Senesi 44:1-34
44 Ki muli age, neʼe ina fakatotonu ki te tagata ʼae neʼe tokaga ki tona loto fale: “Fafaʼo te meʼa kai ki te ʼu taga ʼa te ʼu tagata ʼaia pea ke fakafonu, pea ke ʼai te falā ʼa te tagata takitahi ki tana taga.+
2 Kae ʼe tonu ke ke ʼai toku ipu, te ipu siliva, ki te taga ʼo ia ʼae ʼe muli, ʼo feia mo tana falā ʼae neʼe ina totogi ʼaki tana meʼa kai.”* Neʼe ina fai ʼo mulimuli pe ki te ʼu meʼa ʼae neʼe fakatotonu age e Sosefo.
3 ʼI te mafoata, neʼe tuku leva te ʼu tagata ke olo mo ʼanatou asino.
4 Neʼe heʼeki natou mamaʼo mai te kolo pea neʼe ui e Sosefo ki te tagata ʼae neʼe tokaga ki tona loto fale: “Alu ʼo tuli te ʼu tagata ʼaia! Ka ke maʼu ia natou, pea ke ui age: ‘He koʼe ʼe kotou tauʼi ia te lelei ʼaki te kovi?
5 He koʼe neʼe kotou toʼo te ipu ʼae ʼe inu ai toku pule pea ʼe ina fakaʼaogaʼi moʼo kumi he ’u fakailoga? ʼE kovi te meʼa ʼae neʼe kotou fai.’ ”
6 ʼI tana maʼu atu ia natou, neʼe ina fai age te ʼu palalau ʼaia.
7 Kae neʼe natou tali age ki ai: “Siʼomatou ʼaliki, he koʼe ʼe ke palalau feia? ʼE mole feala ia ke matou fai he meʼa feia.
8 Neʼe matou toe liliu mai mai te fenua ʼo Kanaane ʼo ʼaumai te falā ʼae neʼe matou maʼu ʼi ʼamatou taga.+ Koia, ʼe lava feafeaʼi hamatou kaihaʼa te siliva peʼe ko te aulo ʼi te loto fale ʼo tou pule?
9 Kapau ʼe maʼu te ipu ʼi te taga ʼo he tahi ia matou, ʼe tonu anai ke matehi pea ʼe liliu anai ia natou ʼae ko he ʼu kaugana ʼo tou* pule.”
10 Neʼe ina tali age: “Ke fai pe ki te meʼa ʼae kua kotou ui: Ko ʼae ʼe maʼu ai anai te ipu, ʼe liliu anai ko taku kaugana, kae ʼe ʼateaina ia natou ʼae mai ai.”
11 Neʼe natou tahi tuku fakavilivili ifo ai tana taga ki lalo pea neʼe natou avahi.
12 Neʼe ina kumi fakalelei, ʼo kamata mai ia ia ʼae ʼe lahi ʼo fakaʼosi ki ʼae ʼe veliveli. Pea neʼe maʼu leva te ipu ʼi te taga ʼa Pesamino.+
13 Neʼe natou hae leva ʼonatou kofu. Neʼe natou tahi hili tana taga ki tana asino pea neʼe natou toe liliu leva ki te kolo.
14 ʼI te hu atu ʼa Suta+ mo ʼona tehina ki te ʼapi ʼo Sosefo, neʼe kei nofo ai pe ia Sosefo. Pea neʼe natou tulolo ki te kele ʼi ʼona muʼa.+
15 Neʼe ui e Sosefo kia natou: “He koʼe neʼe kotou fai te meʼa ʼaia? ʼE mole kotou iloʼi koa la ʼe feala ki he tagata ohage ko au ke ina iloʼi te ʼu meʼa ʼae ka hoko?”+
16 Neʼe tali age e Suta: “Siʼoku pule, kotea he meʼa ke matou ui atu? Pea ʼe matou fakamoʼoni feafeaʼi anai neʼe mole matou fai he meʼa ʼe kovi? Neʼe fakaha e te ʼAtua moʼoni tamatou hala.+ ʼI te lakaga ʼaeni, kua matou liliu leva ko ʼau kaugana ʼo feia mo ia ʼae neʼe maʼu ai te ipu!”
17 Kae neʼe ina ui: “ ʼE mole feala ke au fai he meʼa feia! Ko te tagata ʼae neʼe maʼu ai te ipu, ʼe ko ia anai ka liliu ko haku kaugana.+ Kae ko koutou, kotou olo ʼi te fimalie ki takotou tamai.”
18 Pea neʼe fakaovi age ia Suta ki ai ʼo ui: “Siʼoku pule, fakalelei siʼou loto, ʼe au kole mamahi atu ke ke fakalogo mai. Pea ʼaua naʼa ke ita kia au ʼaeni ko tau tagata kaugana, he ʼe ke hage pe ko Falaone.+
19 Siʼoku pule, neʼe ke fehuʼi mai: ‘ ʼE kei maʼuli koa takotou tamai? ʼE ʼi ai koa hokotou tahi tehina?’
20 Pea neʼe matou tali atu: ‘ ʼEi, ʼe kei maʼuli tamatou tamai kae kua matuʼa pea ʼe ʼi ai tomatou tahi tehina, ko te foha ʼaia neʼe maʼu e tamatou tamai ʼi tana kua matuʼa, pea ko ia te muli.+ Neʼe ʼi ai tona tehina, kae kua mate.+ Pea ʼe ko ia tokotahi pe ʼe kei toe ʼi te ʼu fanau ʼa tana faʼe,+ pea ʼe ʼofa mamahi tana tamai ia ia.’
21 Pea neʼe ke ui mai: ‘Kotou ʼaumai ia ia ke au sio ki ai.’+
22 Kae neʼe matou ui atu: ‘ ʼE mole feala ke mavae te tama mai tana tamai. Kapau ʼe mavae mai ia ia, ʼe mate moʼoni anai tana tamai.’+
23 Pea neʼe ke ui mai: ‘Kapau ʼe mole kotou ʼomai mo tokotou tehina muli, ʼe mole feala anai hakotou toe tutuʼu ʼi ʼoku muʼa.’+
24 “Neʼe matou olo ai ki tamatou tamai ʼo fakaha age ki ai ʼau palalau.
25 Ki muli age, neʼe ui mai e tamatou tamai: ‘Kotou toe liliu ʼo totogi mai hatatou meʼa kai.’+
26 Kae neʼe matou ui ki ai: ‘ ʼE mole feala hamatou olo. Kapau ʼe haʼu tomatou tehina muli mo matou, ʼe matou olo anai, he ʼe mole feala ke matou toe tutuʼu ia muʼa ʼo te tagata ʼaia mo kapau ʼe mole matou olo age mo tomatou tehina muli.’+
27 Pea neʼe ui mai e tamatou tamai: ‘ ʼE kotou iloʼi lelei pe neʼe fanauʼi e toku ʼohoana te ʼu tama pe ʼe lua.+
28 Kae kua puli te tahi pea neʼe au ui: “ ʼE mahino ia neʼe hae liki ia ia e he manu fekai!”+ Pea neʼe heʼeki au toe sio ki ai ʼo kaku mai ki te ʼaho nei.
29 Kapau ʼe kotou ʼave ia ia ʼaeni ke mamaʼo ia au, pea kapau ʼe hoko he tuʼutamaki kia ia ʼo mate ai, ʼe kotou fakahifo anai au ki te Faitoka*+ ʼuhi ko toku lotomamahi.’+
30 “ ʼE ʼofa mamahi tamatou tamai ʼi tona foha ohage pe ko tona ʼofa ki tona maʼuli.* Koia, kapau ʼe mole au toe liliu mo te tama ki tamatou tamai,
31 pea ka sio ʼe puli te tama, ʼe mate anai. ʼE matou fakahifo anai tamatou tamai ki te Faitoka* ʼuhi ko tona lotomamahi.
32 Neʼe au fakapapau ki taku tamai ʼe au tokaga anai ki te tama, ʼo au ui age ki ai: ‘Kapau ʼe mole au toe liliu mai anai mo ia, ʼe au agahala anai kia koe ʼo talu ai.’+
33 Koia, siʼoku pule, fakalelei siʼou loto, tuku ke au kaugana kia koe, kae mole ko te tama, ke feala hana toe liliu mo ʼona tehina.
34 ʼE lava feafeaʼi haku toe liliu ki taku tamai kae mole haʼu te tama mo au? ʼE mole au fia sio ki te lotomamahi ʼo taku tamai!”
Nota
^ Neʼe lagi ko te fulumeto peʼe ko te olose.
^ Hep. “toku.”
^ Vakaʼi Te ʼu Kupu.
^ Hep. nèphèsh. Vakaʼi Te ʼu Kupu.
^ Vakaʼi Te ʼu Kupu.
