Sosue 22:1-34
22 Pea neʼe pauʼi e Sosue te kau Lupeni, mo te kau Kate pea mo te vaelua ʼo te telepi ʼo Manase,
2 ʼo ina ui age kia natou: “Neʼe kotou fai ia meʼa fuli neʼe fakatotonu atu e Moisese, te tagata faifekau ʼa Sehova+ pea neʼe kotou fakalogo ki toku leʼo, ʼo kotou fai ia meʼa fuli neʼe au fakatotonu atu.+
3 Neʼe mole kotou liʼaki ʼokotou tehina ʼi te temi ʼaia ʼo kaku mai ki te ʼaho nei,+ pea neʼe kotou fakalogo ki te fakatotonu ʼa Sehova, tokotou ʼAtua.+
4 Kua foaki e Sehova tokotou ʼAtua ia te tokalelei ki ʼokotou tehina, ohage pe ko tana fakapapau age kia natou.+ Koia, kua feala leva hakotou toe liliu kio koutou, ʼi te potu fenua ʼae neʼe foaki atu e Moisese, te tagata faifekau ʼa Sehova ʼi te tahi faʼahi* ʼo te Solotane.+
5 Kae kotou tokakaga ʼo mulimuli fakalelei ki te fakatotonu mo te Lao ʼae neʼe foaki atu e Moisese, te tagata faifekau ʼa Sehova.+ Koia ʼe tonu ai ke kotou ʼoʼofa kia Sehova, tokotou ʼAtua,+ mo haʼele ʼi ʼona ala fuli,+ mo fakalogo ki ʼana fakatotonu,+ mo pipiki kia te ia,+ pea mo tauhi kia te ia+ ʼaki tokotou loto katoa mo tokotou maʼuli* katoa.”+
6 Neʼe tapuakiʼi leva natou e Sosue ʼo ina fekauʼi ke natou toe liliu kio natou, pea neʼe natou olo ai.
7 Neʼe kua foaki e Moisese ki te vaelua ʼo te telepi ʼo Manase tonatou tofiʼa ʼi te potu fenua ʼo Pasani.+ Pea neʼe foaki e Sosue ki te tahi vaelua ʼo te telepi ʼo Manase he ʼu kele ʼi te potu uesite ʼo te Solotane,+ ʼi te lotolotoiga ʼo ʼonatou tehina. Pea ʼi te fekauʼi e Sosue ke natou toe liliu kio natou, neʼe ina tapuakiʼi natou
8 pea neʼe ina ui age kia natou: “Neʼe kotou maʼu ni tuʼuga koloa, ko he faga manu, mo he siliva, mo he aulo, mo he kapa, mo he ukamea pea mo he ʼu mutuʼi meʼa neʼe lahi ʼaupito.+ Kotou toe liliu kio koutou mo te ʼu koloa ʼaia+ ʼo ʼokotou fili pea kotou vaevae mo ʼokotou tehina.”
9 Hili ʼaia, neʼe mavae leva te kau Lupeni, mo te kau Kate pea mo te vaelua ʼo te telepi ʼo Manase mai ʼonatou tehina Iselaele. Neʼe natou mavae mai Silo, ʼi te fenua ʼo Kanaane, ʼo toe liliu ki te potu fenua ʼo Kileate,+ te fenua ʼae neʼe natou maʼu pea mo nonofo ai, ohage pe ko tona fakatotonu e Sehova ʼaki ia Moisese.+
10 ʼI tanatou tau atu ki te ʼu potu fenua ʼo Kanaane ʼae ʼe ovi ki te Solotane, neʼe laga e te kau Lupeni, mo te kau Kate pea mo te vaelua ʼo te telepi ʼo Manase he ʼaletale ʼo ovi ki te Solotane. Neʼe lahi ʼaupito te ʼaletale ʼaia.
11 Ki muli age, neʼe logo ʼonatou tehina Iselaele:+ “Neʼe laga e te kau Lupeni, mo te kau Kate pea mo te vaelua ʼo te telepi ʼo Manase he ʼaletale ʼi te tuʼakoi ʼo Kanaane, ʼi te ʼu potu fenua ʼae ʼe ovi ki te Solotane, ʼi totatou faʼahi.”
12 ʼI tanatou logo ki ai, neʼe fakatahitahi te kau Iselaele fuli ʼi Silo,+ ke natou olo ʼo tauʼi ia natou.
13 Neʼe fekauʼi ai leva e te kau Iselaele ia Fineasi,+ te foha ʼo Eleasale te pelepitelo, ke alu ki te kau Lupeni, mo te kau Kate pea mo te vaelua ʼo te telepi ʼo Manase ʼi te potu fenua ʼo Kileate.
14 Neʼe olo mo ia te ʼu pule ʼe toko hogofulu, neʼe takitahi te famili ʼo te ʼu telepi fuli ʼo Iselaele mo tona pule. Neʼe tahi pule ki tona famili ʼi te toko lauʼi afe ʼo Iselaele.+
15 Neʼe natou tau atu leva ki te potu fenua ʼo Kileate, ʼae ʼe nonofo ai te kau Lupeni, mo te kau Kate pea mo te vaelua ʼo te telepi ʼo Manase. Pea neʼe natou ui age kia natou:
16 “Koʼeni te meʼa ʼae ʼe ui e te hahaʼi katoa ʼa Sehova: ‘He koʼe neʼe kotou heʼe agatonu+ ki te ʼAtua ʼo Iselaele? Neʼe kotou maliu kehe mai ia Sehova, ʼo kotou laga he ʼaletale pea mo agatuʼu kia Sehova.+
17 ʼE mole tou feʼaugaʼia koa te ʼu fua kovi ʼae neʼe tou tau mo ia ʼuhi ko te hala ʼae neʼe tou fai ʼi Peole? ʼI te ʼaho nei, ʼe kei tou maʼuli mamahi pe, logo la neʼe kua tauteaʼi te hahaʼi ʼa Sehova.+
18 Pea ʼe kotou fia maliu kehe koutou mai ia Sehova! Kapau ʼe kotou agatuʼu ʼi te ʼaho nei kia Sehova, pea ʼe ita anai apogipogi ki te kau Iselaele fuli.+
19 Kapau leva ʼe kotou manatu ʼe heʼe maʼa te fenua ʼae ʼe kotou maʼu, pea kotou ʼomai ki te fenua ʼae ʼe maʼu e Sehova,+ ʼae ʼe tuʼu ai te tapenakulo ʼo Sehova,+ ʼo kotou nonofo ai mo matou. Kae ʼaua naʼa kotou agatuʼu kia Sehova pea ʼaua naʼa kotou fakaliliu ia matou ko he hahaʼi agatuʼu ʼuhi ko takotou laga he tahi age ʼaletale kae kua tuʼu te ʼaletale ʼo Sehova, totatou ʼAtua.+
20 ʼI te heʼe agatonu ʼa Akane,+ te foha ʼo Sela, ʼo kaihaʼa te meʼa ʼae neʼe tonu ke pulihi, neʼe mole ita ai koa la te ʼAtua ki te kau Iselaele fuli?+ Neʼe mole ko Akane tokotahi pe ʼae neʼe mate ʼuhi ko tana agahala.’ ”+
21 Pea neʼe tali e te kau Lupeni, mo te kau Kate pea mo te vaelua ʼo te telepi ʼo Manase ki te ʼu pule ʼo te toko lauʼi afe ʼo Iselaele:+
22 “ ʼE iloʼi e Sehova, te ʼAtua ʼo te ʼu ʼatua+ te tupuʼaga ʼo tamatou fai te faʼahi ʼaia. ʼEi, ʼe iloʼi e Sehova, te ʼAtua ʼo te ʼu ʼatua, pea ʼe toe iloʼi foki anai e Iselaele. Kapau neʼe matou agatuʼu, pea kapau neʼe matou heʼe agatonu kia Sehova, pea ke ʼaua naʼa ina haofaki matou ʼi te ʼaho nei.
23 Kapau neʼe matou maliu kehe mai ia Sehova, ʼo laga he ʼaletale ke matou momoli ai ni holokoseta, mo ni molaga meʼa kai pea mo ni sakilifisio ʼo te tokalelei, pea ʼe tauteaʼi anai matou e Sehova.+
24 Kae neʼe matou fai ia te faʼahi ʼaia he neʼe matou feuiʼaki: ‘ ʼE ui anai e ʼokotou foha ki ʼamuli ki ʼomatou foha: “Ko ai ʼae neʼe ina ui atu ʼe feala hakotou atolasio fakatahi mo matou kia Sehova,* te ʼAtua ʼo Iselaele?
25 Neʼe fakatuʼu e Sehova ia te Solotane ko he tuʼakoi ia matou mo koutou, ia te kau Lupeni mo te kau Kate. ʼE mole feala ke kotou kau ki te tauhi ʼae kia Sehova.” Pea ʼe taʼofi anai e ʼokotou foha te atolasio* ʼo ʼomatou foha kia Sehova.’
26 “Koia, neʼe matou ui ai: ‘ ʼE tonu ke tou fai he puleʼaki. Tou laga he ʼaletale, kae mole tou momoli ai ni holokoseta peʼe ko ni sakilifisio,
27 kae ʼe ko he fakamoʼoni ʼaia kia koutou mo matou,+ ʼo feia mo tomatou hologa,* ʼe matou tauhi anai kia Sehova ʼaki tamatou momoli ni holokoseta, mo ni sakilifisio pea mo ni sakilifisio ʼo te tokalelei.+ Neʼe matou fai te faʼahi ʼaia ke mole ui ai e ʼokotou foha ki ʼamuli ki ʼomatou foha: “ ʼE mole feala ke kotou kau ki te tauhi ʼae kia Sehova.” ’
28 Koia, neʼe matou ui ai: ‘Kapau ʼe natou palalau feia mai kia matou mo tomatou hologa ki ʼamuli, pea ʼe matou tali anai: “Kotou sisio ki te ʼaletale ʼaeni neʼe laga e ʼamatou kui ke tatau mo te ʼaletale ʼo Sehova. ʼE mole momoli ai anai ni holokoseta peʼe ko ni sakilifisio, kae ko he fakamoʼoni ia kia koutou mo matou.” ’
29 ʼE mole feala kia matou hamatou agatuʼu kia Sehova pea mo maliu kehe mai ia Sehova,+ ʼo laga he ʼaletale ke momoli ai ni holokoseta, mo ni molaga meʼa kai pea mo ni sakilifisio, kae kua tuʼu te ʼaletale ʼo Sehova totatou ʼAtua, ʼi te muʼa tapenakulo!”+
30 Neʼe fiafia ia Fineasi, te pelepitelo ʼo feia mo te ʼu pule ʼo te hahaʼi, pea mo te ʼu pule ʼo te toko lauʼi afe ʼo Iselaele, ʼi tanatou logo ki te ʼu palalau ʼae neʼe fai e te ʼu hologa ʼo Lupeni, mo Kate pea mo Manase.+
31 Pea neʼe ui e Fineasi, te foha ʼo te pelepitelo ko Eleasale ki te ʼu hologa ʼo Lupeni, mo Kate pea mo Manase: “Kua matou iloʼi ʼi te ʼaho nei, ʼe nofo ia Sehova mo tatou, he neʼe mole kotou heʼe agatonu kia Sehova. Pea ʼe mole tauteaʼi anai tatou e Sehova.”
32 Pea neʼe mavae ia Fineasi, te foha ʼo te pelepitelo ko Eleasale mo te ʼu pule mai te kau Lupeni mo te kau Kate ʼi te potu fenua ʼo Kileate. Neʼe natou toe liliu ki Kanaane, pea neʼe natou fakamatala leva ki te tahi kau Iselaele ia te ʼu meʼa fuli ʼae neʼe hoko.
33 Neʼe fiafia te kau Iselaele ʼi tanatou logo ki te fakamatala ʼaia. Pea neʼe natou vikiʼi leva ia te ʼAtua, ʼo mole natou olo ai ʼo tauʼi te kau Lupeni mo te kau Kate pea mo maumauʼi tonatou fenua.
34 Koia, neʼe foaki ai e te kau Lupeni mo te kau Kate he higoa ki te ʼaletale* ʼaia, koteʼuhi neʼe natou ui: “Ko he fakamoʼoni ia kia tatou ʼe ko Sehova ia te ʼAtua moʼoni.”
Nota
^ ʼE fakaʼuhiga ki te potu esite.
^ Hep. nèphèsh. Vakaʼi Te ʼu Kupu.
^ Hep. “Kotea tona ʼuhiga kia koutou pea mo Sehova.”
^ Hep. “manavasiʼi.”
^ Hep. “ ʼomatou taʼiake.”
^ Neʼe lagi higoa te ʼaletale ko “Fakamoʼoni,” ʼo mulimuli ki te fakamahino ʼae ʼe tuʼu ʼi te vaega ʼaeni.
