Sosue 3:1-17
-
Neʼe fakalaka ia Iselaele ʼi te Solotane (1-17)
3 Neʼe ʼala uhuuhu leva ia Sosue, pea neʼe mavae mo te kau Iselaele fuli* mai Sitime+ ʼo olo ki te Solotane. Neʼe natou nonofo ai ʼi te poʼuli, ʼi muʼa ʼo tanatou fakalaka ʼi te vai tafe.
2 Hili ʼaho ʼe tolu, neʼe fakalaka te ʼu pule ʼo te hahaʼi+ ʼi te nofoʼaga
3 pea neʼe natou fakatotonu ki te hahaʼi: “Ka kotou sisio anai kua fata e te kau pelepitelo Levite te aleka ʼo te fuakava ʼa Sehova tokotou ʼAtua,+ pea ʼe kotou mavae anai mai te faʼahi ʼae ʼe kotou nonofo ai ʼo mulimuli ai.
4 Kae ʼe tonu anai ke kotou tuku he vaha ia koutou mo te aleka, ʼe teitei fasiga nima 2 000.* ʼAua naʼa kotou fakaovi fau ki te aleka, ke feala ai hakotou iloʼi te ala ʼae ʼe tonu ke kotou fakalaka ai, he neʼe heʼeki kotou olo ʼi te ala ʼaia.”
5 Pea neʼe ui e Sosue ki te hahaʼi: “Kotou fakamaʼa ia koutou,+ koteʼuhi apogipogi, ʼe fai anai e Sehova he ʼu meʼa fakaofoofo ʼi te lotolotoiga ʼo koutou.”+
6 Pea neʼe ui e Sosue ki te kau pelepitelo: “Kotou fata te aleka+ ʼo te fuakava pea kotou olo ʼi muʼa ʼo te hahaʼi.” Neʼe natou fata ai te aleka ʼo te fuakava pea neʼe natou haʼele ai ʼi muʼa.
7 Neʼe ui leva e Sehova kia Sosue: “ ʼI te ʼaho nei, ʼe au fakamaʼuhigaʼi anai koe ia muʼa ʼo Iselaele katoa,+ ke natou iloʼi ai ʼe au nofo anai mo koe+ ohage pe ko taku nofo ʼae mo Moisese.+
8 ʼE ke fai anai te fakatotonu ʼaeni ki te kau pelepitelo ʼae ʼe natou fata te aleka ʼo te fuakava: ‘Ka kotou aʼu ki te kauvai ʼo te Solotane, kotou hihifo ki te vai ʼo tutuʼu ai.’ ”+
9 Pea neʼe ui e Sosue ki te kau Iselaele: “Kotou fakaovi mai pea kotou fakalogo ki te ʼu folafola ʼa Sehova, tokotou ʼAtua.”
10 Neʼe ui leva e Sosue: “ ʼAki te faʼahi ʼaeni, ʼe kotou iloʼi ai anai ʼe nofo te ʼAtua maʼuli ʼi te lotolotoiga ʼo koutou+ pea ʼe ina kapu moʼoni anai mai te fenua ia te kau Kanaane, mo te kau Heti, mo te kau Hevi, mo te kau Pelesite, mo te kau Kilikasi, mo te kau Amole, pea mo te kau Sepusi.+
11 ʼE muʼa anai ia koutou ʼi te Solotane te fata ʼo te aleka ʼo te fuakava ʼa te ʼAliki ʼo te kele katoa.
12 ʼI te lakaga nei, kotou filifili ni tagata ʼe toko 12 ʼi te ʼu telepi ʼo Iselaele, ko he tagata ʼe tahi ʼi te ʼu telepi takitahi.+
13 ʼI te temi ʼae ka lave ai ia te ʼu vaʼe ʼo te kau pelepitelo, ʼae ʼe natou fata te Aleka ʼo Sehova te ʼAliki ʼo te kele katoa, ki te vai ʼo te Solotane, ʼe gata ai anai tona tafe. ʼE tuʼu anai ʼo liliu ohage ko he kaupa.”+
14 Koia, neʼe mavae leva te hahaʼi mai te koga meʼa ʼae neʼe fakatuʼu ai tonatou nofoʼaga. Kae ʼi muʼa ʼo tanatou fakalaka ʼi te Solotane, neʼe olo ʼi muʼa te kau pelepitelo ʼae neʼe natou fata te aleka+ ʼo te fuakava.
15 ʼI te temi pe ʼae neʼe aʼu ai te kau pelepitelo ki te kauvai ʼo te Solotane, pea mo lave ai ʼonatou vaʼe ki te vai (koteʼuhi, ʼe hake te vai ʼo te Solotane+ ʼi te temi katoa ʼo te taʼukai),
16 neʼe gata ai te tafe ʼo te vai ʼi te kolo ko Atama, ʼae ʼe ovi ki Salatani, pea neʼe hage te vai ko he kaupa. Pea neʼe hoko atu pe te tafe ʼo te vai ʼae neʼe toe ki te Tai ʼo Alapa, ia te Tai Kona,* ʼo kaku ki te moamoa ʼo te vai tafe. Neʼe mole kei tafe ai te vai, pea neʼe fakalaka leva te hahaʼi. Neʼe tuʼu te kolo ko Seliko ʼo haga mai kia natou.
17 Neʼe tutuʼu maʼu te kau pelepitelo ʼae neʼe natou fata te aleka ʼo te fuakava ʼa Sehova+ ʼi te lotomalie ʼo te Solotane, ʼi he kele moamoa, kae fakalaka te kau Iselaele fuli.+ Neʼe natou tutuʼu maʼu ai ʼo kaku ki te fakalaka ʼa te puleʼaga katoa ʼi te Solotane, ʼi he kele moamoa.
Nota
^ Hep. “te ʼu foha fuli ʼo Iselaele.”
^ ʼE teitei meta 900. Vakaʼi Te ʼu Fakamahino 2.14.
^ ʼE ko te Tai Mate.
