼo Naole, te ʼAtua ʼo tanā tamai.” Pea neʼe fai leva e Sakopo he fakapapau ʼi te huafa ʼo te ʼAtua, ʼae ʼe manavasiʼi ki ai tana tamai ko Isaake.+
54 Hili ʼaia, neʼe momoli leva e Sakopo he sakilifisio ʼi te moʼuga pea neʼe ina fakaafe ʼona tehina ke natou kai he moʼi pane. Neʼe natou kakai ai pea neʼe natou momoe leva ʼi te po ʼaia ʼi te moʼuga.
55 Kae neʼe tuʼu ake ia Lapane ʼi te kei hegihegi, ʼo ʼuma ki ʼona mokopuna*+ mo ʼona ʼofafine pea neʼe ina tapuakiʼi ia natou.+ Pea neʼe toe liliu leva ia Lapane ki tona ʼapi.+
Nota
^ Hep. “telafimi.” ʼE fakaʼuhiga ki te ʼu taula ʼatua ʼo te ʼu loto fale.
^ ʼE fakaʼuhiga ki te Efalate.
^ Peʼe “kaiga.”
^ Hep. “foha.”
^ Hep. “ ʼE malohi feʼauga toku nima.”
^ Ko he kupu Fakaalamea ʼe fakaʼuhiga ki he tuʼuga maka ʼe fakaʼaogaʼi ohage ko he fakamoʼoni.
^ Ko he kupu Fakahepeleo ʼe fakaʼuhiga ki he tuʼuga maka ʼe fakaʼaogaʼi ohage ko he fakamoʼoni.
^ Hep. “foha.”
