Sosue 24:1-33
-
Neʼe fakamatala e Sosue te hisitolia ʼo Iselaele (1-13)
-
Te ʼu fakalotomalohi ke tauhi te hahaʼi kia Sehova (14-24)
-
“Ko au mo toku famili, ʼe matou tauhi anai kia Sehova” (15)
-
-
Neʼe fai e Sosue he fuakava mo Iselaele (25-28)
-
Te mate mo te ʼavaifo ʼo Sosue (29-31)
-
Neʼe tuku te ʼu hui ʼo Sosefo ʼi Sekemi (32)
-
Te mate mo te ʼavaifo ʼo Eleasale (33)
24 Pea neʼe fakatahiʼi leva e Sosue te ʼu telepi fuli ʼo Iselaele ʼi Sekemi, pea neʼe ina pauʼi te kau tagata takitaki ʼo Iselaele, mo te kau pule, mo te kau tuʼi fakamau pea mo te kau tagata taupau.+ Pea neʼe natou tutuʼu ia muʼa ʼo te ʼAtua moʼoni.
2 Neʼe ui e Sosue ki te hahaʼi katoa: “Koʼeni te meʼa ʼae ʼe ui e Sehova, te ʼAtua ʼo Iselaele: ‘ ʼI muʼa atu,+ neʼe maʼuʼuli ʼakotou kui ʼi te tahi faʼahi ʼo te Vai Tafe*+ pea neʼe natou tauhi ki he tahi age ʼu ʼatua.+ Neʼe kau ʼi ʼakotou kui ʼaia ia Tela, te tamai ʼa Apalahamo mo Naole.
3 “ ‘Hili ʼaia, neʼe au fakatotonu ki takotou kui ko Apalahamo+ ke mavae mai te tahi faʼahi ʼo te Vai Tafe, ʼo alu ʼi te fenua katoa ʼo Kanaane, pea neʼe au fakaliliu tona hakoga ʼo kaugamalie.+ Neʼe au foaki age ki ai ia Isaake,+
4 pea neʼe au foaki age kia Isaake ia Sakopo mo Esau.+ Ki muli age, neʼe au foaki kia Esau ia te Moʼuga ʼo Seili.+ Kae neʼe hifo ia Sakopo mo ʼona foha ki Esipito.+
5 Pea ki muli age, neʼe au fekauʼi ia Moisese mo Alone+ ke olo atu, pea neʼe au tauteaʼi ia Esipito ʼaki ni malaʼia,+ pea neʼe au fakamavae leva koutou mai te fenua ʼaia.
6 ʼI taku fakamavae ʼakotou kui mai Esipito+ pea ʼi tanatou kaku ki te tai, neʼe tuli ia natou e te kau Esipito ʼo kaku ki te Tai Kula, ʼaki ʼanatou saliote mo ʼanatou tagata heka hosi.+
7 Pea neʼe pauʼi mai ʼakotou kui kia au ʼaeni ko Sehova.+ Neʼe au fakatuʼu ai he ʼao fakapoʼuli ʼi te vaha ʼo koutou mo te kau Esipito, mo au fakamapeʼe ifo te tai kia natou,+ pea neʼe kotou sisio mata ki te ʼu meʼa ʼae neʼe au fai ʼi Esipito.+ Pea neʼe kotou nonofo leva ʼi te toafa lolotoga ni taʼu.*+
8 “ ‘Neʼe au ʼave koutou ki te fenua ʼo te kau Amole, ʼae neʼe nonofo ʼi te tahi faʼahi* ʼo te Solotane, pea neʼe natou tauʼi koutou.+ Kae neʼe au tuku atu ia natou ki ʼokotou nima ke feala hakotou maʼu tonatou fenua, pea neʼe au fakaʼauha natou ʼi takotou hu ki te fenua.+
9 Pea neʼe tauʼi leva e Palaka, te foha ʼo Tesipoli, te hau ʼo Moape ia Iselaele. Neʼe ina pauʼi ai ia Palaame, te foha ʼo Peoli, ke faitutuku kia koutou.+
10 Kae neʼe mole au fia fakalogo kia Palaame.+ Koia, neʼe ina tapuakiʼi tuʼa lahi ai ia koutou,+ pea neʼe au haofaki koutou mai tona nima.+
11 “ ‘Pea neʼe kotou fakalaka ʼi te Solotane+ pea neʼe kotou tau leva ki Seliko.+ Neʼe tauʼi leva koutou e te kau pule ʼo* Seliko, mo te kau Amole, mo te kau Pelesite, mo te kau Kanaane, mo te kau Heti, mo te kau Kilikasi, mo te kau Hevi pea mo te kau Sepusi. Kae neʼe au tuku atu natou ki ʼokotou nima.+
12 Koia, neʼe kua natou lotovaivai* ʼuhi ko au, ʼi muʼa ʼo takotou tau atu ki ai. Neʼe natou feholaki ai ʼi ʼokotou muʼa,+ ohage pe ko te meʼa ʼae neʼe hoko ki te ʼu hau ʼe lua ʼo te kau Amole. Neʼe mole kotou malo ia natou ʼaki ʼakotou heleta mo ʼakotou nahau.+
13 Koia, neʼe au foaki atu kia koutou he fenua neʼe mole kotou maʼu ʼi te kinakina, pea mo te ʼu kolo ʼae kua kotou nonofo ai, kae neʼe mole kotou laga.+ Pea ʼe kotou kai te ʼu fua ʼo he ʼu fuʼu vite mo he ʼu fuʼu oliveto kae neʼe mole kotou to.’+
14 “Koia, ʼi te temi nei, kotou manavasiʼi kia Sehova pea mo tauhi agatonu kia te ia ʼaki he loto ʼe maʼa.+ Kotou pulihi te ʼu ʼatua ʼae neʼe tauhi ki ai ʼakotou kui ʼi te tahi faʼahi ʼo te Vai Tafe pea mo Esipito,+ kae kotou tauhi kia Sehova.
15 Kae kapau ʼe mole kotou fia tauhi kia Sehova, kotou filifili e koutou totonu ʼi te temi nei pe ko ai ʼae ka kotou tauhi anai ki ai.+ Kotou filifili pe ʼe kotou tauhi ki te ʼu ʼatua ʼae neʼe tauhi ki ai ʼakotou kui ʼi te tahi faʼahi ʼo te Vai Tafe,+ peʼe ko te ʼu ʼatua ʼo te kau Amole ʼi te fenua ʼae ʼe kotou nonofo ai.+ Kae ko au mo toku famili, ʼe matou tauhi anai kia Sehova.”
16 Pea neʼe tali e te hahaʼi: “ ʼE mole feala ke matou liʼaki ia Sehova kae matou tauhi ki he tahi age ʼu ʼatua.
17 ʼE ko Sehova, tomatou ʼAtua ʼae neʼe ina fakamavae matou mo ʼamatou kui mai te fenua ʼo Esipito,+ ʼae neʼe fakapopulaʼi ai matou.*+ Neʼe ina fai ni milakulo* fakaofoofo ʼi ʼomatou muʼa.+ Pea neʼe ina puipui matou ʼi tamatou faifagona pea mai te hahaʼi ʼo te ʼu fenua fuli ʼae neʼe matou fakalaka ai.+
18 Neʼe kapu e Sehova te hahaʼi fuli ʼae neʼe nonofo ʼi muʼa atu ʼi te fenua ʼaeni, pea neʼe kau ai te kau Amole. Koia, ʼe matou toe tauhi anai kia Sehova, he ʼe ko ia tomatou ʼAtua.”
19 Pea neʼe ui e Sosue ki te hahaʼi: “ ʼE mole feala ke kotou tauhi kia Sehova, koteʼuhi ʼe ko he ʼAtua ʼe maʼoniʼoni.+ ʼE ko he ʼAtua ʼe ina fakamaʼua ke pipiki ʼateaina pe kia te ia.+ ʼE mole ina fakamolemole anai ʼakotou lakahala* mo ʼakotou agahala.+
20 Kapau ʼe kotou liʼaki ia Sehova pea kapau ʼe kotou tauhi ki he ʼu ʼatua matapule, ʼe toe fakafeagai anai kia koutou pea ʼe ina fakaʼauha anai ia koutou, tatau aipe pe neʼe ina fai atu he ʼu meʼa ʼe lelei kia koutou ʼi muʼa atu.”+
21 Neʼe tali e te hahaʼi kia Sosue: “ ʼE ko Sehova ia ʼae ʼe matou tauhi anai ki ai!”+
22 Pea neʼe ui e Sosue ki te hahaʼi: “ ʼE kotou fakamoʼoni e koutou totonu takotou filifili faʼitaliha ʼae ke kotou tauhi kia Sehova.”+ Neʼe natou tali age: “ ʼE matou fakamoʼoni ki ai.”
23 “Kapau koia, kotou pulihi te ʼu ʼatua matapule ʼae ʼi te lotolotoiga ʼo koutou, pea kotou pipiki kia Sehova, te ʼAtua ʼo Iselaele ʼaki tokotou loto katoa.”
24 Neʼe tali e te hahaʼi kia Sosue: “ ʼE matou tauhi anai kia Sehova, totatou ʼAtua, pea ʼe matou fakalogo anai kia te ia!”
25 ʼI te ʼaho ʼaia, neʼe fai e Sosue he fuakava mo te hahaʼi ʼi Sekemi pea neʼe ina fakatuʼu he lekula mo he lao.
26 Pea neʼe tohi e Sosue te ʼu folafola ʼaia ki te tohi ʼo te Lao ʼa Te ʼAtua,+ pea neʼe ina toʼo he foʼi maka lahi+ ʼo fakatuʼu ʼi te lalo fuʼu ʼakau lahi ʼae ʼe ovi ki te sagatualio ʼo Sehova.
27 Neʼe toe ui e Sosue ki te hahaʼi katoa: “Koʼeni te foʼi maka ʼae ka liliu ko he fakamoʼoni kia tatou,+ he neʼe logo te foʼi maka ki te ʼu meʼa fuli ʼae neʼe ui mai e Sehova. ʼE liliu anai ko he fakamoʼoni kia koutou, ke mole kotou fakafisi ai ki tokotou ʼAtua.”
28 Hili ʼaia, neʼe tuku e Sosue te hahaʼi ke tahi alu ki te fenua ʼae neʼe ko tona tofiʼa.+
29 Hili te ʼu faʼahi ʼaia, neʼe mate leva ia Sosue, te foha ʼo Nune, te tagata faifekau ʼa Sehova, ʼi tona taʼu 110.+
30 Pea neʼe ʼavaifo ia ia ʼi te fenua ʼae neʼe ko tona tofiʼa, ʼi Timinati-sela,+ ʼi te potu moʼugaʼia ʼo Efalaimi, ʼi te potu noleto ʼo te Moʼuga ʼo Kaasi.
31 Neʼe tauhi ia Iselaele kia Sehova ʼi te temi maʼuli ʼo Sosue pea mo te kau tagata takitaki, ʼae neʼe kei maʼuʼuli ʼi te ʼosi mate ʼa Sosue. Neʼe sisio te kau tagata takitaki ʼaia ki te ʼu gaue fuli ʼae neʼe fai e Sehova maʼa Iselaele.+
32 Ko te ʼu hui ʼo Sosefo,+ ʼae neʼe ʼaumai e te kau Iselaele mai Esipito, neʼe tuku ʼi Sekemi, ʼi te moʼi kele ʼae neʼe totogi e Sakopo ki te ʼu foha ʼo Amole,+ te tamai ʼa Sekemi ʼaki ni foʼi piesi siliva ʼe 100.+ Pea neʼe foaki te moʼi kele ʼaia ki te ʼu foha ʼo Sosefo ko honatou tofiʼa.+
33 Neʼe toe mate foki mo Eleasale, te foha ʼo Alone.+ Neʼe ʼavaifo ia ia ʼi te Kiʼi Moʼuga ʼo Fineasi, tona foha,+ ko he kiʼi moʼuga neʼe foaki kia Fineasi, ʼi te potu moʼugaʼia ʼo Efalaimi.
Nota
^ ʼE fakaʼuhiga ki te Efalate.
^ Hep. “ ʼaho.”
^ ʼE fakaʼuhiga ki te potu esite.
^ Peʼe lagi “e natou ʼae ʼe ʼi ai ʼonatou kele ʼi.”
^ Peʼe lagi “matataku.”
^ Hep. “mai te fenua ʼo Esipito, mai te fale ʼo te kau popula.”
^ Hep. “fakailoga.”
^ Peʼe “takotou agatuʼu.”
